Cibalo 21

Makanze aa Jehova Azwidilila Munzila Iitaliboteli

1, 2. (a) Ino Jehova ujisi makanze nzi kujatikizya zilenge zyakwe zyamaanu? (b) Ino mbaani bakabikkilizyigwa mucibeela camukwasyi uukamantene wabakombi ba Leza?

ILUYANDO lwa Jehova ndwakuti zilenge zyoonse zyamaanu kazikamantene mukukomba Leza mwini-mwini uuli alikke alimwi akuti zyoonse kazijisi lwaanguluko lwabulemu lwakwiitwa kuti mbana ba Leza. Alimwi eeco ncobalombozya aabo ibayanda bululami.

² Jehova wakatalika kuzuzikizya makanze aakwe aaya mapati naakatalika milimo yakwe yakulenga. Cilenge cakwe citaanzi wakali Mwana ooyo walo kuzwa naakabusyigwa wali “nguumwesya bulemu bwa-Leza, alimwi nguwenya ncecizibyo icizibya mbwabede Leza.” (Ba-Hebrayo 1:1-3) Ooyu Mwana wakali libedelede, mbwaanga ngowakalengwaa Leza alikke. Kuzwawaawo, nkwiinda mu Mwana ooyu izilenge zimbi zyoonse mozyakali kuyoolengelwa: ikusaanguna mbangelo kujulu mpoonya ibabili mbantu aanyika. (Jobu 38:7; Luka 3:38) Zilenge eezyi zyoonse zyakali cibeela camukwasyi omwe wakujulu aanyika. Kulizeezyi zyoonse, Jehova ngowakali Leza wazyo, Mwami Wakujulu Aansi alimwi Wisi siluyando.

3. (a) Ino ncinzi swebo toonse ncotwakakona kuzwa kubazyali besu bakusaanguna? (b) Ino mbubambe nzi bwaluyando Jehova mbwaakacitila bana ba Adamu?

³ Ciindi bazyali besu bakusaanguna nobakasinganizyigwa kufwa akaambo kakubisya acaali, bakatandwa  mu Edeni akukakwa a Leza. Tiibakacili cibeela camukwasyi wa Leza wazilenge zyoonse izyakujulu aansi. (Matalikilo 3:22-24; Deuteronomo 32:4, 5) Swebo toonse tuli luzubo lwabo, aboobo twakazyalwa katujisi tumpenda tubyaabi. Pele Jehova wakalizi kuti bamwi akati kaluzubo lwa Adamu a Eva bakali kuyooyanda bululami. Aboobo caluyando Leza wakacita bubambe kutegwa bantu bali boobu bakacikonzye kubaa “bulubulo bulemu bwabana ba-Leza.”—Ba-Roma 8:20, 21.

Israyeli Wabula Coolwe

4. Ino ncoolwe nzi Jehova ncaakapa bana Israyeli bansiku?

⁴ Imyaaka iisika ku 2,500 kuzwa ciindi Adamu naakalengwa, Jehova wakapa coolwe cilibedelede kuli bamwi bantu cakuba balongwe bakwe. Wakasala Israyeli wansiku kuba bantu bakwe alimwi wakabapa Mulawo wakwe. (Matalikilo 12:1, 2) Wakabacita kuba cisi alimwi wakababelesya mukuzuzikizya makanze aakwe. (Deuteronomo 14:1, 2; Isaya 43:1) Pele bakacili mubuzike kucibi alufwu, aboobo kunyina pe nobakabaa lwaanguluko ndwaakajisi Adamu alimwi a Eva kumatalikilo.

