“Tabali Banyika”
Cibalo 18
“Tabali Banyika”
1. (a) Ino mmajwi nzi ngaakaamba Jesu naakali kupailila basikwiiya bakwe kataninga jayigwa? (b) Ino nkaambo nzi ‘kutaba banyika’ ncokuyandika kapati?
IBUZUBA kataninga jayigwa Jesu imasiku wakabapailila basikwiiya bakwe. Mbwaanga wakalizi kuti Saatani wakali kuyoobapenzya kapati, Jesu wakaamba boobu kuli Wisi: “Nsikumbili kuti ubagwisye munyika, pele kuti ubavune kulooyo mubi. Tabali banyika mbuli mbwentali wenyika amebo.” (Johane 17:15, 16) Ino nkaambo nzi ncokuyandika kapati kuba bantu baindenyi anyika? Nkaambo kakuti Saatani ngomuleli wanyika eeyi. Banakristo tabayandi pe kuba banyika iili mubweendelezi bwakwe.—Luka 4:5-8; Johane 14:30; 1 Johane 5:19.
2. Ino mmuunzila zili buti Jesu mwaatakali wanyika?
2 Ikutaba banyika tiicakali kwaamba kuti Jesu tanaakajisi luyando kuli bamwi pe. Muciindi caboobo, wakali kuponya balwazi, kubusya bafwide alimwi akuyiisya bantu zya Bwami bwa Leza. Alimwi mane wakaaba buumi bwakwe akaambo kabantu. Pele tanaakali kubuyanda bukkale bubyaabi alimwi amicito iitali yabunaleza yabaabo bakali kutondezya muuya wanyika eeyi ya Saatani. Aboobo, wakacenjezya kuzintu mbuli kutalilemeka, ikuyandisya zintu zyakumubili alimwi akulombozya kubaa mpuwo. (Matayo 5:27, 28; 6:19-21; Luka 20:46, 47) Alimwi tacigambyi buya pe kuti Jesu tanaakali kutola lubazu mutwaambo twacisi munyika eeyi. Nokuba kuti wakali mu Juda, kunyina naakatola lubazu mumazwanga aatwaambo twacisi aakaliko akati kabana Roma alimwi aba Juda.
“Bwami Bwangu Tabuli Bwaansi Ano”
3. (a) Ino mulandu nzi basololi babukombi bwaba Juda ngobakamupa Jesu kuli Pilato, alimwi ino nkaambo nzi? (b) Ino ncinzi citondezya kuti Jesu tanaakali kuyanda kuba mwami muntunsi?
3 Amulange cakacitika ciindi ibasololi babukombi bwaba Juda nobakajata Jesu akumutola kumweendelezi muna Roma wazina lya Ponto Pilato. Ibwini mbwakuti, ibeendelezi aabo bakacimwa akaambo kakuti Jesu wakayubununa nzyibakali kusisikizya. Ikutegwa bakulwaizye mweendelezi kubweza ntaamu kuli Jesu, bakamupa mulandu kwiinda mukwaamba kuti: “Twakamujana oyu ulengawida cisi cesu, ukasya kupa Kaisara mutelo, uamba kuti, Ndime Kristo Mwami.” (Luka 23:2) Masimpe oobu bwakali bubeji nkaambo kakuti kakwiindide mwaka omwe musyule ciindi bantu nobakali kuyanda kumubikka kuti abe mwami, Jesu wakakaka. (Johane 6:15) Wakalizi kuti wakali kuyooba Mwami wakujulu kumbele. (Luka 19:11, 12) Alimwi Jehova nguwakali kuyoomubikka kuba Mwami ikutali bantu pe.
4. Ino Jesu wakali kukubona buti kupa mitelo?
4 Kakusyeede buyo mazuba otatwe kuti Jesu ajatwe, iba Farisi bakasoleka kumujanina kaambo Jesu mumakani aakutapa mitelo. Pele wakaamba kuti: “Amunditondezye sheleni [idi lyabana Roma]. Ino lijisi cikozyano cani, abulembo mbubwani?” Nobakaamba kuti “Nzizya-Kaisara,” Jesu wakaingula kuti: “Mbubo, amupe Kaisara zintu zya-Kaisara, akuli-Leza zintu zya-Leza.”—Luka 20:20-25.
