Cibalo 5

“Ngooyu Mwanaangu”

EELYO bana nobacita zintu zibotu, aabo ibabalanganya balakkomana. Eelyo mwana musimbi naa musankwa nacicita kabotu cintu cimwi naa kucita zintu zibotu, bausyi balakkomana ikwaambila bamwi kuti: “Ooyu mmwanaangu.”

Ciindi coonse Jesu ulacita zintu zikkomanisya Bausyi. Aboobo Bausyi balamukkomanina kapati. Sena ulaciyeeya ncobakacita Bausyi Jesu bumwi buzuba eelyo naakali aabasikumutobela bakwe botatwe?— Inzya, Leza wakaambaula kuzwa kujulu kubaambila kuti: “Ngooyu mwanaangu uuyandwa ngwinkondelwa.”—Matayo 17:5.

Jesu ulakukkomanina lyoonse ikucita zintu izikkomanisya Bausyi. Sena ulikazyi kaambo kamupa kuzikkomanina? Nkaambo ulabayanda kapati Bausyi. Ikuti muntu kacita zintu akaambo kakusungilizyigwa buya, cilamuyumina ikuzicita zintu eezyo. Pele eelyo nalisungwide buya, zintu zilauba-uba. Sena ulicizyi ncocaamba kulisungula?— Caamba kuyandisya kucita cintu cimwi.

Neliba leelyo Jesu katana boola anyika, wakalilisungwide kucita kufwumbwa ceeco ncobakali kumwaambila kuti acite Bausyi. Wakacita oobo akaambo kakuti ulamuyanda Jehova Leza, Bausyi. Jesu wakali kukkala kabotu kujulu antoomwe a Bausyi. Pele Leza wakajisi mulimo uulibedelede ngwaakali kuyanda kuti acite Jesu. Ikutegwa aucite mulimo ooyo, Jesu wakeelede kuzwa kujulu. Wakeelede kuzikuzyalwa kali mwana anyika. Jesu wakalilisungwide kucita zyeezi akaambo kakuti Jehova wakali kuyanda kuti azicite.

Ikutegwa azyalwe kali mwana anyika, Jesu wakeelede kuba abanyina. Sena ulibazyi izina banyina Jesu?— Bakali ba Mariya. Jehova wakatuma mungelo Gabriyeli kuzwa kujulu kuti akanane a Mariya. Gabriyeli wakamwaambila kuti wakali kuyoozyala mwana musankwa. Imwana ooyo wakali  kuyoowulikwa zina lyakuti Jesu. Alimwi ino mbaani bakali kuyooba bausyi bamwana ooyu?— Imungelo wakaamba kuti Bausyi bamwana wakali kuyooba Jehova Leza. Nkakaambo kaako Jesu ncaakali kuzyooyitwa kuti Mwanaa Leza.

Ino uyeeya kuti Mariya wakalimvwa buti naakaambilwa makani aaya?— Sena wakaamba kuti, “Tandiyandi kuba banyina Jesu”? Peepe, Mariya wakalilibambilide kucita ceeco ncaakali kuyanda Leza. Pele ino mbuti Mwanaa Leza kujulu mbwaakali kunga wazikuzyalwa kali mwana anyika? Ino kuzyalwa kwa Jesu kwakaindene buti akuzyalwa kwabana bambi boonse? Sena ulikuzyi kwiindana kuliko?—

Leza wakalenga bazyali besu bakusaanguna ba Adamu a Eva kuti kabaswaangana munzila iikondelezya. Kuzwa waawo, imwana wakali kukonzya kutalika kukomena mwida lyabanyina. Ibantu baamba kuti aaya mmaleele! Ndasyoma anduwe mboyeeya oobo.

Pele Leza wakacita cintu cimwi icakali maleele aagambya kwiinda waawo. Wakalonzya buumi bwa Mwanaakwe kuzwa kujulu akumubikka mwida lya Mariya. Kunyina ciindi cimbi Leza naakacitide boobo, alimwi kunyina naaciinduluka eeco pe kuzwa ciindi eeco. Kwiinda mumaleele aaya, Jesu wakatalika kukomena mwida lya Mariya mbubwenya bukomena bana bambi mumada aabamanyina. Kuzwa waawo, Mariya wakakwatwa kuli Josefa.

Iciindi nocakakkwana cakuti Jesu azyalwe, Mariya a Josefa bakali kuswaya munzi wa Betelehemu. Pele munzi ooyo wakalizwide abantu. Kwakanyina busena nobuceya ooko Mariya a Josefa nkobakali  kunga bakkala, aboobo bakakkala muciba. Kubusena oobo, Mariya wakatumbuka, eelyo Jesu wakabikkwa mucilido caŋombe abanyama bambi, mbubwenya mbobona aawa. Icilido ncibelesyo mubikkilwa cakulya caŋombe naa banyama bambi kuti balide mumo.

