Cibalo 8

Ibamwi Balaa Zyuuno Zyaatala Kwiinda Ndiswe

NDISYOMA kuti ulazumina kuti bamwi balaa zyuuno zyaatala, naa mbapati alimwi balaanguzu kwiinda nduwe andime. Ino nguni ngonga waamba kuti mmupati kwiinda ndiswe?— Ngu Jehova Leza. Ino mbuti walo Mwanaakwe, Imwiiyi Mupati? Sena mmupati kwiinda ndiswe?— Inzya, mmupati.

Jesu wakaliponede kale a Leza kujulu. Wakali Mwana kali muuya naa mungelo. Sena Leza wakalenga bangelo naa bana bakwe bambi bamuuya?— Inzya, wakalenga bangelo banji kapati batabaliki. Abalo bangelo aaba mbapati alimwi balaanguzu kapati kwiinda ndiswe.—Intembauzyo 104:4; Daniele 7:10.

Sena uciliyeeyede izina lyamungelo wakaambaulaa Mariya?— Wakali Gabriyeli. Wakaambila Mariya kuti mwanaakwe wakali kunooli Mwanaa Leza. Leza wakabikka buumi bwa Mwanaakwe kali muuya mwida lya Mariya ikutegwa Jesu akonzye kuzyalwa kali mwana anyika.—Luka 1:26, 27.

Sena ulaasyoma maleele aayo? Sena ulasyoma kuti Jesu wakaliponede kale a Leza kujulu?— Jesu mwini wakaamba kuti wakaliponede kale. Ino Jesu wakaazyiba buti makani aayo? Naakacili mulombe, Mariya ndiza wakamwaambila cakaambide mungelo Gabriyeli. Alimwi Josefa awalo kulangilwa kuti wakamwaambila Jesu kuti Leza ngowakali Wisi mwini-mwini.

Jesu naakabbapatizyigwa, Leza mwini  wakaambaula kuzwa kujulu kuti: “Ooyu ngo mwanaangu.” (Mateyo 3:17, Ci) Alimwi imasiku katanafwa, Jesu wakapaila ategwa: “Taata . . . kondilemya abulemu oobo mbundakajisi nindakali ayebo nyika kiitanalengwa.” (Joni 17:5, Ci) Inzya, Jesu wakalomba kuti apilusigwe kutegwa akakkale alimwi a Leza kujulu. Ino cakali kukonzyeka buti kuti akakkale ooko?— Cakali kukonzyeka lilikke ikuti Jehova Leza naakamupa kuti abe muntu wamuuya uutalibonyi naa mungelo alimwi.

Lino andikubuzye mubuzyo uuyandika kapati. Sena bangelo boonse mbabotu? Ino uyeeya buti?— Ee, aciindi cimwi, boonse buyo bakali babotu. Cili boobo nkaambo ngu Jehova wakabalenga alimwi zyoonse nzyalenga nzibotu. Pele omwe akati kabangelo wakabija. Ino eeco cakacitika buti?

Ikutegwa tujane bwiinguzi, tweelede kulanga musyule kuciindi Leza naakalenga mwaalumi amwanakazi bakusaanguna, Adamu a Eva. Bamwi baamba kuti imakani aajatikizya mbabo ngakulengelezya buyo. Pele Mwiiyi Mupati wakalizyi kuti akali aamasimpe.

Leza naakalenga ba Adamu a Eva, wakababikka mumuunda mubotu uutegwa Edeni. Wakali muunda mubotu kapati, wakali paradaiso. Bakali kunoozyala bana banji, akubaa mukwasyi mupati alimwi akupona mu Paradaiso lyoonse. Pele kuli ciiyo ciyandika ncobakeelede kwiiya. Nciiyo ncotwabandika kale. Atubone naa tuciciyeeyede.

 Jehova wakaambila ba Adamu a Eva kuti bakali kukonzya kulya micelo njobakali kuyanda kumasamu aakali mumuunda. Pele kwakali cisamu comwe ncobatakeelede kulya micelo yaco. Leza wakabaambila cakali kuyoocitika ikuti nobakalya kulinguwo. Wakati: ‘Muyoofwa ncobeni.’ (Matalikilo 2:17) Aboobo, ino nciiyo nzi ba Adamu a Eva ncobakeelede kwiiya?—

Nciiyo cakumvwida Leza. Inzya, lilikke notumumvwida Jehova Leza notunga twazumanana kupona! Tiicakazyulide kuli ba Adamu a Eva ikwiile kwaamba kuti bakali kuyoomumvwida Leza. Bakeelede kutondezya kuti bakali kuyoocita oobo kwiinda muzintu nzyobakali kucita. Ikuti nobakamumvwida Leza, nobakatondezya kuti bakali kumuyanda alimwi akuti bakali kuyanda kuti kali Mweendelezi wabo. Nobakacita oobo, nobakapona kukabe kutamani mu Paradaiso. Pele ikuti nobakalya kucisamu eeco, ino cakali kunootondezya nzi?—

Cakali kunootondezya kuti tiibakazilumba pe nzyaakabapede Leza. Sena nowakamumvwida Jehova ikuti nowakali kupona kuciindi eeco?— Kumatalikilo, ba Adamu a Eva bakamumvwida. Pele umwi wakali mupati kwiinda mbabo wakamucenga Eva. Wakamupa kuti atamvwidi Jehova. Ino wakali ni ooyo?—

 Ibbaibbele lyaamba kuti nzoka naa simwaaba wakaambaula a Eva. Pele ulizyi kuti inzoka taikonzyi kwaambaula. Aboobo, ino nkaambo nzi ncoyakacikonzya kwaambaula?— Imungelo umwi wakapa kuti kulibonye mbuli kuti inzoka njiyakali kwaambaula. Pele mubwini iwakali kwaambaula mmungelo. Imungelo ooyo wakatalika kuyeeya zintu zibi. Wakali kuyanda kuti ba Adamu a Eva kabamukomba akumumvwida muciindi cakumvwida Leza akumukomba.