5. (a) Nciiyo nzi Jesu ncaakabayiisya basikwiiya bakwe ciindi naakajatwa? (b) Ino mbupanduluzi nzi Jesu mbwaakapa kujatikizya ntaamu njaakabweza? (c) Ino ncinzi cakatobela musunko ooyo?
5 Peepe, Jesu tanaakayiisya kuzangila bweendelezi bwamunyika pe. Iciindi basikalumamba alimwi abamwi baalumi nobakaboola kuti bajate Jesu, Petro wakasomona panga mucikanda calyo akugonka umwi wabaalumi, wamukosola kutwi. Pele Jesu wakaamba kuti: “Bwedezya ipanga lyako mucikanda calyo, nkaambo boonse babweza ipanga bazoovwinyaunwa kupanga.” (Matayo 26:51, 52) Ibuzuba bwakaccilila Jesu wakamupandulwida Pilato icakapa kuti acite boobo, eelyo naakaamba kuti: “Bwami bwangu tabuli bwaansi ano, bwami bwangu nobwali bwaansi ano, abazike bangu nobandilwanina, kuti entatolwa [a]ba-Juda.” (Johane 18:36) Pilato wakazumina kuti ‘tanaakajana kaambo’ nkobakali kumutamikizya Jesu. Pele akaambo kakuyoowa nkamu yabantu, Pilato wakazumizya kuti Jesu akankaminwe.—Luka 23:13-15; Johane 19:12-16.
Basikwiiya Batobela Busolozi bwa Jesu
6. Ino mbuti Banakristo bakusaanguna mbobakatondezya kuti bakali kuukaka muuya wanyika kakuli ibantu balo bakali kubayanda?
6 Aboobo basikwiiya ba Jesu bakaciteelelesya ncocakali kwaamba kutaba banyika. Cakali kwaamba kukaka muuya uutali wabunaleza alimwi amicito yanyika, yalo yakali kubikkilizya zisobano zyakulwana alimwi abwaamu izyakali kucitika mumabbuwa aakusobanina aabana Roma. Akaambo kakukaka kujatikizyigwa mumicito yakulikondelezya iili boobo, basikwiiya bakaambwa kuti mbantu basulaika bantunyina. Pele kunyina nobakali kubasulaika bantunyina pe, muciindi caboobo bakali kubeleka canguzu kugwasya bamwi kuti abalo bagwasyigwe kububambe bwa Leza bwalufwutuko.
7. (a) Ino ncinzi cakabacitikila basikwiiya bakusaanguna akaambo kakutaba banyika? (b) Ino bakali kubabona buti beendelezi bazisi alimwi akutela mitelo, alimwi ino nkaambo nzi?
7 Mbubonya mbuli Jesu, basikwiiya bakwe abalo bakapenzyegwa ikanjikanji akaambo kakuti beendelezi bamfwulumende bakali kupegwa makani aalubide. Nokuba boobo, imwaka wamu 56 C.E. kuuyanda kusika, imwaapostolo Paulo wakalembela Banakristo mu Roma, ikubakulwaizya ‘kulibombya kumaami aacisi naa [beendelezi bazisi]. Nkaambo taakwe bwami cita buzwa kwa-Leza.’ Takuli kwaamba kuti Jehova nguuwaanza mfwulumende zyabantunsi pe, pele ulazizumizya kweendelezya kusikila leelyo nokuyooba Bwami bwakwe bulikke ibweendelezya nyika yoonse mbwiizulwa. Cakweelela, Paulo wakalaya Banakristo kulemeka beendelezi bamunyika alimwi akutela mitelo.—Ba-Roma 13:1-7; Tito 3:1, 2.
8. (a) Ino Banakristo beelede kulibombya kusikila aali kumami aacisi? (b) Ino mbuti Banakristo bakusaanguna mbobakatobela citondezyo ca Jesu?
8 Pele, ikulibombya kubeendelezi bazisi kweelede kubaa mpokujinkila, ikutali kwakumaninina buya pe. Nokuli kukazyanya akati kamilawo ya Jehova alimwi aya bantu, aabo babelekela Jehova beelede kumvwida milawo ya Leza. Amubone ncolyaamba bbuku litegwa On the Road to Civilization—A World History kujatikizya Banakristo bakusaanguna: “Banakristo bakali kukaka kutola lubazu mumilimo imwi njobakeelede kucita basicisi bana Roma. Banakristo . . . bakacibona kuti nkusotoka mulawo uujatikizya lusyomo lwabo kunjila mumulimo wabusikalumamba. Tiibakali kuzumina pe kubaa zyuuno mubweendelezi bwatwaambo twacisi. Tiibakali kuzumina kukomba mwami wacisi.” Iciindi nkuta mpati yaba Juda ‘noyakabalailila’ basikwiiya kuti baleke kukambauka, bakaingula kuti: “Tuleelede kumvwa Leza kwiinda bantu.”—Incito 5:27-29.
