Ncolwaamba Lubbapatizyo Lwanu
Cibalo 12
Ncolwaamba Lubbapatizyo Lwanu
1. Ino nkaambo nzi umwi aumwi wesu ncayelede kubikkila maanu kulubbapatizyo lwamumeenda?
MUMWAKA wa 29 C.E., Jesu wakabbapatizigwa, wakabbizyigwa mumeenda a Johane Mubbapatizi mu Mulonga wa Jordano. Jehova mwini wakali kulangilila alimwi wakamuzumina. (Matayo 3:16, 17) Aboobo Jesu wakapa citondezyo ncobakeelede kutobela boonse basikwiiya bakwe. Nokwakainda myaka yotatwe acisela, Jesu wakapa basikwiiya bakwe malailile aaya aakuti: “Ndapegwa bwami boonse nibuba bwakujulu nibuba bwaansi. Nkaambo kaako kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala.” (Matayo 28:18, 19) Sena mwakabbapatizigwa kweelanaa mbwaakalailila Jesu? Ikuti kakutali boobo, sena muli mukulibambila kucita boobo?
2. Ikujatikizya lubbapatizyo, ino mmibuzyo nzi yeelede kwiingulwa?
2 Tacikwe makani naa mwakabbapatizigwa kale antela mulibambila buya kucita boobo, iluzibo lwini-lwini kujatikizya lubbapatizyo lulayandika kapati kuli umwi aumwi wesu uuyanda kubelekela Jehova akupona munyika yakwe mpya yabululami. Imibuzyo iiyandika kwiingulwa njeeyi yakuti: Sena ilubbapatizyo lwa Banakristo sunu lujisi bupanduluzi bukonzyenye aboobo bwa Jesu? Ino caamba nzi kubbapatizigwa “muzina lya-Taata alya-Mwana alya-Muuya Uusalala”? Ino ncinzi cijatikizyidwe mukupona kweelanaa ncolwaamba lubbapatizyo lwa Banakristo lwamumeenda?
Ilubbapatizyo Ndwaakacita Johane
3. Nkuuli bani balikke lubbapatizyo lwa Johane nkulwakagamikidwe?
3 Imyezi iitandila kucisambomwi Jesu katana bbapatizigwa, Johane Mubbapatizi wakali kukambauka munkanda yaku Judaya kaamba kuti: “Amweempwe, nkaambo kakuti Bwami bwakujulu buliswenede.” (Matayo 3:1, 2) Elyo ibantu bakamvwa eeco Johane ncaakali kwaamba, bakalutobela lulayo oolo. Bakazizumina caantangalala zibi zyabo, akweempwa alimwi akuboola kuli Johane kuti babbapatizigwe mu Mulonga wa Jordano. Lubbapatizyo oolo lwakali lwaba Juda balikke.—Luka 1:13-16; Incito 13:23, 24.
4. Ino nkaambo nzi bama Juda bamumwaanda wamyaka wakusaanguna ncobakali kuyandika kufwambaana kweempwa?
4 Iba Juda aabo bakali kuyandika kweempwa cakufwambaana. Mumwaka wa 1513 B.C.E. ku Cilundu ca Sinai, bamawisi bakapangene cizuminano—cipangano icisinizidwe cakabambwa a Jehova Leza. Pele akaambo kazibi zyabo, tiibakapona kweelanaa cipangano ncobakajisi mucizuminano eeco, aboobo bakajanwa kuti mbaasimilandu. Kuzikusikila kuciindi ca Jesu, ibukkale bwabo bwakaindilila kubija. “Buzuba bupati buyoosya bwa-Jehova” mbwaakasinsima Malaki bwakali afwaafwi. Mu 70 C.E., “buzuba” oobo bwakasika iciindi impi zyabana Roma nozyakanyonyoona Jerusalemu alimwi atempele lyakali mumo kubikkilizya abama Juda bainda kukaulunzuma. Johane Mubbapatizi, kasungweede mubukombi bwakasimpe, wakatumwa kalutanatalika lunyonyooko oolo kuti, “akabambile Jehova bantu balulamikidwe.” Bakeelede kweempwa kuzibi zyabo nkaambo kakutyola Mulawo wa Musa alimwi bakeelede kulibambila kuzumina Mwanaa Leza, Jesu walo Jehova ngwaakali kuyootuma kulimbabo.—Malaki 4:4-6; Luka 1:17; Incito 19:4.