Imasiku eelyo Jesu naakazyalwa, kwakacitika zintu zikondelezya. Munsi amunzi wa Betelehemu, imungelo wakalibonya kubeembeli bamwi. Wakabaambila kuti Jesu wakali muntu uuyandika kapati. Imungelo wakaamba kuti: ‘Amulange! Ndamuletela makani mabotu aakondelezya kapati kubantu boonse. Sunu kwazyalwa muntu uuyoofwutula bantu.’—Luka 2:10, 11.

Imungelo wakaambila beembeli kuti bakali kuyoomujana Jesu ku Betelehemu, kalazikidwe mucilido caŋombe. Ndilyonya, kwakaboneka bangelo bambi ibakasangana amungelo wakusaanguna mukutembaula  Leza. Ibangelo aabo bakaimba kuti: “Akube bulemu kuli Leza . . . [amwalo] munyika amube luumuno akati kabaabo mbakondelwa!”—Luka 2:12-14, Ci.

Ibangelo nobakapilukila kujulu, ibeembeli bakaunka ku Betelehemu eelyo bakaakumujana Jesu. Ooko bakaambila Josefa alimwi a Mariya zintu zibotu zyoonse nzyobakamvwa. Sena inga weezyeezya mbwaakakkomene Mariya akaambo kakuti wakalisungula kuba banyina Jesu?

Nikwakainda ciindi, Josefa alimwi a Mariya bakatola Jesu kumunzi wa Nazareta. Mumunzi ooyo mwaakakomenena Jesu. Naakaba mwaalumi, wakatalika mulimo wakwe mupati wakuyiisya. Mulimo ooyu wakali cibeela camulimo Jehova Leza ngwaakali kuyanda kuti Mwanaakwe azyoocite anyika. Jesu  wakalilisungwide kucita mulimo ooyo akaambo kakuti wakali kubayanda kapati Bausyi bakujulu.

Jesu katana kutalika mulimo wakwe kali Mwiiyi Mupati, wakabbapatizyigwa a Johane Mubbapatizi mu Mulonga wa Jordano. Mpoonya kwakacitika cintu cimwi cigambya! Eelyo Jesu naakanuka kuzwa mumaanzi, Jehova wakaambaula kuzwa kujulu, ulaamba: “Ooyu ngo mwanaangu ngwenjandisisya, ulandibotezya kapati.” (Mateyo 3:17, Ci) Sena tokkomani eelyo bazyali bako nobakwaambila kuti balakuyanda?— Tulakonzya kusyoma kuti awalo Jesu wakakkomana.

Jesu wakali kucita zintu ziluleme lyoonse. Kunyina naakali kulicengeezya buyo kuzintu nzyaakali kucita. Kunyina naakaambila bantu kuti wakali Leza. Imungelo Gabriyeli wakaambilide Mariya kuti Jesu wakali kuzooyitwa kuti Mmwanaa Leza. Jesu lwakwe wakaamba kuti wakali Mwanaa Leza. Alimwi kunyina naakaambila bantu kuti wakajisi luzibo kwiinda ndobajisi Bausyi. Wakati: “Taata mupati kwiinda ndime.”—Johane 14:28.

Neliba leelyo naakacili kujulu, eelyo Bausyi Jesu nobakamupa mulimo wakucita, wakali kuucita. Kunyina naakali kusyomezya buyo kuti wakali kunoowucita mulimo pele amana wacita zimbi kuzwa waawo. Wakali kubayanda Bausyi. Aboobo wakali kuzitobela nzyobakamwaambila Bausyi. Mpoonya eelyo Jesu naakaboola anyika, wakazicita zyoonse eezyo nzyobakamutuma Bausyi kuti azyoocite. Kunyina ciindi naakacimana mukucita zintu zimbi pe. Anu Jehova ncamukkomanina Mwanaakwe!

Aswebo tuyanda kumukkomanisya Jehova, tee kayi?— Ikuti naa mboobo, atutondezye kuti tulamuswiilila Leza mbubwenya mbuli bwakacita Jesu. Leza ulaambaula andiswe kwiinda mu Bbaibbele. Inga tiicabota ikwiile kulitondezya kuti tulamuswiilila Leza pele katusyoma zimbi akucita zintu ziimpene azyaambwa mu Bbaibbele, tee kayi?— Alimwi koyeeya kuti, tuyooyandisisya ikukkomanisya Jehova ikuti katumuyanda ncobeni.

Lino bala magwalo aaya aambi aamu Bbaibbele aatondezya nzyotweelede kuzyiba alimwi akusyoma kujatikizya Jesu: Matayo 7:21-23; Johane 4:25, 26; alimwi a 1 Timoteo 2:5, 6.

[Cifwanikiso icili apeeji 33]

Ino ncinzi mungelo Gabriyeli ncaakaambila Mariya?

[Cifwanikiso icili apeeji 34]

Ino nkaambo nzi Jesu ncali mukubikkwa mucilido caŋombe?

[Cifwanikiso icili apeeji 35]

Ino mmakani nzi mabotu mungelo umwi akati kabaaba ngaakaambila beembeli?