Lwaanguluko Lujisi Bakombi ba Jehova
Cibalo 5
Lwaanguluko Lujisi Bakombi ba Jehova
1, 2. (a) Ino ndwaanguluko luli buti Leza ndwaakapa banabubili bakusaanguna? (b) Amwaambe milawo imwi yakali kweendelezya zintu nzyobakali kucita ba Adamu a Eva.
ICIINDI Jehova naakalenga mwaalumi alimwi amwanakazi wakusaanguna, boonse bakalijisi lwaanguluko lusumpukide kapati kwiinda loolo loonse ndobajisi bantu sunu. Munzi wabo wakali Paradaiso, Muunda uuyebeka wa Edeni. Kakutakwe kuciswa ikwakali kunyonganya lukkomano lwabo mubuumi, mbwaanga bakajisi mizeezo alimwi amibili iilondokede. Tiibakajisi bulangizi bwalufwu mbuli mbocibede kubantu boonse kuzwa ciindi cabo. Alimwi tiibakali mbuli mincini iiteyelwa limwi pe, pele bakajisi cipego cibotu cakulisalila, inguzu zyakulisalila kufwumbwa ncobakali kuyanda. Nokuba boobo, ikutegwa bazumanane kubaa lwaanguluko lubotu luli boobo, bakeelede kumvwida milawo ya Leza.
2 Mucikozyanyo, amulange-lange milawo imwi Leza njaakatalisya. Masimpe, milawo eeyi ilakonzya kuti tiiyakalembedwe buya cacigaminina mumajwi manji, pele ba Adamu a Eva bakalengedwe munzila yakuti bakeelede ikwiitobela. Ikuyandisisya cilyo cimwi cakali kutondezya kuyandika kwacakulya; nyota yakali citondezyo cakuti bayandika kunywa maanzi; kubbila kwazuba kwakali kutondezya kuyandika kwakoona. Alimwi Jehova wakabapa mulimo wakubeleka. Mulimo ooyo wakeelene buyo amulawo nkaambo wakali kuyooyendelezya micito yabo. Bakali kuyoozyala bana, kweendelezya zilenge zinji zyamunyika alimwi akukomezya Paradaiso kusikila nyika yoonse yazula. (Matalikilo 1:28; 2:15) Elo kaka ooyo wakali mulawo mubotu alimwi uugwasya! Mulawo ooyu wakabapa mulimo uukatalusya, iwakabapa coolwe cakubelesya nguzu zyabo cakumaninina munzila zigwasya. Alimwi bakalaangulukide kapati kulisalila kujatikizya mbobakeelede kwiibeleka milimo yabo. Ino ncinzi ciinda waawa muntu ncaakali kunga walombozya?
3. Mbuti ba Adamu a Eva mbobakali kunooiya kulubelesya cabusongo lwaanguluko lwabo lwakulisalila?
3 Masimpe, ciindi ba Adamu a Eva nobakapegwa coolwe cakulisalila, eeci tiicakali kwaamba kuti kufwumbwa buyo kusala nkobakali kunoocita kwakali kunooleta zintu zibotu. Lwaanguluko lwabo lwakulisalila lwakeelede kucitwa kweelanaa caamba milawo alimwi azyeelelo zya Leza. Ino mbuti mbokali kunga baiya milawo alimwi azyeelelo zya Leza eezi? Nkwiinda mukumvwida Mulengi wabo alimwi akwiiya milimo yakwe. Leza wakapa ba Adamu a Eva busongo bwakali kuyandika kuti kabatobela eezyo nzyobakali kwiiya. Mbwaanga bakalengwa kabalondokede, cakali kunooba cilengwa cabo kutondezya bube bwa Leza ciindi nobakali kusala. Masimpe, bakali kunookonzya kupakamana kucita boobo ikuti nobakazibikkila maanu cakulumba eezyo Leza nzyaakabacitilide alimwi nobakayandisya kumukkomanisya.—Matalikilo 1:26, 27; Johane 8:29.
4. (a) Sena mulawo ngobakapegwa ba Adamu a Eva wakutalya mucelo wamusamu omwe wakabalesya kubaa lwaanguluko? (b) Nkaambo nzi mulawo ooyu ncowakeelede?
