Inguzu Zyabulangizi Bwabubuke
Cibalo 9
Inguzu Zyabulangizi Bwabubuke
1. Ikuti nokwanyina bulangizi bwabubuke, ino bafwide nobajisi bulangizi nzi?
SENA mwakafwidwa kale bayandwa banu? Nokwanyina bubuke, nokutakwe bulangizi bwakuyoobabona alimwi pe. Bakali kuyoozumanana kuba muciimo eeco Bbaibbele ncolipandulula nolyaamba kuti: “Pele bafwide tabezi cintu niciba comwe; . . . nkaambo taakwe milimo niiba miyeeyo neluba luzibo nebuba busongo mukabanda moyoonjila.”—Mukambausi 9:5, 10.
2. Ino mbulangizi nzi butaliboteli bwalo bukonzyeka akaambo kabubuke?
2 Icaluzyalo kwiinda mububuke, Jehova wapa coolwe citalikomeneni kumakamu-makamu aabantu aabo bafwide kuti bakapilusigwe kuzwa kubafwu akuyookkomana abuumi butamani. Eeci caamba kuti mulakonzya kubaa bulangizi bukkazika moyo bwakuti bumwi buzuba munyika mpya ya Leza muyooswaangana abayandwa banu aabo bakafwa.—Marko 5:35, 41, 42; Incito 9:36-41.
3. (a) Muunzila zili buti bubuke mobwasinizya kuti bulayandika kapati mukuzuzikizigwa kwamakanze a Jehova? (b) Ino ndiilili bulangizi bwabubuke nobutuyumya-yumya?
3 Akaambo kabubuke, tatweelede kubaa bukandu buteelede kujatikizya lufwu. Kakunyina kubalekela kuti banyonyoonwe babelesi bakwe basyomeka kusikila kukabe kutamani, Jehova ulakonzya kuzumizya Saatani kucita kufwumbwa mpakonzya kugolela kusinizya kutaminizya kwakwe kwaluciso kuti “muntu uyakupa zyoonse kuti akabe abuumi bwakwe mwini.” (Jobu 2:4) Jesu wakali kusyomeka kuli Leza mane kusikila kulufwu, aboobo Leza wakamubusya kubuumi bwakujulu. Aboobo, Jesu wakali kukonzya kupa muulo wacipaizyo cabuumi bwakwe bwabuntunsi ibulondokede kucuuno ca Wisi kujulu, kacijisi nguzu zyakutufwutula. Kwiinda mububuke, aabo ‘bakatanga kaniini’ mbobali basikulelanyinaa Kristo, balijisi bulangizi bwakuyooswaangana anguwe mu Bwami bwakujulu. (Luka 12:32) Ibambi balaa bulangizi bwakuyoobusigwa kubuumi butamani muparadaiso anyika. (Intembauzyo 37:11, 29) Banakristo boonse balayumizyigwa kapati abulangizi bwabubuke munzila “zigambya” ciindi nobasikilwa masunko aakonzya kubaletela lufwu.—2 Ba-Korinto 4:7.
Ibubuke Ncobuyandika Kapati Mulusyomo lwa Banakristo
4. (a) Ino muunzila nzi bubuke mbwaali “makani aakusaanguna”? (b) Ino bubuke caamba nzi kubantu banji munyika?
