“Kuti Mutanjili Mukusunkwa”

“Amulangile akukomba, kuti mutanjili mukusunkwa.”—MATAYO 26:41.

JESU KRISTO, Imwana a Leza wakapenga citanabwenwe kwiinda mbwaakalinapengede. Wakali kumamanino kwabuumi bwakwe anyika. Wakazyiba kuti tiilyakali kunoolampa pe, wakali kunooangwa, kusinganizyigwa kufwa alimwi akukankaminwa acisamu cakupenzezya. Wakalizyi kuti kusala kwakwe anzyaakali kuyoocita kwakali kuyoobotya naa kusampaula zina lya Bausyi. Alimwi Jesu wakalizyi kuti ibulangizi bwabuumi bwakumbele bwabantu bwakeelede kusinizyigwa lino. Kapengede kapati azintu eezyi zyoonse, ino ncinzi ncaakacita?

² Jesu wakaunka kumuunda wa Getesemane abasikwiiya bakwe. Bwakali busena mbwaakali kuyanda kapati. Ooko wakasiya basikwiiya bakwe waya alaale. Naakali alikke, camoyo woonse wakalomba nguzu kuli Bausyi bakujulu akubaambila zyakali kumoyo wakwe mumupailo uusitikide ziindi zyotatwe. Nokuba kuti wakalilondokede, kunyina Jesu naakalimvwa kuti wakali kukonzya kulwana zyakamupenzezye lwakwe mwini.—Matayo 26:36-44.

³ Aswebo tulapenga sunu. Kumatalikilo kwabroshuwa eeli, twalanga-langa bumboni bwakuti tupona kumazuba aakumamanino kwabukkale bwanyika oobu bubyaabi. Imasunko akwaatikizyigwa ikuletwa anyika ya Saatani zili mukwiindila. Ikusala amicito yaumwi aumwi wandiswe uulyaamba kuti ubelekela Leza mwini-mwini, kulalilemya naa kulisampaula zina lyakwe alimwi kulabujatikizya kapati bulangizi bwabukkale bwakumbele baumwi aumwi wesu munyika yakwe mpya. Tulamuyanda Jehova. Tuyanda ‘kuliyumya kusikila kumamanino’—mamanino aabuumi bwesu naa aabukkale bwanyika oobu buliko, kufwumbwa ceeco ciyoosaanguna. (Matayo 24:13) Pele ino mbuti mbotunga twazumanana kubikkila maanu alimwi akulangila?

⁴ Akaambo kakuti wakalizyi kuti basikwiiya bakwe—bamumwaanda wamyaka wakusaanguna alimwi asunu—bakali kuyoopenga abalo, Jesu wakakulwaizya kuti: “Amulangile akukomba, kuti mutanjili mukusunkwa.” (Matayo 26:41) Ino majwi aayo aamba nzi kulindiswe sunu? Ino mmasunko nzi aamucitikila? Alimwi ino mbuti mbomunga mwazumanana ‘kulangila’?

Kusunkwa Kucita Nzi?

⁵ Abuzuba toonse tusunkwa kunjila “mukooze ka-Saatani.” (2 Timoteo 2:26) Ibbaibbele litucenjezya kuti Saatani kwaambisya ukanzide bakombi ba Jehova. (1 Petro 5:8; Ciyubunuzyo 12:12, 17) Ino nkutegwa abatyani? Takanzide kutujaya buya pe. Tazundi pe Saatani naa twafwa katusyomeka kuli Leza. Saatani ulizyi kuti Jehova, kuciindi ncabikkide Mwini, uyooluzunda lufwu kwiinda mububuke.—Luka 20:37, 38.

⁶ Saatani uyanda kunyonyoona cimwi ciyandika kwiinda buumi bwesu bwaino—ikusyomeka kwesu kuli Leza. Saatani ulayandisya kutondezya kuti ulakonzya kutulesya kukomba Jehova. Aboobo ikuti naa twazundwa akucileka kusyomeka—ikuti twacileka kukambauka makani mabotu naa kucileka kutobela zyeelelo zya Bunakristo—ooko inga kwaba kuzunda  kuli Saatani! (Ba-Efeso 6:11-13) Aboobo ooyu “Sikusunka” utubikkila masunko manji.—Matayo 4:3.

