‘Ciindi Calubeta’ Casika

IBBUKU lyamamanino mu Bbaibbele lya Ciyubunuzyo lituzyibya kuti imungelo uuluka mumulenga-lenga ujisi “Makani Mabotu aateeli” aakukambauka. Ajwi lipati waamba kuti: “Amuyoowe Leza akumupa bulemu, nkaambo casika ciindi calubeteko lwakwe.” (Ciyubunuzyo 14:6, 7) Eeco ‘ciindi calubeta’ cibikkilizya kwaambilizyigwa alimwi akucitwa kwalubeta lwa Leza. Ikucitwa kwalubeta kunooli ngamamanino aa “mazuba aakumamanino,” iciindi ncotupona lino.—2 Timoteo 3:1.

‘Iciindi calubeta’ mmakani mabotu kubantu bayanda bululami. Nciindi Leza nayoolemununa babelesi bakwe ibapenga mubukkale oobu buliko munyika ibwalunya alimwi imunyina luyando.

Lino ‘ciindi calubeta’ nocitana kumana lyalunyonyooko lwabukkale oobu bubyaabi, tukulwaizyigwa kuti: “Amuyoowe Leza akumupa bulemu.” Sena mulacita oobo? Eeci cibikkilizya zintu zinji kunze lyakwaamba buyo kuti, “Ndisyoma muli Leza.” (Matayo 7:21-23; Jakobo 2:19, 20) Ikuyoowa Leza kuluzi kweelede kutupa kumulemeka kapati. Kweelede kutupa kutantamuka bubi. (Tusimpi 8:13) Kweelede kutugwasya kuyandisya zibotu alimwi akusula zintu zibyaabi. (Amosi 5:14, 15) Ikuti katumulemeka Leza, tunoomuswiilila kapati. Tatukajati bubi azintu zimbi akuleka kubala Jwi lyakwe, Ibbaibele ciindi coonse. Tunoomusyoma lyoonse alimwi camoyo woonse. (Intembauzyo 62:8; Tusimpi 3:5, 6) Aabo ibamulemeka ncobeni bamubona kuti Mmulengi wajulu anyika, Mwami Wakujulu Aansi alimwi caluyando balalibombya kulinguwe kali Mweendelezi wamaumi aabo. Ikuti twabona kuti tweelede kubikkila maanu kapati kuzintu eezyi, atufwambaane kucita boobo cakutasowa ciindi.

Iciindi cakucita lubeta imungelo ncaakaamba alimwi ciitwa kuti “[m]buzuba bwa-Jehova.” “Buzuba” oobo bwakasikila Jerusalemu yansiku mu 607 B.C.E. akaambo kakuti ibakali kukkala mumo tiibakakutobela kucenjezya kwa Jehova nkwaakacita mubasinsimi bakwe. Kwiinda mukusumpya buzuba bwa Jehova mumizeezo yabo, bakaindila kulibikka muntenda. Jehova wakabacenjezyede kuti: “Buli kufwaafwi, bulafwambaana loko kusika.” (Zefaniya 1:14) Abumbi “buzuba bwa-Jehova” bwakasikila Babuloni yansiku mu 539 B.C.E. (Isaya 13:1, 6) Kabasyoma malambo aabo alimwi abaleza babo, bana Babuloni bakakuunduluzya kucenjezya kwakapegwa abasinsimi ba Jehova. Pele mubuzuba bomwe buyo masiku, Babuloni mupati wakazundwa aba Mediya aba Persia.

Ino ncinzi citugeme sunu? ‘Mbuzuba bwa-Jehova’ bumbi bupati kwiinda oonse. (2 Petro 3:11-14) Lubeta lwa Leza lwaambilizyigwa kujatikizya “Babuloni, munzi oyo mupati.” Kweelana abbuku lya Ciyubunuzyo 14:8, imungelo waamba kuti: “Wawa Babuloni, munzi oyo mupati.” Eeco cakacitika kale. Kunyina nacikonzya kusinkilila bakombi ba Jehova. Ikubija kwakwe alimwi akujatikizyigwa munkondo zyabonwa koonse-koonse. Ilunyonyoono lwakwe lulaafwaafwi lino. Akaambo kaceeco, Ibbaibbele likulwaizya bantu koonse-koonse kuti: “Kamuzwa mulinguwe [Babuloni Mupati] . . . kuti mutavwelanizigwi azibi zyakwe, mutapenzegwi azipenzyo zyakwe. Nkaambo zibi zyakwe zyatanta kujulu, lino sunu Leza waiyeeya milandu yakwe.”—Ciyubunuzyo 18:4, 5.