4 Aboobo Leza wakacibona kuti inga ceelela kusunka kulibombya kwabo kulinguwe akulisungula kwabo kwakuzumanana mukutobela zyeezyo nzyaakabalailila mbwaakali ngo Sikubapa Buumi. Jehova wakapa Adamu mulawo ooyu: “Misamu yoonse yamumuunda ncobeni uyooilya, cita musamu wakuziba bubotu abubi. Toelede kulya kulinguwo pe, nkaambo mubuzuba obo mboyoolya kulinguwo ncobeni uyoofwa.” (Matalikilo 2:16, 17) Awalo Eva naakalengwa wakaambilwa kujatikizya mulawo ooyu. (Matalikilo 3:2, 3) Sena kukasigwa ooku kwakabalesya kubaa lwaanguluko? Peepe. Bakalijisi zilyo zibotu zinji alimwi zyamisyobo-misyobo kakunyina kulya mucelo wamusamu omwe ooyo. (Matalikilo 2:8, 9) Cakalikweelela kapati kuti bazibe kuti nyika yoonse njiya Leza mbwaanga ngonguwe wakiilenga. Aboobo ulijisi nguzu zyakubikka milawo yeendelanaa makanzaakwe alimwi iigwasya bantu.—Intembauzyo 24:1, 10.
5. (a) Ino mbuti ba Adamu a Eva mbobakasweekelwa lwaanguluko lubotu ndobakajisi? (b) Ncinzi cakatola busena bwalwaanguluko lubotu ba Adamu a Eva ndobakajisi, alimwi ino mbuti mbotwajatikizyigwa?
5 Pele ino ncinzi cakacitika? Kwiinda mukukulwaizigwaa kulombozya kubyaabi, imungelo umwi wakabelesya lwaanguluko lwakwe lwakulisalila munzila mbyaabi eelyo wakaba Saatani, icaamba kuti “Sikukazya.” Wakeena Eva kwiinda mukumusyomezya cintu ciimpene akuyanda kwa Leza. (Matalikilo 3:4, 5) Awalo Adamu wakatobela Eva mukutyola mulawo wa Leza. Kwiinda mukubweza cintu catakali cabo, bakasweekelwa lwaanguluko lwabo lubotu. Icibi cakatalika kubeendelezya, alimwi kweelanaa mbwaakabacenjezyede Leza, lufwu lwakatalika. Icikono ncobakaabila bana babo cakali cibi—icilibonya mukampenda kakuyandisya kubisya. Alimwi cibi cakaleta kukompama ikusololela kumalwazi, kucembaala alimwi alufwu. Ikampenda kakuyandisya kucita zitaluleme, ikakasumpulwaa kuyunga kwa Saatani, kakapa kuti kube ciinga cabantu calo cizibidwe kuzwa kaindi mumakani aakusulaikana, milandu, kudyaaminina alimwi ankondo zyajaya tuulunzuma twabantu banji. Elo kaka kuli kwiimpana kupati alwaanguluko Leza ndwaakapa bantu kumatalikilo!—Deuteronomo 32:4, 5; Jobu 14:1, 2; Ba-Roma 5:12; Ciyubunuzyo 12:9.
Lwaanguluko Nkolukonzya Kujanwa
6. (a) Nkuukuli lwaanguluko lwini-lwini nkolukonzya kujanwa? (b) Ino lwakali lwaanguluko luli buti Jesu ndwaakabandika?
6 Akaambo kabukkale bubyaabi buliko koonse-koonse sunu, tacigambyi pe kuti bantu balombozya kubaa lwaanguluko lwini-lwini. Pele ino nkukuli lwaanguluko lwini-lwini nkolukonzya kujanwa? Jesu wakaamba kuti: “Mwajatisya majwi aangu, ncobeni mwaba basikwiiya bangu, alimwi muyooziba bwini, abwalo bwini buyoomunununa.” (Johane 8:31, 32) Lwaanguluko oolu taluli loolo bantu ndobalangila ciindi nobakaka mweendelezi umwi naa mfwulumende imwi akaambo kakuyanda mweendelezi umbi naa mfwulumende iimbi. Muciindi caboobo, oolu ndwaanguluko kumapenzi mapati aapenzya bantu. Jesu ncaakali kubandika lwakali lwaanguluko kubuzike bwacibi. (Johane 8:24, 34-36) Aboobo, ikuti muntu waba sikwiiya mwini-mwini wa Jesu Kristo, ulacinca mubukkale bwakwe munzila iilibonya, ulaangululwa!
