Ibwami “Butakooyoonyonyoonwa”
Cibalo 10
Ibwami “Butakooyoonyonyoonwa”
1. Ino nkaambo nzi ikasinizigwa kwiinda muzintu izicitika munyika ikuzwa kaindi mubukkale bwabantu?
IZINTU zicitika munyika buzubaa buzuba zisinizya kuti bantu tiibalujana lukkomano kwiinda mukukaka bweendelezi bwa Jehova akusola kulyeendelezya lwabo beni. Kunyina noiba yomwe mfwulumende yabantu yaleta bubotu kubantu boonse. Nokuba kuti bantu basumpuka kapati muluzibo lwasayaansi munzila iitanabwenwe, kunyina nobakonzya kulesya kuciswa naa kumanizya lufwu nokuba kumuntu omwe buyo. Ibulelo bwabantu kunyina nobwagwisya inkondo, lunya, milandu, lweeno naa bucete. Imfwulumende zidyaaminina zicizumanana kweendelezya bantu mumasi manji. (Mukambausi 8:9) Imulimo wabusyaabusongo, bulyato alimwi akubula luzibo nzyezintu zisofwaazya nyika, maanzi alimwi amuuya ngotuyoya. Akaambo kakuti beendelezi tabalubelesyi kabotu lubono lwazisi, ibantu banji cilabayumina kujana zintu ziyandika mubuumi. Izyuulu-zyuulu zyamyaka zyabulelo bwabantu zyasinizya caantangalala kululama kwakaambo aaka kakuti: “Muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe.”—Jeremiya 10:23.
2. Ino ncinzi cilikke icikonzya kumanizya mapenzi aabantu?
2 Ino ncinzi ciyoomanizya mapenzi? Mbwami bwa Leza, oobo Jesu mbwaakalailila basikumutobela bakwe kupailila kuti: “Abuze Bwami bwako, alucitwe luyando lwako, ansi ano mbubonya mbuli kujulu.” (Matayo 6:9, 10) Kulugwalo lwa 2 Petro 3:13, Bwami bwa Leza bwakujulu bupandulwidwe kuti “ijulu ipya” lyalo iliyooyendelezya “nyika impya,” nkokuti ciinga cabantu baluleme. Bulayandika kapati Bwami bwa Leza bwakujulu cakuti Jesu wakabucita kuba ngomutwe wamakani mubukambausi bwakwe. (Matayo 4:17) Wakatondezya mbotweelede kububikkila kapati maano mubuumi bwesu, kakulwaizya kuti: “Amusaangune kuyandaula Bwami bwa-Leza abululami bwakwe.”—Matayo 6:33.
3. Ino nkaambo nzi kwiiya kujatikizya Bwami bwa Leza lino ncokweelede kucitwa cakufwambaana?
3 Ikwiiya kujatikizya Bwami bwa Leza kulayandika kucitwa cakufwambaana nkaambo ino-ino Bwami oobo buyoobweza ntaamu akucinca bulelo bwaanyika iino mane kukabe kutamani. Ilugwalo lwa Daniele 2:44 lwakasinsima kuti: “Mumazuba aabaami abo [imfwulumende zili mukweendelezya lino], Leza wakujulu uyoobusya bwami [kujulu] butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi [bantu kunyina nobayooyendelezya nyika alimwi]. Obo bwami buyoopwayaula akumanisya mami aya oonse [aliko lino], alimwi bwalo buyooima nji kukabe kutamani.” Aboobo, Bwami bwa Leza buyoomaninzya mazuba aaya aamamanino kwiinda mukunyonyoona bweende bwazintu oobu bubyaabi boonse. Mpoonya bweendelezi bwa Bwami bwakujulu aanyika kunyina nobuyookazyigwa pe. Elo kaka cileelede kutukkomanisya kuti ikukatalukwa kuyooba akaambo kaceeci kuli afwaafwi kapati!