4 Kweelanaa mbokulembedwe kubbuku lya Ba-Hebrayo 6:1, 2, ibubuke “makani aakusaanguna.” Ncibeela camakani aantalisyo yalusyomo calo ciyandika kuti tube Banakristo basimide. (1 Ba-Korinto 15:16-19) Nokuba boobo, injiisyo ya Bbaibbele yabubuke taizyibidwe pe kubantu banji munyika. Akaambo kakuti tabasimide munzila yakumuuya, ibantu banji buumi oobu bulikke mbobabona kuba bwini-bwini. Aboobo, bayanda buyo kulikondelezya mubuumi. Mponya kulibaabo batobela bukombi bwatunsiyansiya mu Kristendomu alimwi azikombelo zimwi buyo ibayeeya kuti bajisi buumi butafwiki. Pele lusyomo luli boobo talweendelani pe anjiisyo ya Bbaibbele yabubuke, mbwaanga inga takuyandiki bubuke ikuti bantu nobalijisi cimwi cintu citafwiki cizumanana kupona muntu nafwa. Ikusola kweendelanya njiisyo eezi zyobile kulanyonganya kapati muciindi cakukkazika moyo. Ino mbuti mbotukonzya kubagwasya babombe myoyo ibayanda kuzyiba kasimpe?
5. (a) Ikutegwa muntu amvwisye kujatikizya bubuke, ino ncinzi ncayelede kusaanguna kuzyiba? (b) Mmagwalo nzi ngomukonzya kubelesya kupandulula makani aabuumi? ciimo cabantu bafwide? (c) Ino ncinzi cikonzya kucitwa ikuti umwi muntu kabelesya busanduluzi bwa Bbaibbele butaambi kasimpe?
5 Ikutegwa bantu bali boobo bamvwisye mbobuli bubotu bubambe bwabubuke, kusaanguna beelede kukamvwisya kasimpe kujatikizya ciimo cabantu bafwide. Ikanjikanji mmagwalo buyo masyoonto aakonzya kusalazya makani aaya kumuntu uuyandisya kasimpe kamu Bbaibbele. (Matalikilo 2:7; Intembauzyo 146:3, 4; Ezekieli 18:4) Nokuba boobo, ibusanduluzi bumwi bwamazubaano alimwi amabbuku amwi aapandulula zyamu Bbaibbele taambi zyamasimpe kujatikizya buumi. Aboobo cilakonzya kugwasya kapati kulanga-langa mabala aabelesyedwe mumyaambo yakusaanguna yamu Bbaibbele.
6. Ino mbuti mbomukonzya kumugwasya muntu kuzyiba buumi ncocaamba?
6 Ibbaibbele lya New World Translation lilagwasya kapati mukucita boobo nkaambo kakuti muzibeela zyoonse ibbala lya Cihebrayo neʹphesh alimwi aleelyo ndolikozyenye limwi lya Cigiliki lyakuti psy·khe alisandulwidwe bweelede. Kucibeela citondezya makani amwi mubusanduluzi oobu kulibikidwe mulongo wamagwalo manji mujanika mabala aaya. Mubusanduluzi bunji bwama Bbaibbele amwi, mabala aaya mumwaambo wakusaanguna taasandulwidwe bweelede kuti ‘mbuumi.’ Ikweezyanisya busanduluzi bwama Bbaibbele aambi alimwi a New World Translation kuyoogwasya sikwiiya mubombe moyo kuzyiba kuti mabala aamumwaambo wakusaanguna aasanduludwe kuti “buumi” aamba bantu alimwi abanyama. Pele kunyina mabala aaya naapa muzeezo wakuti buumi ncintu citalibonyi, citazibidwe kabotu cikonzya kuzwa mumubili wamuntu ciindi nafwa alimwi akuzumanana kupona kubusena bumbi.