7. (a) Muunzila nzi sunu mbotukonzya kwaanguluka kucibi? (b) Ikutegwa tubaa lwaanguluko oolo, ncinzi ncotweelede kucita?
7 Eeci tacaambi kuti Banakristo bakasimpe sunu kunyina nobapenga akaambo kakampenda nkobakazyalwa ankako kakuyanda kubisya. Mbwaanga abalo bakacikona cibi, bacijisi nkondo yakulwana akaambo kancico. (Ba-Roma 7:21-25) Nokuba boobo, ikuti muntu kapona kweendelanaa njiisyo zya Jesu, kunyina nayooba muzike wacibi. Kulinguwe, icibi kunyina nociyooba mbuli mweendelezi silunya uumupa milawo njayelede kumvwida kakunyina kuwayawaya. Kunyina nayoozumanana mubukkale butakwe mpindu alimwi buyoomuletela manjezeezya mabi. Uyoobaa manjezeezya mabotu kuli Leza akaambo kakuti zibi zyamusyule zinooli zyalekelelwa akaambo kalusyomo ndwajisi mucituuzyo ca Kristo. Mizeezo yakucita zintu zibi ilakonzya kumusikila akusola kumweendelezya, pele ciindi nakazya kwiitobela akaambo kakwiibaluka njiisyo zibotu zya Kristo, utondezya kuti cibi tacicijisi bweendelezi kulinguwe.—Ba-Roma 6:12-17.
8. (a) Ino Bunakristo bwini-bwini butupa lwaanguluko luli buti? (b) Ino beendelezi bazisi tweelede kubalanga munzila iili buti?
8 Amulange-lange lwaanguluko ndotujisi to Banakristo. Twakaangululwa kuzintu ziboola akaambo kanjiisyo zyakubeja, kuzwa kubuzike bwakuyoowa zintu zitako alimwi akucibi. Ikasimpe kalatusyomezya kujatikizya ciimo cabantu bafwide alimwi abubuke mbobutwaangulula kukuciindizya kuyoowa lufwu. Ikuziba kuti mfwulumende zyabantu batalondokede ziyoogwisigwa ino-ino alimwi mubusena bwanzizyo kuyoobikkwa Bwami bwa Leza bululeme citupa kukkomana. (Daniele 2:44; Matayo 6:10) Nokuba boobo, lwaanguluko luli boobo taluzumizyi kutalemeka beendelezi bazisi alimwi amilawo yabo.—Tito 3:1, 2; 1 Petro 2:16, 17.
9. (a) Mbuti lino Jehova mbwatugwasya munzila yaluyando kubaa lwaanguluko lupati lukonzyeka kubantu? (b) Mbuti mbotukonzya kusala cabusongo?
9 Jehova kunyina natulekela kulijanina inzila mbotu yambuli mbotukonzya kupona kwiinda mukusoleka eeci aceeci. Ulizi mbotupangidwe, ulizizyi zintu zikonzya kutupa lukkomano lwini-lwini alimwi azikonzya kutugwasya mane kukabe kutamani. Jehova uliizi mizeezo alimwi akulilemeka kukonzya kunyonyoona cilongwe Anguwe alimwi abantu alimwi mane ambweni akulesya muntu ooyo kuyoonjila munyika mpya. Caluyando, Jehova ulatuzyibya zintu zyoonse eezi kwiinda mu Bbaibbele alimwi ambunga yakwe iilibonya. (Marko 13:10; Ba-Galatiya 5:19-23; 1 Timoteo 1:12, 13) Mpoonya mmukuli wesu ikubelesya nguzu zyakulisalila nzyatupede Leza ikusala ntaamu njotweelede kubweza. Mukwiimpanaa Adamu, ikuti twatobela eeco Bbaibbele ncolitwaambila, tuyoosala cabusongo. Tuyootondezya kuti ikubaa cilongwe cibotu a Jehova ncecintu cipati mubuumi bwesu.
