Cibalo 47

Mbotukonzya Kuzyiba Kuti Harmagedoni Ilaafwaafwi

ULICIZYI citondezyo, tee kayi?— Mu Cibalo 46 twakabala citondezyo Leza ncaakapa cakuti takainyonyooni alimwi nyika azambangulwe. Alimwi ibaapostolo bakalomba kuti bapegwe citondezyo cakubazyibya kuti Jesu wakalipilukide acakuti mamanino aanyika naa aabweende bwazintu akali afwaafwi.—Matayo 24:3.

Mbwaanga Jesu tanaakali kunoolibonya kujulu, kwakali kuyandika citondezyo ikutegwa bantu bazyibe kuti wakatalika kweendelezya. Aboobo Jesu wakaamba zintu basikwiiya bakwe nzyobakeelede kubikkila maanu aano anyika. Eelyo zintu eezi nozyakali kuyoocitika, zyakali kuyootondezya kuti wakalipilukide alimwi wakalitalikide kweendelezya kujulu kali Mwami.

Ikutegwa ayiisye basikwiiya bakwe mbocakali kuyandika kulangila,  Jesu wakabaambila kuti: “Amuuyeeye mukuyu amisamu yoonse imwi. Ciindi nomwiibona kuti yatalika kusyuuka mulaziba kuti mainza ali afwiifwi.” Tee ulazyiba ciindi mainza naali afwaafwi. Aboobo ulakonzya kuzyiba kuti Harmagedoni ili afwaafwi nobona zintu Jesu nzyaakaamba.—Luka 21:29, 30, Ci.

Apeeji eeli alimwi alitobela, tulalanga-langa zifwanikiso zyazintu Jesu nzyaakaamba kuti zyakali kuyooba cibeela cacitondezyo cakuti Bwami bwa Leza buli afwaafwi. Izintu eezi zyoonse zyaakucitika,  Bwami bwa Leza oomo Kristo mwanooli Mweendelezi buyoovwinyauna imfwulumende zimbi zyoonse, mbubwenya mbotwakabala mu Cibalo 46.

Aboobo, kozilangisya zifwanikiso zili amapeeji obile aali musyule, eelyo tulazibandika. Kuli Matayo 24:6-14 alimwi a Luka 21:9-11, ulakonzya kwaabala makani aajatikizya zintu nzyobona muzifwanikiso eezi. Alimwi tee waibona namba nsyoonto iili acifwanikiso acimwi. Inamba eeyo njimunya ilajanika kumatalikilo aamuncali uupandulula cifwanikiso eeco. Lino atubone naa izibeela zinji zyacitondezyo ncaakapa Jesu zili mukuzuzikizyigwa sunu.

(1) Jesu wakati: ‘Muyoomvwa inkondo ampuwo zyankondo. . . . Cisi cizoolwana acisinyina, abwami buzoolwana abwaminyina.’ Sena kuli nowakamvwa kale bantu kabaamba makani aankondo?— Inkondo yanyika yakusaanguna yakalwanwa kuzwa mu 1914 kusikila mu 1918, kumane alimwi kwakaba Nkondo Yanyika Yabili kuzwa mu 1939 kusikila mu 1945. Kunyina ciindi cimbi nokwakali nkondo zyanyika! Lino kuli nkondo nyika yoonse mbwiizulwa. Lyoonse tulabala naa kumvwa makani aankondo aacipekupeku, muli sikapepele naa mumiteende.

(2) Alimwi Jesu wakati: “Kuzooba inzala . . . mumasena aansininsini.” Mbubwenya mbozyi kale, tabali bantu boonse ibajisi cakulya cikkwene. Abuzuba zyuulu-zyuulu zyabantu balafwa akaambo kanzala.

(3) Jesu wakayungizya kuti: ‘Mumasena aandeene kuyooba zilwazi.’ Sena cilwazi ulicizyi kuti ninzi?— Mbulwazi ibujaya bantu banji. Icilwazi cimwi cibyaabi ciitwa kuti Spanish flu naa Munamakwekwe cakajaya bantu batandila kutuulunzuma tuli 20 mumwaka omwe. Kuciindi cesu, ambweni bantu banji kwiinda waawo bayoofwa kubulwazi bwasikalileke (AIDS). Alimwi kuli bulwazi bwakkansa, bwamoyo alimwi amalwazi manji aambi aajaya zyuulu-zyuulu zyabantu amwaka.