4. Ikujatikizya Bwami, ino ncinzi cakacitika kujulu mu 1914, alimwi nkaambo nzi eeco ncociyandika kulindiswe?
4 Mu 1914, Kristo Jesu wakabikkwa kuba Mwami alimwi wakapegwa nguzu zyakuba ‘mweendelezi akati kabasinkondonyina.’ (Intembauzyo 110:1, 2) Alimwi mumwaka nguwenya ooyo, “mazuba aakumamanino” aabweende bwazintu oobu bubyaabi akatalika. (2 Timoteo 3:1-5, 13) Aciindi ncimunya eeci, izintu Daniele nzyaakabona mucilengaano cabusinsimi zyakacitika ncobeni kujulu. Jehova Leza “Sinsiku,” wakapa Mwanaa muntu, Jesu Kristo “bweendelezi abulemu abwami, kuti bantu bazisi zyoonse abamisyobo yoonse abamyaambo yoonse bamumanine milimo.” Naakali kwaamba nzyaakabona mucilengaano, Daniele wakalemba kuti: “Bweendelezi bwakwe mbweendelezi butamani butakonzyi kweela, abwami bwakwe tabukonzyi kunyonyoonwa.” (Daniele 7:13, 14) Nkwiinda mu Bwami oobu bwakujulu buli mumaanzaa Kristo Jesu mwalo Leza mwayoopa kuti cikonzyeke kulibaabo bayanda bululami kukkomana azintu zibotu zinji nzyaakakanzide ciindi naakabikka bazyali besu bakusaanguna mu Paradaiso.
5. Ino mmakani nzi aajatikizya Bwami aayandika kapati kulindiswe, alimwi nkaambo nzi?
5 Sena mulombozya kuba bantu basyomeka ibayoolelwa mu Bwami oobo? Ikuti kakuli boobo, mulakonzya kuyandisisya kuziba mboibambidwe alimwi amboibeleka mfwulumende eeyi yakujulu. Muyanda kuziba ncoili mukucita lino, ncoiyoocita kumbele alimwi ancoiyanda kuti mucite. Mbomuyaabuzumanana kubulanga-langa Bwami, ikulumba kwanu kujatikizya mbubo kunakuya ambele. Ikuti mwabikkila maano kubweendelezi bwanjiyo, muyooba bantu balibambilide kwaambila bambi kujatikizya zintu zibotu Bwami bwa Leza nzyobuyoocitila bantu bamumvwida.—Intembauzyo 48:12, 13.
Ibeendelezi ba Bwami bwa Leza
6. (a) Ino Magwalo nguni ngwaatondezya kuti nguujisi bweendelezi butondezyedwe mu Bwami bwabu Mesiya? (b) Ino mbuti mbotweelede kujatikizyigwa azintu nzyotwiiya zya Bwami?
6 Cimwi akati kazintu zitaanzi ncotujana kwiinda mukulanga-langa kuli boobo ncakuti, Bwami oobo bwabu Mesiya ncitondezyo cabulelo bwa Jehova kumugama. Jehova lwakwe nguwakapa Mwanaakwe “bweendelezi abulemu abwami.” Imwanaa Leza naakapegwa nguzu zyakutalika kulela kali Mwami, cakweelela kwakamvwugwa jwi pati kuzwa kujulu lyaambilizya kuti: “Bwami bwaansi bwaba bwa-Mwami wesu [Jehova Leza] abwa-Kristo wakwe, nkabela [Jehova] uyooendelezya lyoonse mane kukabe kutamani.” (Ciyubunuzyo 11:15) Aboobo zyoonse nzyotukonzya kwiiya kujatikizya Bwami oobu alimwi anzyobuli mukucita kulakonzya kuyaka bulongwe bwesu bubotu a Jehova. Eezyo nzyotwiiya zyeelede kutukulwaizya kuba bantu balibombya kubweendelezi bwakwe mane kukabe kutamani.
