Cibalo 33

Jesu Ulakonzya Kutukwabilila

EELYO Jesu naakakomena akuzyiba makani aakuti wakakwabililwa naakacili mwana, sena uyeeya kuti wakapaila kuli Jehova akumulumba?— Ino uyeeya kuti ncinzi kumbele Jesu ncaakaambila ba Mariya a Josefa eelyo naakazyiba kuti bakamuvwuna kwiinda mukumutola ku Egepita?—

Ee, Jesu tacili mwana muvwanda lino. Alimwi tacikkali anyika mbuli ciindi eeco. Pele sena wabona kuti mazubaano bantu bamwi baciyeeya kuti Jesu ucili muvwanda mucilido caŋombe?— Eeci cilalibonya ciindi ca Kkilisimusi eelyo mumasena manji nokuboneka zifwanikiso zya Jesu kali mwana muvwanda.

Nokuba kuti Jesu taciponi anyika, sena ulasyoma kuti mmuumi?— Inzya, wakabusyigwa kuzwa kubafwu alimwi lino Mmwami singuzu kujulu. Ino uyeeya kuti ncinzi ncanga wacita kutegwa akwabilile baabo ibamubelekela?— Mucikozyanyo, eelyo Jesu naakali anyika, wakatondezya mbwanga wabakwabilila aabo ibakali kumuyanda. Atubone mbwaakacita boobo eelyo bumwi buzuba naakali mubwaato abasikwiiya bakwe.

 Kwakali kumangolezya. Jesu wakazwide aakuyiisya buzuba boonse kunkomwe ya Lwizi lwa Galilaya, ilwizi lupati lulampa makkilomita aali 20 alimwi amakkilomita aali 12 mubwaamba. Wakaambila basikwiiya bakwe kuti: “Atuzubuke, tuye mutala lyeziba.” Aboobo bakatalika kweenda mubwaato kuya mutala lyalwizi. Jesu wakalikatede kapati, aboobo wakaunka kusyule lyabwaato akulala aali pilo naa citulisyo. Ndilyonya wakoona.

Basikwiiya bakali kulanga kutegwa beenzye bwaato nkobweelede kuunka. Zintu zyoonse zyakali buyo kabotu kwaciindi cili mbocibede, pele kwakatalika kubbubbula guwo pati. Lyakabbubbula canguzu kapati, eelyo aalo mayuwe akatalika kukomena. Imaanzi akatalika kunjila mubwaato cakuti bwaato bwakatalika kuzyula.

Basikwiiya bakayoowa kapati kuti bakali kunoonyikila. Pele Jesu tanaakayoowede pe. Wakacili koona kusyule lyabwaato. Nolyakaindila, basikwiiya bakamubusya balaamba: ‘O Mwiiyi, O Mwiiyi, tuvwune; tuyandoofwa muguwo eeli.’ Eelyo Jesu wakabuka akulailila guwo alimwi amayuwe. Wakati: “Umuna zi! . . . Batama!”

Ndilyonya, iguwo lyakaleka kubbubbula, eelyo lwizi  lwakabatama. Basikwiiya bakagambwa. Kunyina buzuba nobakabonede cintu cili mbuli bwaceeci. Bakatalika kwaambaula mulicabo ategwa: “Ino nguni oyu uumuzya iguwo amaanzi, mpoonya zilamumvwa?”—Luka 8:22-25; Marko 4:35-41.

Sena Jesu ulimuzyi kuti nguni?— Sena ulikuzyi nkwaakazyijana nguzu zyakwe zipati?— Basikwiiya tiibakeelede kuyoowa pe eelyo Jesu naakali ambabo, nkaambo Jesu tanaakali muntu-muntu buyo pe. Wakali kukonzya kucita zintu zigambya zyatakali kunga zyacitwa amuntu umbi uuli woonse. Andikwaambile cimbi ncaakacita aciindi cimbi naakali mulwizi kakuli mayuwe aguwo pati.

Bwakali buzuba bumbi, kakwiindide ciindi cili mbocibede. Nokwakaba kumangolezya, Jesu wakaambila basikwiiya bakwe kutanta bwaato kuti basolole kuunka mutala leliya lyalwizi. Mpoonya Jesu wakaunka mumulundu alikke. Ibusena oobo bwakanyina ciyobeka, bwakali busena ooko nkwaakali kunga wapaila kuli Bausyi, nkokuti Jehova Leza.