5. (a) Iciindi Jesu naakaunka kuti abbapatizigwe, nkaambo nzi Johane ncaakadoonekela? (b) Ncinzi cakatondezyegwaa lubbapatizyo lwa Jesu?
5 Akati kabaabo bakaunka kuli Johane kuti babbapatizigwe a Jesu lwakwe kumugama wakaliko. Ino nkaambo nzi? Mbwaakazi kuti Jesu tanaakajisi cinyonyoono ncakeelede kweempwa, Johane wakaamba kuti: “Ndime enjeelede kubapatizigwa kulinduwe, anukuti yebo weza kulindime?” Pele lubbapatizyo lwa Jesu lwakali kuyooyiminina cimwi cintu ciindene. Aboobo Jesu wakaingula kuti: “Akube boobo, nkaambo kakuti mbuboobo mbutweelede kuzulizya ziluleme zyoonse.” (Matayo 3:13-15) Akaambo kakuti Jesu tanaakajisi cibi, lubbapatizyo lwakwe tiilwakali kutondezya kweempwa kucibi pe; alimwi taakwe naakali kuyandika kulyaaba kuli Leza akaambo kakuti wakali umwi wabantu bacisi cakalyaabide kale kuli Jehova. Muciindi caboobo, ilubbapatizyo lwakwe kajisi myaka iili 30 lwakaliindene alwabantu bamwi alimwi lwakali kutondezya kulipa lwakwe mwini kuli Wisi wakujulu kuti acite kuyanda Kwakwe kuyungizyidwe.
6. Ino mbuti Jesu mbwaakali musungu kukucita kuyanda kwa Leza?
6 Kuyanda kwa Leza kujatikizya Kristo Jesu kwakali kubikkilizya mulimo uuswaangene a Bwami. (Luka 8:1) Alimwi kwakali kubikkilizyaa kucita buumi bwakwe bwabuntunsi bulondokede kuba cituuzyo alimwi amusemu wacizuminano cipya. (Matayo 20:28; 26:26-28; Ba-Hebrayo 10:5-10) Jesu wakalubikkila maano kapati lubbapatizyo lwakwe lwamumeenda ncolwakali kwiiminina. Taakwe naakazumina koongelezyegwaa zintu zimwi. Ikusikila kumamanino aabuumi bwakwe anyika, wakakakatila cakusyomeka kucita kuyanda kwa Leza alimwi mulimo wakukambauka Bwami bwa Leza ngowakali mulimo wakwe mupati.—Johane 4:34.
Lubbapatizyo Lwamu Meenda lwa Basikwiiya Banakristo
7. Ikuzwa lya Pentekoste wamu 33 C.E., ncinzi Banakristo ncobakaambilwa kucita kujatikizya lubbapatizyo?
7 Basikwiiya ba Jesu bakusaanguna bakabbapatizigwa a Johane mumeenda mpoonya akubapa mumaanza aa Jesu kabali bantu bakali kulangilwa kuba cibeela ca Bwami bwakujulu. (Johane 3:25-30) Kwiinda mukulaililwaa Jesu, aaba basikwiiya abalo bakali kubbapatizya, lubbapatizyo lwabo kalujisi bupanduluzi bukozyenye aloolo ndwaakacita Johane. (Johane 4:1, 2) Nokuba boobo, ikutalikila lya Pentekoste wamu 33 C.E., bakatalika kuzuzikizya mulimo wakubbapatizya “muzina lya-Taata alya-Mwana alya-Muuya Uusalala.” (Matayo 28:19) Mulagwasyigwa kapati kwiinda mukulanga-langa ncocaamba eeco.