⁷ Saatani ubelesya nzila zinji kazili ‘meeneeno.’ (Ba-Efeso 6:11) Ulakonzya kutusunka akuyandisya buvwubi, buyoofwu, kudooneka naa kuyandisya kulikondelezya. Pele inzila yakwe imwi yazwidilila kapati ijatikizya kutyompokelwa. Mbwali silweeno, ulizyi kuti kutyompokelwa kulakonzya kutupa kukompama kumuuya calo cinga catupa kubula nguzu zyakukazya kutepaulwa. (Tusimpi 24:10) Aboobo, ikapati eelyo ‘notwatyolauka’ mumizeezo, utusunka kuti tucileke.—Intembauzyo 38:8.

⁸ Mbotuya buswena kumagolelo kwamazuba aakumamanino, kuboneka kuti zintu zityompya ziyaabuvwula alimwi kunyina notukwabilidwe kulinzizyo. (Amubone kabbokesi kakuti “Izimwi Zipa Kutyompokelwa.”) Kufwumbwa naa kuletwa anzi, kutyompokelwa kulakonzya kutupa kukompama. ‘Ikujana ciindi’ cakucita zintu zyakumuuya—zibikkilizya kwiiya Bbaibbele, kujanika kumiswaangano ya Bunakristo alimwi akutola lubazu mumulimo—cilakonzya kuba cintu cikatazya ikuti kamukatede kumubili akukatazyigwa mumizeezo amumoyo. (Ba-Efeso 5:15, 16) Kamuyeeyede kuti Sikusunka uyanda kuti mucileke. Pele eeci tacili nceciindi cakuyozya-yozya naa kucileka kubikkila maanu kweelana amazuba ngotupona! (Luka 21:34-36) Ino mbuti mbomunga mwatantamuka masunko akuzumanana kulangila? Amulange-lange nzila zyone zinga zyagwasya.

‘Kamupaila Lyoonse’

⁹ Amusyome Jehova kwiinda mumupailo. Amuyeeye cikozyanyo ca Jesu mumuunda wa Getesemane. Ino ncinzi ncaakacita kakatazyidwe kapati mumoyo? Wakalomba Jehova kuti amugwasye, wakapaila cakulitakata cakuti “nkasaalo yakwe yakaba mbuli malosi aabulowa aalondaukila ansi.” (Luka 22:44) Amuciyeeyele eeci. Jesu wakalimuzyi kabotu Saatani. Jesu wakalilangilide kuzwa kujulu akubona masunko oonse Saatani ngabelesya nasola kuca babelesi ba Leza mutooze. Nokuba boobo, kunyina Jesu naakalimvwa kuti wakali kukonzya kuzizunda kufwumbwa zyeezyo Sikusunka nzyaakali kuyoomusunka. Ikuti Mwana a Leza uulondokede wakacibona kuti cilayandika kupailila lugwasyo anguzu zya Leza, tee kulindiswe inga caindila buya!—1 Petro 2:21.

¹⁰ Alimwi amuyeeye kuti naakamana kukulwaizya basikwiiya bakwe kuti ‘kamupaila lyoonse,’ Jesu wakati: “Walo moyo ncobeni ulayandisisya, pele mubili wabula nguzu.” (Mateyo 26:41, Ci) Ino mmubili wani ngwaakali kwaamba Jesu? Mmasimpe tanaakali kwaamba mubili wakwe pe; kunyina cakakompeme mumubili wakwe wanyama uulondokede. (1 Petro 2:22) Pele tiicakali boobo pe kuli basikwiiya bakwe. Akaambo kakutalondoka akulombozya  kucita zibyaabi nkobakakonede, bakali kuyandika lugwasyo kapati kutegwa bazunde mukutepaulwa. (Ba-Roma 7:21-24) Ncaakabakulwaizya—kubikkilizya a Banakristo bakasimpe boonse kumbele—ikupailila lugwasyo lwakuliyumya mukutepaulwa. (Matayo 6:13) Jehova ulayiingula mipailo iili boobo. (Intembauzyo 65:2) Munzila nzi? Munzila zyobile.

