Inyika Impya Njaakasyomezya Leza

IBBAIBBELE, Ijwi lya Leza lilembedwe litupa bulangizi nolyaamba kuti: “Swebo tulangila ijulu ipya anyika impya, mbubwenya mbuli mbwaakatusyomezya. Mulinzizyo momukala bululami.”—2 Petro 3:13.

Ino “ijulu ipya” ninzi? Ibbaibbele liswaanganya julu kubweendelezi. (Incito 7:49) “Ijulu ipya” nimfwulumende mpya iiyooyendelezya nyika. Nimpya akaambo kakuti iyoonjila abusena bwabubambe bwamfwulumende ziliko lino; alimwi nintaamu mpya mukuzuzikizyigwa kwamakanze aa Leza ikuya bucitika bucebuce. Mbwami oobo Jesu mbwaakatuyiisya kuti katupailila. (Matayo 6:10) Mbwaanga Leza nguwakabutalisya alimwi ukkala kujulu, bwiitwa kuti “Bwami bwakujulu.”—Matayo 7:21.

Ino “nyika impya” ninzi? Taili nyika yaanzidwe buya alimwi pe, mbwaanga cakusalazya Bbaibbele lyaamba kuti nyika yini inookkalwa bantu mane kukabe kutamani. “Nyika impya” nciinga cabantu cipya. Inooli mpya akaambo kakuti bantu babi banoonyonyoodwe. (Tusimpi 2:21, 22) Boonse ibanoopona eelyo, bayoomulemeka akumumvwida Mulengi alimwi banoopona kweelana ambwayanda. (Intembauzyo 22:27) Ibantu bamuzisi zyoonse balatambwa kuti baiye njiisyo eezyo alimwi akweendelanya maumi aabo anzizyo lino. Sena mulacita oobo?

Bantu boonse munyika mpya ya Leza bayoobulemeka bweendelezi Bwakwe. Sena kuyanda Leza kwanu kumukulwaizya kumumvwida? (1 Johane 5:3) Sena mulatondezya kuti mulamumvwida muŋanda yanu, kumilimo naa kucikolo amubukkale bwanu boonse?

Munyika eeyo mpya, bantu boonse banookomba Leza mwini-mwini. Sena mukomba Mulengi wajulu anyika? Sena bukombi bwanu bumupa kuba cibeela comwe ncobeni abakombinyoko bamuzisi zyoonse, amubala alimwi amyaambo?—Intembauzyo 86:9, 10; Isaya 2:2-4; Zefaniya 3:9.

 [Kabbokesi kali apeeji 17]

Leza Uusyomezya Zintu Eezyi

Uusyomezya zintu eezyi Mmulengi wajulu a Nyika nzyotubona. Ngooyo Jesu Kristo ngwaakaamba kuti “Leza mwini-mwini, ooli olike.”—Johane 17:3.

Ibunji bwabantu balemeka baleza mbobalipangila beni. Ituulunzuma twabantu bakomba zibumbwa zitaponi. Ibamwi balumbaizya bubambe bwabantunsi, injiisyo zyabusyaabusongo naa kulombozya kwabo beni. Nobaba baabo ibalyaamba kuti babelesya Bbaibbele mubukombi bwabo tabalilemeki izina lyayooyo ngolyaamba kuti “ngu-Leza [wakasimpe, NW].”—Deuteronomo 4:35.

Kalyaamba mwini, Imulengi waamba kuti: “Ndime Jehova. Ndezina lyangu.” (Isaya 42:5, 8) Mu Bbaibbele, izina eeli lilajanika ziindi ziinda ku 7,000 mumyaambo yalyo yakusaanguna. Jesu Kristo wakayiisya basikumutobela kuti kabapaila kuti: “Taateesu ooli kujulu, alilemekwe izina lyako.”—Matayo 6:9.

Ino Leza mwini-mwini mmuntu uuli buti? Ulyaamba kuti ngu “siluzyalo asibuuya uutafwambi kukalala, uuzwide luse” abwini alimwi uutaleki kusubula baabo ibasotoka milawo yakwe acaali. (Kulonga 34:6, 7) Mbwaali kubeendelezya bantu muciindi cainda kusinizya mbobuluzi bupanduluzi oobu.

Izina alimwi amuntu wiimininwa azina eelyo weelede kulemekwa naa kubonwa kuti ulasalala. Mbwali Mulengi alimwi Mwami Wakujulu Aansi, tuleelede kumumvwida akumukomba cakumaninina. Sena nywebo mulacita oobo?

 [Kabbokesi/Cifwanikiso icili apeeji 18]

Ino Nkucinca nzi Ikuyooletwa a “Julu Ipya Anyika Impya”?

Inyika iyoosandulwa kuba Paradaiso Luka 23:43

Iciinga cabantu bazisi zyoonse, mubala Johane 13:35;

amyaambo ibabelekela antoomwe caluyando Ciyubunuzyo 7:9, 10

Luumuno nyika yoonse, kuliiba Intembauzyo 37:10, 11;

kwini-kwini kubantu boonse Mika 4:3, 4

Milimo iikkomanisya, zyakulya zinji Isaya 25:6; 65:17, 21-23

Kuciswa, buumba alufwu ziyoogusyigwa Isaya 25:8;

Ciyubunuzyo 21:1, 4

Inyika imuli buyo bantu bakomba Leza Ciyubunuzyo 15:3, 4

mwini-mwini

 [Kabbokesi/Zifwanikiso izili apeeji 19]

Sena Mulagwasyigwa?

Leza takonzyi kubeja!—Tito 1:2.

Jehova waamba kuti: “Ijwi lyangu . . . Talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.”—Isaya 55:11.

Jehova uli mukulilengulula kale “ijulu ipya anyika impya.” Imfwulumende yakujulu ilabeleka lino. Intalisyo ‘yanyika impya’ nkwiili kale.

Nolimanizya kuluula zintu zimwi zibotu iziyooletwa a “julu ipya anyika impya” kubantu, ibbuku lya Ciyubunuzyo lizubulula Leza mwini, Mwami Wakujulu Aansi kaamba kuti: “Amubone, ndalengulula zintu zyoonse, zibe zipya.” Alimwi waamba kuti: ‘Lemba, nkaambo majwi aaya alasyomeka alimwi alisinizyide.’—Ciyubunuzyo 21:1, 5.

Imubuzyo uuyandika kapati ngwakuti, Sena umwi aumwi wesu tuli mukucita kucinca kweelede ikutegwa tubalilwe akati kabaabo bazumizyidwe kuba cibeela ‘canyika impya’ mubweendelezi ‘bwajulu lipya’?