Cibalo 7

Ikuswiilila Kulakukwabilila

SENA inga wakkomana ikuti kowangulukide kucita cintu kufwumbwa ncoyanda? Sena kuli ziindi nolombozya kuti kutabi muntu uukwaambila ncoyelede kucita? Kondaambila bwini buya mbolimvwa.—

Pele ino ncinzi cikonzya kukukonda? Sena cilagwasya iikwiile kucita kufwumbwa ncoyanda? Naa sena zintu zyeenda kabotu noswiilila bauso alimwi abanyoko?— Leza waamba kuti weelede kuswiilila bazyali bako, aboobo kuli kaambo kayandika ncoyelede kucitila boobo. Atubone naa inga twakazyiba kaambo aako.

Ino ulaamyaka yakuzyalwa yongaye?— Sena uliizyi myaka yakuzyalwa njobajisi bauso?— Ino banyoko naa banyookulu abasyaanyookulu balaamyaka yakuzyalwa yongaye?— Bapona kwamyaka minji kwiinda njowapona yebo. Alimwi ikuti muntu wapona kwamyaka minji, mumyaka eeyo ulaiya zintu zinji kapati. Nzinji kapati zintu nzyamvwa akubona alimwi akucita mwaka amwaka. Aboobo bana bacili basyoonto balakonzya kwiiya kuzwa kubapati.

Sena kuli ngozyi uucili musyoonto kulinduwe?— Sena iwe uzyi zintu zinji kwiinda nguwe?— Ino nkaambo nzi ncozyi zintu zinji kwiinda nguwe?— Nkaambo kakuti wakazyalwa kaindi. Walijisi ciindi cinji cakwiiya zintu kwiinda wooyo mwana kulinduwe.

 Ino nguni wapona kwaciindi cilamfwu kwiinda nduwe andime alimwi amuntu uumbi uuli woonse?— Ngu Jehova Leza. Nzinji nzyazyi kwiinda nduwe alimwi andime. Natwaambila kucita cintu cimwi, tulakonzya kusyoma kuti ncintu ciyandika nokuba kuti cilakonzya kacikatazya kucicita. Sena ulizyi kuti naba Mwiiyi Mupati cimwi ciindi cakamuyumina kucita zintu zyakali kuyandika?—

Cimwi ciindi Leza wakaambila Jesu kuti acite cintu cimwi cikatazya kapati. Jesu wakalomba lugwasyo mumupailo mbubwenya mbotubona mucifwanikiso eeci. Wakapaila ulaamba: ‘Kuti wayanda, gwisya penzi eeli kulindime.’ Kwiinda mukupaila boobo, Jesu wakatondezya kuti talili lyoonse nocakali cuuba-uba kucita kuyanda kwa Leza. Pele ino wakaumanizya buti Jesu mupailo wakwe? Sena ulizyi?—

Jesu wakaumanizya kwiinda mukwaamba kuti: “Akucitwe kuyanda kwako, kutabi kwangu.” (Luka 22:41, 42) Inzya, wakayanda kuti kuyanda kwa Leza kucitwe nkuko, ikutali kwakwe mwini. Alimwi wakacita eeco ncaakali kuyanda Leza kuti acite muciindi cakucita ncaakali kuyeeyela walo kuti ncecakali kunoomugwasya.

Ino ncinzi ncotunga twaiya mumakani aaya?— Twiiya kuti cililuzi lyoonse ikucita ceeco ncaamba Leza kuti tucite, neliba leelyo nocitali cuuba-uba. Pele kuli acimbi ncotwiiya. Sena ulicizyi?— Twiiya kuti Leza alimwi a Jesu tali muntu omwe pe mbubwenya bamwi mbobaamba. Jehova Leza mmupati alimwi ulizyi zintu zinji kwiinda nzyazi Mwanaakwe, Jesu.

Notumumvwida Leza, tutondezya kuti tulamuyanda. Ibbaibbele lyaamba kuti: “Oku nkokuyanda Leza, kuti twabamba milazyo yakwe.” (1 Johane 5:3) Aboobo tee wateelela kuti toonse tuyandika kumumvwida Leza. Ayebo ulayanda kumumvwida, tee kayi?—

Atujalule Bbaibbele lyesu akubona ceeco Leza ncaambila bana kuti  bacite. Tulabala ncolyaamba Bbaibbele ku Baefeso caandaano 6, tupango 1, 2, alimwi a 3, Ci. Tubala kuti: “Nobana, amuswiilile bazyali banu mu Mwami, nkaambo kucita boobu cililuleme. Nkaambo Majwi aa Leza alati, ‘Lemeka uso abanyoko.’ (Ooyu ngo mulawo mutaanzi uujisi cisyomezyo.) ‘Wacita boobo, ulalelekwa, alimwi uloongola munyika.’”

Aboobo tee wabona kayi kuti ngu Jehova Leza lwakwe uukwaambila kuti weelede kubamvwida bauso alimwi abanyoko. Ino caamba nzi ‘kubalemeka’? Caamba kubalemenezya, kubabikkila maanu munzila yaalubazu. Eelyo Leza usyomezya kuti, ikuti naa wabamvwida bazyali bako, ‘uyoolelekwa.’