¹¹ Yakusaanguna, Leza utugwasya kukuzyiba ikutepaula. Ikutepaula kwa Saatani kuli mbuli tooze tuteedwe koonse-koonse munzila yamudima. Ikuti tiimwatubona, mulakonzya kucegwa. Kwiinda mu Bbaibbele alimwi amabbuku aapandulula Bbaibbele, Jehova ulatuyubununa tooze twa Saatani, eelyo utugwasya kulikasya kukutepaulwa. Kwamyaka minji, kwiinda mumabbuku amiswaangano mipati cakwiinduluka-induluka twacenjezyegwa kuntenda mbuli zyakuyoowa bantu, bwaamu, kuyandisya buvwubi alimwi akutepaulwa kumbi nkwacita Saatani. (Tusimpi 29:25; 1 Ba-Korinto 10:8-11; 1 Timoteo 6:9, 10) Sena tamumulumbi Jehova akaambo kakutucenjezya nkwaacita kujatikizya makanze aa Saatani? (2 Ba-Korinto 2:11) Ikucenjezya ooko koonse mbwiinguzi kumipailo yanu yakulomba lugwasyo mukuliyumya kukutepaulwa.

¹² Yabili, Jehova ulayiingula mipailo yesu kwiinda mukutupa nguzu zitugwasya kuliyumya mukutepaulwa. Ijwi lyakwe lyaamba kuti: “Leza . . . takoozoozumina kuti mutepaulwe kwiinda inguzu zyanu, pele antoomwe alutepauzyo ulacita cipolelo.” (1 Ba-Korinto 10:13) Leza kunyina nayoozumizya kutepaulwa ikutuzyinga kapati cakuti mane twabula nguzu zyakumuuya zyakukulwana—ikuti naa twazumanana kumusyoma. Ino mbuti ‘mbwatucitila cipolelo’? Ulapa ‘muuya uusalala kuli baabo bamukumbila.’ (Luka 11:13) Imuuya ooyo ulakonzya kutugwasya kwiibaluka njiisyo zya Bbaibbele izinga zyatupa kukakatila kukucita ziluzi akutugwasya kusala camaanu. (Johane 14:26; Jakobo 1:5, 6) Ulakonzya kutugwasya kutondezya bube buyandika kutegwa tucikonzye kuzunda kulombozya kutaluzi. (Ba-Galatiya 5:22, 23) Alimwi muuya wa Leza ulakonzya kubakulwaizya basyomima kuba ‘basikutuumbulizya.’ (Ba-Kolose 4:11) Sena tamulumbi kuti Jehova ulaingula munzila eezyi zyaluyando kumipailo yanu yakulomba lugwasyo?

Mutalangili Zintu Zitakonzyi Kucitika

¹³ Ikutegwa katulangila lyoonse, tatweelede kulangila zintu zitakonzyi kucitika. Akaambo kamapenzi mubuumi, toonse tulalema zimwi ziindi. Pele tweelede kunooyeeya kuti Leza kunyina naakasyomezya kuti tunoopona buumi bunyina mapenzi mubukkale bwanyika oobu bwakaindi. Nokuba kuciindi ca Bbaibbele, babelesi ba Leza bakapenga, kubikkilizya akupenzyegwa, bucete, kutyompokelwa alimwi akuciswa.—Incito 8:1; 2 Ba-Korinto 8:1, 2; 1 Ba-Tesalonika 5:14; 1 Timoteo 5:23.

¹⁴ Aswebo sunu tulijisi mapenzi eesu. Tulakonzya kupenzyegwa, kulibilika akaambo kakubula mali, ikutyompokelwa, tulakonzya kuciswa alimwi akupenga munzila zimbi. Ikuti Jehova naali kutukwabilila camaleele kuzintu zicisa zyoonse, sena eeco inga tiicamupa kaambo Saatani kakumusampauda Jehova? (Tusimpi 27:11) Jehova ulazumizya kuti babelesi bakwe batepaulwe akusunkwa, zimwi ziindi kusikila nkobafwa cakutayeeyelwa kwiinda mumicito yabasikukazya.—Johane 16:2.

