Cibalo 19

Sena Ncibotu Kulwana?

SENA kuli basankwa naa basimbi mbozyi balipeekezya kukomena alimwi ibalidunda?— Sena ulacikkomanina kweenda ambabo? Naa sena inga wayanda kubaa muntu silubomba alimwi siluumuno?— Imwiiyi Mupati wakati: ‘Balaacoolwe basiluumuno, nkaambo bazyootegwa mbana ba Leza.’—Matayo 5:9.

Pele zimwi ziindi bantu bamwi bacita zintu zitunyemya. Sena taali masimpe aayo?— Aboobo tulakonzya kuyanda kubajosezya bubi. Eeci cakacitika cimwi ciindi kuli basikwiiya ba Jesu eelyo nobakali kweenda a Jesu kuya ku Jerusalemu. Andikwaambile mbocakabede.

Nobakeenda musinzo uuli mbuubede, Jesu wakatuma bamwi basyoonto buyo akati kabasikwiiya bakwe kumbele kumunzi wabana Samariya kuti bakayandaule busena bwakulyookezezya alimwi akoona. Pele bantu bamumunzi ooyo kunyina nobakayanda kuti boone mumunzi ooyu, nkaambo bana Samariya bakajisi bukombi bumbi. Alimwi kunyina nobakali kumuyanda  muntu uuli woonse wakali kuunka kumunzi wa Jerusalemu kuyookomba.

Ikuti eeco nocakacitikila nduwe, ino nowakacita buti? Sena nowakanyema? Sena nowakayanda kubajokezya bubi bwabo?— Eeco ncobakali kuyanda kucita basikwiiya ba Jakobo alimwi a Johane. Bakaambila Jesu kuti: ‘Sena uyanda kuti tulailile mulilo useluke kuzwa kujulu ubanyonyoone?’ Anu Jesu ncaakabaulika kuti Mbana Basimuzumo! Pele Jesu wakabaambila kuti tiicakaluzi pe kubacitila boobo bantu bambi.—Luka 9:51-56; Marko 3:17.

Ncamasimpe kuti bantu bamwi balakonzya kabatupenzya naa kutatufwida lubomba zimwi ziindi. Bana bamwi inga kabatayandi kuti tubasangane muzisobano zyabo. Alimwi mane balakonzya kwaamba kuti: “Kozwa okuno, tatuyandi kusobana anduwe.” Eelyo nocacitika cili boobo, cilakonzya kutucima, tee kayi? Tulakonzya kuyanda kubacitila cintu cimwi ciyoobasubula abalo. Pele sena tweelede kucita oobo?—

Bweza Bbaibbele lyako. Atujalule ku Tusimpi caandaano 24, kapango ka 29. Ooko tubala kuti: “Utaambi kuti, Njoomucitila mbubonya mbwaakandicitila, njoomubweedezezya bulumbu bweelede milimo yakwe.”

Ino uyeeya kuti kapango aako kaamba nzi?— Kaamba kuti tatweelede kujosezya bamwi bubi pe. Tatweelede kuba basilunya kumuntu akaambo kakuti walo ngusilunya. Pele ino mbuti ikuti muntu umwi wakutalika kayanda kuti mulwane? Ulakonzya kusoleka kukunyemya kwiinda mukukunonga akubelesya majwi mabyaabi kupandulula mbobede. Ulakonzya kukuweela akwaamba kuti wayoowa. Ino mbuti kuti wakwaamba kuti uli mukandu? Ino ncinzi ncoyelede kucita? Sena weelede kumulwana?—

Alimwi atulange ncolyaamba Bbaibbele. Jalula kuli Matayo caandaano 5, kapango ka 39. Ooko Jesu waamba kuti: ‘Utamutonteeki muntu mubi, pele muntu umwi aumwi uukuuma kusaya lyalulyo, umusandwide limwi alyalo.’ Ino uyeeya kuti wakali kwaamba nzi Jesu mumakani  aayo? Sena wakali kwaamba kuti, ikuti muntu wakuuma kusaya lyomwe weelede kumulekela kuti akuume akusaya limbi?—

Peepe, teensyi ncaakali kwaamba Jesu eeco pe. Ilubayi taluli mbuli kuumwa amfwaindi pe. Luli mbuli kutonkaikwa buyo. Imuntu ulakonzya kutuuma lubayi kutegwa tutalike kulwana. Inga kayanda buyo kuti tunyeme. Alimwi ikuti naa twanyema akutalika kumutonkaika aswebo, ino ncinzi cinga cacitika?— Tulatalika kulwana.