5. Ino mbuti bana Israyeli mbobakasweekelwa coolwe citaliboteli ncobakajisi a Leza?

⁵ Nokuba boobo, bana Israyeli bakali kuyandwaa Leza. Alimwi bakeelede kumulemeka Jehova mbwaanga wakali ngo Wisi alimwi bakeelede kupona kweelanaa makanze aakwe. Jesu wakakankaizya mbocakali kuyandika kapati kuti bauzuzikizye mukuli ooyo. (Matayo 5:43-48) Nokuba boobo, cisi cabana Israyeli cakaalilwa kucita boobo. Nokuba kuti iba Juda aabo bakali kwaamba kuti, “tulijisi Taata omwe, ngo-Leza,” Jesu wakaamba kuti micito yabo alimwi amuuya ngobakali kutondezya tiizyakali kweendelana pe ambubakali kulitaminina. (Johane 8:41, 44, 47) Mumwaka wa 33 C.E., Leza wakaulesya Mulawo,  aboobo cilongwe ncobakajisi bana Israyeli anguwe cakamana. Pele sena eeci cakali kwaamba kuti kunyina bantu bakali kuyooba balongwe ba Leza?

Kuyobolola “Zintu Zyamujulu”

6. Ino ‘bubambe’ mbwaakaamba Paulo ku Ba-Efeso 1:9, 10 bujisi mpindu nzi?

⁶ Imwaapostolo Paulo wakatondezya kuti bantu bamwi akati kabanamaleya bakali kuyoobaa cilongwe cilibedelede a Leza. Mucikozyanyo, naakali kwaamba bubambe bwa Jehova aabo bakajisi lusyomo oomo mobakali kukonzya kuba bacibeela camukwasyi Wakwe, Paulo wakalemba kuti: “[Leza wakatucita] kuti tuzibe makani aasisidwe aabukanze bwamoyo wakwe. Lulito lwakwe ndwaakalita kalekale mulinguwe ndoolu. Wakabamba kuti, casika buyo ciindi ceelede, mitwe yazintu zyoonse, niziba zintu zyamujulu niziba zintu zyaansi, ibikwe antoomwe muli-Kristo.” (Ba-Efeso 1:9, 10) ‘Bubambe’ oobu buyeeme aali Jesu Kristo. Kwiinda mulinguwe, cakonzyeka kubantu kubaa bukkale butambulika kuli Leza. Imweelwe uubalika akati kabaaba ujisi bulangizi bwakuyookkala kujulu. Pele imweelwe mupati wabantu uyookkala anyika kukabe kutamani.

7. Ino mbaani bambwa kuti “zintu zyamujulu”?

⁷ Cakusaanguna, ikutalikila lya Pentekoste mu 33 C.E., kwakabikkilwa maano “[ku]zintu zyamujulu” nkokuti, aabo bakali kuyooba basikulelanyinaa Kristo mu Bwami bwakujulu. Akaambo kakuti bakatondezya lusyomo lwabo mucipaizyo ca Jesu, Leza wakabaamba kuti baliluleme. (Ba-Roma 5:1, 2) Mukuya kwaciindi, iba Juda alimwi a Bamasi bakabikkilizyigwa, eelyo “zintu zyamujulu” zyakali kuyoosika kumweelwe uuli 144,000. (Ba-Galatiya 3:26-29; Ciyubunuzyo 14:1) Ibasyeede balikke mbabacili anyika.

 Kuyobolola “Zintu Zyaansi”

8. Ino mbaani bambwa kuti “zintu zyaansi,” alimwi ino bajisi cilongwe cili buti a Jehova?

⁸ Alimwi bubambe mbubwenya oobu buli mukuyobolola “zintu zyaansi.” Tuulunzuma twabantu bali mukuyobololwa kabajisi bulangizi bwakuyoopona anyika kukabe kutamani. Kabakamantene abasyeede basikukona Bwami, balaambilizya zina lya Jehova akusumpula bukombi bwakwe. (Isaya 2:2, 3; Zefaniya 3:9) Alimwi baita Jehova kuti “Taata” akaambo kakuti balizi kuti walo nguupa buumi. Kuyungizya waawo, balijisi bukkale butambulika kulinguwe kwiinda mulusyomo ndobajisi mubulowa bwa Jesu bwakatilwa. (Ciyubunuzyo 7:9, 14) Pele mbwaanga bacili bantu batalondokede, ikwaambwa kwabo kuti mbana ba Leza cakumaninina kucili kumbele.