Bamwi Bayanda Lwaanguluko Lumbi
10. Ndwaanguluko luli buti bamwi Bakamboni ba Jehova ndobayandaula?
10 Zimwi ziindi ibakubusi Bakamboni ba Jehova kubikkilizyaa bamwi bapati, balakonzya kulimvwa kuti bayandika lwaanguluko lumbi. Inyika ilakonzya kulibonya kubaa zintu zibotu izikondelezya, alimwi mbobayaa buzumanana kuziyeeya, akwalo kulombozya kwabo kwakuyandisya kucita micito iitali yabunakristo iidumide munyika kulakomena kapati. Ibali boobo balakonzya kabatakanzide buya ikubelesya misamu iikola, kunywa bukoko cakwiindilizya naa kucita bwaamu. Pele batalika kuyanzanaa bamwi batali Banakristo bakasimpe akupanga cilongwe ambabo. Ambweni balakonzya kutalika kwiiya ŋambawido alimwi abukkale bwabo.—3 Johane 11.
11. Nkuukuli zimwi ziindi muzeezo wakucita cibi nkouzwa?
11 Zimwi ziindi ikuyungwa kutobela nzila iitali yabunakristo kuzwa kumuntu uulyaamba kuti ubelekela Jehova. Eeco cakacitika ku Banakristo bakusaanguna alimwi cilakonzya kucitikaa mumazubeesu. Ikanjikanji bantu bali boobo inga bayanda kucita zintu nzyobayeeya kuti inga zyabakondelezya, pele zintu eezi tazyeendelani pe amilawo ya Leza. Bakulwaizya bamwi kuti “balikkomanisye.” “Balabasyomezya bulubusi, anukuti balo beni mbazike babubi.”—2 Petro 2:19.
12. Nzintu nzi zibyaabi zicitika akaambo kakupona munzila iiteendelani amilawo alimwi azyeelelo zya Leza?
12 Izicitika akaambo kaceeco icaambwa kuti ndwaanguluko lyoonse nzintu zibyaabi, mbwaanga caamba kutyola milawo ya Leza. Mucikozyanyo, koonana kutali kwamumulawo kulakonzya kuletela kupenga mumoyo, malwazi, lufwu, madaa musokwe alimwi ambweni akulekana. (1 Ba-Korinto 6:18; 1 Ba-Tesalonika 4:3-8) Kubelesya misamu iikola kulakonzya kupa kufwambaana kukalala, kuba akamaama, kutabona kabotu, cizyuungwe, kufwundilila, kubona zintu zitako alimwi akufwa. Kulakonzya kupa kuzibila kwalo kukonzya kusololela kukucita mulandu akaambo kakuyanda kusumpula cilengwa eeco. Izintu zikozyenye azeezyo zilacitika akaambo kakukolwa. (Tusimpi 23:29-35) Aabo bajisi bukkale buli boobo, balakonzya kuyeeya kuti balaangulukide, pele inga kwaba kumuka nobazyiba kuti baba bazike kucibi. Elo kaka cibi mmweendelezi silunya! Ikubikkila maanu kukaambo aaka lino kulakonzya kutukwabilila kukucitikilwa cintu cili boobu.—Ba-Galatiya 6:7, 8.
Mbwaatalika Mapenzi
13. (a) Ino kulombozya kusololela kumapenzi ikanjikanji kutalika buti? (b) Ino nkuzilanga munzila yani zintu kunga kwatugwasya kumvwisye ncocaamba ‘kweendaa bamineme’? (c) Nomwiingula mibuzyo iindandamikidwe mumuncali wa 13, amukankaizye mbwazilanga zintu Jehova.
