Cibalo 11

Mbobatugwasya Bangelo Ba Leza

BANTU bamwi baamba kuti basyoma buyo zintu nzyobabona. Pele nkufwubaala kuyeeya boobo. Kuli zintu zinji kapati nzyotutakonzyi kubona ameso eesu. Sena inga waamba cimwi cazyeezo?—

Ino mbuti kujatikizya muya ngotuyoya? Sena inga twaumvwa?— Tambika janza lyako akulifwulida. Sena kuli ncowamvwa?— Inzya kuli ncowamvwa, pele tokonzyi kuubona muya, sena tabusyi na?—

Twaabandika kale makani aajatikizya bantu bamuuya aabo mbotutakonzyi kubona. Twaiya kuti bamwi mbabotu, pele ibamwi mbabi. Kobaamba mazina bantu babotu bamuuya mbotutakonzyi kubona.— Kuli Jehova Leza, Jesu alimwi abangelo babotu. Sena abangelo babi nkobali?— Ibbaibbele lyaamba kuti inzya nkobali. Kondaambila ncooyiya kujatikizya mbabo.—

Cintu comwe ncotuzyi ncakuti ibangelo babotu alimwi ababi boonse buyo balijisi nguzu zinji kwiinda ndiswe. Imwiiyi Mupati wakalijisi luzibo lunji kujatikizya bangelo. Cakali boobo akaambo kakuti wakali mungelo katanazyalwa anyika. Wakali kupona abangelo kujulu. Ibangelo mbaakazyi bakali kubalilwa kutuulunzuma tuli mbotubede. Sena bangelo aaba boonse balijisi mazina?—

Musyule twakaiya kuti Leza wakapa mazina kunyenyeezi. Aboobo tulakonzya kusyoma kuti abalo bangelo boonse balijisi mazina. Alimwi tulizyi kuti balakonzya kwaambauzyanya akaambo kakuti Bbaibbele litwaambila ‘zyamwaambo wabaangelo.’ (1 Ba-Korinto 13:1) Ino uyeeya kuti ibaangelo inga baambaula makani nzi? Sena balaambaula kujatikizya ndiswe notuli anyika?—

Tulizyi kuti bangelo ba Saatani, imadaimona alatuyunga kutegwa tuzangile  Jehova. Aboobo kulangilwa kuti balabandika kujatikizya mbobanga bacicita eeci. Bayanda kuti tube mbuli mbabo ikutegwa Jehova aleke kutuyanda mbubwenya mbwatabayandi balo. Pele, ino mbuti kujatikizya bangelo ba Leza basyomeka? Sena uyeeya kuti abalo balaambaula kujatikizya ndiswe?— Inzya balacita oobo. Bayanda kutugwasya. Andikwaambile mbuli bangelo ba Leza bamwi mbobakagwasya bantu ibakali kumuyanda Jehova alimwi akumubelekela.

Mucikozyanyo, kuli mwaalumi umwi wazina lya Daniele iwakali kukkala ku Babuloni. Ibantu banji bakubusena oobo kunyina nobakali kumuyanda Jehova pe. Aboobo bakabikka mulawo wakusubula muntu uuli woonse wakali kupaila kuli Jehova Leza. Pele Daniele tanaakaleka pe kupaila kuli Jehova. Sena ulicizyi ncobakamucita Daniele?—

Ee, ibantu babi bakawaala Daniele mumulindi wabasyuumbwa. Daniele wakali buyo alikke abasyuumbwa bakafwide nzala kapati mumulindi ooyo. Sena ulicizyi cakacitika kuzwa waawo?— Daniele wakati, ‘Leza wakatuma  mungelo wakwe eelyo wakamuma milomo yabasyuumbwa.’ Kunyina mpaakalumwa pe! Ibangelo balakonzya kucita zintu zigambya kuli baabo ibamubelekela Jehova.—Daniyeli 6:18-22, BT.

Mpoonya kuli ciindi Petro naakali muntolongo. Tee ulayeeya kuti Petro wakali mulongwe wa Mwiiyi Mupati, Jesu Kristo. Ibantu bamwi kunyina nobakaciyanda eeco Petro ncaakabaambila naakati Jesu wakali Mwanaa Leza. Aboobo bakamubikka muntolongo Petro. Kwakali basikalumamba ibakali kulindilila Petro kutegwa ataloboki. Sena kuli wakali kukonzya kumugwasya?—

Petro wakali koona akati kabasikalumamba bobile alimwi wakaangidwe nketani kumaanza. Pele Bbaibbele lyaamba kuti: ‘Amubone! Mungelo  wa Jehova wakasika, eelyo mumuni wakamweka muntolongo. Mungelo wakatikimuna Petro akumubusya wati, “Fwamba! Buka!”’