9. (a) Ino nkaambo nzi Banakristo bamu Jerusalemu ncobakabweza ntaamu kuzwa mumunzi mumwaka wa 66 C.E.? (b) Ino mmuunzila nzi eeco mocili citondezyo ciyandika kapati?
9 Ikujatikizya mazwanga aacitika muzisi alimwi ankondo zilwanwa, basikwiiya kunyina nokuceya nobakatola lubazu. Mumwaka wa 66 C.E., iba Juda mu Judaya bakazangila Kaisara. Cakufwambaana basikalumamba bana Roma bakauzinguluka munzi wa Jerusalemu. Ino ncinzi ncobakacita Banakristo bakali mumunzi ooyo? Bakayeeya malailile aa Jesu aakuti bakeelede kuzwa mumunzi. Iciindi bana Roma nobakapiluka kwaciindi cili mbocibede, Banakristo bakatijila kumalundu aaku Pela mutalaa Mulonga wa Jordano. (Luka 21:20-24) Ikutatola lubazu kwabo mutwaambo twacisi ncitondezyo cibotu ku Banakristo basyomeka bakali kuzyooba kumbele.
Banakristo Tabeelede Kutola Lubazu Mumazwanga Aamumasi Kumazubaano Aakumamanino
10. (a) Ino mulimo nzi Bakamboni ba Jehova mobali kutola lubazu, alimwi ino nkaambo nzi? (b) Ino muumakani aali mobatatoli lubazu?
10 Sena kuli makani aaliko aatondezya kuti kuli nkamu yabantu kumazubaano aakumamanino ibali mukusoleka kwiiya Banakristo bakusaanguna mukutatola lubazu nokuceya mumazwanga aamumasi? Inzya, Bakamboni ba Jehova bali kucita oobo. Muciindi eeci coonse, bazumanana kukambauka kuti Bwami bwa Leza bulikke mbobuyooleta luumuno, kuzwidilila alimwi alukkomano lutamani kubantu bayandisya bululami. (Matayo 24:14) Pele kumakani aamazwanga aaliko akati kamasi, bazumanana kutaba kulubazu luli loonse.
11. (a) Ino Bakamboni baindene buti amicito yabasololi bazikombelo mumakani aakutatola lubazu mutwaambo twacisi? (b) Ino Bakamboni ba Jehova bakubona buti kujatikizyigwa nkobacita bamwi mutwaambo twacisi?
11 Mukwiindana kapati, ibasololi bamuzikombelo zyanyika eeyi balijatikizyidwe kapati mumakani aatwaambo twacisi. Mumasi aamwi, bali kubagwasyilizya kapati aabo bayanda kusalwa muzyuuno zyabweendelezi alimwi akukasya bamwi kucita boobo. Ibasololi bazikombelo bamwi mane balijisi buya azyuuno mumfwulumende. Ibamwi bali kuyunga basitwaambo twacisi kuzumizya kumwaigwa kwamapulogilamu ngobayanda basololi bazikombelo. Nokuba boobo, Bakamboni ba Jehova tabatoli lubazu mutwaambo twacisi. Alimwi tabazitongooki zintu nzyobacita bamwi naa kubakasya kunjila munkamu imwi yatwaambo twacisi, ikuyanda kubaa cuuno mumfwulumende yacisi, naa kutola lubazu mukuvwoota nokusalwa beendelezi. Jesu wakaamba kuti basikwiiya bakwe tabakooyooba banyika, aboobo Bakamboni ba Jehova tabatoli lubazu pe mutwaambo twacisi.
12. Ino ncinzi cacitika akaambo kakuti zikombelo zyamunyika eeyi zitola lubazu mutwaambo twacisi?
12 Mbubonya Jesu mbwaakasinsima, kwaciindi aciindi masi alikulwana. Notuba tubunga twamuzisi mumwenya twali kulwana. (Matayo 24:3, 6, 7) Kwaziindi zinji, basololi babukombi bagwasyilizya cisi cimwi naa kabunga kamwi kubukila bamwi, akukulwaizya basikubatobela kucita mbubonya. Ino ncinzi cacitika? Ibantu bamucikombelo comwe bali kujayana lwabo akaambo buyo kakwiindana kwazisi nkobazwa naa musyobo. Eeci taceendelani pe anzyayanda Leza.—1 Johane 3:10-12; 4:8, 20.
