Cibalo 11

‘Amuzumanane Kuyandaula Bwami Cakusaanguna’

1. (a) Nkaambo nzi Jesu ncaakakulwaizya baswiilizi bakwe kuti basaangune kuyandaula Bwami? (b) Ino mmubuzyo nzi ngotweelede kulibuzya?

IMYAKA iinda ku 1,900 yainda, Jesu mumakani aakwe ku Galileya wakakulwaizya baswiilizi bakwe kuti: “Amusaangune kuyandaula Bwami bwa-Leza abululami bwakwe.” Pele ino nkaambo nzi ncokwakali kuyandika kufwambaana kucita boobo? Sena iciindi cakuti Kristo apegwe nguzu zya Bwami tiicakali myaanda yamyaka minji kumbele? Inzya, pele Bwami bwabu Mesiya mbubwakali kuyooba inzila yalo Jehova mwaakali kuyoosinizya nguzu nzyajisi zyakulela alimwi akuzuzikizya makanzaakwe mapati kujatikizya nyika. Kufwumbwa muntu wakali kuteelelesya mboziyandika zintu eezyo wakali kuyoobikka Bwami mubusena bwakusaanguna mubuumi bwakwe. Ikuti naa eeco cakali masimpe mumwaanda wamyaka wakusaanguna, nkokuti mazubaano cilainda kuyandika mbwaanga lino Kristo wakabikkwa kuba Mwami! Aboobo imubuzyo ngwakuti, Sena buumi bwangu bulatondezya kuti ndili mukuyandaula Bwami bwa Leza cakusaanguna?—Matayo 6:33.

2. Ino nzintu nzi bantu banji nzyobayandaula?

² Imasimpe ngakuti, sunu tuulunzuma twabantu nyika yoonse mbwiizulwa bali mukuyandaula Bwami kusaanguna. Bali mukutondezya lusyomo lwabo kubweendelezi bwa Bwami kwiinda mukubikkila maanu kapati mubuumi bwabo kucita luyando lwa Jehova, mbwaanga bakalyaaba kulinguwe. Kulubazu lumwi, ibanamunji babikkide maano kapati kukuyandaula zintu zyanyika.  Ibantu bayandaula mali, lubono alimwi azyakulikondelezya nzyobakonzya kwiinda mukubelesya mali. Bamwi balabeleka canguzu kutegwa basumpule lwiiyo lwabo. Ibukkale bwabo butondezya mbobalibikkila maanu kapati lwabo beni, izintu zyakumubili alimwi akulikondelezya. Ikuti naa balamusyoma Leza, nkokuti bamubikka mubusena bwabili.—Matayo 6:31, 32.

3. (a) Ino ndubono luli buti Jesu ndwaakakulwaizya basikwiiya bakwe kuti bayandaule, alimwi nkaambo nzi? (b) Nkaambo nzi ncocitayandiki kuciindizya kulibilika kujatikizya zintu zyakumubili?

³ Nokuba boobo, basikwiiya bakwe Jesu wakapa lulayo oolu: “Mutaliyobwedi lubono ansi ano,” mbwaanga kunyina lubono luli boobo lunooliko lyoonse. Pele wakati, “Amuliyobwede lubono kujulu” kwiinda mukubelekela Jehova. Jesu wakakulwaizya basikumutobela bakwe kuzumanana kubamba liso ‘lilulamikidwe’ kwiinda mukubikkila maanu alimwi akubelesya nguzu zyesu kucita kuyanda kwa Leza. Wakabaambila kuti: “Tamukonzyi kubelekela Leza antoomwe alubono.” Pele ino mbuti kujatikizya zintu ziyandika zyakumubili—zyakulya, zyakusama alimwi aŋanda? Jesu wakalaya kuti: “Mutalibiliki.” Wakabaambila kujatikizya tuyuni, ikutondezya mbuli Leza mbwatusanina. Jesu wakakulwaizya basikumutobela bakwe kwiiya maluba-luba—Leza ulaasamika. Sena ibabelesi ba Jehova basongo tabaindi aazintu zyoonse eezyi? Jesu wakati: “Amusaangune kuyandaula Bwami bwa-Leza abululami bwakwe, elyo zintu ezi zyoonse [iziyandika] mulaziyungizizigwa azyalo.” (Matayo 6:19-34) Sena milimo yanu itondezya kuti mbomusyoma oobo?