Ino Babuloni Mupati Ninzi? Mbukombi bwanyika yoonse ibujisi tumpenda twa Babuloni wansiku. (Ciyubunuzyo, zyaandaano 17, 18) Amulange-lange kukozyanya kumwi kuliko:

• Bapaizi bamu Babuloni yansiku bakalijatikizyidwe kapati mutwaambo twacisi mobakali  kukkala. Mbocibede muzikombelo zinji sunu.

• Bapaizi bamu Babuloni ziindi zinji bakali kukulwaizya nkondo zyamucisi. Bukombi bwamazuba aano lyoonse buli kumbele mukuleleka basikalumamba eelyo zisi nozyilwana.

• Injiisyo alimwi amicito yamu Babuloni yansiku zyakasololela cisi mukutalilemeka kutaambiki. Eelyo basololi bazikombelo sunu nobatatobeli zyeelelo zya Bbaibbele zyakulilemeka, ikutalilemeka kwavwula akati kabasololi bazikombelo alimwi abasizikombelo buyo. Acimbi ciyandika ncakuti akaambo kakuti Babuloni Mupati uli mbuli muvwuule kunyika alimwi amfwulumende zyayo, ulatondezyegwa kali sikuvwuula mubbuku lya Ciyubunuzyo.

• Alimwi Bbaibbele lyaamba kuti Babuloni Mupati upona buumi ‘bwakulitakaazya loko.’ Mu Babuloni yansiku, ibubambe bwatempele bwakali kujatikizya busena bupati, eelyo bapaizi bakaba ampuwo mumilimo yamakwebo. Mazuba aano, kunze lyamasena aakukombela, Babuloni Mupati ulijisi zintu zinji mwacitila makwebo. Injiisyo zyakwe alimwi amazuba aakulyookezya amuletela mali manji walo abasimwakwebo boonse.

• Ikubelesya zikozyanyo, masalamuzi akusonda zyakalidumide mu Babuloni yansiku mbubwenya mbozidumide mumasena manji sunu. Ikufwa kwakali kubonwa kuti ninzila buyo iitola kubuumi bumbi. Babuloni yakazwide matempele aakukombela baleza bakwe, pele bana Babuloni bakabakazya bakombi ba Jehova. Eezyi nzyezicisyomwa akucitwa muli Babuloni Mupati wasunu.

Kuciindi cansiku, Jehova wakeendelezya zisi zipati alimwi zyanguzu ikusubula baabo ibakazumanana kutamumvwida akuunduluzya kuyanda kwakwe. Aboobo Samariya yakanyonyoonwa abana Asuri mu 740 B.C.E. Jerusalemu yakanyonyoonwa abana Babuloni mu 607 B.C.E. alimwi abana Roma mu 70 C.E. Eelyo Babuloni awalo wakazundwa aba Mediya aba Persia mu 539 B.C.E. Kujatikizya ciindi cesu, Ibbaibbele lisinsima kuti imfwulumende zyamunyika, mbuli cinyama ziyoobukila “mwanakazi sikuvuula” akumusiya acinswe, nkokuti kumutondezya bwini mbwabede. Ziyoomunyonyweeda limwi.—Ciyubunuzyo 17:16.

Sena mfwulumende zyamunyika ziyoocicita ncobeni eeco? Ibbaibbele lyaamba kuti ‘Leza uyooubikka mumyoyo yabo muzeezo ooyu.’ (Ciyubunuzyo 17:17) Ciyoocitika campoona-mpoona, cinoogambya, cinoolamya, tacinoolangilwi pe naa kucitika muzibeela-beela.

