Cibalo 4

Leza Ulijisi Zina

INO ncinzi ncosaanguna kubuzya noswaanganya muntu umbi ciindi cakusaanguna?— Inzya, ubuzya izina lyakwe. Toonse tulijisi mazina. Leza wakamupa zina muntu wakusaanguna kulengwa anyika. Wakamuulika kuti ngu Adamu. Imukaintu wa Adamu wakaulikwa zina lyakuti Eva.

Nokuba boobo, tabali bantu balikke ibajisi mazina. Koyeeya zintu zimbi azyalo zijisi mazina. Zimwi ziindi abalo ibabwa alimwi aŋombe zilaulikwa mazina, tee kayi?— Inzya, ikubaa zina ncintu ciyandika kapati.

Nolanga kujulu masiku ubona nyenyeezi zinji kapati. Sena ulizi kuti zilijisi mazina?— Inzya, Leza wakaulika izina nyenyeezi imwi aimwi iili kujulu. Ibbaibbele litwaambila kuti: “Ulabala mweelwe wanyenyeezi; ulaziita zyoonse kumazina aazyo.”—Intembauzyo 147:4.

Nguni ngoyeeyela kuti ngomuntu mupati kwiinda boonse mububumbo?— Inzya, ngu Leza. Sena uyeeya kuti ulijisi izina?— Jesu wakaamba kuti Ulijisi. Cimwi ciindi Jesu mumupailo wakaambila Leza kuti: ‘Ndalizibya zina lyako kuli basikunditobela.’ (Johane 17:26) Sena ulilizyi izina lya Leza?— Leza mwini ulatwaambila izina lyakwe. Waamba kuti: “Ndime Jehova. Ndezina lyangu.” Aboobo izina lya Leza ngu JEHOVA.—Isaya 42:8.

Ino inga ulimvwa buti eelyo bamwi nobakwiita azina lyako?— Ulakkomana, tee kayi?— Awalo Jehova uyanda kuti bantu balizyibe izina lyakwe. Aboobo tweelede kulibelesya izina lya Leza lyakuti Jehova eelyo notwaambaula makani aajatikizya nguwe. Imwiiyi Mupati wakalibelesya zina lya Leza lyakuti Jehova eelyo naakali kubandika abantu. Cimwi ciindi Jesu wakati: “Uleelede kuyandisya Jehova Leza wako amoyo wako woonse.”—Marko 12:30.

 Jesu wakalizyi kuti izina lyakuti “Jehova” ndizina liyandika kapati. Aboobo wakayiisya basikumutobela kuti kabalibelesya izina lya Leza. Alimwi mane wakabayiisya kuti kabalyaamba izina lya Leza mumipailo yabo. Jesu wakalizyi kuti Leza uyanda kuti bantu boonse balizyibe izina Lyakwe lyakuti Jehova.

Ikaindi, Leza wakatondezya mboliyandika izina lyakwe kumuntu uutegwa Musa, ooyo iwakali umwi wabana ba Israyeli. Ibana ba Israyeli, bakakkala mucisi citegwa Egepita. Ibantu bamucisi eeco bakali kutegwa mbana Egepita. Bakacita kuti bana Israyeli babe bazike alimwi bakali basilunya kulimbabo. Eelyo Musa naakakomena, wakasoleka kugwasya mwaalumi umwi sicisinyina. Eeci cakapa kuti mwami waku Egepita Farao anyeme. Wakayanda kuti amujaye Musa! Akaambo kaceeco, Musa wakatija kuzwa mu Egepita.

Musa wakaunka kubusena bumbi.  Wakaunka ku Midyani. Kucisi eeco Musa wakakwata akubaa mukwasyi. Alimwi wakabeleka kali mweembeli wambelele. Bumwi buzuba Musa wakajisi bubi kweembela mbelele zyakwe munsi aamulundu eelyo naakabona cintu cimwi cigambya. Wakabona citeyo cakali kuyaka mulilo, pele kunyina nocakali kupya pe! Musa wakaswena munsi kutegwa acilangisye.

Sena ulicizyi cakacitika?— Musa wakamvwa ijwi kaliita kuzwa mukati kaciteyo cakali kuyaka mulilo. Ijwi eelyo lyakaita ategwa, “Musa! Musa!” Ino nguni wakali kwiita?— Ngu Leza! Leza wakajisi milimo minji njaakali kuyanda kuti Musa ayicite. Leza wakaamba kuti: ‘Boola nkutume kuli Farao, mwami wa Egepita, elyo weelede kupozya bantu bangu, bana ba Israyeli kuzwa ku Egepita.’ Leza wakasyomezya Musa kuti wakali kuyoomugwasya kucita mulimo ooyo.

Pele Musa wakaambila Leza kuti: ‘Lino ndaakusika kubana ba Israyeli mu Egepita akubaambila kuti Leza wandituma. Ino kuti bakandibuzye kuti, “Ngwani izina lyakwe?” Nkabavwiile buti?’ Leza wakaambila Musa kuti akaambile bana Israyeli kuti: ‘Jehova nguwandituma kulindinywe.  Jehova ndezina lyakwe mane kukabe kutamani.’ (Kulonga 3:1-15) Eeci caamba kuti Leza kunyina naakali kuyoolicinca pe zina lyakwe lyakuti Jehova. Leza wakali kuyanda kuti bantu kabamuzyi azina lyakwe lyakuti Jehova, lyoonse mane kukabe kutamani.