Mutakasinkili Kasimpe ka Bwami

4. Ikuti muntu kabikkila kapati maano kuzintu zyakumubili, ino ncinzi cikonzya kutobela?

⁴ Ncintu ciluleme kulibilika kujatikizya kujana zintu zyeelede ziyandika zyakumubili zyesu tobeni alimwi azyamukwasyi wesu. Nokuba boobo, ikuti muntu waciindizya kulibilika  kujatikizya zintu zyakumubili, izintu zikonzya kutobela zilakonzya kuba zibyaabi. Nokuba kuti ulakonzya kwaamba kuti ulaa lusyomo mu Bwami, ikuti mumoyo wakwe kabikkide zintu zimwi mubusena bwakusaanguna, ikasimpe ka Bwami kayoosinkililwa. (Matayo 13:18-22) Mucikozyanyo, iciindi cimwi mweendelezi umwi mwana-mwana muvwubi wakabuzya Jesu kuti: “Ino nkacite buti kuti nkajane buumi butamani?” Wakali kulilemeka kabotu akulanganya bamwi munzila mbotu, pele wakalilibilikide kapati kujatikizya lubono lwakumubili ndwaakajisi. Kunyina naakali kukonzya kusiya lubono lwakwe ikutegwa abe sikutobela wa Kristo. Aboobo wakacikaka coolwe cakali kunga camusololela mukuyoobaa Kristo mu Bwami bwakujulu. Aciindi eeco Jesu wakati: “Ha! takuli nkokuyuma kunjila mu-Bwami bwa-Leza kulibaabo bali alubono lunji.”—Marko 10:17-23.

5. (a) Ino nkubaa zintu nzi Paulo nkwaakakulwaizya Timoteo kuti akkutile, alimwi nkaambo nzi? (b) Ino mbuti Saatani mbwabelesya “kuyandisya lubono” kuba kakole kanyonyoona?

⁵ Kakwiindide myaka iili mbwiibede, imwaapostolo Paulo wakalembela Timoteo walo aciindi eeco wakali ku Efeso, imunzi wakasumpukide kapati mumakani aamakwebo. Paulo wakamuyeezya kuti: “Takukwe ncotwakaleta ansi ano nociba ncotukonzya kutolelela nkuko, aboobo kufumbwa twanoojisi cakulya acakulivumba, nciconya eco mbubo ncinji.” Ikubeleka kutegwa muntu ajane “cakulya acakulivumba” cakwe alimwi abamukwasyi wakwe kuli buyo kabotu. Pele Paulo wakacenjezya kuti: “Abo bayandisya kuvuba balawida mukutepaulwa amukuteegwa amuzisusi zibi zinji zyabufubafuba zibisizya buumi akubbizya bantu mukunyonyauka amukusweeka.” Saatani mumpelenge. Kumatalikilo ulakonzya koongelezya muntu mutuntu tusyoonto-syoonto. Kuzwawaawo ulakonzya kumusinikizya kapati, ambweni kumupa coolwe cakusumpulwa amulimo naa kumupa mulimo mubotu uuvwolwa mali  manji pele uuyanda ciindi cakabikkidwe ambali kucita zintu zyakumuuya. Ccita kuti katupakamene, “kuyandisya lubono” kulakonzya kusinkilila zintu ziyandika kapati zijatikizya Bwami. Paulo wakacaamba boobu: “Nkaambo kakuluyandisya bamwi ncobaleela kulusyomo, elyo zyabajaya insoni zinjizinji.”—1 Timoteo 6:7-10.

6. (a) Ikutegwa tutacegwi mukooze kakuyandisya zintu zyakumubili, ncinzi ncotweelede kucita? (b) Ino ndusyomo nzi ndotukonzya kubaandulo noliba leelyo izintu munyika sunu nozikatazya kujana?