7. Nkaambo nzi ncocikondelezya kulindiswe kuti Jesu Kristo ngo Muleli Wabili wa Jehova?
7 Alimwi amubone kuti Jehova wabikka Jesu Kristo acuuno cabwami kuba Muleli Wabili. Mbwali Mubelesi Mupati walo Leza ngwaakabelesya mukulenga nyika alimwi abantu, Jesu ulizizyi kabotu nzyotuyandika kwiinda mbotuzizi. Kunze lyaboobo, kuzwa bantu nibakalengwa, watondezya ‘luyando ndwajisi kubana ba-Adamu.’ (Tusimpi 8:30, 31; Ba-Kolose 1:15-17) Ulabayandisya kapati bantu cakuti wakaboola anyika akupa buumi bwakwe kuba cinunuzyo kulindiswe. (Johane 3:16) Aboobo wakatujulila inzila yakwaangululwa kucibi alufwu alimwi akutupa coolwe cakubaa buumi butamani.—Matayo 20:28.
8. (a) Mukwiimpanaa bulelo bwabantu, nkaambo nzi mfulumende ya Leza ncoinooliko lyoonse? (b) Ino nkweendelana kuli buti kuliko akati “[ka]muzike musyomesi uucenjede” alimwi amfwulumende yakujulu?
8 Ibwami bwa Leza nimfwulumende iinooliko lyoonse. Ikubako kwanjiyo lyoonse kulasinizyigwa akaambo kakuti Jehova kumugama tafwi pe. (Habakuku 1:12) Mukwiimpana abaleli bantunsi, Jesu Kristo walo Leza ngwabikkide kuba mwami awalo mbubona tafwi pe. (Ba-Roma 6:9; 1 Timoteo 6:15, 16) Ibambi banoobelekelaamwi a Kristo muzyuuno zyabwami zyakujulu bali 144,000, balo bali mbabelesi ba Leza basyomeka kuzwa “[ku]misyobo yoonse amilaka yoonse amikowa yoonse, azisi zyoonse.” Abalo aaba balapegwa buumi butamani. (Ciyubunuzyo 5:9, 10; 14:1-4; 1 Ba-Korinto 15:42-44, 53) Ibanabunji akati kabo bali kale kujulu alimwi ibasyeede anyika mbabali mucibeela ca “muzike musyomesi uucenjede” wamazubaano walo cakusyomeka uuli mukutolaambele makani aajatikizya Bwami oobo aano anyika.—Matayo 24:45-47.
9, 10. (a) Ino mbukkale buli buti buleta lwaandaano alimwi ibunyonyoona buyoogwisigwa a Bwami? (b) Ikuti katutayandi kuba basinkondonyinaa Bwami bwa Leza, ino mmicito nzi njotweelede kulilesya?
9 Lino-lino aciindi ncabikkide, Jehova uyootuma basikalumamba bakwe basikunyonyoona kutegwa basalazye nyika. Bayoobanyonyooda limwi bantu aabo ibakaka caali kulibombya kubweendelezi bakwe alimwi ibasampaula ibubambe bwaluyando mbwapa kwiinda muli Jesu Kristo. (2 Ba-Tesalonika 1:6-9) Oobo bunooli buzuba bwa Jehova, iciindi cali kulindilwa kuzwa kaindi cakusinizya kuti ngo Mwami Wakujulu Aansi. “Amubone! Buzuba bwa-Jehova buleza. Mbuzuba buyumu, bulijisi lunyemo abukali bunji. . . . [Ku]kunyonyoona basizibi bali mulinjiyo.” (Isaya 13:9) “Buzuba obo mbuzuba bwabukali, mbuzuba bwamapenzi abwamafwabi, mbuzuba bwalupyopyongano abwalupilingano, mbuzuba bwamudima abwakusiya, mbuzuba bwamayoba busiya mbi.”—Zefaniya 1:15.