Pele Jesu tanaakayanda kuti basikwiiya bakwe kabalwana pe. Aboobo wakaamba kuti, ikuti muntu umwi watuuma lubayi, tatweelede kumuuma aswebo pe. Tatweelede kunyema akutalika kulwana pe. Ikuti naa twalwana, tutondezya kuti tuli buyo mbuli yooyo watalisya nkondo.

Ikuti kwatalika mapenzi, ncinzi ncoyeeya kuti ncecintu ciinda kubota  ncotweelede kucita?— Nkuzwa aabusena oobo. Imuntu ooyo uumbi ulakonzya kuzumanana kukutonkaika kwaciindi cili mbocibede. Pele mukuya kwaciindi ulakonzya kucileka. Eelyo nowazwa abusena oobo, tacaambi kuti unyina nguzu pe. Caamba kuti ulijisi nguzu zyakukakatila kuzyeelelo ziluzi.

Pele ino mbuti ikuti naa wamuuma akumuzunda muntu ngomwali kulwana limwi? Ino ncinzi cinga cacitika?— Ooyo ngowauma ulakonzya kuboola abeenzinyina bali mbobabede aciindi cimbi. Mane balakonzya kukuuma cakukucisa ankoli naa kukuyasa acipeni. Aboobo sena wakateelela kaambo lino Jesu ncatayandili kuti katulwana?—

Ino ncinzi ncotweelede kucita eelyo notubona bantu bamwi kabalwana? Sena tweelede kuba kulubazu lumwi akati kabaabo balwana?— Ibbaibbele lilatwaambila cintu ncotweelede kucita. Jalula ku Tusimpi caandaano 26, kapango ka 17 (BT). Lyaamba kuti: “Ooyo mweendanzila uunjilila kuzwangana kutali kwakwe, uli mbuli muntu uujata matwi aamubwa.”

Ino ncinzi cinga cacitika ikuti waakwela matwi aamubwa? Inga mubwa wamvwa kucisa, aboobo ulakonzya kukuluma, tee kayi? Ikuti nayanda kuti alekezyegwe, ayebo waajatisya matwi aakwe, uyoomunyemya kwiindilila. Ikuti naa wamulekezya, uyookuluma. Pele sena ulakonzya kwiile kumujata kumatwi akwiima mane kukabe kutamani?—

Aayo ngamapenzi ngotunga twaliletela ikuti twanjila munkondo yabantu bambi. Ambweni inga katutamuzyi watalisya nkondo naa kaambo nkobalwanina. Umwi inga kaumwa, pele ambweni wakabba cintu cimwi kuli yooyo uumuuma.  Ikuti naa twamuvwuninina, inga caba mbuli kuti tulumbaizya milimo yakwe mibi. Eeco inga kacitaluzi pe, tee kayi?

Aboobo, ino ncinzi ncoyelede kucita ikuti wabona bantu balwana?— Ikuti kamuli kucikolo, ulakonzya kubaambila bayi cakufwambaana. Alimwi ikuti kakutali kucikolo, ulakonzya kwiita bazyali bako naa kwaambila mupulisa. Inzya, neliba leelyo bantu bamwi nobayanda kulwana, swebo tweelede kuba basiluumuno.

Basikwiiya ba Jesu beni-beni balacita kufwumbwa nzyobakonzya kutegwa batajatikizyigwi mukulwana. Munzila eeyi, tutondezya kuti tulikakatide kuzyeelelo ziluzi. Ibbaibbele lyaamba kuti sikwiiya wa Jesu “teelede kulwana pe, [pele] uleelede kuba mutete-moyo kubantu boonse.”—2 Timoteo 2:24.

Lino atulange malailile aambi aakonzya kutugwasya kutajatikizyigwa mukulwana: Ba-Roma 12:17-21 alimwi a 1 Petro 3:10, 11.

[Cifwanikiso icili apeeji 102]

Ino ncinzi Jakobo alimwi a Johane ncobakayanda kucita kutegwa bajosezye bana Samariya bubi bwabo?

[Cifwanikiso icili apeeji 104]

Ncinzi ncotweelede kucita ikuti muntu umwi kayanda kuti tulwane?

[Cifwanikiso icili apeeji 105]

Ino kujatikizyigwa munkondo zyabamwi kukozyenye buti akukwela matwi aamubwa? Ulakonzya kulicisa, aboobo utaciti oobo pe!

[Cifwanikiso icili apeeji 106]

Ino ncinzi ncoyelede kucita ikuti wabona bantu balwana?