Cibalo 42

Ncotweelede Kubeleka

INO ncinzi ncoyandisya, sena nkubeleka naa nkusobana?— Mubwini, kusobana kuli buyo kabotu. Ibbaibbele lyaamba zyaciindi Jerusalemu ‘noyakazula balombe abasimbi basobana mumigwagwa yanguwo.’—Zekariya 8:5.

Imwiiyi Mupati wakali kukkomana kweebelela bana nobasobana. Kataninga boola anyika, Jesu wakati: “Ndakali munsi lya [Leza] kandili mubelesinyina uucibwene . . . kandisekelela lyoonse kumbele lyakwe.” Kobona kuti Jesu wakali mubelesi antoomwe a Jehova kujulu. Alimwi naakali kujulu, wakati: “Izintu zyakali kundibotela mbantu.” Inzya, mbubwenya mbotwakaiya kale, Imwiiyi Mupati wakali kumubikkila maanu muntu woonse kubikkilizyaa bakubusi.—Tusimpi 8:30, 31, NW.

Sena uyeeya kuti Jesu wakali kusobana naakacili  mwana?— Uleelede kuti wakacita oobo. Pele mbwaanga wakali “mubelesinyina” kujulu, sena wakabeleka anaakali anyika?— Jesu wakali kwiitwa kuti “mwana wamubezi.” Pele alimwi lwakwe wakali kwiitwa kuti “mubezi.” Ino eeci caamba nzi?— Caamba kuti Josefa, iwakamukomezya Jesu kali mwanaakwe uleelede kuti wakamuyiisya. Aboobo awalo Jesu wakaba mubezi.—Matayo 13:55; Marko 6:3.

Ino Jesu wakali mubezi uuli buti?— Mbwaanga wakali mubelesinyina uucibwene kujulu, sena toyeeyi kuti wakali mubezi uucibwene anyika?— Kolanga mbowakali muyumu mulimo wakubeza kuciindi eeco. Kulangilwa kuti Jesu wakeelede kuunka musokwe kuyootema cisamu, kucikosaula muzibeela-beela, kubweza  zibeela-beela zyacisamu eezyo kutola kumunzi alimwi akuzibeza kuba matafwule, mabbenci naa zintu zimbi.

Sena uyeeya kuti Jesu wakalikkomene naakali kucita mulimo ooyu?— Sena inga kokkomene ikuti kocikonzya kubambila bantu matafwule, zyuuno azintu zimbi zibotu?— Ibbaibbele lyaamba kuti ncintu cibotu kuti muntu “alibotezye mumilimo yakwe.” Mulimo upa lukkomano lumwi ndotakonzyi kujana nosobana.—Mukambausi 3:22.

Mubwini, ikubeleka kulatugwasya mumizeezo alimwi akumubili. Ibana banji bakkomanina buyo kukkala, kulya misalo akusobana abeenzinyina. Baba basicinguni akuba batolo alimwi kunyina mubwini nobakkomene pe. Alimwi kunyina nobakkomanisya bambi pe. Ino ncinzi ncotweelede kucita kutegwa katukkomene?—

Mu Cibalo 17 cabbuku eeli twakaiya kuti ikupa alimwi akugwasya bamwi kulatukkomanisya. (Incito 20:35) Ibbaibbele lyaamba Jehova kuti ngu “Leza uukkomene.” (1 Timoteo 1:11, NW) Alimwi mbubwenya mbutwabala ku Tusimpi, Jesu wakali “[ku]sekelela lyoonse kumbele lyakwe.” Ino nkaambo nzi Jesu ncaakakkomene?— Wakakaamba ikaambo kamwi kakamupa kukkomana naakati: “Mbubonya Taata mbwacibeleka ambuli sunu, amebo ncembeleka.”—Johane 5:17.

Jesu naakali anyika, tanaakabeleka kali mubezi mubuumi bwakwe boonse. Jehova Leza wakajisi mulimo uulibedelede ngwaakali kuyanda kuti aucite anyika. Sena uluuzyi kuti wakali mulimo nzi?— Jesu wakati: “Mebo ndeelede kuyookambauka Makani Mabotu aabwami bwa Leza . . . nkaambo ncencico ncindakazida.” (Luka 4:43, Ci) Zimwi ziindi Jesu naakali kukambaukila bantu, bakali kumusyoma alimwi bakali kwaambila bamwi zintu eezyo nzyaakaamba, mbubwenya ooyu mwanakazi muna Samariya ngobona mucifwanikiso aawa mbwaakacita.—Johane 4:7-15, 27-30.

Ino Jesu wakali kulimvwa buti kujatikizya kucita mulimo ooyu?  Sena uyeeya kuti wakali kuyanda kuucita?— Jesu wakati: “Cakulya cangu nkucita ziyanda yooyo wakandituma, akumanizya mulimo wakwe.” (Joni 4:34, Ci) Ino mbuti mbolombozya kulya cilyo ncoyandisya kapati?— Eeci cikupa muzeezo kujatikizya Jesu mbuli mbwaakali kuuyanda mulimo ngwaakamupa Leza kuti aucite.