8. Ino caamba nzi kubbapatizigwa “muzina lya-Taata”?
8 Ino caamba nzi kubbapatizigwa “muzina lya-Taata”? Caamba kulizumina zina lyakwe, cuuno ncajisi, bweendelezi, makanze alimwi amilawo yakwe. Amulange-lange eeci ncocijatikizya. (1) Ikujatikizya izina lyakwe, Intembauzyo 83:18 yaamba kuti: “Nduwe olike oojisi izina lya-Jehova, nduwe Mupatikampatila atala anyika yoonse.” (2) Kujatikizya cuuno ncajisi, ibbuku lya 2 Bami 19:15 lyaamba kuti: “O Jehova . . . , nduwe Leza olike wamasi oonse aanyika.” (3) Kubweendelezi bwakwe, ibbuku lya Ciyubunuzyo 4:11 litwaambila kuti: “Nduwe uuelede, O Mwami, kutambula bulemu alulemeko anguzu, nkaambo nduwe wakalenga zintu zyoonse, nkaambo kabukanze bwako nkizibeda, ankizyakalengelwa.” (4) Alimwi tweelede kuziba kuti Jehova ngo Sikupa buumi, walo uukanzide kuyootwaangulula kucibi alimwi alufwu: “Lufutuko lulazwa kuli-Jehova.” (Intembauzyo 3:8; 36:9) (5) Tweelede kuzumina kuti Jehova ngo Sikupa Milawo Mupati: “Jehova ngumubetesi wesu, Jehova ngusimilao wesu, Jehova ngumwami wesu.” (Isaya 33:22) Akaambo kakuti ulijisi zyuuno zyoonse eezyo, tukulwaizigwa kuti: “Yanda Leza Jehova wako amoyo wako woonse, amoya wako woonse, amumiyeeyo yako yoonse.”—Matayo 22:37.
9. Ino caamba nzi kubbapatizigwa “muzina . . . lya-Mwana”?
9 Ino lubbapatizyo “muzina . . . lya-Mwana” caamba nzi? Caamba ikuziba izina, cuuno alimwi abweendelezi bwa Jesu Kristo. Izina lyakwe lyakuti Jesu, lyaamba kuti “Jehova Ndolufutuko.” Icuuno ncajisi wakacijana akaambo kakuti ngo Mwanaa Leza simuzyalwaalikke, imutaanzi kuzilenge zya Leza zyoonse. (Matayo 16:16; Ba-Kolose 1:15, 16) Kujatikizya Mwanaakwe, ibbuku lya Johane 3:16 litwaambila kuti: “Obuya Leza mbwaakayandisya nyika [yabantu bakonzya kufwutulwa], wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” Akaambo kakuti Jesu wakafwa kali muntu uusyomeka, Leza wakamubusya kuzwa kubafwu akumupa nguzu zitalivwulili. Kweelanaa mbwaakaamba mwaapostolo Paulo, Leza ‘wakamusumpula Jesu’ alikke mububumbo boonse ikuba wabili kuli Jehova. Nkakaambo kaako “boonse bafugame mazwi cakulemeka izina lya-Jesu . . . alimwi kuti indimi zyoonse zizumine kuti Jesu Kristo ngu-Mwami cakulemeka Leza Taateesu.” (Ba-Filipi 2:9-11) Eeci caamba kutobela milawo ya Jesu yalo iizwa kuli Jehova mwini.—Johane 15:10.
10. Ino caamba nzi kubbapatizigwa “muzina . . . lya-Muuya Uusalala”?
10 Ino caamba nzi kubbapatizigwa “muzina . . . lya-Muuya Uusalala”? Caamba ikuziba lubazu alimwi amulimo ngoujisi muuya uusalala. Ino muuya uusalala ncinzi? Ninguzu nzyabelesya Jehova kutegwa azuzikizye makanzaakwe. Jesu wakabaambila basikumutobela bakwe kuti: “Ndiyookumbila Taata, uyoomupa Mugwasyi umbi kuti akale anywebo lyoonse. Ngonguwe Muuya wabwini.” (Johane 14:16, 17) Ino eeci cakali kuyoobagwasya kucita nzi? Jesu wakayaambele kubaambila kuti: “Muyootambula nguzu, wasika alindinywe Muuya Uusalala, muyooba bakamboni bangu muno mu-Jerusalemu, amu-Judaya moonse, amu-Samariya, mane kusikila kumamanino aanyika.” (Incito 1:8) Kwiinda mukubelesya muuya uusalala, Jehova alimwi wakasololela kulembwa kwa Bbaibbele: “Teensi luyando lwamuntu lwakaleta businsimi kalekale, pe, pele bantu ba-Leza bakaamba mbobakasungulwa Muuya wa-Leza.” (2 Petro 1:21) Aboobo tulazumina lubazu lujisi muuya uusalala ciindi notwiiya Bbaibbele. Inzila imbi motuzumina muuya uusalala nkwiinda mukulomba Jehova kuti atugwasye kuzyala “micelo ya-Muuya” yalo iili “[nd]uyandano, lukondo, luumuno, busicamba, buuya, bubotu, lusyomo, lubombo, kulyeendele[zya].”—Ba-Galatiya 5:22, 23.