10 Ibukombi bwakubeja boonse alimwi amfwulumende zyabantu abasikalumamba babo, balo bali kweendelezyegwaa muleli mubi uutalibonyi wanyika eeyi, bayoonyonyoodwa limwi. Boonse aabo bayanzanaa nyika eeyi kwiinda mukusumpula muuya wakulicitila zintu, ikutasyomeka, akupona buumi bwamavwunze bayoonyonyoonwa. Saatani amadaimonaakwe bayoolesyegwa kuyunga bantu munyika, bayooangwa kwamyaka iili cuulu. Mpoonya Bwami bwa Leza buyooyendelezya nyika yoonse mboizulwa. Elo kaka bayookatalukwa aabo boonse bayanda bululami!—Ciyubunuzyo 18:21, 24; 19:11-16, 19-21; 20:1, 2.
Imakanze a Bwami—Mbwaayoozuzikizyigwa
11. (a) Ino mbuti Bwami bwabu Mesiya mbobuyoozuzikizya makanze aa Jehova kujatikizya nyika? (b) Ino bulelo bwa Bwami buya kuleta nzi kubantu bayoopona munyika kuciindi eeco?
11 Ibwami bwabu Mesiya buyoozuzikizya makanze aa Leza aakusaanguna kujatikizya nyika. (Matalikilo 1:28; 2:8, 9, 15) Ikusikila sunu, ibantu baalilwa kwaazuzikizya makanze aayo. Nokuba boobo, “inyika eyo iiciza” iyooyendelezyegwaa Mwanaa muntu, Jesu Kristo. Boonse ibayoofwutuka lunyonyooko lwa Jehova kuzwa kubweende bwazintu oobu bubyaabi bayoobeleka calukamantano mubulelo bwa Mwami Kristo alimwi cakukkomana bayoocita kufwumbwa ncayoolailila kutegwa nyika yoonse mboizulwa ibe paradaiso. (Ba-Hebrayo 2:5-9) Bantu boonse bayookkomana amilimo njobayookutauka alimwi bayoogwasyigwa kapati azintu zinji ziyoozwa munyika.—Intembauzyo 72:1, 7, 8, 16-19; Isaya 65:21, 22.
12. Ino mbuti kulondoka munzila yakumizeezo alimwi akumubili mbokuyooletwa kubantu bayoolelwaa Bwami?
12 Nobakalengwa ba Adamu a Eva bakali londokede alimwi akali makanze aa Leza kuti nyika ikazule bana babo, boonse kabalondokede mumizeezo alimwi aamubili. Makanze aayo ayoocitika ncobeni munzila iikondelezya mubulelo bwa Bwami. Kutegwa eeci cikacitike, zintu zyoonse ziboola akaambo kacibi zyeelede kugusyigwa alimwi akaambo kaceeci, Kristo ulabeleka kali Mwami alimwi a Mupaizi Mupati. Cakukkazika moyo, uyoobagwasya balelwa bakwe bamumvwida kutegwa bagwasyigwe ampindu yakumanya zibi yacipaizyo cabuumi bwakwe bwabuntunsi.
13. Ino nkuponesyegwa kuli buti kuyoocitika munzila yakumubili mubulelo bwa Bwami?
13 Mubulelo bwa Bwami, aabo bayookkala munyika bayoogwasyigwa kapati munzila yakumubili. “Lino meso aaboofu ayoobononona, amatwi aabasinke ayoosinkuka. Cilema unooya busotauka mbuli insya, alulimi lwasyataambi luyooimbisya.” (Isaya 35:5, 6) Imubili uunyanide- nyanide akaambo kakucembaala naa kuciswa uyakuteteeta kwiinda wooyo wamwana alimwi abaciswa-ciswa bayooyuma akubaa buumi buli kabotu. “Lino inyama yakwe ilaba impya kwiinda yamwana, inguzu zyabulombe bwakwe [zi]lajoka.” (Jobu 33:25) Ibuzuba buyoosika nokutakooyooba waamba kuti, “Ndaciswa.” Ino nkaambo nzi? Nkaambo kakuti ibantu bayoowa Leza bayooangululwa kumukuli wacibi alimwi azintu zibyaabi ziboola akaambo kancico. (Isaya 33:24; Luka 13:11-13) Inzya, Leza “uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:4.
