Cibalo 14

Ino Jehova Uyeendelezya Buti Mbunga Yakwe?

1. Ino Ibbaibbele liyubununa makani nzi kujatikizya mbunga ya Jehova, alimwi nkaambo nzi makani aaya ncaayandika kulindiswe?

SENA Leza ulijisi mbunga? Magwalo aakasololelwaa muuya atwaambila kuti ulijisi. Kwiinda mu Jwi lyakwe, ulatutondezya tubeela-beela twambunga yakujulu iigambya. (Ezekieli 1:1, 4-14; Daniele 7:9, 10, 13, 14) Nokuba kuti kunyina notunga twacibona cibeela cambunga eeci citalibonyi, cilabajatikizya kapati bakombi bakasimpe mazubaano. (2 Bami 6:15-17) Alimwi imbunga ya Jehova ilijisi cibeela cilibonya aano anyika. Ibbaibbele lilatugwasya kuteelelesya mbocibede alimwi ambwaceendelezya Jehova.

Ikuzyiba Cibeela Cilibonya Cambunga

2. Ino nimbungano mpya iili Leza njaakabamba?

² Kwamyaka iili 1,545, imusyobo wabana Israyeli yakali mbungano ya Leza. (Incito 7:38) Pele bana Israyeli bakaalilwa kubamba milawo ya Leza alimwi bakamukaka Mwanaakwe. Akaambo kaceeci, imbungano eeyo wakaikaka Jehova alimwi wakaleka kwiigwasya. Jesu wakaambila ba Juda kuti: “Amulange! Iŋanda yanu yasyaala kulindinywe mbuli itongo.” (Matayo 23:38) Mpoonya Leza wakatalisya mbungano mpya njaakapangana ayalo cizuminano cipya. Imbungano eeyi yakeelede kubambwaa bantu ibali 144,000 ibakasalwaa Leza kuti bakabeleke aantoomwe a Mwanaakwe kujulu.—Ciyubunuzyo 14:1-4.

3. Ncinzi cakacitika lya Pentekoste mu 33 C.E. icakatondezya kabotu-kabotu kuti Leza lino wakali kubelesya mbungano mpya?

 ³ Ibantu bakusaanguna ikuba cibeela cambungano mpya eeyi bakananikwaa muuya wa Jehova lya Pentekoste mu 33 C.E. Kujatikizya cintu cipati eeco cakacitika, tubala kuti: “Nobwakasika buzuba bwa-Pentekoste, bakali antoomwe boonse. Ndilyonya kwakazwa mujulu muzunzumina mbuli guwo ilyuungisya, wakazuzya ŋanda yoonse mobakakede. Kwakabasikila milaka; iili mbuli mulilo yakabakala umwi [a]umwi. Boonse bakazyula Muuya Uusalala.” (Incito 2:1-4) Aboobo muuya wa Leza wakapa bumboni butadoonekwi bwakuti eeyi njenkamu yabantu Leza njaakali kuyoobelesya kuzuzikizya makanzaakwe kwiinda mubusolozi bwa Jesu Kristo kujulu.

4. Ino mbaani sunu ibabamba mbunga ya Jehova iilibonya?

⁴ Sunu, balikke basyeede baciinga caba 144,000 mbabacili anyika. Pele ikuzuzikizya businsimi bwa Bbaibbele, “inkamu impati” ya “mbelele zimwi” yayobololwa kuti iyanzane abananike basyeede. Jesu, Mweembezi Mubotu wabakamantanya ibambelele zimwi antoomwe abasyeede kutegwa babe tanga lyomwe ndyayendelezya kali Mweembezi wabo omwe. (Ciyubunuzyo 7:9; Johane 10:11, 16) Caantoomwe aaba babamba mbungano iikamantene, imbunga ya Jehova iilibonya.

Imbunga Yeendelezyegwaa Leza

5. Ino nguni weendelezya mbunga ya Leza, alimwi ino uyeendelezya buti?

⁵ Ikaambo kajanika mu Magwalo ikakuti “mbungano ya-Leza muumi” kalatondezya uuyeendelezya. Imbunga eeyi yeendelezyegwaa Leza. Jehova ulabasololela bantu bakwe kwiinda muli Jesu, ooyo Leza ngwabikkide kuba Mutwe uutalibonyi wambungano alimwi akwiinda mu Jwi Lyakwe ndyaakasololela, Ibbaibbele.—1 Timoteo 3:14, 15; Ba-Efeso 1:22, 23; 2 Timoteo 3:16, 17.