Mpoonya, inketani nzyaakaangidwe Petro zyakaloka! Eelyo mungelo wakamwaambila kuti: ‘Liyabike zisani zyako, sama mpato zyako undiccilile.’ Basikulindila tiibakali kukonzya kumukasya nkaambo mungelo wakali kumugwasya Petro. Lino bakasika kumulyango wakajalidwe acijazyo calubulo lwabutale, eelyo kwakacitika cintu cigambya. Imulyango ooyo wakajaluka wini! Imungelo ooyo wakamuvuna Petro ikutegwa azumanane kukambauka.—Milimo 12:3-11, Ci.

Sena bangelo ba Leza balakonzya kutugwasya aswebo?— Inzya balakonzya. Sena eeci caamba kuti baya kubona kuti tatubi mumapezi ciindi coonse?— Peepe, ibangelo kunyina nobakonzya kutukwabilila kumapenzi ikuti twatalilemeka. Pele nokuba kuti tatuciti zintu zyitalomene, tulakonzya kuba mumapenzi. Ibangelo tiibakatumwa kutukwabilila kuzintu zili boobu pe. Muciindi caboobo, Leza wabapa mulimo uulibedelede wakucita.

Ibbaibbele lilaamba kujatikizya mungelo iwaambila bantu boonse koonse-koonse kuti bakombe Leza. (Ciyubunuzyo 14:6, 7) Ino mbuti mungelo mbwabaambila makani aaya? Sena uloongolola kuzwa kujulu ikutegwa bantu boonse bamumvwe?— Peepe, muciindi caboobo basikutobela Jesu anyika mbabaambila bamwi kujatikizya Leza, alimwi ibangelo balabasololela mumulimo wabo. Ibangelo balabona kuti aabo ibayandisya ncobeni kuzyiba makani aajatikizya Leza babaa coolwe cakwaamvwa. Tulakonzya kutola lubazu mumulimo ooyo wakukambauka, eelyo ibangelo bayootugwasya.

Pele, ino mbuti kuti bantu ibatamuyandi Leza kabatupenzya? Ino mbuti kuti batubikka muntolongo? Sena bangelo inga batwaangulula?— Inzya balakonzya. Pele eeco teensyi cintu ncobacita lyoonse pe.

Sikutobela Jesu wazina lya Paulo cimwi ciindi wakalaangidwe muntolongo. Wakali mubwaato ciindi cimwi nokwakali guwo mulwizi. Pele bangelo tiibakamwaangulula ndilyonya pe. Cakali boobo akaambo kakuti  kwakali bantu bambi ibakeelede kumvwa makani aa Leza. Imungelo wakati: “Utayoowi, Paulo, uleelede kuyooima kumbele lya-Kaisara.” Inzya, Paulo wakeelede kutolwa kumweendelezi wanyika yoonse uutegwa Kaisara ikutegwa Paulo akamukambaukile. Lyoonse buyo ibangelo bakalizyi nkwaakabede Paulo, eelyo bakamugwasya. Aswebo bayootugwasya ikuti twamubelekela ncobeni Leza.—Incito 27:23-25.

Alimwi kuli mulimo uuyandika kapati ngobayoocita bangelo, alimwi bayoowucita ino-ino. Iciindi cakuti Leza anyonyoone bantu bacita zibi, cili afwaafwi kapati. Boonse ibatakombi Leza wakasimpe bayoonyonyoonwa. Aabo ibaamba kuti tabasyomi kuti bangelo nkobali akaambo kakuti tabakonzyi kubabona bayoozyiba kuti balilubizyide kapati.—2 Ba-Tesalonika 1:6-8.

Ino eeco ciyoowamba nzi kulindiswe?— Ikuti katuli kulubazu lomwe abangelo ba Leza, nkokuti bayootugwasya. Pele, sena tuli kulubazu lwabo?— Inzya inga katuli kulubazu lwabo ikuti katumubelekela Jehova. Alimwi ikuti katumubelekela Jehova, nkokuti tunookulwaizya bantu abambi kuti abalo kabamubelekela.

Ikutegwa wiiye makani aambi kujatikizya mbobeendelezya bantu ibangelo, bala Intembauzyo 34:7; Matayo 4:11; 18:10; Luka 22:43; alimwi a Incito 8:26-31.

[Cifwanikiso icili apeeji 63]

Ino ncinzi Leza ncaakacita kutegwa amuvwune Daniele?

[Cifwanikiso icili apeeji 64]

Mbuti mungelo mbwaakamugwasya Petro kuzwa muntolongo?

[Cifwanikiso icili apeeji 66]

Ino mungelo umwaambila nzi Paulo?