⁶ Kajisi luyando lwini-lwini kumunyina Munakristo, Paulo wakayumya-yumya Timoteo kuti: “Kozicija zintu ezi zili boobu” alimwi akuti “Yasana lumamba lubotu lwalusyomo.” (1 Timoteo 6:11, 12) Ikusoleka canguzu kulayandika ikutegwa tutayungwi abukkale bwanyika iituzingulukide bwakuyandisya zintu zyakumubili. Pele, ikuti twakakatila kucita kweelanaa lusyomo lwesu, Jehova kunyina nayootulekelezya pe. Tacikwe makani amyuulo iiyabuya atala alimwi akubula milimo kuvwulide kapati, Leza uyoobona kuti tulijisi eezyo nzyotuyandika ncobeni. Paulo wakalemba kuti: “Buumi bwanu butabi bwakuyanda mali, pe, mutabi basyaacivulemwangu, nkaambo Leza wakati, Nsikwe nenti kamulekelezye nokuba kuyoomuleka buyo pe, pe. Boobo ncotulisyomaisya kuti, Jehova ngomuvuni wangu, takukwe encenjoowa. Nobaba bantu ino bandicite buti?” (Ba-Hebrayo 13:5, 6) Alimwi Mwami Davida wakalemba kuti: “Ndakali mulombe, sunu ndakomena, pele nsina bona uululeme uusiidwe, nanka lunyungu lwakwe lukumbila insima.”—Intembauzyo 37:25.

Basikwiiya Bakusaanguna Bapa Citondezyo

7. Ino mmalailile aali buti aajatikizya kukambauka Jesu ngaakapa basikwiiya bakwe, alimwi nkaambo nzi ncaakeelede?

⁷ Jesu naakamana kupa baapostolo bakwe lwiiyo lweelede, wakabatuma mu Israyeli kuyookambauka makani mabotu alimwi akwaambilizya kuti: “Bwami bwakujulu buliswenede.”  Elo kaka wakali kukondelezya mulumbe ooyu! Jesu Kristo, Mwami wabu Mesiya wakali akati kabo. Mbwaanga baapostolo bakalilyaabide kucita mulimo wa Leza, Jesu wakabakulwaizya kubaa lusyomo kuti Leza uyakubalanganya. Aboobo wakaamba kuti: “Mutabwezi cintu calweendo, nuuba musako, niiba nkomo, nebuba bulilu, naaba mali, alimwi mutabi ezibaki zyobile. Kufwumbwa ŋanda njomuti kanjile, mukakale mumonya omo mane mukainke.” (Matayo 10:5-10; Luka 9:1-6) Jehova wakali kunoobona kuti zyoonse nzyobakali kuyandika zyapegwa kulimbabo abana Israyelinyina, aabo balo bakajisi cilengwa cakusamausya beenzu.

8. (a) Kakusyeede ciindi cisyoonto kuti afwe, nkaambo nzi Jesu ncaakapa malailile mapya kujatikizya mulimo wakukambauka? (b) Ino ncinzi cakeelede kutolelela kuba mubusena bwakusaanguna mubuumi bwabasikutobela Jesu?

⁸ Kumbele, kakusyeede ciindi cisyoonto kuti afwe, Jesu wakabacenjezya baapostolo bakwe kuti kumazuba aazya kumbele bakali kuyoobeleka mubukkale bwiimpene. Akaambo kakukazyigwa abeendelezi kujatikizya mulimo wabo, talili lyoonse kusamausya nokwakali kuyootondezegwa kulimbabo mu Israyeli. Alimwi bakali kunootalika kutola mulumbe wa Bwami kumanyikaa Bamasi. Lino bakeelede kubwezelezya “zikwama enkomo.” Nokuba boobo, bakeelede kuzumanana kuyandaula Bwami bwa Jehova kusaanguna alimwi abululami bwakwe, kabasyomede kuti Leza wakali kuyooyilongezya milimo yabo yakujana cakulya acakulivwumba.—Luka 22:35-37.

9. Ino mbuti Paulo mbwaakabikka Bwami mubusena bwakusaanguna mubuumi bwakwe kumwi kaliyandawida zintu zyakumubili, alimwi ndulayo nzi ndwaakapa kujatikizya makani aaya?

