Ino Nyika Eeyi Iya Kuli?

Imapenzi mapati alimwi azintu zigambya nzyezintu ziluulwa lyoonse munyika! Ino eeci caamba nzi?

KULIIBA: Mabbomba abbolosyegwa mumisika. Bamayi abasicikolo badubulwa kucikolo. Ibana babbigwa bazyali nobabikkilide maanu kumbi. Banakazi abamadaala baumwa akubbidwa kalitwa mwaaba.

ZICITIKA MUZIKOMBELO: Izikombelo zyagwasyilizya munkondo. Basololi bazikombelo bapegwa mulandu mucijayejaye. Bapaizi banyengelela bana baniini koonana ambabo; cikombelo caasisa makani. Ibajanika muzikombelo baceya; maanda aazikombelo asambalwa.

CILAWO: Zisaka zyanyonyoonwa kutegwa kuyakwe masena aakucitila makwebo. Zisamu bazimana bacete kutebba nkuni akuumpa malasha. Maanzi aamumigodi asofwaazyigwa, taacili kabotu kunywa. Buzubi bwanswi bwanyonganizyigwa amalabisi aazwa mupangilwa zintu aasowelwa mumilonga amulwizi alimwi anzila zyamazuba aano zyakuzela nswi. Muya uuyoyegwa wabija.

 BUKKALE: Imali ngavwola muntu amuntu mu Afulika kumusanza kwacimpayuma ca Sahara aambwa kuti abalilwa ku K2,340,000 [$480 (U.S.)] amwaka. Ibusyaacivwulemwangu bwabeendelezi bamilimo bwawisya makwebo, akupa zyuulu-zyuulu zyabantu kubula milimo. Lucengo lwapa kuti basikutalisya makwebo basweekelwe mali ngobali kuyobola kwaciindi ncobali kubeleka.

KUBULILA KWAZYAKULYA: Ibantu babalilwa kutuulunzuma tuli 800 nyika yoonse ziindi zinji banyina zyakulya.

NKONDO: Ibantu bainda kutuulunzuma tuli 100 bakajaigwa munkondo zyamumwaanda wamyaka wa 20. Kuli zilwanyo zyanyukkiliya zinji izinga zyasinya bantu boonse munyika akusyaala zimwi. Kuli nkondo zyamuzisi mumwenya. Kuli kukonga kwazigwebenga ikwasakana munyika yoonse.

ZILWAZI: Ikutalikila mu 1918, ibulwazi Bwanamakweekwe butegwa Spanish flu bwakajaya bantu bali tuulunzuma tuli 21. Bulwazi bwasikalileke lino bwaba “mbobulwazi bwiindide kusakana mubukkale bwabantu.” Bulwazi bwakkansa alimwi abwamoyo mmalwazi aali mukujaya bantu nyika yoonse.

Mutabikkili buyo maanu kucibeela camakani comwe-comwe ciluulwa. Sena nzintu zicitika buyo aciindi comwe? Naa sena ncibeela cazintu zitondezya mboyeelede kuba nyika izyaamba cintu ciyandika kapati?

 [Kabbokesi/Cifwanikiso icili apeeji 5]

Sena Ncobeni Leza Ulatulanganya?

Akaambo kakutyompwa azintu zigambya naa akaambo kakusweekelwa kupati, ibantu banji balanyongana Leza ncatanjilili kutegwa alesye zintu zili boobu.

Leza ulatulanganya ncobeni. Ulatupa busolozi busyomeka akulemununwa kwini-kwini lino. (Matayo 11:28-30; 2 Timoteo 3:16, 17) Wabweza ntaamu zyakumanizya kulwana, malwazi alufwu mane kukabe kutamani. Nzyaatubambila zitondezya kuti talanganyi buyo bantu bacisi comwe pele bamumasi oonse, mikowa alimwi amyaambo.—Incito 10:34, 35.

Ino tumubikkila kapati buti maanu Leza? Sena mulimuzyi Mulengi wajulu anyika? Ino zina lyakwe nguni? Ino mmakanze nzi ngajisi? Ulayiingula mibuzyo eeyi mu Bbaibbele. Mulindilyo utwaambila ntaamu nzyali mukubweza kutegwa amanizye kulwana, malwazi alufwu. Ino ncinzi ncotweelede kucita kutegwa tugwasyigwe? Tweelede kwiiya zyanguwe alimwi amakanze aakwe. Tatukonzyi kugwasyigwa abubambe bwakwe ikuti katutamusyomi. (Johane 3:16; Ba-Hebrayo 11:6) Acimbi ciyandika nkutobela nzyayanda. (1 Johane 5:3) Sena mulabikkila maanu cakuti mulilisungwide kutobela nzyayanda Leza?

Ikutegwa tuteelele ncabulekelede kuzumanana Leza bukkale oobu, tweelede kumvwisya kaambo kamwi kapati. Ibbaibbele lilakapandulula. Mulakonzya kukabala kaambo aaka apeeji 15 mubroshuwa eeyi.