11. (a) Ino lubbapatizyo mazubaano lujisi bupanduluzi nzi bwini-bwini? (b) Ino mbuti lubbapatizyo mbolukozyenye akufwa alimwi akubusyigwa?
11 Ikutalikila mu 33 C.E., ibakasaanguna kubbapatizigwa kweelanaa malailile aa Jesu bakali ba Juda alimwi abama Juda bakasanduka. Teelyakalampa kuzwa ciindi eeco pe, icoolwe cakuba basikwiiya Banakristo cakapegwa kubana Samariya. Mpoonya mu 36 C.E., ikutambwa kwakayaambele akubikkilizya Bamasi batapaludwe. Kabatana kubbapatizigwa, ibana Samariya alimwi a Bamasi bakeelede kulyaaba kuli Jehova kuti bamubelekele kabali basikwiiya ba Mwanaakwe. Oobu bwazumanana kuba bupanduluzi bwalubbapatizyo lwamumeenda lwa Bunakristo mane kusikila sunu. Ikubbizyigwa cakumaniina mumeenda ncitondezyo ceelela cakuti muntu walyaaba, mbwaanga kubbapatizigwa caamba kuzikkwa munzila yacikozyanyo. Iciindi nomwabbila mumeenda mulubbapatizyo citondezya kuti mwafwa kubukkale bwanu bwakaindi. Ikugwisyigwa mumaanzi ciiminina kuti mwabusyigwa kuti mucite kuyanda kwa Leza. Oolu “lubbapatizyo lomwe” lulacitwa abaabo boonse ibaba Banakristo bakasimpe. Iciindi nobabbapatizigwa balaba Bakamboni Banakristo ba Jehova, babelesi basalidwe a Leza.—Baefeso 4:5, Ci; 2 Ba-Korinto 6:3, 4.
12. Ino lubbapatizyo lwa Banakristo lwamumaanzi lukozyenye anzyi, alimwi muunzila nzi?
12 Ilubbapatizyo luli boobo lulijisi inguzu zyakufwutula mumeso aa Leza. Mucikozyanyo, naakamana kwaamba zyakuyaka kwabwaato nkwaakacita Nowa, walo alimwi abamukwasyi wakwe mubakafwutudwa ciindi ca Zambangulwe, imwaapostolo Petro wakalemba kuti: “Maanzi aayo alikozyenye alubbapatizyo lwalo lino lumufutula nkaambo kakubuka kwa Jesu Kilisito. Lubbapatizyo oolu takuli kusanzya tombe pe, pele lulomba manjezeezya aasalala kuli Leza.” (1 Pita 3:21, Ci) Ibwaato cakali citondezyo cisinizyide cakuti Nowa wakaubeleka cakusyomeka mulimo ngwaakapegwa kuli Leza. Imulimo wakuyaka bwaato nowakamana, “[i]nyika yaciindi eciya yakanyonyoonwa kulinga[w]o, mboyakapayizigwa maanzi.” (2 Petro 3:6) Pele Nowa amukwasyi wakwe, “bace buyo, nkokuti bali lusele bakafutuka kuzwa kumaanzi.”—1 Pita 3:20, Ci.
13. Ino nkunzintu nzi Munakristo nkwafwutulwa kwiinda mulubbapatizyo lwamumaanzi?
13 Mazubaano, aabo balyaaba kuli Jehova kwiinda mukubaa lusyomo muli Kristo uubusidwe balabbapatizigwa mukutondezya kulyaaba ooko. Balazumanana kucita kuyanda kwa Leza kuyandika muciindi cesu alimwi balafwutulwa kubweende bwazintu bubyaabi. (Ba-Galatiya 1:3, 4) Tabacili munzila iisololela kulunyonyooko antoomwe abweende bwazintu oobu bubyaabi. Balikwabilidwe kulunyonyooko oolu alimwi Leza wabapa manjezeezya mabotu. Imwaapostolo Johane ulabasyomezya babelesi ba Leza kuti: “Nyika ilamana, azisusi zyayo, pele oyo uucita makanze aa-Taata ulakalilila kukabe kutamani.”—1 Johane 2:17.