Leka ndikwaambile kaano kajatikizya bantu bamwi ibakafwutuka akaambo kakuti bakali kumvwida nzyobakaambilwa. Ibantu aaba bakapona kuciindi cansiku mumunzi mupati wa Jerusalemu. Ibunji bwabantu mumunzi ooyo kunyina nobakamuswiilila pe Leza, aboobo Jesu wakabacenjezya kuti Leza wakali kuyoounyonyoona munzi wabo ooyo. Alimwi Jesu wakabaambila mbobakali kunga baloboka ikuti nobakayanda zintu ziluzi. Wakati: ‘Mwaakubona kuti munzi wa Jerusalemu wazingulukwa ampi zyabasikalumamba, mukazyibe kuti ciindi cakunyonyoonwa kwanguwo caswena afwaafwi. Aboobo eeco cinooli ciindi cakuzwa mumunzi wa Jerusalemu akutijila kumalundu.’—Luka 21:20-22.

Aboobo mbubwenya Jesu mbwaakaambide, impi zyabasikalumamba zyakasika kuzyoolwana munzi wa Jerusalemu. Impi zyabasikalumamba zyabana Roma zyakauzinguluka munzi woonse. Mpoonya akaambo kamwi katazizyilwe, basikalumamba bakayoboloka akupiluka kwabo. Ibunji bwabantu bakayeeya kuti mapenzi akalimanide lino. Aboobo bakazumanana kukkala mumunzi. Pele ino ncinzi Jesu ncaakaambide kuti ncobakeelede kucita?— Ino nowakacita buti yebo nowakali umwi wabaabo ibakali kukkala mu Jerusalemu?— Aabo ibakamusyoma ncobeni Jesu bakasiya maanda aabo akutijila kumalundu aali kule kapati amunzi wa Jerusalemu.

Kwamwaka oonse mbuubede kunyina cakacitika kumunzi wa Jerusalemu. Amumwaka wabili kunyina cakacitika pe. Alimwi mane amwaka  watatu wakainda kakutakwe cicitika. Ibantu bamwi ndiza bakayeeya kuti aabo ibakapola kuzwa mumunzi bakali bafwubafwuba. Pele mumwaka wane, impi zyabasikalumamba zyabana Roma zyakapiluka. Alimwi bakauzinguluka munzi wa Jerusalemu woonse. Lino tiicakali kukonzyeka kuloboka pe. Aciindi eeci, impi zyabasikalumamba zyakaunyonyoona munzi. Ibunji bwabantu bakali mumunzi bakafwa, alimwi ibatakafwa boonse bakaangwa akutolwa buzike.

Pele ino ncinzi cakacitika kuli baabo ibakamumvwida Jesu?— Kunyina penzi lyakabasikila pe. Bakali kule kapati amunzi wa Jerusalemu. Ncobatakajatikizyigwa amapenzi aayo. Ikuswiilila ncobakaambilwa kwakabakwabilila.

Ikuti kocitobela ncowaambilwa, sena ayebo eeco inga cakukwabilila mazubaano?— Ibazyali bako balakonzya kukwaambila kuti toyelede kunoosobanina mumugwagwa. Ino nkaambo nzi ncobaambila boobo?— Nkaambo ulakonzya kulimbwa amootokala. Pele bumwi buzuba ambweni uyooyeeya kuti: ‘Taakwe myootokala yiinda mumugwagwa lino.  Tandikoolimbwa pe. Kuli bana bambi basobanina mumugwagwa, alimwi kunyina ngondakabona kale wakalimbwa.’

Ibunji bwabantu mu Jerusalemu mbobakali kuyeeya oobo. Impi zyabasikalumamba zyabana Roma nozyakapiluka, kwakalibonya mbuli kuti penzi lyakalimanide. Ibamwi bakalikkede mumunzi. Aboobo abalo bakazumanana kukkala mumunzi ooyo. Bakalicenjezyedwe, pele tiibakaswiilila pe. Akaambo kaceeci, bakafwa.

Atulange-lange cikozyanyo cimbi. Sena kuli ciindi nowakasobanya mancisi?— Inga kacili cintu cikondelezya ikubona mulilo uuyaka nogwalula kancisi. Pele ikusobanya mancisi kulakonzya kuleta ntenda. Iŋanda yoonse ilakonzya kupya mulilo alimwi ayebo ulakonzya kufwa!

Koyeeya kuti, ikumvwida caambwa muziindi zimwi buyo takugwasyi pe. Pele ikuti koswiilila caambwa lyoonse, uyookwabililwa ncobeni. Alimwi ino nguni uukwaambila kuti, “Nobana, amuswiilile bazyali banu”?— Ngu Leza. Alimwi koyeeya kuti ukwaambila boobo akaambo kakuti ulakuyanda.

Lino bala magwalo aaya aatondezya mbociyandika kuswiilila caambwa: Tusimpi 23:22; Mukambausi 12:13; Isaya 48:17, 18; alimwi a Ba-Kolose 3:20.

[Cifwanikiso icili apeeji 42]

Ino nkaambo nzi ncoyelede kuswiilila caamba bapati?

[Cifwanikiso icili apeeji 43]

Ino ncinzi ncotunga twaiya kumupailo wa Jesu?

[Cifwanikiso icili apeeji 45]

Ino mbuti kuswiilila malailile aa Jesu mbokwakabafwutula bantu aaba?

[Cifwanikiso icili apeeji 46]

Nkaambo nzi ncoyelede kuswiilila caambwa noliba leelyo notazyi ntenda iikonzya kuba?