13. Ino ncinzi bumboni ncobutondezya kujatikizya kutatola lubazu kwa Bakamboni ba Jehova mutwaambo twacisi?
13 Nokuba boobo, Bakamboni ba Jehova taakwe nobali kutola lubazu mumazwanga oonse. Ngazi Yamulindizi yamu Cingisi yamu November 1, 1939 yakaamba kuti: “Boonse aabo bali kulubazu lwa Mwami tabakooyootola lubazu munkondo zyazisi.” Bakamboni ba Jehova bazumanana kucita oobo mumasi oonse alimwi amubukkale bwabo boonse. Kunyina nobazumizya twaambo twacisi alimwi ankondo zyalo izyaandaanya bantu kunyonganya bunyina bwabo bwanyika yoonse. ‘Bafwula mapanga aabo kuba maamba aakulimya, amasumo aabo kuba zizibyo zyamasamu.’ Mbwaanga tabatoli lubazu mutwaambo twacisi, tabaiyi nkondo pe.—Isaya 2:3, 4; 2 Ba-Korinto 10:3, 4.
14. Ino ncinzi cabacitikila Bakamboni ba Jehova akaambo kakuba bantu baindenyi anyika?
14 Ino ncintu nzi cimwi cacitika akaambo kakutatola lubazu kwabo mumazwanga aamucisi? Jesu wakaamba kuti: “Nkaambo tamuli bayeeyi nyika, . . . inyika nciimusulide.” (Johane 15:19) Bakamboni ba Jehova banji baangwa akubikkwa muntolongo akaambo kakuti mbabelesi ba Leza. Ibamwi bali kupenzyegwa calunya, mane akujaigwa buya mbubonya mbocakacitika ku Banakristo bamumwaanda wamyaka wakusaanguna. Eeci cili boobo akaambo kakuti Saatani, “leza waansi aano” ulabakazya babelesi ba Jehova, ibatali banyika eeyi.—2 Bakolinti 4:4, Ci; Ciyubunuzyo 12:12.
15. (a) Ino ncinzi ciya kucitika kumasi oonse ino-ino, alimwi ncinzi Bakamboni ba Jehova ncobabikkilide maano kuti bataciti? (b) Ino nkaambo nzi makani aakuba bantu baindenyi anyika ncaali mapati?
15 Bakamboni ba Jehova balikkomene kuti tabali banyika, nkaambo kayi masi aamunyika oonse alaafwaafwi kunyonyoonwa lya Harmagedoni. (Daniele 2:44; Ciyubunuzyo 16:14, 16; 19:11-21) Tuyookwabililwa kulunyonyooko oolo akaambo kakuti tuli bantu baindenyi anyika. Mbotuli bantu bakamantene munyika yoonse, tulasyomeka kubweendelezi bwa Bwami bwa Leza bwakujulu. Masimpe, akaambo kakutaba banyika tulasampaulwa alimwi akupenzyegwa. Pele zyoonse eezyo ziyoomana ino-ino mbwaanga nyika eeyi mbyaabi yeendelezyegwaa Saatani iyoonyonyoonwa cakumaninina. Kulubazu lumwi, aabo babelekela Jehova bayoopona kukabe kutamani munyika yakwe mpya yabululami yeendelezyegwaa Bwami bwa Leza.—2 Petro 3:10-13; 1 Johane 2:15-17.
Mubandi Wakwiinduluka
• Ino mbuti Jesu mbwaakatondezya ncocaamba ‘kutaba wanyika’?
• Ino mbuti Banakristo bakusaanguna mbobakali kulanga (a) muuya wanyika, (b) beendelezi bazisi, alimwi (c) akupa mitelo?
• Ino muunzila zili buti Bakamboni ba Jehova mazubaano mobapa bumboni bwa Bunakristo bwakutaba kulubazu luli loonse mumazwanga aamumasi?
[Mibuzyo yaciiyo]
[Cifwanikiso icili apeeji 165]
Jesu wakapandulula kuti walo alimwi abasikumutobela bakwe ‘tiibakali banyika’