7. Kwiinda mukubelesya Bbaibbele, ino mbuti mbomunga mwacipandulula ciimo cabaabo bali mu Sheol? mu Hades? mu Gehena?
7 Alimwi mu New World Translation, ibbala lya “Sheol” lisandulwidwe kubbala lya Cihebrayo lya sheʼohlʹ alimwi a “Hades” lisandulwidwe kubbala lya Cigiliki lya haiʹdes alimwi a “Gehenna” lisandulwidwe kubbala lya Cigiliki lyakuti geʹen·na, ngamabala aabelesegwa mumasena oonse oomo mwaayelede. Ibbala lyakuti “Sheol” lileelene abbala lyakuti “Hades.” (Intembauzyo 16:10; Incito 2:27) Ibbaibbele lilacisalazya kwaamba kuti, Sheol alimwi a Hades aamba cuumbwe ikuya bantu boonse alimwi oonse mabala aliswaangene alufwu ikutali buumi. (Intembauzyo 89:48; Ciyubunuzyo 20:13) Alimwi Magwalo alatondezya kuti kuli bulangizi bwakupiluka kuzwa kucuumbwe kuya bantu boonse kwiinda mububuke. (Jobu 14:13; Incito 2:31) Mukwiimpana, kunyina bulangizi bwabuumi kulibaabo baya ku Gehena alimwi kunyina nokwaambwa kuti kuli buumi ooko.—Matayo 10:28.
8. Ino mbuti muntu mbwakozya kugwasigwa kumvwisya bubuke alimwi mbuti mbokunga kwajatikizya bube alimwi amicito yakwe?
8 Iciindi makani aayo naapandululwa munzila nguba-uba, imuntu ulakonzya kugwasigwa kumvwisya bulangizi mbwajisi bwabubuke. Ulakonzya kutondezya kulumba kuluyando lwa Jehova lwakubikka bubambe oobu bubotu. Ibuusu mbobaba aambubo aabo bakafwidwa bayandwa babo bulakonzya kucesyegwa kwiinda mukubaa lusyomo lwakuti ciyakusika ciindi nobayooswaangana ambabo munyika mpya ya Leza. Alimwi ikuti mwaamvwisye kabotu makani aaya, kuyandika kusaanguna kulumvwisya ncolwaamba lufwu lwa Kristo. Ibanakristo bamumwaanda wamyaka wakusaanguna bakabona kuti ibubuke bwa Jesu Kristo ncintu ciyandika kapati kulusyomo lwa Bunakristo, calo cijula nzila kububuke bwabantu abambi. Bakakambauka cabusungu kujatikizya bubuke bwa Jesu alimwi abulangizi bupegwa. Ncimwi buyo asunu, aabo bamvwisya alimwi akubukkomanina bubuke balilibambilide kwaambila bamwi kasimpe aaka kayandika kapati.—Incito 5:30-32; 10:42, 43.
Ikubelesya ‘Zijaluzyo Zyacikkalilo Cabafwu’
9. Ino mbuti Jesu mbwasaanguna kubelesya ‘zijaluzyo zyacikkalilo cabafwu’?
9 Boonse aabo ibayoobelekaa Kristo mu Bwami bwakwe bwakujulu mukuya kwaciindi beelede kufwa. Pele balicizyi kabotu cisyomezyo ncaakapa ciindi naakati: “Ndakalifwide. Lino amubone, akupona ndapona lyoonse mane kukabe kutamani, nkabela ndijisi zijaluzyo zyalufu azya-Gehena.” (Ciyubunuzyo 1:18) Ino wakali kwaamba nzi? Wakali kwaamba cintu cakamucitikila. Awalo wakalifwide. Pele Leza tanaakamusiya Mucikkalilo cabafwu. Mubuzuba bwatatu, Jehova mwini wakamubusya kubuumi bwamuuya alimwi akumupa buumi butafwiki. (Incito 2:32, 33; 10:40) Kunze lyaboobo, Leza wakamupa ‘zijaluzyo zyacikkalilo cabafwu’ izyakubelesya kwaangulula bambi kuzwa mucuumbwe muya bantu boonse alimwi akuzintu ziboola akaambo kacibi ca Adamu. Akaambo kakuti nguujisi zijaluzyo eezyo, Jesu ulaanguzu zyakubusya basikumutobela bakwe basyomeka kuzwa kubafwu. Jesu usaanguna kubusya ibacibeela cambungano yakwe ibananikidwe amuuya akubapa cipego citaliboteli cabuumi butafwiki kujulu mbubwenya mbuli Wisi mbwaakamupa walo.—Ba-Roma 6:5; Ba-Filipi 3:20, 21.