6. (a) Ino mbuti busolozi bwambungano kuzwa kujulu mbobwakatondezyegwa mumwaanda wamyaka wakusaanguna? (b) Ino ncinzi citondezya kuti Jesu ucili ngo Mutwe wambungano?

 ⁶ Ibweendelezi buli boobo bwakalibonya caantangalala lya Pentekoste. (Incito 2:14-18, 32, 33) Bwakatondezyegwa ciindi mungelo wa Jehova naakalailila kuti imakani mabotu amwaigwe mu Afulika, Jesu naakapa malailile aciindi cakusanduka kwa Saulo waku Tarso alimwi aleelyo Petro naakatalika mulimo wabukambausi akati ka Bamasi. (Incito 8:26, 27; 9:3-7; 10:9-16, 19-22) Nokuba boobo, mukuya kwaciindi kunyina nokwakacili kumvwugwa majwi kuzwa kujulu, kunyina nokwakacili kubonwa bangelo alimwi kunyina nokwakacili kupegwa zipego zyamuuya zyakucita maleele. Pele Jesu wakasyomezya kuti: “Amulange, ndaba anywe mazuba oonse nikuba kusikila kumamanino aaciindi.” (Matayo 28:20; 1 Ba-Korinto 13:8) Sunu, Bakamboni ba Jehova balabuzumina busolozi bwa Jesu. Nikwatali boobo, nocatali kunookonzyeka ikuzumanana kukambauka mulumbe wa Bwami kumwi katukazyigwa kapati.

7. (a) Ino mbaani ibabamba ciinga ca “muzike musyomesi uucenjede,” alimwi ino nkaambo nzi? (b) Ino mmulimo nzi wakapegwa ku “muzike”?

⁷ Kakusyeede buyo ciindi cisyoonto kuti afwe, Jesu wakaambila basikwiiya bakwe kujatikizya “muzike musyomesi uucenjede” ooyo walo mbwaakali Simalelo ngwaakali kuyoopa mukuli uulibedelede. “Muzike” ooyo wakali kunooliko ciindi Mwami naakali kuyoowunka kujulu alimwi wakacili kunoobeleka canguzu aciindi cakupiluka kwa Kristo kutalibonyi mubweendelezi bwa Bwami. Ibupanduluzi buli boobo kunyina nobwakali kunga bweelela kwaamba muntu omwe buyo pe, pele buleelela kwaamba mbungano ya Kristo yabananike. Mbwaanga wakayulaa bulowa bwakwe mwini, Jesu wakayaamba kuti yakali “muzike” wakwe.  Wakapa bantu bamumbungano eeyi mulimo wakugwasya bamwi kuba basikwiiya akuzumanana kubasanina kwiinda mukubapa “zilyo zyabo [zyakumuuya] kuciindi ceelede.”—Matayo 24:45-47; 28:19; Isaya 43:10; Luka 12:42; 1 Petro 4:10.

8. (a) Ino mmilimo nzi iijisi ciinga camuzike lino? (b) Ino nkaambo nzi ncociyandika kuti twaatobele malailile aaboola kwiinda munzila njabelesya Leza?

⁸ Mbwaanga ciinga camuzike cakali kucita mulimo wa Mwami cakusyomeka aciindi naakapiluka katalibonyi mu 1914, kuli bumboni bwakuti cakapegwa mulimo mupati mu 1919. Imyaka yainda kuzwa ciindi eeco cali ciindi cakupa bumboni kujatikizya Bwami munyika yoonse mbwiizulwa, alimwi ibankamu mpati yabakombi ba Jehova ili mukuyobololwa kutegwa ikafwutulwe kuciindi camapenzi mapati. (Matayo 24:14, 21, 22; Ciyubunuzyo 7:9, 10) Abalo aaba bayandika cakulya cakumuuya alimwi cili mukupegwa kulimbabo aciinga camuzike. Aboobo ikutegwa tumukkomanisye Jehova, tweelede kwaatobela imalailile ngatupa kwiinda mukubelesya nzila eeyi alimwi akucita kweelenaa ziyandika.

