Cibalo 30

Lugwasyo lutupa Kutaba Bakandu

SENA ncintu cuuba-uba kulinduwe ikubelekela Jehova?— Imwiiyi Mupati kunyina naakaamba kuti cakali kunooli cuuba-uba kucita boobo. Imasiku aabuzuba Jesu mbwaakajaigwa, wakaambila baapostolo bakwe kuti: “Na inyika yamusula, mulizi kuti yali kundisulide kale.”—Johane 15:18.

Petro wakalitukumuna akwaamba kuti kunyina naakali kuyoomusiya Jesu, pele Jesu wakaamba kuti Petro wakali kuyoomukaka ziindi zyotatwe imasiku ngoonaayo. Alimwi eeci ncaakacita Petro! (Matayo 26:31-35, 69-75) Ino eeco inga cacitika buti?— Cakacitika akaambo kakuti Petro alimwi abaapostolo bambi boonse bakayoowa.

Sena ulikazyi kaambo ibaapostolo ncobakayoowela?— Nkaambo bakakakilwa kucita cintu cimwi ciyandika kapati. Ikucizyiba eeco kulakonzya kutugwasya kuzumanana kubelekela Jehova kunyina makani azyeezyo bantu bambi nzyobaamba naa nzyobatucitila. Pele kusaanguna tweelede kulanga-langa zyakacitika imasiku aamamanino Jesu naakali abaapostolo bakwe.

Kusaanguna, bakasekelela pobwe lya Kwiindilila antoomwe. Lyakali cilyo cilibedelede cakali kuligwa amwaka ikwiibalusya bantu ba Leza zyalufwutuko lwabo kuzwa mubuzike ku Egepita. Mpoonya Jesu wakatalisya cakulya cilibedelede cimbi ambabo. Tuya kucibandika mucibalo cakumbele akupandulula mbocitugwasya cilyo eeco mukwiibaluka Jesu. Nocakamana cakulya eeco alimwi naakamanizya kubakulwaizya baapostolo bakwe, Jesu wakabatola kumuunda wa Getesemane. Oobo bwakali busena bubotu mbobakali kuswaya-swaya lyoonse.

Jesu wakaya alaale alikke mumuunda kutegwa apaile. Alimwi  wakaambila ba Petro, Jakobo alimwi a Johane kuti abalo bapaile. Pele muciindi cakucita boobo bakoona. Iziindi zyotatwe Jesu wakaunka ambali alikke kutegwa apaile, alimwi wakapiluka ziindi zyotatwe kuli Petro abambi pele lyoonse wakali kubajana baloona! (Matayo 26:36-47) Sena ulikazyi kaambo ncobakeelede kuzumanana kabalanga alimwi akupaila?— Atukabandike.

Judase Iskariote wakaliko kupobwe lya Kwiindilila antoomwe a Jesu alimwi abaapostolo bambi kumangolezya aabuzuba oobo. Ambweni uciyeeyede kuti Judase wakasanduka kuba mubbi. Lino wakaba sikwaaba buya. Wakali buzyi busena mumuunda wa Getesemane ooko kanjikanji Jesu nkwaakali kuswaanganina abaapostolo bakwe. Aboobo Judase wakasololela basikalumamba kubusena oobo ikutegwa bakamwaange Jesu. Nobakasika ooko, Jesu wakababuzya kuti: “Ino nguni ngomuyandaula?”

Basikalumamba bakaingula kuti: “Jesu.” Jesu tanaakayoowa pe, aboobo wakaingula kuti: “Ndime uno.” Basikalumamba bakagambwa kapati akaambo kabusicamba bwa Jesu cakuti bakapiluka cifwuteesule akuwida ansi. Mpoonya Jesu wakaamba kuti: ‘Naa muyandaula ndime, amubaleke baapostolo bangu baunke.’—Johane 18:1-9.

Basikalumamba nobakamujata akumwaanga Jesu, ibaapostolo bakayoowa kapati, eelyo bakatija. Pele Petro alimwi a Johane bakayanda kuzyiba cakali kuyoocitika, aboobo bakatalika kutobela munsi. Muciindi, Jesu bakamusisya kuŋanda ya Kayafa, imupaizi mupati. Mbwaanga Johane waalizibidwe kumupaizi mupati, sikulindila mulyango wakamuzumizya antoomwe a Petro kuti banjile mubbuwa.

Bapaizi bakaliswaangene kale kuŋanda ya Kayafa kutegwa babeteke mulandu. Bakali kanzide kumujaya Jesu. Aboobo bakaleta bakamboni ibakaamba makani aakubeja kujatikizya nguwe. Ibantu bakali kumuuma amfwaindi Jesu alimwi amabayi. Petro wakali afwaafwi nozyakali kucitika zyoonse eezyi.

Mpoonya imusimbi mubelesi, sikulindilila mulyango iwakanjizya Petro  alimwi a Johane, wakamuzyiba Petro. Eelyo wakati: “Ayebo wakali awe Jesu”! Petro wakakazya nokuba kumuzyiba buyo Jesu. Nokwakainda kaindi kaniini buyo, imusimbi aumbi wakamuzyiba Petro, eelyo wakaambila baabo mbocakaimvwi limwi kuti: “Oyu alakwe wakali awe Jesu.” Alimwi Petro wakakazya kuti tanaakamuzyi pe. Alimwi kumbele ikakamu kabantu kakamubona Petro eelyo bakati kulinguwe: “Ncobeni ayebo uli wankamu yabo.” Kwaciindi catatu Petro wakakazya kaamba kuti: “Nsimuzi muntu oyu”! Petro mane wakakonka kuti wakali kwaamba masimpe, eelyo Jesu wakazyuuluka akumulanga.—Matayo 26:57-75; Luka 22:54-62; Johane 18:15-27.

