“Teebakabikkila Maanu”

IKUUNDULUZYA ncenjezyo zyaambwa kulakonzya kuletela ntenda.

Ku Australia, mudolopo lya Darwin, ibantu bakajisi bubi kulibambila mapowe ciindi cakulyookezya mu 1974 eelyo nobakacenjezyegwa zyaguwo pati lyakali afwaafwi. Pele kunyina dolopo lya Darwin nolyakanyonyoodwe aguwo kwamyaka iitandila ku 30. Ino inga cacitika buti lino? Ibunji bwabantu bamudolopo eeli kunyina nobakabona ntenda eeyi kuti yakali mpati kusikila leelyo guwo pati nolyakatalika kuvwumbaula ziluli akukolomona maanda mwakalundene bantu. Kuzyi kusikila buzuba bwakatobela mafwumofwumo, imunzi woonse wakasyeede buyo zitantaala naa tongo.

Ku Colombia mu November 1985, icilundu cakazwa mulilo. Ikuyaaya kwacaanda kwakapa kuti kube kupaya kwamankanda aakavwumba bantu bainda ku 20,000 mudolopo lya Armero. Sena kwakanyina kucenjezya kwakacitidwe kakucili ciindi? Icilundu eeco cakali zungaanide kwamyezi iili mbwiibede. Nokuba boobo, akaambo kakuti bantu balizyibide kukkala munsi lyacilundu cizwa mulilo, ibunji bwabo mu Armero tiibakabikkila maanu. Ibalupati-pati bakacenjezyegwa kuti ntenda yakali kulangilwa kucitika muciindi cisyoonto buyo, pele kunyina ncobakacita kutegwa bacenjezye buleya. Ikwaambilizya muli sikapepele kwakacitwa ikusoleka kukkazyika myoyo yabantu. Kwakabelesyegwa cakwaambilizizya cacikombelo icisumpula majwi ikwaambila bantu kuti bakkalikane. Imangolezya, ikubboloka kugambya kwakacitika ziindi zyobile. Sena nomwakasiya mbono zyanu akutija? Mbasyoonto buyo ibakasoleka kucita boobo kusikila mane kwakaba kumuka.

Ibunji bwaziindi, bahaazibwene mubuyale bwanyika baambila limwi cakululama kakucili ciindi kujatikizya kuzungaana kwanyika kulangilwa kucitika. Nokuba boobo, ndisyoonto nobaamba ciindi cini nokulangilwa kucitika. Mu 1999, ikuzungaana kwanyika ikwakacitika nyika yoonse kwakajaya bantu batandila ku 20,000. Ibanji akati kabaabo bakafwa bakali kuyeeya kuti kunyina nocakali kuyoobacitikila.

Ino Mucita Buti Akucenjezya Kuzwa Kuli Leza Mwini?

Kakucili ciindi cinji Ibbaibbele cakutainda mumbali lyakapandulula zibeela zilibedelede zyamazuba aakumamanino. Ikujatikizya bupanduluzi  oobo, litukulwaizya kubikkila maanu “kumazuba aa-Nowa.” “Kumazuba ayo maanzi naatakalina kupaya,” bantu bakajisi bubi amilimo yalyoonse mubuumi nokuba kuti cakutadooneka bakalilibilikide akulwana kwakavwulide. Ikujatikizya kucenjezya nkwaakapa Leza kwiinda mumubelesi wakwe Nowa, “teebakabikkila maanu mane kupaya kwamaanzi kwakasika akubatola boonse.” (Matayo 24:37-39, NW) Sena nomwakakutobela kucenjezya? Sena mulacita oobo lino?

Ino mbuti ikuti nomwakali kukkala mu Sodoma, munsi lya Lwizi Lunyina Zilenge Zyuumi kumazuba aa Loti imujwa wa Abrahamu? Ibusena oobo bwakali kweebeka mbuli paradaiso. Mumunzi mwakali buvwubi. Ibantu tiibakali kulibilika, bakaliliibide. Kumazuba aa Loti bantu “bakali kulya, bakali kunywa, bakali kuula akuuzya, bakali kulima akuyaka.” Alimwi ibukkale bwabantu bamumo bwakalisofweede citaambiki. Sena nomwakakutobela kucenjezya eelyo Loti naakatongooka micito mibyaabi? Sena nomwakaswiilila naakali kunoomwaambila kuti Leza wakakanzide kuunyonyoona munzi wa Sodoma? Naa sena nomwakamubona kuti useka buyo mbubwena bwakacita bakatiibe bakwe ba Loti? Sena nomwakatalika kutija pele kumbele akutalika kupiluka munsi ibwakacita mukaintu wa Loti? Nokuba kuti bamwi tiibakakusyoma kucenjezya, mubuzuba Loti mbwaakapola mu Sodoma, “kwakaloka mulilo uwakazwa kujulu amusulufa, wakabatenta boonse.”—Luka 17:28, 29.

Ibunji bwabantu sunu tababikkili maanu pe. Pele izikozyanyo eezyi zyakayobolwa mu Jwi lya Leza kutegwa zitucenjezye, ikutukulwaizya KULANGILA LYOONSE!

[Kabbokesi/Cifwanikiso icili apeeji 22]

Sena Zambangulwe Lyakacitika Ncobeni?

Basikukazya banji baamba kuti tiilyakacitika pe. Pele Ibbaibbele lyaamba kuti lyakacitika ncobeni.

Jesu Kristo lwakwe wakalyaamba, alimwi wakali kupona nolyakacitika kalilangilila kuzwa kujulu.

[Kabbokesi/Cifwanikiso icili apeeji 23]

Sena Minzi ya Sodoma a Gomora Yakanyonyoonwa Ncobeni?

Lwiiyo lwazintu zyakasiigwa abasinku lulaasinizya makani aaya.

Lwiiyo lwamakani aakaindi lulaamba kuti yakanyonyoonwa.

Jesu Kristo wakacisinizya cakacitika alimwi cilaambwa mumabbuku aali 14 mu Bbaibbele.