⁹ Imwaapostolo Paulo wakali citondezyo cibotu camuntu wakatobela lulayo lwa Jesu. Paulo mulimo wakaucita kuba cintu cipati mubuumi bwakwe. (Incito 20:24, 25) Iciindi naakali kuunka kuyookambauka kubusena bumwi, wakali kulilangawida izintu zyakumubili nzyaakali  kuyanda nokuba kubeleka kali sikusuma matente. Tanaakali kulangila kubantu bambi kuti bamusanine pe. (Incito 18:1-4; 1 Ba-Tesalonika 2:9) Nokuba boobo, wakali kukkomana kusamausyigwa alimwi akulumba kapati kuzipego nzyaakali kupegwa iciindi bamwi nobakali kutondezya luyando lwabo munzila eeyi. (Incito 16:15, 34; Ba-Filipi 4:15-17) Paulo wakakulwaizya Banakristo kutaleka kubikkila maano kumikuli yabo yamumukwasyi ikutegwa kabakambauka, pele muciindi caboobo kuti kabaibeleka munzila yeelede mikuli yabo iisiyene-siyene. Wakabalailila kuti kababeleka, kabayanda mikwasyi yabo alimwi akwaabana abambi zintu. (Ba-Efeso 4:28; 2 Ba-Tesalonika 3:7-12) Wakabakulwaizya kusyoma muli Leza, ikutali mumbono zyakumubili alimwi akupona munzila yakali kutondezya kuti mmasimpe bakali kuziteelelesya mbozibede zintu ziyandika kapati. Kweelanaa kuyiisya kwa Jesu, eeco cakali kwaamba kusaanguna kuyandaula Bwami bwa Leza abululami bwakwe.—Ba-Filipi 1:9-11.

Amuzumanane Kubikka Bwami Mubusena Bwakusaanguna Mubuumi Bwanu

10. Ino caamba nzi kusaanguna kuyandaula Bwami?

¹⁰ Ino ncinji buti ciindi ncotutola mukwaabila bamwi makani mabotu a Bwami? Eeco ciya buyo mbuli bukkale bwesu mbobubede alimwi aluyando ndotujisi. Kamuyeeya kuti Jesu tanaakaamba kuti, ‘Amuyandaule Bwami iciindi nomutajisi cintu cimbi cakucita.’ Kazyi mbobwakali kuyandika Bwami, Jesu wakatondezya kuyanda kwa Wisi kaamba kuti: ‘Amuzumanane kuyandaula bwami bwa-Leza cakusaanguna.’ (Luka 12:31) Nokuba kuti ibunji bwesu tweelede kubeleka ikutegwa tulanganye nzyotuyandika alimwi amikwasyi yesu, ikuti katujisi lusyomo, bukkale bwesu bunooyeeme aamulimo wa Bwami walo Leza ngwatupede. Aciindi nciconya, tuyoobikkila maanu kukulanganya mikuli yesu yamukwasyi.—1 Timoteo 5:8.

11. (a) Ino ncikozyanyo nzi ncaakapa Jesu ikutondezya kuti tabali boonse ibayoocita milimo yeelene mukumwaya mulumbe wa Bwami? (b) Ino nzintu nzi zijatikizyidwe izyeendelezya ciindi ncotumanina mumulimo?

 ¹¹ Tobamwi tulakonzya kutola ciindi cilamfwu kukambauka makani mabotu aa Bwami kwiinda bamwi. Pele mucikozyanyo cakwe cijatikizya bulongo busiyene-siyene, Jesu wakatondezya kuti boonse balaa myoyo iili mbuli bulongo bubotu bayoozyala micelo. Baya kuzyala micelo minji buti? Ibukkale bwabantu buliindene. Kuli kukomena, kuciswa-ciswa alimwi amikuli yamumikwasyi. Pele ciindi bantu nobatondezya luyandisyo lwini-lwini, balakonzya kuzwidilila mumulimo ooyu.—Matayo 13:23.

12. Ino nimbaakani nzi yakumuuya iiyandika kapati njobeelede kulanga-langa bakubusi?

¹² Cilayandika kubaa mbaakani izikonzya kutugwasya kuyungizya ciindi ncotutola mumulimo wa Bwami. Ibana beelede kutelaika kapati kujatikizya citondezyo cibotu camwana musungu Munakristo Timoteo. (Ba-Filipi 2:19-22) Ino ncinzi cikonzya kubabotela kapati kwiinda kunjila mumulimo waciindi coonse ciindi nobamanizya lwiiyo lwabo lwakumubili? Abalo bapati balakonzya kugwasyigwa kwiinda mukulibikkila mbaakani zyeelede zyakumuuya.

13. (a) Ino nguni uusala nzyotukonzya kucita mumulimo wa Bwami? (b) Ikuti katuyandaula Bwami kusaanguna, ncinzi ncotusinizya?