 (4) Jesu wakapa cibeela cimbi cacitondezyo naakati: ‘Kuyooba mizuzumo yanyika mumasena aansininsini.’ Sena ulikuzyi kuzuzuma kwanyika?— Mizuzumo yanyika ipa kuti nyika izungaane kapati. Imaanda alakolomoka alimwi kanjikanji bantu balafwa. Kuzwa mumwaka wa 1914 kwacitika mizuzumo yanyika minji amwaka. Sena kuli wakakwaambila kale zyamakani aakuzuzuma kwanyika?—

(5) Jesu wakaamba kuti icibeela cimbi cacitondezyo cakali kuyooba “kuvwula kwabubi.” Nkakaambo kaako ncokuli bantu babba alimwi abalwani ibanji. Koonse-koonse bantu balayoowa kuti ambweni umwi ulakonzya kunjila mumaanda aabo akubabbida. Kunyina ciindi cimbi nokwakali milandu abulwani bunji kapati muzibeela zyanyika yoonse mbuli mbobuvwulide lino.

(6) Jesu wakaamba cibeela ciyandika kapati cacitondezyo naakati: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Matayo 24:14) Ikuti koisyoma mpindu ya “Makani Mabotu” aaya, weelede kwaambila bamwi. Munzila eeyo ulakonzya kutola lubazu mukuzuzikizya cibeela eeci cacitondezyo.

Ibantu bamwi balakonzya kwaamba kuti izintu Jesu nzyaakasinsima zyali kucitika lyoonse kuzwa kale-kale. Pele kunyina zintu eezyo nozyakacitikide zyoonse mumbazu zinji zyamunyika alimwi aciindi comwe. Aboobo sena lino waciteelela ncocaamba citondezyo?— Caamba kuti eelyo notwabona zintu eezyi zyoonse kazicitika, nkokuti inyika ino mbyaabi ilaafwaafwi kunjililwa mubusena anyika ya Leza mpya.

Eelyo Jesu naakaamba zyacitondezyo eeci, wakaamba azyaciindi cimwi cilibedelede mumwaka. Wakati: “Amukombe kuti kutija kwanu kutakabi ciindi camupeyo.” (Mateyo 24:20, Ci) Ino uyeeya kuti ncinzi ncaakali kwaamba mukaambo aako?—

Ikuti muntu watija mapenzi amwi lyaciindi camupeyo, eelyo nocikatazya kapati kweenda, ino ncinzi cinga cacitika?— Nokuba kuti wacikonzya  kutija, uyoocita oobo abuyumuyumu. Sena inga tiicabija kapati kuti muntu wafwa muguwo lyamupeyo akaambo kakuti wakajisi bubi kapati kacita zintu zimbi akukakilwa kutalika lweendo lwakwe kacitanasika ciindi eco?—

Sena wakateelela kaambo nkaakali kwaamba Jesu aawa naakaamba kuti muntu tayelede kulindila kusikila ciindi camupeyo kutegwa atije?— Wakali kutwaambila kuti, mbwaanga tulizyi kuti Harmagedoni ilaafwaafwi, tatuyandiki kuwayawaya kubweza ntaamu kutondezya kuti tulamuyanda Leza kwiinda mukumubelekela. Ikuti naa twamuka kucita boobo, inga tiitwacijana pe ciindi cakumubelekela. Aboobo inga twaba buyo mbuli baabo bakuciindi ca Zambangulwe ibakamvwa kucenjezya kwa Nowa pele ibatakanjila mubwaato.

Lino atubandike mbociyooba eelyo nkondo mpati ya Harmagedoni yaakwiinda. Tulaiya eeco ncatubambilide Leza toonse notumuyanda alimwi akumubelekela lino.

Ngaaya aambi magwalo aatondezya kuti Harmagedoni ilaafwaafwi: 2 Timoteo 3:1-5 alimwi a 2 Petro 3:3, 4.

 [Zifwanikiso izili apeeji 244-246]

Ino nciiyo nzi Jesu ncaakali kuyiisya naakaamba zyacisamu camukuyu?

[Cifwanikiso icili apeeji 249]

Ino nciiyo nzi ncaakali kuyiisya eelyo Jesu naakaamba zyakusoleka kutija lyaciindi camupeyo?