Leza wakatulenga kutegwa ikwiiya kubeleka kakutugwasya kuba bantu bakkomene. Waamba kuti icipego Cakwe kubantu ncakuti ‘basekelele mumilimo yabo.’ Aboobo ikuti waiya kubeleka nocili mukubusi, ibukkale bwako boonse bunooli bwalukkomano.—Mukambausi 5:19.

Eeco tacaambi kuti mwana muniini ulakonzya kucita mulimo wamupati, pele toonse tulakonzya kucita mulimo umwi. Ibazyali bako balakonzya kababeleka buzuba abuzuba kutegwa bajane mali aakuti mukwasyi wanu kuujisi cakulya alimwi aŋanda mwakukkala. Alimwi mbubwenya mbozyi, kuli milimo minji yeelede kubelekwa aŋanda ikutegwa kaisumbwide alimwi kaili yabulondo.

Ino mmilimo nzi iiliko njokonzya kucita iiyoogwasya mukwasyi woonse?— Ulakonzya kugwasilizya kubikka zintu kutafwule, kusanzya mitiba, kusowa tombe, ikusalazya nkoona alimwi akuyobola kabotu zintu nzyosobanya. Ambweni ulazicita kale zimwi akati kazintu eezyo. Imulimo ooyo ulagwasya ncobeni kumukwasyi.

Atubone mbuli mulimo uuli boobo mbougwasya. Zyakusobanya zyeelede kuyobolwa wamana kusobana. Ino nkaambo nzi nconga waamba kuti eeci cilayandika?— Cipa kuti ŋanda kaili yabulondo alimwi cipa kutalicisa. Ikuti kotaziyoboli nzyosobanya, bumwi buzuba banyoko balakonzya kuyoonjila muŋanda kabayumwide zintu mumaanza akucilyata cimwi. Balakonzya kulinontola kuli ncico akuwa, calo cinga cabapa kulicisa. Alimwi mane balakonzya kuyandika kuunka kucibbadela. Sena eeco inga tiicabija?—Aboobo eelyo noziyobola nzyosobanya wamana kusobana, cilabagwasya boonse.

Kuli milimo iimbi njobajisi abalo bana. Mucikozyanyo, milimo yakucikolo.  Kucikolo ulaiya mbokubalwa. Ibana bamwi cilabakkomanisya kubala, pele ibamwi baamba kuti nciyumu. Nokuba kuti cilibonya kuti nciyumu kumatalikilo, uyookondwa ikuti wacizyiba kubala kabotu. Eelyo nocizyi kubala, kunooli zintu zibotu kapati nzyonga waiya. Unoocikonzya nokuba kulibalila bbuku lya Leza mwini, Ibbaibbele. Aboobo eelyo noicita cabusungu milimo yako yakucikolo, ncintu cikugwasya, tee kayi?—

Kuli bantu bamwi ibatayandi kubeleka. Ambweni kuli ngozyi uuli boobo. Pele mbwaanga Leza wakatulenga kuti katubeleka, tweelede kwiiya mbotunga twakukkomanina kubeleka. Ino Mwiiyi Mupati wakali kuuyanda buti mulimo wakwe?— Cakali mbuli kulya cilyo ncaakali kuyandisya. Alimwi ino mmulimo nzi ngwaakali kwaamba?—Ngwakwaambila bamwi zya Jehova Leza alimwi ambobanga bajana buumi butamani.

Aboobo nceeci cinga catugwasya kuukkomanina mulimo. Kolibuzya kuti, ‘Ino nkaambo nzi mulimo ooyu ncoweelede kucitwa?’ Nowazyiba kaambo cintu cimwi ncociyandika, ulayandisya kucicita. Alimwi kunyina makani naa mulimo ooyo mmupati naa mmusyoonto, ubeleke kabotu alimwi cabusungu. Ikuti waucita kabotu, ulakonzya kusekelela mumilimo yamaanza aako, mbubwenya Mwiiyi wesu Mupati mbwaakacita.

Ibbaibbele lilakonzya kugwasya muntu kuba mubelesi mubotu. Bala ncolyaamba ku Tusimpi 10:4; 22:29; Mukambausi 3:12, 13; alimwi a Ba-Kolose 3:23.

[Cifwanikiso icili apeeji 217]

Ino ncinzi ncaakali kucita Mwiiyi Mupati katana kuboola anyika?

[Zifwanikiso izili apeeji 218]

Ino mmilimo nzi yobile njaakacita Jesu naakali anyika?

[Cifwanikiso icili apeeji 221]

Ino nkaambo nzi ncoyelede kuziyobola nzyosobanya wamana kusobana?