Aboobo ooyo mungelo mubyaabi wakapa kuti Eva abe aamizeezo mibi. Kwiinda munzoka, wakaambila Eva kuti: ‘Leza tanaakakwaambila masimpe pe. Tokooyoofwa pe ikuti walya mucelo wacisamu eeciya. Uyoosongwaala mbuli Leza.’ Sena nowakaasyoma imajwi aayo?—

Eva wakatalika kulombozya cintu ncaatakamupede Leza. Wakalya mucelo wacisamu cakakasyidwe. Mpoona mucelo ooyo nguwona wakaupa Adamu. Adamu tanaakazisyoma pe zyakaamba nzoka. Pele iluyando ndwaakajisi kuli Eva lwakali kwiinda aaluyando ndwaakajisi kuli Leza. Aboobo awalo wakaulya mucelo wacisamu.—Matalikilo 3:1-6; 1 Timoteo 2:14.

Ino ncinzi cakatobela?— Ba Adamu a Eva bakaba bantu batalondokede, bakacembaala akufwa.  Alimwi akaambo kakuti tiibakalondokede, ibana babo boonse tiibakalondokede abalo alimwi mukuya kwaciindi abalo bakacembaala akufwa. Leza tanaakabejede pe! Mmasimpe, ikutegwa katupona lyoonse, tweelede kumumvwida. (Ba-Roma 5:12) Ibbaibbele litwaambila kuti imungelo wakeena Eva wiitwa kuti ngu Saatani Diabolosi, alimwi ibangelo bambi ibakabija baitwa kuti madaimona.—Jakobo 2:19; Ciyubunuzyo 12:9.

Sena lino wakateelela kaambo ikakapa kuti mungelo mubotu ngwaakalenga Leza abije?— Nkaambo wakatalika kuyeeya zintu zibyaabi. Wakali kuyanda kuti kalemekwa Kwiinda boonse. Wakalizyi kuti Leza wakaambilide ba Adamu a Eva kuzyala bana, alimwi wakali kuyanda kuti kabamukomba boonse. Diabolosi uyanda kuti muntu woonse katamvwidi Jehova. Aboobo utupa kuyeeya zintu zitaluzi.—Jakobo 1:13-15.

Diabolosi waamba kuti kunyina muntu uumuyanda ncobeni Jehova. Waamba kuti yebo andime tatumuyandi Leza akuti mubwini tatuyandi kucita ncayanda kuti tucite Leza. Waamba kuti tulamumvwida Jehova lilikke zintu zyoonse nozili buyo kabotu kulindiswe. Sena Diabolosi uliluzi? Sena mbotubede oobo?

Imwiiyi Mupati wakaamba kuti Diabolosi mmubeji! Jesu wakatondezya kuti wakali kumuyanda ncobeni Jehova kwiinda Mukumumvwida. Alimwi Jesu tanaakamvwida Leza lilikke zintu nozyakali zyuuba-uba kulinguwe. Wakali kucita oobo lyoonse, neliba leelyo ibantu bambi nobakacita zintu kuti zimuyumine. Wakasyomeka kuli Jehova kusikila ciindi naakafwa. Nkakaambo kaako Leza ncaakamubusyila kuti kapona kukabe kutamani.

Aboobo, ino nguni ngonga waamba kuti ngosinkondoma mupati?— Inzya, ngu Saatani Diabolosi. Sena ulakonzya kumubona?— Peepe! Pele tulizyi kuti nkwali, mmupati alimwi ulaanguzu kwiinda ndiswe. Pele ino nguni mupati kwiinda Diabolosi?— Ngu Jehova Leza. Aboobo tulizyi kuti Leza ulakonzya kutukwabilila.

Bala makani aambi kujatikizya Yooyo ngotweelede kukomba: Deuteronomo 30:19, 20; Joshua 24:14, 15; Tusimpi 27:11; alimwi a Matayo 4:10.

[Cifwanikiso icili apeeji 47]

Ino kulangilwa kuti ncinzi Mariya alimwi a Josefa ncobakaambila Jesu?

[Cifwanikiso icili apeeji 48, 49]

Ncinzi ncobakeelede kucita ba Adamu a Eva ikutegwa bapone kukabe kutamani mu Paradaiso?

[Cifwanikiso icili apeeji 50]

Ino nguni wakali kupa kuti kuboneke kuti ninzoka yakali kwaambaulaa Eva?

[Zifwanikiso izili apeeji 50]

Ino ncinzi cakacitikila ba Adamu a Eva nobakatyola mulawo wa Leza?