13 Amuyeeye kanjikanji mbwaatalika mapenzi. Ibbaibbele lipandulula kuti: “Muntu amuntu ulatepaulwa ciindi naongelezegwa akucegwa azisusi zyakwe mwini. Lino zisusi zyasima zilazyala zibi, azyalo zibi zyakomena zilazyala lufu.” (Jemusi 1:14, 15, Ci) Ino kulombozya ooku kutalika buti? Nkwiinda muzintu nzyayeeya. Ikanjikanji eeci cilacitika akaambo kakuyanzanaa bantu batatobeli zyeelelo zya Bbaibbele. Masimpe, toonse tulizyi kuti tweelede kweeleba ‘kweendaa bamineme.’ (1 Ba-Korinto 15:33) Pele ino nkuyanzana kuli buti kubyaabi? Alimwi ino Jehova waabona buti makani aaya? Ikulanga-langa mibuzyo iitobela alimwi amagwalo aabikkidwe buyo kweelede kutugwasya kujana bwiinguzi buluzi.
Mbwaanga bamwi bantu balibonya kubaa bulemu, sena eeci caamba kuti mbalongwe babotu? (Matalikilo 34:1, 2, 18, 19)
Sena mibandi yabo naa masesya ngobacita alakonzya kutondezya kuti tweelede kuba balongwe babo? (Ba-Efeso 5:3, 4)
Ino Jehova ulimvwa buti notusala kuyanzanaa bantu ibatamuyandi? (2 Makani 19:1, 2)
Nokuba kuti tulakonzya kubeleka naa kwiiya muzikolo antoomwe abantu batatobeli nzyotusyoma, nkaambo nzi ncotweelede kucenjela? (1 Petro 4:3, 4)
Kweebelela cipekupeku amabbasikopo, kubelesya muncini wakkompyuta uubelesyegwa kubala akweebelela (Internet), kubala mabbuku, mamagazini alimwi amiteende ninzila zyakuyanzanaa bantu bamwi. Ino mmakani aali buti aajanika muzintu eezi ngotweelede kucenjelela? (Tusimpi 3:31; Isaya 8:19; Ba-Efeso 4:17-19)
Ino kusala kwesu kujatikizya bantu mbotuyanzana limwi kumutondezya kuti tuli bantu bali buti Jehova? (Intembauzyo 26:1, 4, 5; 97:10)
14. Ino ndwaanguluko luli buti ndobalangila aabo ibasyomeka ibatobela lulayo luli mu Jwi lya Leza lino?
14 Lino-lino ilasika nyika mpya ya Leza. Kwiinda mumfwulumende ya Bwami bwa Leza bwakujulu, bantu bayooangululwa kukuyungwa kwa Saatani abweende bwakwe bwazintu bubyaabi boonse. Mukuya kwaciindi, zyoonse ziletwaa cibi ziyoogwisigwa kubantu bamvwa, calo ciyoosololela kubulondosi bwamumizeezo alimwi akumubili kutegwa tukakonzye kukkomanaa buumi butamani mu Paradaiso. Kumamanino, izilenge zyoonse ziyookkomanaa lwaanguluko lweendelana cakumanininaa “Muuya wa-Mwami [Jehova].” (2 Ba-Korinto 3:17) Sena lino ncamaanu kulibikka mumapenzi aakusweekelwa zintu zyoonse eezyo akaambo buyo kakutatobela lulayo luli mu Jwi lya Leza? Kwiinda mukubelesya lwaanguluko lwesu lwa Bunakristo cabusongo sunu, toonse atutondezye caantangalala kuti ncotuyanda cini ‘ndwaanguluko lwabulemu bwabana ba-Leza.’—Ba-Roma 8:21.
Mubandi Wakwiinduluka
• Ino banabubili bakusaanguna bakajisi lwaanguluko luli buti? Ino oolo lwaanguluko lwiindene buti alwaanguluko ndobajisi bantu lino?
• Ino Banakristo bakasimpe bajisi lwaanguluko luli buti? Ino nkwiindana kuli buti kuliko akati kalwaanguluko oolu aloolo lwaambwaa bantu bamunyika kuti ndwaanguluko?
• Nkaambo nzi ncociyandika kapati kweeleba kuyanzana kubyaabi? Mukwiimpanaa Adamu wakasala cibyaabi, nkusala kwani nkotweelede kutobela?
[Mibuzyo yaciiyo]
[Zifwanikiso izili apeeji 46]
Ijwi lya Leza licenjezya kuti: “Mutalyeeni. Mweenda abamineme, anywebo mulaminama”