 ¹³ Muciindi cakutongooka baabo mbotuyeeyela kuti inga bacita kabotu kwiinda, lusyomo lweelede kutukulwaizya kuyaambele kutegwa tubelekele Leza cakumaninina kusikila mpotukonzya kweelanaa bukkale bwesu. (Ba-Roma 14:10-12; Ba-Galatiya 6:4, 5) Kweelanaa mbokutondezyedwe mumakani aa Jobu, Saatani utaminina kuti nzyotuyandisisya kapati ndubono lwakumubili, kuliiba, kupona kabotu alimwi akuti tubelekela Leza akaambo buyo kabulyatu. Pele ikuti katuyandaula Bwami kusaanguna, tuli mukutola lubazu mukusinizya kuti Diabolosi mmubeji mwini-mwini. Tuli mukupa bumboni bwakuti ncotubikkide mubusena bwakusaanguna mubuumi bwesu mmulimo wa Leza. Aboobo kwiinda muzintu nzyotwaamba alimwi akucita, tusinizya luyando lwini-lwini ndotujisi kuli Jehova, ikukakatila kubweendelezi bwakwe cakusyomeka alimwi aluyando ndotujisi kubantuma.—Jobu 1:9-11; 2:4, 5; Tusimpi 27:11.

14. (a) Ino nkaambo nzi mulongo wazyakucita kujatikizya mulimo wamumuunda ncouyandika? (b) Ino mbuti Bakamboni banji mbobali mukutola lubazu mumulimo wamumuunda?

¹⁴ Imulongo wazintu zyakucita ulakonzya kutugwasya kuzuzikizya zintu zinji kwiinda nzyotukonzya kucita kuti katutaujisi. Jehova kumugama “wakabika ciindi” cakucita makanzaakwe. (Kulonga 9:5; Marko 1:15) Ikuti kacikonzyeka, cili kabotu kutola lubazu aciindi comwe cibikkidwe naa kwiindawaawo nsondo ansondo mumulimo wamumuunda. Myaanda-myaanda yazyuulu zya Bakamboni ba Jehova anyika yoonse mboizulwa bakalilembya kubeleka kabali bapainiya bakugwasyilizya, aabo balo batola maola obile abuzuba mukukambauka makani mabotu. Ibamwi ibali myaanda-myaanda yazyuulu balabeleka kabali bapainiya baciindi coonse, balo batola maola obile acisela abuzuba  kukambauka mulumbe wa Bwami. Ibapainiya baalubazu alimwi abamisyinali balatola ciindi cinji kwiinda waawo mumulimo wa Bwami. Aswebo tulakonzya kujana zyoolwe zyakwaabila bulangizi bwa Bwami kumuntu uuli woonse uukonzya kuswiilila kwiinda mukwiizya. (Johane 4:7-15) Tweelede kubaa makanze aakuyanda kutola lubazu cakumaninina mumulimo ooyo kusikila mpotukonzya, kweelanaa bukkale bwesu, nkaambo Jesu wakasinsima kuti: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”—Matayo 24:14; Ba-Efeso 5:15-17.

15. Kujatikizya mulimo wesu, ino nkaambo nzi ncomusyoma kuti lulayo luli kubbuku lya 1 Ba-Korinto 15:58 luleelede?

¹⁵ Cikkomanisya ncakuti, munyika yoonse kufwumbwa naa bakkala mucisi nzi, Bakamboni ba Jehova bali mukutola lubazu mumulimo ooyu wakukambauka. Balalutobela lulayo lwakasololelwaa Leza mu Bbaibbele lwaamba kuti: “Amukakatile, mutazungaani. Amupangike myoyo yanu lyoonse kumilimo ya-Mwami, nkaambo mulizi kuti milimo yanu yamu-Mwami tiikonzyi kuba yabuyo pe.”—1 Ba-Korinto 15:58.

Mubandi Wakwiinduluka

• Iciindi Jesu naakati ‘amuzumanane kuyandaula Bwami cakusaanguna,’ ncinzi ncaakali kutondezya kuti nceceelede kubikkwa mubusena bwabili?

• Ino nkuzilanga munzila nzi zintu nkotweelede kubaankuko kujatikizya kulanganya nzyotuyandika munzila yakumubili alimwi aziyandika mikwasyi yesu? Ino ndugwasyo luli buti Leza ndwayootupa?

• Muuzibeela izili zyamulimo wa Bwami motukonzya kutola lubazu?

[Mibuzyo yaciiyo]

[Cifwanikiso icili apeeji 107]

Mumasi oonse, Bakamboni ba Jehova sunu bali mukukambauka makani mabotu, imamanino naatanasika