9. Ino bbuku lya Ba-Roma 8:21 lijisi cisyomezyo nzi kubantu?

⁹ Lino aaba ibajisi bulangizi bwakuyookkala anyika balindila ciindi eelyo bantu nobaya ‘kulubulwa kubuzike bwabubozi.’ (Ba-Roma 8:21) Ilwaanguluko oolo luyootalika eelyo Kristo alimwi amakamu aakujulu aabaangelo baakumaniizya mapenzi mapati kwiinda munkondo ya Harmagedoni. Oolu luyooba lunyonyooko lwabweende bwazintu bubyaabi bwa Saatani, mpoonya zilongezyo zyamu Cuulu Camyaka ya Bulelo bwa Kristo mubweendelezi bwa Bwami ziyootobela.—Ciyubunuzyo 19:17-21; 20:6.

10. Ino babelesi ba Jehova baya kwiimba lwiimbo lwantembauzyo luli?

¹⁰ Elo ciyookondelezya kapati kaka ciindi babelesi ba Jehova anyika baakukamantana akwaamba majwi aababelesi bakwe bakujulu, balo cakukondwa baambilizya kuti: “Milimo yako mipati, ilagambya, Mwami Leza Singuzuzyoonse. Ziyanza zyako nzyalusinizyo, zililuleme. Nduwe Mwami waciindi coonse. Nguni uutakuyoowi, Mwami, akulemeka  izina lyako? Nkaambo nduwe olike uusalala. Ncobeni bantu bazisi zyoonse balaboola kukukomba kunembo lyako, Nkaambo imbeta zyako zyaboneka.” (Ciyubunuzyo 15:3, 4) Inzya, babelesi ba Jehova boonse bayookamantana mukukomba Leza mwini-mwini uuli alikke. Alimwi nobaba baabo bafwide bayoobusyigwa akupegwa coolwe cakutola lubazu mukwiimbila Jehova intembauzyo.—Incito 24:15.

Lwaanguluko Lutaliboteli Kumbele

11. Ino ndwaanguluko nzi lutaliboteli ndobayooba aandulo aabo bayoofwutuka mapenzi mapati?

¹¹ Aakwiinda mapenzi mapati aayo ayoomana lyankondo ya Harmagedoni, ibubi anyika buyoomana, alimwi Saatani Diabolosi takabi limbi “leza waansi ano.” Bakombi ba Jehova kunyina nobayoopenzyegwa limbi pe amicito ya Saatani mibyaabi njabelesya kuyunga bantu. (2 Bakolinti 4:4, Ci; Ciyubunuzyo 20:1, 2) Kunoonyina bukombi bwakubeja bunoobejelezya Jehova alimwi akwaandaanya bantu. Kunyina cisi naa bweendelezi bwabantunsi ibucinoopenzya naa kudyaaminina babelesi ba Leza mwini-mwini. Elo taluliboteli kaka lwaanguluko oolu iluyoobako!

12. Ino mbuti bantu boonse mbobaya kwaangululwa kucibi azintu ziboola akaambo kacibi?

¹² Mbwali “Mwanaambelele wa-Leza, uugwisya cibi cenyika,” Jesu uyoobelesya muulo wacituuzyo cakwe kumaniizya zibi zyabantu. (Johane 1:29) Jesu naakali anyika alimwi anaakali kulekelela zibi zyamuntu, wakali kuponya muntu ooyo walekelelwa kutegwa cibe citondezyo cakulekelelwa kwakwe. (Matayo 9:1-7; 15:30, 31) Munzila iikozyenye, Kristo Jesu mbwali Mwami wakujulu wa Bwami bwa Leza, munzila yamaleele uyooponya boofwu, basyaataambi, basinke matwi, balemene, basondokede alimwi abaabo bajisi malwazi aambi. (Ciyubunuzyo 21:3, 4) “Mulao wazibi”  uyoogwisyigwa kubantu boonse bamvwa ikutegwa miyeeyo yabo abukkale bwabo kabubakkomanisya alimwi akukkomanisya Leza. (Ba-Roma 7:21-23) Kuzikusika kumamanino aa Myaka iili Cuulu, bantu aaba banoolondokede kabali “mucinkozya” ca Leza mwini-mwini uuli alikke.—Matalikilo 1:26.