Musa naakapiluka ku Egepita, bana Egepita bakayeeya kuti Jehova wakali kaleza-leza buyo kabana Israyeli. Kunyina nobakayeeya kuti wakali Leza wanyika yoonse. Aboobo Jehova wakaambila mwami waku Egepita kuti: ‘Ndiyoozyibya izina lyangu munyika yoonse.’ (Kulonga 9:16) Masimpe Jehova wakalizyibya izina lyakwe. Sena ulizyi mbwaakacita boobo?—

Wakapa kuti Musa asololele bana Israyeli kuzwa mu Egepita. Nobakasika ku Lwizi Lusalala, Jehova wakabamba nzila aakati kalwizi. Bana Israyeli bakazabuka kabotu-kabotu boonse munzila eeyo yakanyina maanzi. Pele Farao ampi zyakwe zyabasikalumamba zyoonse nobakabelesya nzila eeyo njoona, imaanzi aakaimikidwe ooku akooku akaponzoka akubavwumba bana Egepita alimwi boonse buyo bakafwa.

Ndilyonya ibantu munyika yoonse bakaamvwa makani aaceeco ncaakacita Jehova ku Lwizi Lusalala. Ino tuzyi buti kuti bakaamvwa makani aaya?— Kakwiindide myaka iisika ku 40, bana Israyeli bakasika ku Kanana, inyika Jehova njaakabasyomezyede  kubapa. Ooko, imwanakazi uucili mwana-mwana wazina lya Rahabu wakaambila baalumi bana Israyeli bobile kuti: “Twakamvwa Jehova mbwaakamuyuminizizya maanzi aa-Lwizi Lusalala ciindi eciya nimwakazwa ku-Egepita.”—Joshua 2:10.

Sunu ibantu banji bali mbuli bana Egepita aabo. Tabasyomi pe kuti Jehova ngo Leza wanyika yoonse. Aboobo Jehova uyanda kuti bantu bakwe beni baambile bamwi kujatikizya nguwe. Eeci ncecintu ncaakacita Jesu. Kumamanino aabuumi bwakwe anyika,  Jesu wakaambila Jehova mumupailo kuti: “Ndabazibya zina lyako.”—Johane 17:26.

Sena ulayanda kuba mbuli Jesu? Nkokuti kobaambila bamwi kuti izina lya Leza ngu Jehova. Uyoojana kuti ibunji bwabantu tabalizyi pe. Aboobo ulakonzya kubatondezya lugwalo lwamu Bbaibbele lwa Intembauzyo 83:18. Atubweze Bbaibbele ndilyonya lino tululange lugwalo oolo antoomwe. Lwaamba kuti: “Bazibe kuti nduwe olike oojisi izina lya-Jehova, nduwe Mupatikampatila atala anyika yoonse.”

Ino ncinzi ncotwiiya notubala makani aaya?— Ee, twiiya kuti izina lyakuti Jehova ndezina liyandika kapati kwiinda mazina oonse. Ndizina lya Leza Singuzuzyoonse, Bausyi Jesu alimwi Ooyo iwakalenga zintu zyoonse. Alimwi koyeeya kuti Jesu wakaamba kuti tweelede kuyanda Jehova Leza amoyo wesu woonse. Sena ulamuyanda Jehova?—

Ino inga twatondezya buti kuti tulamuyanda Jehova?— Inzila yomwe nkwiinda mukumuzyiba kali Mulongwe. Inzila imbi nkwiinda mukwaambila bambi izina lyakwe. Tulakonzya kubatondezya cakaanzambwene kuzwa mu Bbaibbele kuti izina lyakwe ngu Jehova. Alimwi tulakonzya kubaambila zintu zigambya nzyaakalenga Jehova alimwi azintu zibotu nzyaacita. Eeci cilamukkomanisya kapati Jehova akaambo kakuti uyanda kuti bantu bamuzyibe. Tulakonzya kutola lubazu mukucita boobo, tee kayi?—

Tabali bantu boonse ibayooswiilila notubaambila makani aa Jehova. Ibantu banji kunyina nobakaswiilila neliba leelyo Jesu, Mwiiyi Mupati naakabaambila kujatikizya Nguwe. Pele eeco kunyina nocakamutyompya Jesu ikwaamba makani aa Jehova.

Aboobo atube mbuli Jesu. Atuzumanane kwaamba makani aa Jehova. Ikuti twazumanana kucita boobo, Jehova Leza uyootukkomanina akaambo kakuti tutondezya luyando kuzina lyakwe.

Lino amubale antoomwe zibalo zimbi zisyoonto kuzwa mu Bbaibbele izitondezya mboliyandika izina lya Leza: Isaya 12:4, 5; Matayo 6:9; Johane 17:6; alimwi a Ba-Roma 10:13.

[Cifwanikiso icili apeeji 27]

Sena walizyi kuti inyenyeezi zyoonse zilijisi mazina?

[Cifwanikiso icili apeeji 28]

Ncintu nzi ciyandika kapati ncaakaiya Musa kuciteyo cakali kuyaka mulilo?

[Cifwanikiso icili apeeji 29]

Mbuti Leza mbwaakacita kuti zina lyakwe lizyibwe ku Lwizi Lusalala?

[Zifwanikiso izili apeeji 30]

Jesu wakalizyibya izina lya Leza kubantu.

Sena inga walyaamba mpolijanika izina lya Leza mu Bbaibbele?