Ino nintaamu nzi nzyomweelede kubweza? Amulibuzye kuti: ‘Sena ndicibalilwa kumbunga yabukombi iiyiisya njiisyo akucita zintu iziitondezya kuti ncibeela ca Babuloni Mupati?’ Neliba leelyo nomutabalilwi kulinguwe, mulakonzya kulibuzya kuti: ‘Sena ndilekela muuya wakwe kundeendelezya?’ Muuya uuli buti? Ngwakuzumina kutalilemeka, kuyandisya buvwubi akulikondelezya muciindi cakuyanda Leza, naa wakuunduluzya Jwi lya Jehova (nomuba muzintu zilibonya kuti nziniini). Amukkale ansi kuyeeya kujatikizya kwiingula kwanu.

Ikutegwa tukkomaninwe a Jehova, cilayandika kapati kuti nzyotucita azilombozya moyo wesu kazitondezya kuti mmasimpe tatuli cibeela ca Babuloni Mupati. Tacili ciindi cakuwayawaya. Ikutucenjezya kuti mamanino ayooboola campoona-mpoona, Ibbaibbele lyaamba kuti: “Obu mbuuyoocitigwa munzi mupati Babuloni. Uyoowisigwa bbu, tuukooyoojanwa limbi pe.”—Ciyubunuzyo 18:21.

 Kuli zimbi ziyoocitika. Mucibeela cimbi ‘caciindi calubeta,’ Jehova Leza uyoobeteka mfwulumende, ibeendelezi bazyo alimwi aboonse ibaunduluzya bweendelezi bwakwe buluzi kwiinda mu Bwami bwakwe bwakujulu ibweendelezyegwa a Jesu Kristo. (Ciyubunuzyo 13:1, 2; 19:19-21) Icilengaano cabusinsimi icilembedwe kuli Daniele 2:20-45 citondezya bweendelezi bwamasi kuzwa kuciindi ca Babuloni yansiku kusikila sunu mucibumbwa cipati cijisi zibeela zyangolida, nsiliva, mukuba, butale alimwi abulongo. Ikujatikizya ciindi ncotupona, ibusinsimi bwakaamba kuti: “Leza wakujulu uyoobusya bwami butakooyoonyonyoonwa abuniini mane kukabe kutamani.” Alimwi kujatikizya ncobuyoocita Bwami oobo ‘lyaciindi calubeta’ lwa Jehova, Ibbaibbele lyaamba kuti: “Buyoopwayaula akumanisya mami aya [aabantu] oonse, alimwi bwalo buyooima nji kukabe kutamani.”—Daniele 2:44.

Ibbaibbele licenjezya bakombi bakasimpe kuti batayandi “zintu zyamunyika,” nkokuti ibukkale bukulwaizyigwa anyika eeyi iizandukide kuli Leza wakasimpe. (1 Johane 2:15-17) Sena nzyomusala anzyomucita zitondezya kuti muli kulubazu lwa Bwami bwa Leza cakumaninina? Sena masimpe mububikka mubusena butaanzi mubuumi bwanu?—Matayo 6:33; Johane 17:16, 17.

[Kabbokesi kali apeeji 14]

Ino Mamanino Ayoosika Lili?

“Kuciindi ncimutezi nciconya ncazoosika Mwana a-Muntu.”—Matayo 24:44.

“Amulangile, nkaambo tamuzi buzuba niciba ciindi.”—Matayo 25:13.

“Tacikooyoocedelelwa pe.”—Habakuku 2:3.

[Kabbokesi kali apeeji 14]

Sena Nomucincide Bukkale Nomwali Buzyi Buzuba?

Ikuti nomwalizyi kuti lubeta lwalunyonyooko lwa Leza ilulangilwa talukoocitika kwamyaka iili mbwiibede, sena eeco nocacinca mbomupona? Ikuti mamanino aabukkale bwamunyika oobu bubyaabi tanaacitika mbuli mbomwali kuyeeyela, sena eeci mwacilekela kumupa kutolwaala mumulimo wa Jehova?—Ba-Hebrayo 10:36-38.

Ikutazyiba ciindi cini kutupa coolwe cakutondezya kuti tubelekela Leza amakanze mabotu. Ibalongwe ba Jehova balizyi kuti ikutondezya busungu kucitwa naali afwaafwi mamanino takukamukkomanisyi pe Leza, ooyo uubona zili mumoyo.—Jeremiya 17:10; Ba-Hebrayo 4:13.