¹⁵ Aboobo ino ncinzi Jehova ncaasyomezya? Mbubwena mbotwaamba kale musyule, wasyomezya kuti uyootugwasya kukazya kutepaulwa kuli koonse kuyootusikila, kufwumbwa kuti katumusyoma cakumaninina. (Tusimpi 3:5, 6) Kwiinda mu Jwi lyakwe, muuya wakwe alimwi ambunga yakwe, ulatukwabilila kumuuya, ikutugwasya kutegwa cilongwe cesu anguwe cizumanane. Ikuti cilongwe eeco kacitanyonganizyidwe, nokuba kuti twafwa, tulazunda. Kunyina cintu—neluba lufwu—icikonzya kulesya Leza kupa bulumbu  kubabelesi bakwe basyomeka. (Ba-Hebrayo 11:6) Alimwi munyika impya, yalo iili afwaafwi lino, Jehova mmasimpe uyoozizuzikizya zisyomezyo zyakwe zibotu zyoonse kuli baabo ibamuyanda.—Intembauzyo 145:16.

Kamutuyeeya Twaambo

¹⁶ Ikutegwa tuliyumye kusikila kumamanino, tweelede kutuyeeya twaambo tuyandika tuliko kujatikizya ncalekelede bubi Leza. Ikuti zimwi ziindi imapenzi eesu alibonya kuti atuzyinga alimwi twayeeya kuti tucileke, tweelede kuliyeezya kuti Saatani wakakazya kululama kwabweendelezi bwa Jehova. Silweeno ooyo alimwi wakazumbauzya kulyaaba akusyomeka kwabakombi ba Leza. (Jobu 1:8-11; 2:3, 4) Itwaambo ooto alimwi anzila Jehova mbwaakasala kutumanizya tulayandika kapati kwiinda buumi bwaumwi aumwi wandiswe. Munzila nzi?

¹⁷ Ikuzumizya mapenzi nkwaacita Leza kwakaindi kwapa ciindi cakuti bamwi bakajane kasimpe. Amuciyeeyele eeci: Jesu wakapenga kutegwa tujane buumi. (Johane 3:16) Sena tatulumbi akaambo kaceeco? Pele sena tulilisungwide kuzumanana kuliyumya mumapenzi ikutegwa abambi bajane buumi? Ikutegwa tuliyumye kusikila kumamanino, tweelede kuzyiba kuti busongo bwa Jehova bulisumpukide kapati kwiinda bwesu. (Isaya 55:9) Uyoobumanizya bubi aciindi cibotu cakusalazya twaambo toonse alimwi munzila iitugwasya mane kukabe kutamani. Ino ninzila nzi imbi mubwini yiinda waawa? Kunyina kutalulama kuli Leza!—Ba-Roma 9:14-24.

“Amuswenenene kuli-Leza”

¹⁸ Ikutegwa tuzumanane kubikkila maanu, tweelede kuba acilongwe cibotu a Jehova. Mutalubi kuti Saatani ubelesya nzila zyoonse kutegwa anyonyoone cilongwe cesu cibotu a Jehova. Saatani uyanda kuti tusyome kuti mamanino taakabooli alimwi akuti kunyina kaambo ncotweelede kukambauka makani mabotu naa kupona buumi bweendelana azyeelelo zya Bbaibbele. Pele “nguubeja, ngowisi wababeja.” (Johane 8:44) Tweelede kukanza ‘kumukazya Diabolosi.’ Icilongwe ncotujisi a Jehova ncintu ncotuteelede kubona kuti cinyina mpindu. Caluyando Bbaibbele litukulwaizya kuti: “Amuswenenene kuli-Leza, elyo alakwe ulamuswenenena.” (Jakobo 4:7, 8) Ino mbuti mbomunga mwaswenenena kuli Jehova?