10. Ino ndiilili bubuke bwa Banakristo bananike basyomeka nobucitika?
10 Ino ndiilili Banakristo basyomeka ibananike nobayoobusigwa kubuumi bwakujulu? Ibbaibbele litondezya kuti bubuke oobu bwakatalika kale. Imwaapostolo Paulo wakapandulula kuti bayoobusigwa ‘kuciindi cakubako kwa Kristo,’ eeco calo cakatalika mu 1914. (1 Ba-Korinto 15:23) Iciindi bananike basyomeka nobamanizya buumi bwabo bwaanyika lino muciindi cakubako kwa Kristo, tabazumanani kabafwide mane kusikila kuboola kwa Mwami. Pele mbobafwida buyo, balabusigwa mumuuya ‘akusandulwa mukaindi kaniini loko, mbuli mukulaba kwaliso.’ Elo kaka talulivwulili lukkomano ndobajisi, mbwaanga milimo yabo mibotu njobakacita “ilabatobela”!—1 Ba-Korinto 15:51, 52; Ciyubunuzyo 14:13.
11. Ino mbubuke buli ibuya kuba kubantu boonse, alimwi ndiilili nobuyootalika?
11 Pele kubusigwa kwabasikukona Bwami kubuumi bwakujulu takuli nkokubusigwa kulikke pe. Mbwaanga lugwalo lwa Ciyubunuzyo 20:6 lwaamba kuti ‘mbubuke butaanzi,’ eeci citondezya kuti kuli abumbi bubuke bweelede kutobela. Aabo bayoobaa bubuke oobu bumbi buyootobela bayoobaa bulangizi bukkomanisya bwabuumi butamani muparadaiso anyika. Ino ndiilili bubuke oobo nobuyootalika? Ibbuku lya Ciyubunuzyo litondezya kuti eeci ciyoocitika ciindi “nyika ajulu”—ibweende bubyaabi oobu bwazintu buliko sunu alimwi abaleli bali mukweendelezya baakuzwisigwa. Aayo mamanino aabweende bubyaabi alaafwaafwi kapati. Mpoonya, muciindi ncabikkide Leza, ibubuke bwabantu anyika buyootalika.—Ciyubunuzyo 20:11, 12.
12. Ino mbaani bayoobikkilizyigwa akati kabantu basyomeka bayoobusigwa munyika, alimwi nkaambo nzi eeco ncobuli bulangizi bukondelezya?
12 Ino mbaani bayoobikkilizyigwa mububuke oobo buyoocitika anyika? Akati kabo kunooli babelesi ba Jehova basyomeka bakali kupona kaindi, ibaalumi abanakazi balo akaambo kalusyomo luyumu mububuke, “bakakaka kuvunwa” kwiinda munzila zimwi zyacinunuzyo. Eeci caamba kuti, kunyina nobakapiluka munsi akuleka kusyomeka kuli Leza ikutegwa batajaigwi munzila yalunya. Elo kaka ciya kukkomanisya kubaziba umwi aumwi alimwi akuswiilila kabaamba twaambo toonse twalo twaambidwe buyo cakukosaula-kosaula mu Bbaibbele! Ibambi bayoobusigwa kubuumi bwaanyika banooli ba Abelo, kamboni wa Jehova mutaanzi uusyomeka; Enoki alimwi a Nowa, bakambausi ba Leza batayoowi bakacenjezya bantu kalitanasika Zambangulwe; Abrahamu alimwi a Sara balo ibakasamausya bangelo; Musa ooyo ngwaakabelesya kupa Mulawo Leza ku Cilundu ca Sinai; ibasinsimi basicamba mbuli Jeremiya, iwakalibonena lunyonyooko lwa Jerusalemu mu 607 B.C.E.; alimwi a Johane Mubbapatizi iwakalimvwida Leza mwini kaamba Jesu kuti Mmwanaakwe. Kuyungizya waawo, kuyooba baalumi abanakazi banji basyomeka ibafwa kumazuba aaya akumamanino aabweende bwazintu oobu bubyaabi.—Ba-Hebrayo 11:4-38; Matayo 11:11.