9, 10. (a) Mumwaanda wamyaka wakusaanguna, ino mbubambe ibuli buti bwakaliko kujatikizya kwiingula mibuzyo yakayeeme aanjiisyo zyabukombi alimwi ino yakapa busolozi nzi kujatikizya kukambauka makani mabotu? (b) Ino mbubambe ibuli buti bwakweendelezya milimo yabantu ba Jehova ibuliko sunu?

⁹ Zimwi ziindi, kulaba mibuzyo iijatikizya njiisyo alimwi anzila zibikkidwe zyakucita zintu. Ino ncinzi ceelede kucitwa? Ibbuku lya Incito caandaano ca 15, litwaambila mbokakakosolwa ikaambo kajatikizya Bamasi bakasandukide. Imakani akatolwa kubaapostolo alimwi akubapati baku Jerusalemu, aabo balo ibakali kubeleka kabali kabunga keendelezya. Ibaalumi aabo tiibakalondokede pe, pele Leza wakababelesya. Bakalanga-langa ncaakali kwaamba  magwalo kujatikizya kaambo alimwi abumboni bwakali kutondezya mbowakali kubeleka muuya wa Leza mukujalula mulyango wabukambausi kuli Bamasi. Mpoonya bakaakosola makani. Leza wakabulongezya bubambe oobo. (Incito 15:1-29; 16:4, 5) Ikabunga keendelezya aako kakasala bantu kutegwa batumwe mukutolaambele mulimo wakukambauka Bwami.

¹⁰ Mumazubeesu, Kabunga Keendelezya nimbunga ya Jehova iilibonya iibambidwe aabakwesu bananikidwe amuuya ikuzwa mumasi aasiyene-siyene alimwi iijanika kuofesi mpati ya Bakamboni ba Jehova yanyika yoonse. Kwiinda mubusilutwe bwa Jesu Kristo, Kabunga Keendelezya kabutolaambele ibukombi busalala akweendelezya mulimo wabukambausi wa Bakamboni ba Jehova mumakumi-makumi aazyuulu zyambungano. Aabo ibali mu Kabunga Keendelezya balimvwa mbuli mwaapostolo Paulo, iwakalembela Banakristonyina kuti: “Takweensi kwaamba kuti tulaba abwami kulusyomo lwanu pe, pele tulagwasyanya anywebo kuti mube akukondwa, nkaambo muliimvwi nubeni mulusyomo.”—2 Ba-Korinto 1:24.

11. (a) Ino baalu alimwi abakutausi babikkwa buti? (b) Nkaambo nzi ncotweelede kubelekela antoomwe abaabo babikkidwe?

¹¹ Bakamboni ba Jehova nyika yoonse mbwiizulwa balanga ku Kabunga Keendelezya kuti kasale bakwesu beelela amana abalo balazumizigwa kubikka baalu alimwi abakutausi kutegwa balanganye mbungano. Izyeelelo zyabaabo ibasalwa zilaambidwe mu Bbaibbele alimwi kulitondezyedwe kuti baalumi aabo tabalondokede pe, balalubizya abalo mbubona. Ibaalu aabo ibasala alimwi abaabo ibabikka baabo basalwa balijisi mukuli mupati kapati kuli Leza. (1 Timoteo 3:1-10, 12, 13; Tito 1:5-9) Aboobo bapailila muuya wa Leza kuti ubagwasye alimwi akulomba busolozi  bwa Jwi lyakwe kuti libasololele. (Incito 6:2-4, 6; 14:23) Atutondezye kulumba ‘kuzipego mubantu’ eezi, balo ibatugwasyilizya toonse kuti tube “aalukamantano lomwe mukusyoma.”—Baefeso 4:8, 11-16, Ci.

12. Ino mbuti Jehova mbwababelesya banakazi mububambe bwambunga njayendelezya?

¹² Imagwalo atondezya kuti, ibweendelezi bwamumbungano bweelede kulanganizyigwaa baalumi. Eeci kunyina nocipa kunyansya banakazi pe nkaambo bamwi akati kabo bayoolela mu Bwami bwakujulu alimwi balijisi lubazu lupati mumulimo wabukambausi.  (Intembauzyo 68:11) Kuyungizya waawo, ikwiinda mukulanganya mikuli yabo yamumukwasyi cakusyomeka, banakazi balagwasya mukwiitola ambele mpuwo mbotu yambungano. (Tito 2:3-5) Pele ikuyiisya mumbungano kulacitwaa baalumi ibakabikkwa kuti kabacita boobo.—1 Timoteo 2:12, 13.