Basikwiiya bakanjila mubwaato akutalika kukosola lwizi. Pele ndilyonya  kwakatalika kubbubbula guwo. Iguwo eelyo lyakabbubbula canguzu kapati. Ono akali masiku buya. Ibaalumi aabo bakagusya saili lyabwaato akutalika kukwasula buya. Pele tiibakazwidilila pe akaambo kakuti iguwo lyakali kubbubbula lyakali kubatonkela musyule. Ibwaato bwakali kwiile kuzungaana canguzu ooku akooku mumayuwe mapati, alimwi imaanzi akali kunjila mubwaato. Ibaalumi aabo bakalitakata kukwasula kabasoleka kuti bakasike kunkomwe, pele bakakakilwa.

Jesu wakacili mumulundu alikke. Wakali mumulundu kwaciindi cilamfwu. Pele wakabona kuti basikwiiya bakwe bakali muntenda nkaambo kamayuwe. Aboobo wakaseluka mucilundu akwiimikila kunkomwe yalwizi. Jesu wakali kuyanda kubagwasya basikwiiya bakwe, aboobo wakatalika kweenda kuya kuli mbabo atala lyalwizi kakuli mayuwe aguwo!

Ino ncinzi cinga cacitika ikuti naa wasoleka kweenda amaanzi manji?— Inga wabbila, alimwi mane akunyikila. Pele Jesu wakaliimpene. Wakalijisi nguzu zyaalubazu. Jesu wakeenda musinzo mulamfwu kutegwa asike kubwaato. Aboobo kwakali kubucedo eelyo basikwiiya nobakamubona Jesu keenda kuya kuli mbabo atala lyamaanzi. Pele cakabagambya kapati ncobakabona. Bakayoowa kapati eelyo bakoompolola akaambo kakuyoowa. Mpoonya Jesu wakaambaula kulimbabo ategwa: “Amukkazike myoyo, ndime. Mutayoowi.”

Mbwaakanjilila buyo Jesu mubwaato, iguwo lyakaleka kubbubbula. Basikwiiya bakagambwa alimwi. Bakamukotamina Jesu akwaamba kuti: “Ncobeni yebo uli Mwanaa Leza.”—Mateyo 14:22-33, Ci; Johane 6:16-21.

Sena nocatakali kukkomanisya kapati ikupona kuciindi eeco akulibonena Jesu kacita zintu zili mbuli bwazeezyo?— Sena ulikazyi kaambo Jesu ncaakali kucita zintu eezyo zyamaleele?— Wakazicita zintu eezyo akaambo kakuti wakali kubayanda basikwiiya bakwe alimwi wakali kuyanda kubagwasya. Pele alimwi wakacita maleele ikutegwa atondezye nguzu nzyaakajisi alimwi nzyayoobelesya kumbele kali Mweendelezi wa Bwami bwa Leza.

 Neliba lino, Jesu kanjikanji ulazibelesya nguzu zyakwe ikukwabilila basikumutobela bakwe kukusoleka nkwacita Saatani mukubakasya kwaambila bamwi makani aa Bwami bwa Leza. Pele Jesu tabelesyi nguzu zyakwe ikukwabilila basikwiiya bakwe kumalwazi naa kubaponya eelyo nobaciswa. Kayi abalo baapostolo ba Jesu boonse kumbele bakafwa. Imunyina Johane wazina lya Jakobo wakajayigwa, alimwi Johane lwakwe wakaangwa muntolongo.—Incito 12:2; Ciyubunuzyo 1:9.

Ncimwi buyo asunu. Kunyina makani naa bantu balamubelekela Jehova naa pe, boonse buyo balaciswa alimwi akufwa. Pele lino-lino, mubweendelezi bwa Jesu kali Mwami wamfwulumende ya Leza, izintu ziyoocinca. Kuciindi eeco, kunyina muntu uunooyoowa akaambo kakuti Jesu uyoobelesya nguzu zyakwe mukugwasya boonse ibamumvwida.—Isaya 9:6, 7.

Imagwalo aambi aatondezya nguzu nzyajisi Jesu, ooyo Leza ngwabikkide kuba Mweendelezi mu Bwami bwa Leza ngaaya, Daniele 7:13, 14; Matayo 28:18; alimwi a Ba-Efeso 1:20-22.

[Zifwanikiso izili apeeji 172]

Ino Jesu yebo umubona buti—sena umubona kuti Mmwami singuzu naa mwana muvwanda uutakonzyi kuligwasya?

[Cifwanikiso icili apeeji 173]

Ino ncinzi Jesu ncali mukwaambila guwo alimwi amayuwe?

[Cifwanikiso icili apeeji 174]

Ino nkaambo nzi Jesu ncaakacitila maleele?

[Cifwanikiso icili apeeji 176]

Ino mbuti Jesu mbwabakwabilila basikumutobela bakwe sunu?