14. Ino kuba bantu balondokede kubikkilizya nzi?
14 Nokuba boobo, kulondoka kujatikizya zintu zinji ikutali buyo kubaa mibili alimwi amizeezo iili kabotu. Kulabikkilizya akutondezya kabotu-kabotu ibube bwa Jehova, mbwaanga twakalengwa ‘mucikonzya ca Leza, mbubonya mbulinguwe.’ (Matalikilo 1:26) Ikutegwa eeco cikonzyeke, kuyooyandika ilwiiyo lunji. Munyika mpya “momu[yoo]kala bululami.” Aboobo mbubwenya mbuli Isaya mbwaakasinsima, “bantu baluwa balaiya bululami.” (2 Petro 3:13; Isaya 26:9) Ibube oobu bupa kuti kube luumuno akati kabantu bamisyobo yoonse, akati kabalongwe, mumukwasyi alimwi kwiinda zyoonse a Leza mwini buya kumugama. (Intembauzyo 85:10-13; Isaya 32:17) Aabo ibayiya bululami bayoozumanana kuyiisyigwa kujatikizya Leza nzyayanda kulimbabo. Mbobayaabuzumanana kuyandisya Jehova, baya kuzitobela anzila zyakwe mubuumi bwabo boonse. Bayooamba mbubonya mbwaakaamba Jesu kuti: ‘Lyoonse ndacita zintu izimubotela Taata.’ (Johane 8:29) Elo kaka bunookkomanisya buumi caakucitika eeco kubantu boonse!
Imilimo Yazuzikizyigwa Kale
15. Kwiinda mukubelesya mibuzyo iili mumuncali ooyu, amwaambe milimo yazuzikizyigwaa Bwami alimwi ancotweelede kuti katuli mukucita lino.
15 Imilimo mibotu yazuzikizyigwaa Bwami bwa Leza alimwi abalelwa bambubo ilalibonya. Imibuzyo iitobela alimwi amagwalo zilamuyeezya milimo imwi yazuzikizyigwa, alimwi azintu balelwa ba Bwami boonse nzyobakonzya kucita alimwi nzyobeelede kuti kabali mukucita lino.
Ino nkuuli bani Bwami nkobwakasaanguna kubeleka, alimwi ncinzi cakatobela? (Ciyubunuzyo 12:7-10, 12)
Ikuzwa ciindi Kristo naakapegwa Bwami, ino ninkamu iili njaakali kubunganya? (Ciyubunuzyo 14:1-3)
Kweelanaa mbokulembedwe kubbuku lya Matayo 25:31-33, ino mmulimo nzi Jesu ngwaakasinsima kuti uyoocitwa aakumana mapenzi mapati?
Ino mmulimo nzi wamatalikilo uuli mukucitwa lino? Mbaani bali mukutola lubazu mulinguwo? (Intembauzyo 110:3; Matayo 24:14; Ciyubunuzyo 14:6, 7)
Ino nkaambo nzi basitwaambo twacisi alimwi abasizikombelo basikukazya ncobaalilwa kulesya mulimo ooyu wakukambauka? (Zekariya 4:6; Incito 5:38, 39)
Nkucinca kuli buti kwacitika mubuumi bwabaabo ibalibombya kubulelo bwa Bwami? (Isaya 2:4; 1 Ba-Korinto 6:9-11)
Bwami Bwamyaka Iili Cuulu
16. (a) Ino Kristo uyoolela kwaciindi cilamfwu buti? (b) Nzintu nzi zikondelezya ziyoocitwa kuciindi eeco alimwi acaakwiinda?