13. (a) Ino Bbaibbele libakulwaizya kuti baalu beelede kucilanga munzila iili buti cuuno cabo? (b) Ino mmulimo nzi toonse ngotukonzya kutola lubazu?

¹³ Munyika, imuntu uujisi cuuno cipati ulalemekwa kapati, pele mumbunga ya Leza imulawo ngwakuti: “Muniini akati kanu nyoonse ngomupati.” (Luka 9:46-48; 22:24-26) Imagwalo alaya baalu kuti babikkile maanu kutacita kamikami kubutanga bwa Leza, muciindi caboobo beelede kuba zitondezyo kubutanga. (1 Petro 5:2, 3) Takusalidwe buyo basyoonto pe, pele Bakamboni ba Jehova boonse ibaalumi abanakazi balijisi coolwe citaliboteli cakwiiminina Mwami Mupati wakoonse-koonse, ikukanana cakulibombya muzina lyakwe alimwi akwaambila bantu kufwumbwa nkobabede kujatikizya Bwami bwakwe.

14. Kwiinda mukubelesya magwalo aabikkidwe, amubandike mibuzyo iindandamikidwe kumamanino aamuncali.

¹⁴ Inga cabota ikulibuzya kuti: ‘Sena ndilaa luzyibo kujatikizya mbwali mukweendelezya mbunga yakwe iilibonya Jehova? Sena mbondizilanga zintu akulilemeka, ŋambawido alimwi anzyondicita zilatondezya oobo?’ Ikuzinzibala kuyeeya kujatikizya twaambo ootu tutobela kulakonzya kugwasya umwi aumwi wesu kuvwuntauzya.

Ikuti naa ndilalibombya ncobeni kuli Kristo walo uuli Mutwe wambungano, ncinzi ncondeelede kunoocita kweelenaa mbokutondezyedwe mumagwalo aatobela? (Matayo 24:14; 28:19, 20; Johane 13:34, 35)

 Iciindi nonditambula zipego zyakumuuya alimwi abubambe bupegwa kwiinda muciinga camuzike aku Kabunga Keendelezya, nguni ngundilemeka? (Luka 10:16)

Ino mbuti mbotweelede kweendelezyanya toonse mumbungano, ikwaambisya baalu? (Ba-Roma 12:10)

15. (a) Ino ncinzi ncotutondezya kweelanaa mbotwiilanga mbunga ya Jehova iilibonya? (b) Ino nzyoolwe zili buti nzyotujisi zyakukkomanisya Jehova akutondezya kuti Diabolosi mmubeji?

¹⁵ Jehova ulatusololela sunu kwiinda mumbunga yakwe iilibonya iyeendelezyegwaa Kristo. Mbotuya bubulanga bubambe oobu, citondezya mbotulimvwa mukaambo kajatikizya bulelo. (Ba-Hebrayo 13:17) Saatani waamba kuti ncotuyanda kapati nkulibikkila maano. Pele ikuti naa twabeleka munzila iiyandika alimwi akutantamuka zintu izitupa kuti tulibikkile maanu munzila iitayandiki, tutondezya kuti Diabolosi mmubeji. Tulamukkomanisya Jehova eelyo notubayanda akubalemeka aabo beendelezya akati kesu alimwi akukaka ‘kulangilila ziwa zyabantu kuti tulivwubye.’ (Juda 16; Ba-Hebrayo 13:7) Kwiinda mukusyomeka kumbunga ya Jehova, tulatondezya kuti Jehova ngo Leza wesu akuti tulikamantene mukumukomba.—1 Ba-Korinto 15:58.

Mubandi Wakwiinduluka

• Imazubaano, ino mbunga ya Jehova iilibonya ninzi? Ino ijisi mulimo nzi?

• Nguni uubikkidwe kuba Mutwe wambungano, alimwi nkwiinda mububambe ibuli buti bulibonya mwapeda busolozi bwaluyando kulindiswe?

• Ino nkulilemeka kuli buti nkotweelede kuba ankuko kulibaabo ibali mumbunga ya Jehova?

[Mibuzyo yaciiyo]

[Zifwanikiso izili apeeji 133]

Jehova ulatusololela kwiinda mumbunga yakwe iilibonya iyeendelezyegwaa Kristo