Kuli baabo ibamuyanda ncobeni Jehova, ngomuntu ngobabikkila maanu kusaanguna mubuumi bwabo. Mbubwena mbuli bantu bambi, Banakristo bakasimpe balakonzya kucita mulimo wakumubili. Nokuba boobo, imbaakani yabo taili yakuti bavwube, pele njakuti kabajisi zyakumubili nzyobeelede alimwi azimwi zyakwaabila bamwi. (Ba-Efeso 4:28; 1 Timoteo 6:7-12) Alimwi balajatikizyigwa mukusobana kwabulemu alimwi akucinca nzyobacita, pele bacita boobo kutegwa bakatalukwe, ikutali kutobela kufwumbwa zicita bambi. (Marko 6:31; Ba-Roma 12:2) Mbubwenya mbuli Jesu Kristo, bakkomanina kucita kuyanda kwa Leza.—Intembauzyo 37:4; 40:8.

Banakristo bakasimpe bayanda kupona akubelekela Jehova kukabe kutamani. Tabaleki kubukkomanina bulangizi oobo neliba leelyo nobeelede kulindila bulumbu kwaciindi cilamfwu kwiinda mbobali kweezyeezya bamwi.

 [Kabbokesi/Cifwanikiso icili apeeji 15]

Ikaambo Kajatikizya Bweendelezi

Ikutegwa tukateelele kaambo Leza ncazumizyila kupenga kunji boobu, tweelede kuteelela kaambo kajatikizya bweendelezi. Ino bweendelezi ninzi? Nkwiinda bamwi munguzu.

Akaambo kakuti Jehova Mmulengi, ulijisi nguzu zyakweendelezya nyika azyoonse zili mpawo. Nokuba boobo, Ibbaibbele lipandulula kuti kakucili kumatalikilo kwabantu, ibweendelezi bwa Jehova bwakazumbauzyigwa. Saatani Diabolosi wakaamba kuti Jehova wakali kuciindizya kukasya, ikuti wakabeja kubazyali besu bakusaanguna kujatikizya cakali kuyoobacitikila nobakasotoka mulawo wa Leza akucita zintu munzila yabo beni alimwi akuti cakali kuyooinda kubota ikuti nobakali kulyeendelezya lwabo muciindi cakweendelezyegwa a Leza.—Matalikilo, zyaandaano 2, 3.

Ikuti Leza naakabajaya basikuzanga ndilyonya, eeco nocakatondezya nguzu zyakwe pele nocatakatumanizya twaambo twakatalikide. Muciindi cakubanyonyoona basikuzanga ndilyonya eelyo, Jehova walekela kuti zilenge zyamaanu zyoonse zilibonene cicitika akaambo kakuzanga. Nokuba kuti eeci cajatikizya akupenga, alimwi cakapa coolwe cakuti tuzyalwe.

Kunze lyaboobo, cakulyaaba Jehova caluyando wakacita bubambe bwakuti bantunsi ibakali kuyoomumvwa akusyoma mucinunuzyo cacipaizyo ca Mwanaakwe bakaangululwe kucibi azyoonse ziboola ancico akuyookkala mu Paradaiso. Ikuti kwayandika, eeco inga caba kwiinda mububuke kuzwa kubafwu.

Ikulekela kuti kwiinde ciindi cakumanizya kaambo alimwi kwapa babelesi ba Leza coolwe cakutondezya kuti balakonzya kwiingula kuluyando lwa Leza alimwi akutondezya kusyomeka kwabo kuli Jehova mubukkale buli boonse. Ikumanizyigwa kwakaambo kabweendelezi bwa Leza antoomwe akaambo kambi kakozyenye kakusyomeka kwabantunsi kulayandika ikutegwa milawo ilemekwe bweelede mububumbo boonse. Ikuti kiitalemekwi, kunyina luumuno lwini-lwini nolunga lwakonzyeka. *

Bupanduluzi buyungizidwe

[Cifwanikiso]

Ibubambe bwamfwulumende munyika yoonse buyoonyonyoonwa