16 Saatani amadaimonaakwe baakusowelwa mumulindi uutagoli, Jesu Kristo abasikulelanyina ibali 144,000 bayoolela kabali bami alimwi abapaizi kwamyaaka iili cuulu. (Ciyubunuzyo 20:6) Cakwiinda ciindi eeco, ibantu banoolondokede alimwi cibi alufwu lwaaletwa Adamu ziyoogwisyigwa mane kukabe kutamani. Bwaakumana Bulelo bwa Myaka iili Cuulu, kazwidilide kabotu mukucita mulimo wakwe kali Mwami alimwi a Mupaizi wabu Mesiya, Jesu ‘uyootambika bwami kumaanza’ aa Wisi, “kuti Leza abe malondwedo aazintu zyoonse.” (1 Ba-Korinto 15:24-28) Aciindi eeco, Saatani uyooangululwa kwakaindi kaniini buyo kuti asunke bantu bayoofwutulwa naa bayookakatila kubweendelezi bwa Jehova bwakujulu aansi. Imusunko ooyo wamamanino waakumana, Jehova uyoomunyonyoona Saatani abazanginyina ibakamutobela. (Ciyubunuzyo 20:7-10) Boonse aabo bakakatila kubweendelezi bwa Jehova bwakujulu aansi—ikweelela kwakwe kwakweendelezya—banooli bakutondezya cakumaninina kusyomeka kwabo kutazungaani. Mpoonya bayooba balongwe ba Jehova, akuzuminwa anguwe kabali bana bakwe basankwa abasimbi alimwi Leza uyoobapa buumi butamani.—Ba-Roma 8:21.
17. (a) Ino ncinzi ciyoocitika ku Bwami kumamanino aamyaka iili cuulu? (b) Ino muunzila nzi mocili masimpe kuti Bwami kunyina ‘nobuyoonyonyoonwa’?
17 Aboobo, lubazu ndwajisi Jesu alimwi abaabo ibali 144,000 luyoocinca kujatikizya nyika eeyi. Ino mmulimo nzi ngobayoopegwa? Ibbaibbele kunyina nolyaamba pe. Pele ikuti katukakatila kubweendelezi bwa Jehova cakusyomeka, tuya kulibonena kumamanino a Bulelo bwa Myaka iili Cuulu makanze Jehova ngajisi kulimbabo kubikkilizyaa bubumbo boonse ibutalikomeneni. Nokuba boobo, bweendelezi bwa Kristo mucuulu camyaka ‘tabukamani’ alimwi Bwami bwakwe “tabukonzyi kunyonyoonwa.” (Daniele 7:14) Munzila nzi? Ikaambo kamwi nkakuti, inguzu zyabweendelezi kunyina noziyoopegwa kuli bambi bajisi makanze aasiyene, mbwaanga Jehova nguunooli Mweendelezi. Alimwi Bwami kunyina ‘nobuyoonyonyoonwa’ nkaambo kakuti makanze ambubo anooliko lyoonse. (Daniele 2:44) Alimwi Mwami a Mupaizi wabu Mesiya abaminyina alimwi bapaizi bayoolemekwa lyoonse akaambo kamilimo yabo yalusyomo kuli Jehova.
Mubandi Wakwiinduluka
• Nkaambo nzi Bwami bwa Leza ncoili nzila ilikke yakumana mapenzi aabantu? Ino ndiilili Mwami wa Bwami bwa Leza naakatalika kulela?
• Ino ncinzi nywebo cimukondelezya kapati kujatikizya Bwami bwa Leza alimwi ncinzi ncobuyoocita?
• Ino nzintu nzi Bwami nzyobwacita nzyotuli mukubona, alimwi ndubazu nzi ndotujisi muzintu eezyi?
[Mibuzyo yaciiyo]
[Cifwanikiso icili apeeji 92, 93]
Mu Bwami bwa Leza, bantu boonse bayooyiya bululami