Sena ulicizyi cakamupa kubeja Petro?— Inzya, nkaambo wakaliyoowede. Pele ino nkaambo nzi ncaakayoowede? Ino ncinzi ncaatakacita kutegwa abe sicamba? Kociyeeyela. Ino ncinzi Jesu ncaakacitide kutegwa abe sicamba?— Wakapaila kuli Leza, alimwi Leza wakamugwasya kuba sicamba. Alimwi koyeeya kuti, Jesu wakaambilide Petro ziindi zyotatwe kuti apaile akulangila. Pele ino ncinzi cakacitikide?—

Iziindi eezyo zyoonse Petro wakali koona. Kunyina naakapaila, alimwi kunyina naakazumanana kulangila. Aboobo tanaakalibambilide  eelyo Jesu naakaangwa. Kumbele nobakacili kumubeteka Jesu, Petro wakayoowa kapati eelyo nobakamuuma alimwi akwaamba kuti wakeelede kujaigwa. Nokuba boobo, kacitanasika ciindi eeci, ino ncinzi Jesu ncaakaambilide baapostolo bakwe kujatikizya kaambo ncobakeelede kulangila?— Jesu wakabaambilide kuti mbubwenya nyika mboyakamusulide walo, yakali kuyoobasula abalo.

Ono atuyeeye cimwi cinga catucitikila icikozyenye acakacitikila Petro. Koyezeezya kuti uli mukkilasi kucikolo eelyo ibamwi nobatalika kwaamba zintu zibyaabi kujatikizya bantu bataciti silutu  kundembela naa ibatasekeleli Kkilisimusi. Ncinzi nconga wacita ikuti umwi wabo waboola kulinduwe akukubuzya cacigaminina kuti: “Sena mmasimpe kuti yebo tociti silutu kundembela?” Naa ikuti bamwi baamba kuti: “Tumvwide kuti tosekeleli naba Kkilisimusi!” Sena uyooyoowa ikwaamba masimpe?— Sena inga wayanda kubeja, mbubwenya bwakacita Petro?—

Kuzwa waawo, Petro wakausa kapati akaambo kakuti wakakazya kuti tanaakamuzyi Jesu. Naakazyiba ncaakacitide, wakaunka anze akulila kapati. Inzya, wakapilukila kuli Jesu. (Luka 22:32) Ono kociyeeyela buyo. Ino ncinzi cinga catugwasya kutegwa tutayoowi kapati cakuti mane twaambe mbuli zeezyo nzyaakaamba Petro?— Koyeeya kuti, Petro wakakakilwa kupaila alimwi akulangila. Aboobo, ino ncinzi ncoyeeya kuti ncotweelede kucita kutegwa tube sikutobela Mwiiyi Mupati?—

Tweelede kupaila kuli Jehova akulomba lugwasyo kulinguwe. Eelyo Jesu naakapaila, sena ulicizyi Leza ncaakamucitila?— Wakatuma mungelo kuti amuyumye-yumye. (Luka 22:43) Sena bangelo ba Leza balakonzya kutugwasya?— Ibbaibbele lyaamba kuti: “Baangelo ba-Jehova balibazyungulukide bamuyoowa, kuti babavune.” (Intembauzyo 34:7) Pele ikutegwa tugwasyigwe, nzinji nzyotweelede kucita kuleka buyo kupaila. Sena ulicizyi cimbi ncotweelede kucita?— Jesu wakaambila basikumutobela kulangila lyoonse. Ino ncinzi ncoyeeya kuti inga catugwasya kucita boobo?—

Tweelede kuswiililisya eezyo zyaambwa kumiswaangano yesu ya Bunakristo alimwi akubikkila maanu kuli zeezyo nzyotubala mu Bbaibbele. Pele alimwi tweelede kupaila lyoonse kuli Jehova kumulomba kuti atugwasye kumubelekela. Ikuti twacita oobo, tuyoogwasyigwa kutaba bakandu. Aboobo tunookkomene eelyo notujisi coolwe cakwaambila bamwi kujatikizya Mwiiyi Mupati alimwi a Bausyi.

Imagwalo aaya alakonzya kutugwasya kutayoowa bantu akuzumanana kucita zintu ziluleme: Tusimpi 29:25; Jeremiya 26:12-15, 20-24; alimwi a Johane 12:42, 43.

[Cifwanikiso icili apeeji 159]

Ino nkaambo nzi ba Petro, Jakobo alimwi a Johane ncobakeelede kulangila?

[Cifwanikiso icili apeeji 160]

Ino nkaambo nzi Petro ncaakayoowa kapati cakuti mane wakabeja kwiinda mukwaamba kuti tanaakamuzyi Jesu?

[Cifwanikiso icili apeeji 160]

Mbuti mbonga walijana mubukkale bukozyenye abwa Petro?