13, 14. (a) Ino ncinzi ciyoocitika kucikkalilo cabafwu alimwi abantu bafwide balimumo? (b) Mbaani ibayoobikkilizyigwa mububuke, alimwi nkaambo nzi?
13 Mukuya kwaciindi, ibambi kunze lyababelesi ba Leza basyomeka abalo bayoobusigwa kubafwu, kakunyina uyoosyaala mucuumbwe. Ikujatikizya bunji bwabantu bayoobusigwa muzyuumbwe, kulakonzya kubonwa munzila Jesu mbwayoobelesya ‘cijaluzyo cacikkalilo cabafwu’ cakwaangulula bantu. Eeci cilabonwa mucilengaano cakapegwa kumwaapostolo Johane, mwalo mwaakabona cikkalilo cabafwu ‘casowelwa muziba lyamulilo.’ (Ciyubunuzyo 20:14) Ino eeco caamba nzi? Caamba kuti cikkalilo cabafwu naa cuumbwe muya bantu boonse ciyoonyonyoodwa limwi buya. Tacicinooliko mbwaanga bafwu boonse balimumo bayoogwisigwa akaambo kakuti aakumana kubusya bakombi boonse basyomeka ba Jehova, calubomba Jesu uyoobapilusya abaabo bantu bataluleme. Ijwi lya Leza litusyomezya kuti: ‘Kuyooba kubuka kwabafwu, ikwabaluleme akwabataluleme.’—Incito 24:15.
14 Kunyina naba omwe akati kabaaba bataluleme uuyoobusilwa buyo kuti akabetekwe aakumana akafwe alimwi. Mucilawo imunooli bululami nyika yoonse mbwiizulwa mubweendelezi bwa Bwami bwa Leza, bayoogwasigwa kukkala munzila njayanda Jehova. Icilengaano cakatondezya kuti “bbuku lyabuumi” liyoojalulwa. Aboobo, bayoobaa coolwe cakuyoolembwa mazina aabo mulindilyo. ‘Bayoobetekwa muntu umwi aumwi kweelanaa milimo yakwe’ njaakacita naakabusigwa. (Ciyubunuzyo 20:12, 13) Aboobo, ikulanga zintu kweelanaa mboziyakuba kumamanino, ibubuke bwabo bulakonzya kuba ‘bubuke bwakubuumi’ alimwi tabukooyooba ‘bubuke bwakukubetekwa.’—Johane 5:28, 29.
15. (a) Ino mbaani ibatakooyoobusigwa? (b) Mbuti luzibo lwakasimpe kujatikizya bubuke mbobweelede kutujatikizya?
15 Nokubaboobo, tabali boonse bantu ibakaponede alimwi akufwa ibayoobusigwa pe. Ibambi bakacita zibi zitakonzyi kulekelelwa. Ibantu bali boobo tabali mucikkalilo cabafwu pe, pele bali mu Gehena kwalo nkobayoonyonyoodwa limwi. Alimwi ibabikkilizyidwe akati kabaaba kunooli baabo bayoonyonyoonwa ciindi ca “mapenzi mapati” alo aali aafwaafwi kucitika. (Matayo 12:31, 32; 23:33; 24:21, 22; 25:41, 46; 2 Ba-Tesalonika 1:6-9) Aboobo, nokuba kuti Jehova ulatondezya lubomba munzila mpati kwiinda mukubusya bafwide mucikkalilo cabafwu, ibulangizi bwabubuke kunyina nobutuzumizya kutabikkila maano kujatikizya bukkale bwesu lino. Kunyina bubuke bukonzyeka kulibaabo bazanga caali kubweendelezi bwa Jehova. Luzibo oolu lweelede kutukulwaizya kutondezya kuti tulalumba kapati kuluzyalo lwa Leza kwiinda mukupona bukkale bweendelanaa kuyanda kwakwe.