13. Ino ncinzi Kristo ncayoocita kumamanino aa Bweendelezi bwa Myaka iili Cuulu, alimwi ino ncinzi ciyootobela?

¹³ Kristo aakumana kupilusya bantu kubulondosi, uyoobweedezya nguzu zyabweendelezi nzyaakapegwa kuti acite mulimo ooyu kuli Wisi: “Nayootambika bwami kumaanza aa-Leza wisi, nayoolobesezya boonse beendelezi abami abasimutwe. Nkaambo uleelede kweendelezya mane do nanooyoobikide basinkondonyina boonse kunsi lyamaulu aakwe.” (1 Ba-Korinto 15:24, 25) Bweendelezi bwa Myaka iili Cuulu bwa Bwami bunoozwidilide mukucita mulimo wambubo; aboobo taicinooyandiki pe mfwulumende eeyi yakugwasyilizya akati ka Jehova abantu. Alimwi mbwaanga cibi alufwu zinoogusyidwe cakumaninina alimwi bantu banoofwutudwe, eeci ciyoopa kuti Jesu kataciyandiki pe kuba Mufwutuli wabantu. Ibbaibbele lipandulula kuti: “Elyo alakwe Mwana mwini uzoolibombya kuliyooyo iwakamubombesezya zintu zyoonse, kuti Leza abe malondwedo aazintu zyoonse.”—1 Ba-Korinto 15:28.

14. Ino ncinzi ciyoozumizyigwa kubantu boonse balondokede, alimwi ino nkaambo nzi?

¹⁴ Kuzwawaawo, bantu balondokede bayoopegwa ciindi cakuti batondezye naa kusala kwabo nkwakubelekela Leza mwini-mwini uuli alikke mane kukabe kutamani. Aboobo, katana kubatambula cakumaninina kuti babe bana bakwe, Jehova uya kubalekela bantu boonse balondokede kusunkwa musunko wamamanino. Saatani amadaimonaakwe bayooangululwa kuzwa mumulindi uutagoli. Eeci tacikapi  kuti aabo bamuyanda ncobeni Jehova bapenzyegwe kukabe kutamani pe. Pele kufwumbwa ooyo uuyoozumanana kuzangila Jehova uyoonyonyweedwa limwi antoomwe amuzangi wakusaanguna amadaimonaakwe.—Ciyubunuzyo 20:7-10.

15. Ino mbukkale buli buti buya kubako alimwi akati kazilenge zya Jehova zyakujulu alimwi azyaansi?

¹⁵ Mpoonya Jehova uyoobatambula kabali bana bakwe bantu boonse balondokede ibanookakatide kubweendelezi bwa Leza kuciindi eeco camusunko wamamanino. Kuzwa ciindi eeco, bayookkomana kapati alwaanguluko lwabana ba Leza kabali cibeela camukwasyi wazilenge zya Leza izyakujulu aansi. Baangelo boonse kujulu abantu anyika bayookamantana alimwi mukumukomba kali Leza mwini-mwini uuli alikke. Aboobo makanze aa Jehova anooli azwidilila munzila iitaliboteli! Sena mulayanda kuyooba umwi wacibeela camukwasyi ooyo uukkomene alimwi uunooliko mane kukabe kutamani? Ikuti kakuli boobo, twamukulwaizya kutobela ceeco Bbaibbele ncolyaamba kuli 1 Johane 2:17 kuti: “Nyika ilamana, azisusi zyayo, pele oyo uucita makanze aa-Taata ulakalilila kukabe kutamani.”

Mubandi Wakwiinduluka

• Ino mbulongwe buli buti bakombi ba Jehova mbobakajisi anguwe kabutanacitika buzangi mu Edeni?

• Mmukuli nzi ngobajisi babelesi ba Leza?

• Ino mbaani bacilangilwa kuyooba bana ba Leza, alimwi mbuti eeci mbociswaangene amakanze aa Jehova kujatikizya lukkamantano lwabukombi?

[Mibuzyo yaciiyo]

 [Cifwanikiso icili apeeji 190]

Bantu bamvwa bayoopona buumi bukkomanisya muparadaiso inyika yoonse mbwiizulwa