Ikuzuzikizya Mikuli Yesu
14. Ino nkaambo nzi lubbapatizyo lulikke ncolutali cisinizyo calufwutuko?
14 Taali masimpe kuti lubbapatizyo ncisinizyo calufwutuko. Lulijisi mpindu lilikke eelyo muntu nalyaaba mwini cakusinizya kuli Jehova kwiinda muli Jesu Kristo alimwi akucita kuyanda kwa Leza cakusyomeka mane kusikila kumamanino. “Oyo uuliyumya kusikila kumamanino uzoofutuka.”—Matayo 24:13.
15. (a) Ino Leza uyanda nzi sunu ku Banakristo babbapatizidwe? (b) Ino mbuti mbociyandika ikuba sikwiiya Munakristo mubuumi bwesu?
15 Makanze aa Leza kuli Jesu akali kubikkilizya nzila njaakali kupona kali muntu. Wakeelede kupa buumi bwakwe mulufwu kacili cipaizyo. Caboola kulindiswe, mibili yesu yeelede kupegwa kuli Leza alimwi tweelede kuzumananaa muuya wakulyaaba kwiinda mukucita kuyanda kwa Leza. (Ba-Roma 12:1, 2) Masimpe inga katutanoociti kuyanda kwa Leza ikuti naa muziindi zimwi katupona mbuli bantu bamunyika iituzingulukide naa kujata bubi kuliyandawida zintu zyesu zyakumubili akubelekela Leza cakwiinzya buyo mulawo. (1 Petro 4:1-3; 1 Johane 2:15, 16) Iciindi mu Juda umwi naakabuzya ncaakeelede kucita kutegwa ajane buumi butamani, Jesu wakatondezya mbocakali kuyandika kupona buumi busalala. Pele wakayaambele kutondezya cimwi cintu cakali kuyandika kapati kwiindaawo: kuba sikwiiya Munakristo sikutobela Jesu. Eeco ceelede kuba cintu cipati mubuumi bwesu. Taceelede kulidwa busena azintu zyakumubili pe.—Matayo 19:16-21.
16. (a) Ino mmukuli nzi ngobajisi Banakristo boonse kujatikizya Bwami? (b) Mbuli mbokutondezyedwe amapeeji 116 alimwi a 117, ino ninzila nzi zimwi zigwasya kapati motunga twacita mulimo wa Bwami? (c) Ino tupa bumboni kunzi ciindi notutola lubazu camoyo woonse mumulimo wabukambausi?
16 Alimwi cileelede kukankaizyigwa kuti makanze Leza ngaakajisi kuli Jesu akali kubikkilizya mulimo uuyandika kapati uuswaangene a Bwami bwa Leza. Jesu mwini wakananikwa kuba Mwami. Pele ciindi naakali aanyika, awalo wakapa bumboni cabusungu ku Bwami. Tulijisi mulimo uukozyenye wakupa bumboni alimwi tulijisi kaambo kabotu ncotweelede kutola lubazu mulinguwo camoyo woonse. Kwiinda mukucita boobo, tulatondezya mbotukkomene kubweendelezi bwa Jehova alimwi aluyando lwesu kubantuma. (Matayo 22:36-40) Alimwi tulatondezya kuti tulikamantene abakombima nyika yoonse mboizulwa, boonse ibali mbakambausi ba Bwami. Toonse antoomwe nyika yoonse mbwiizulwa, tulazumanana kuya kumbele kutegwa tukajane bulumbu bwabuumi butamani anyika mu Bwami oobo.
Mubandi Wakwiinduluka
• Ino nkukozyanya nzi alimwi akwiimpana kuliko akati kalubbapatizyo lwa Jesu alimwi alubbapatizyo lwamumaanzi lwamazubaano?
• Ino caamba nzi kubbapatizigwa “muzina lya-Taata alya-Mwana alya-Muuya Uusalala”?
• Ino ncinzi cijatikizidwe mukuzuzikizya mikuli yalubbapatizyo lwamumaanzi lwa Bunakristo?
[Mibuzyo yaciiyo]
[Zifwanikiso izili apeeji 116, 117]
INZILA ZIMWI MBOTUKONZYA KWAAMBILIZYA BWAMI
Kubasazima
Kubabelesima
Kuli basicikoloma
Mumigwagwa
Kuŋandaa ŋanda
Kwiinda mukupilukila kubantu batondezya luyandisisyo
Notweendelezya ziiyo zya Bbaibbele zyaaŋanda