Ikuyumizigwaa Bulangizi Bwabubuke
16. Ino mbuti bulangizi bwabubuke mbobukonzya kutuyumya-yumya?
16 Kulibaabo akati kesu ibasyoma ncobeni mubulangizi bwabubuke, tulayumizigwa kapati abulangizi oobu. Sunu mbotuyaabuswena afwaafwi kumamanino aabuumi bwesu, tulizi kuti kunyina notunga twakonzya kulutonkela kumbele lufwu, tacikwe makani naa tubelesya nzila nzi zyabusilisi. (Mukambausi 8:8) Ikuti twali kubelekela Jehova ambunga yakwe cakusyomeka, tulakonzya kulombozya buumi bwakumbele katujisi lusyomo. Tulizi kuti kwiinda mububuke, tuyoopona alimwi muciindi ncabikkide Leza. Elo kaka oobo buya kuba buumi bubotu! Kweelanaa mwaapostolo Paulo, wakabwaamba kuti oobu bunooli “buumi bwinibwini.”—1 Timoteo 6:19; Ba-Hebrayo 6:10-12.
17. Ino ncinzi cikonzya kutugwasya kuzumanana kusyomeka kuli Jehova?
17 Ikuzyiba kuti kuli bubuke alimwi Ayooyo wakabikka bubambe oobu kulatugwasya kubaa lusyomo luyumu. Eeci cilatuyumya kuzumanana kusyomeka kuli Leza noliba leelyo basikupenzya basilunya nobatukonga kutujaya. Kuzwa kaindi, Saatani wali kubelesya kuyoowa lufwu lwaaciindi citayeeyelwi kuba nzila yakweendelezya bantu mbuli bazike. Pele Jesu tanaakali kuyoowa kufwa. Wakasyomeka kuli Jehova mane kusikila kulufwu. Kwiinda mucituuzyo cakwe cacinunuzyo, Jesu wakapa nzila yakwaangulula bambi kubuyoofwu buli boobo.—Ba-Hebrayo 2:14, 15.
18. Ino ncinzi cagwasya babelesi ba Jehova kulijanina mpuwo mbotu yakusyomeka iili boobo?
18 Akaambo kalusyomo lwabo mucipego cacinunuzyo ca Kristo alimwi amububuke, babelesi ba Jehova balijanina mpuwo mbotu yakuba bantu basyomeka. Iciindi nobali mubuyumuyumu, basinizya kuti ‘tabayandisyi buumi bwabo’ kwiinda mbobayandisya Jehova. (Ciyubunuzyo 12:11) Cabusongo, kunyina nobaleka kutobela zyeelelo zya Bunakristo kutegwa bazumanane abuumi bwabo mbobajisi lino. (Luka 9:24, 25) Balizi kuti nokuba kuti basweekelwa buumi bwabo lino akaambo kakukakatila cakusyomeka kubweendelezi bwa Jehova, uyakubalumbula kwiinda mububuke. Sena mulaa lusyomo luli boobo? Mulakonzya kuba andulo ikuti kamumuyanda ncobeni Jehova alimwi ikuti kamucimvwisya cini ncobwaamba bulangizi bwabubuke.
Mubandi Wakwiinduluka
• Nkaambo nzi muntu ncayandika kusaanguna kubumvwisya kabotu ncobwaamba buumi alimwi aciimo cabafwu katanamvwisya cini ncobwaamba bubuke?
• Ino mbaani ibooyopiluka kuzwa kubafwu, alimwi mbuti luzibo oolu mbolweelede kutujatikizya?
• Ino bulangizi bwabubuke butuyumya buti?
[Mibuzyo yaciiyo]
[Cifwanikiso icili apeeji 84, 85]
Jehova wasyomezya kuti kuyooba kubuka kwabaluleme akwabataluleme
