Ino Nkuli Nkomutozya Mubuumi?

• Ibantu banji bajisi bubi muzintu zyabuumi zyabuzuba abuzuba cakuti tababikkili maanu ankobagama.

• Ibbaibbele lilatuzyibya kujatikizya zintu zibotu izili kumbele. Alimwi lilatucenjezya kujatikizya kucinca kupati kulangilwa kucitika nyika yoonse mubweendelezi bwabantu. Ikutegwa tugwasyigwe aluzibo oolu akutacitikilwa mapenzi, kuyandika kubweza ntaamu iigaminide.

• Nkobali bantu bacizyi ncolyaamba Bbaibbele alimwi ibasoleka kulitobela pele ibalekela mapenzi aamubuumi kubanyonganya.

• Sena mulikkomene kujatikizya nkomutozya mubuumi? Nomulibambila zyakucita, sena mulabikkila maanu izintu eezyo mbozikonzya kweendelezya mbaakani zyanu zyamubuumi izimujatikizya kwaciindi cilamfwu?

[Kabbokesi/Zifwanikiso izili apeeji 9]

Ino Ncinzi Ncomuyandisya?

Ino eezyi zitobela inga mwazibikka aali? Amuzibikke mpozyeelede kweelana amboziyandika.

Izinji zilayandika mubuumi, pele nomuyandika kusala, ino nciicili mumulongo ncomubikka mubusena bwakusaanguna, ibwabili, bwatatu abutobela?

․․․ Kulikondelezya/kusobana

․․․ Mulimo wangu naa lwiiyo

․․․ Buzumi bwangu

․․․ Kulikkomanisya

․․․ Ngotukwetene limwi

․․․ Bazyali bangu

․․․ Bana bangu

․․․ Ŋanda mbotu, zyakusama zibotu

․․․ Ikwiinda boonse muzintu zyoonse nzyondicita

․․․ Kukomba Leza

 [Kabbokesi kali apeeji 10, 11]

Sena Ikusala Kwanu Kumusololela Kwini Nkomuyanda Kuunka?

AMULANGE-LANGE MIBUZYO EEYI

KULIKONDELEZYA/KUSOBANA: Sena zyakulikondelezya nzyondisala zilandikatalusya? Sena zijatikizya zyeenzya masusu izinga zyabikka buumi bwangu muntenda nokuba kundilemanizyila limwi? Sena “nkulikkomanisya” kwaaciindi cisyoonto buyo pele ikukonzya kuletela mapenzi aatamani? Nokuba kuti kulikondelezya nkondisala kuli buyo kabotu, sena nditola ciindi cilamfwu cakuti ndinyina ciindi cinji cakucita zintu ziyandika kapati?

MULIMO WANGU NAA LWIIYO: Sena undipa kujana zintu ziyandika mubuumi, naa sena ndaba muzike buya? Sena unditolela ciindi cinji cakuti buumi bwangu buli muntenda? Sena inga ndayanda kwiindilizya kubeleka amulimo wangu nanka kuba amweenzuma wamulukwatano abana bangu? Ikuti sikundilemba mulimo wayanda kuti ndibeleke mulimo uunyonganya manjezyeezya aangu naa uusinkilila zintu zyakumuuya lyoonse, sena inga ndaucita mulimo ooyo ikutegwa ndizumanane kubeleka?

BUZUMI BWANGU: Sena ndilabulekelezya naa ndilazumanana kubona kuti bwakwabililwa? Sena buzumi bwangu ncecintu ncebandika lyoonse? Sena mbondibulanganya citondezya kuti ndilababikkila maanu banamukwasyi?

KULIKKOMANISYA: Sena ncesaanguna kubikkila maanu? Sena ncendibikka mubusena butaanzi muciindi calukkomano lwamweenzuma wamulukwatano naa lwamukwasyi? Sena nzila nzyondibelesya kuluyandaula zileendelana azyeelede kumukombi wa Leza mwini-mwini?

NGOTUKWETENE LIMWI: Sena ndimubona kuba mweenzuma lilikke nocindikkomanisya? Sena ndilamulemeka kali muntu uuyandika kulemekwa? Sena kusyoma Leza kuli mbokundeendelezya kujatikizya mbondimubona?

BAZYALI BANGU: Ikuti kandicili mwanike, sena ndilabamvwida bazyali bangu—ikubaingula cabulemu, ikucita milimo njobandituma, ikupiluka kuŋanda aciindi ncobayanda, ikutayanzana akutacita zintu nzyobandicenjezya? Ikuti kandili mupati, sena ndilabamvwida bazyali bangu akubagwasya camoyo woonse nokwayandika kucita boobo? Sena ndilabacitila zintu kweelana ambondiyanda naa kweelana alulayo lwa Jwi lya Leza?