¹⁹ Kuzinzibala kuyeeya akupaila lyoonse kulayandika kapati. Eelyo mapenzi aamubuumi naalibonya kuti ayanda kumuzyinga, amumwaambile zyoonse zili kumoyo wanu Jehova. Ikuti mwazyigama buya kuzyaamba nzyomuyanda, ciyoouba-uba ikuzyiba bwiinguzi bwakulomba kwanu. Talili lyoonse ibwiinguzi nobunoogaminide kujatikizya ncomwakali kulombozya, pele ikuti mulombozya kumulemeka alimwi akuzumanana kusyomeka, uyoomupa lugwasyo ndomuyandika ikutegwa muzwidilile mukuliyumya. (1 Johane 5:14) Mwanoobona busolozi bwakwe mubuumi bwanu, cilongwe canu anguwe ciyooyuma. Ikubala alimwi akuyeeyesya abube bwa Jehova anzila zyakwe mbubwena mboziyubuludwe mu Bbaibbele akwalo kulayandika. Ikuzinzibala kuyeeya kuli boobo kumugwasya kumuzyiba kabotu; kulamukulwaizya alimwi akuyumya luyando ndomujisi kulinguwe. (Intembauzyo 19:14) Alimwi luyando oolo, kwiinda zintu zyoonse, luyoomugwasya kukazya kutepaulwa akumupa kulangila lyoonse.—1 Johane 5:3.

²⁰ Ikutegwa cilongwe cesu cizumanane a Jehova, icimbi ciyandika nkuti katuyanzana lyoonse abasyomima. Eeci cilabandikwa mucibeela camamanino cabroshuwa eeli.

MIBUZYO YACIIYO

• Ino ncinzi ncaakacita Jesu naakakatazyidwe kapati kumamanino kwabuumi bwakwe anyika, alimwi ino ncinzi ncaakakulwaizya basikwiiya bakwe kucita? (Munc. 1-4)

• Ino nkaambo nzi Saatani ncabakanzide bakombi ba Jehova, alimwi ino muunzila nzi mwatutepaula? (Munc. 5-8)

• Ikutegwa tukukazye kutepaulwa, nkaambo nzi ncotweelede kupaila lyoonse (Munc. 9-12), kutalangila zintu zitakonzyi kucitika (Munc. 13-15), kuyeeya twaambo tujatikizyidwe (Munc. 16-17), alimwi ‘akuswenenena kuli Leza’ (Munc. 18-20)?

[Kabbokesi kali apeeji 25]

Izimwi Zipa Kutyompokelwa

Buzumi naa kucembaala. Ikuti katuciswa bulwazi buzumanana naa ikuti kucembaala kwatupa kulezya kucita zimwi, tulakonzya kutyompokelwa akaambo kakuti tatucikonzyi kucita mbuli mbotuyanda mukubelekela Leza.—Ba-Hebrayo 6:10.

Kutazwidilila. Tulakonzya kutyompokelwa ikuti naa kunyina bantu banji baukkomanina mulimo wesu wakukambauka Jwi lya Leza.—Tusimpi 13:12.

Ikulimvwa kutayandwa. Akaambo kakuteendelezyegwa kabotu kwaciindi cilamfwu, imuntu ulakonzya kusyoma kuti tayandwi abamwi alimwi mane akutayandwa a Jehova.—1 Johane 3:19, 20.

Moyo kucisa. Ikuti umwi wabisizyigwa amusyominyina, ulakonzya kukopana kapati cakuti inga camupa kuyeeya kucileka kujanika kumiswaangano ya Bunakristo naa kutola lubazu mumulimo wamumuunda.—Luka 17:1.

Kupenzyegwa. Ibazikombelo zimbi balakonzya kumukazya, kumupenzya nokuba kumusampaula.—2 Timoteo 3:12; 2 Petro 3:3, 4.

[Cifwanikiso icili apeeji 26]

Jesu wakatukulwaizya ‘kupaila lyoonse’ kulomba lugwasyo kutegwa tuzunde kutepaulwa