BANA BANGU: Sena ndilimvwa kuti mmukuli wangu kubayiisya zintu zibotu naa ndilekela bamayi kuti babayiisye mbabo kucikolo? Sena ndilaizya abana bangu, naa ndilekela zyakusobanya, cipekupeku naa kkompyuta kuba mulongwe wabo? Sena ndilabalaya lyoonse bana bangu nobatatobeli ziyeekezyo zya Leza, naa ndicita buyo boobo eelyo ncobacita nocindicima?

ŊANDA MBOTU, ZYAKUSAMA ZIBOTU: Ino ncinzi ceendelezya mbondibikkila maanu kukulibonya kwangu alimwi ampasya zyangu—sena nkuyanda kuti ndibe ampuwo kuli basimukoboma, sena mbukkale bwamukwasyi wangu, naa nkaambo ndimukombi wa Leza?

IKWIINDA BOONSE MUZINTU ZYOONSE NZYONDICITA: Sena ndilimvwa kuti cilayandika kuzicita kabotu zintu? Sena ndilasolekesya kuba wiinda boonse? Sena ndilanyongana ikuti muntu umbi wacicita kabotu cintu cimwi kwiinda ndime?

KUKOMBA LEZA: Sena ikukkomaninwa a Leza ncecintu ciyandika kapati kulindime kwiinda kukkomaninwa amweenzuma wamulukwatano, ibana bangu, bazyali bangu naa sikundilemba mulimo? Ikutegwa ndibe abukkale bubotu, sena inga ndazumina kubikka mulimo wa Leza mubusena bwabili?

 Ino kukomba Leza kuyandika buti mubuumi bwanu?

Mukambausi 12:13: “Lemeka Leza akubamba milazyo yakwe, nkaambo kucita obo nceelelo coonse camuntu.”

AMULIBUZYE KUTI: Sena buumi bwangu butondezya kuti mbondizibona zintu oobo? Sena kumvwa milawo ya Leza nkokweendelezya mbondiilanganya mikuli aŋanda, kumilimo naa kucikolo? Sena zintu zimbi naa makatazyo aamubuumi nzyezyeendelezya kuti ndibe aciindi cakulanganya makani aa Leza naa pe?

Ino cilongwe canu a Leza cili buti?

Tusimpi 3:5, 6: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.”

Matayo 4:10: “Nguwe Jehova Leza wako ngoelede kukomba, nguwenya alike ngoelede kumanina milimo.”

AMULIBUZYE KUTI: Sena oobo mbondilimvwa kujatikizya Leza? Sena zintu nzyondicita abuzuba kubikkilizya ambondaalanganya mapenzi kutondezya kuti mbondimusyoma oobo akumumanina milimo?

Ino kubala akwiiya Bbaibbele kuyandika buti kulindinywe?

Johane 17:3: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.”

AMULIBUZYE KUTI: Sena mbondikubikkila maanu kubala Jwi lya Leza alimwi akuzinzibala kuyeeya ndilyo kutondezya kuti ndilaasyoma ncobeni makani aaya?

Ino kuyandika buti kulindinywe ikujanika lyoonse kumiswaangano yambungano ya Bunakristo?

Ba-Hebrayo 10:24, 25: “Katunga katuyeeyana, katubusyanya-busyanya mukuyandana akucita milimo mibotu. Tutanoonga katuleka kulibunga-bunga, . . . kamucita obuya lyoonse mbomukubwene kuti buzuba bwa-Kristo buli afwaafwi.”

Intembauzyo 122:1: “Ndakakondwa nibakandaambila kuti, katuya kuŋanda ya-Jehova.”

AMULIBUZYE KUTI: Sena bukkale bwangu butondezya kuti ndilakulumba kulailila ooku ikuli mu Jwi lya Leza? Mumwezi wainda, sena kuli miswaangano ya Bunakristo nkundatakajanika akaambo kakuti ndakabikkila maanu kuzintu zimbi?

Sena mulatola lubazu cabusungu mukwaambila bamwi zya Leza amakanze aakwe?

Matayo 24:14: “Aya Makani Mabotu aa-Bwami azookambaukwa munyika yoonse kuti abe citondezyo . . . . Elyo mamanino azoosika.”

Matayo 28:19, 20: “Nkaambo kaako kamuya mukabaiisye bantu bamisyobo yoonse, . . . amubaiisye kuti bajatisye makani oonse ngendakamulailila.”

Intembauzyo 96:2: “Amwiimbile Jehova, mulumbe izina lyakwe; amuluule makani aalufutuko lwakwe mazuba oonse.”

AMULIBUZYE KUTI: Sena mulimo ooyu ndilaubikkila maanu kweelana ambuli mbouyandika? Sena kutola lubazu kwangu mulinguwo kutondezya lusyomo ndondijisi kujatikizya mbokuyandika kapati kucita boobo mazuba aano?