Cibalo 9

Tweelede Kukukazya Kutepaulwa

SENA kuli muntu wakakwaambila kucita cintu cimwi cibyaabi?— Sena wakakusungilizya buya kucicita? Naa sena wakakwaambila kuti cilakondelezya alimwi takuli kulubizya ikuti wacicita?— Imuntu nacita zili boobu kulindiswe, nkokuti ututepaula buya.

Ino ncinzi ncotweelede kucita ikuti twatepaulwa? Sena tweelede kuzumina akucita cintu cibyaabi?— Eeco inga tiicamukkomanisya pe Jehova Leza. Pele sena ulimuzyi uunga wakkomana?— Inzya, ngu Saatani Diabolosi.

Saatani ngusinkondonyinaa Leza alimwi andiswe. Tatukonzyi kumubona akaambo kakuti mmuntu wamuuya. Pele walo ulakonzya kutubona. Bumwi buzuba Diabolosi wakabandikaa Jesu, Imwiiyi Mupati akusoleka kumusunka. Atubone ncaakacita Jesu. Twamana kucibona tulazyiba cintu ciluzi ncotweelede kucita eelyo notutepaulwa.

Lyoonse buyo Jesu wakali kuyanda kucita kuyanda kwa Leza. Eeci wakacitondezya caantangalala kwiinda mukubbapatizyigwa mu Mulonga wa Jordano. Mbwaakamanina buyo kubbapatizyigwa Jesu, nceciindi Saatani naakasola kumutepaula. Ibbaibbele lyaamba kuti “kujulu kwakajaluka” kuli Jesu. (Matayo 3:16) Eeci caamba kuti lino Jesu wakatalika kuyeeya zyoonse zyabukkale bwakwe bwamusyule kali kujulu a Leza.

Naakazwaa kubbapatizyigwa, Jesu wakaunka munkanda kutegwa akayeeye cakuzinzibala aazintu zimwi  nzyaakayibalukide. Ooko wakakkala mazuba amasiku aali 40. Iciindi eeci coonse Jesu tanaakalya cakulya cili coonse, aboobo wakalifwide nzala kapati. Eeci nceciindi Saatani naakamusunka Jesu.

Diabolosi wakaamba kuti: “Kuti koli Mwana a-Leza, ambila mabwe aya, abe insima.” Elo insima yakali kuyandika kapati alimwi ilanona kaka! Pele sena Jesu wakali kukonzya kusandula mabwe kuba insima?— Inzya wakali kukonzya. Nkaambo nzi? Nkaambo Jesu, Mwanaa Leza wakalijisi nguzu zilibedelede.

Sena nowakasandula bbwe kuti libe insima ikuti Diabolosi naakakwaambila kucita boobo?— Jesu wakalifwide nzala. Aboobo sena nocatakabota ikusandula mabwe kuba nsima ciindi comwe buyo?— Jesu wakalizyi kuti tiicakaluzi ikubelesya nguzu zyakwe munzila eeyo. Jehova wakamupede nguzu eezyo ikutegwa akwelelezye bantu kuboola kuli Leza, ikutali kuzibelesya kucita milimo yakwe mwini.

Aboobo muciindi cakucita boobo, Jesu wakaambila Saatani cilembedwe mu Bbaibbele kuti: ‘Muntu taponeni ansima ilikke, pele ulaponena aamajwi aazwa kumulomo wa Jehova.’ Jesu wakalizyi kuti ikucita ncayanda Jehova kulayandika kapati kwiinda kubaa cakulya.

Pele Diabolosi wakasoleka alimwi. Wakatola Jesu mu Jerusalemu akumwiimika aansonje yatempele. Mpoonya Saatani wakaamba kuti: ‘Kuti koli Mwanaa Leza koliwaala ansi. Tee kayi  kulilembedwe kuti, Leza uyoolailila bangelo bakwe, nkabela bayookukwaba kuti utalicisi.’

Ino nkaambo nzi Saatani ncaakaamba makani aaya?— Wakaamba boobu kutegwa asunke Jesu kucita cintu cimwi cabufwubafwuba. Pele alimwi Jesu kunyina naakamuswiilila Saatani pe. Wakaambila Saatani kuti: “Kulilembedwe kuti, Utasunki Jehova Leza wako.” Jesu wakalizyi kuti cakali lubide ikusunka Jehova kwiinda mukubikka buumi bwakwe muntenda.

Nokuba boobo, Saatani tanaakaleka pe. Lino wakatola Jesu kumulundu mulamfwu kapati. Ooko wakatondezya Jesu zisi zyoonse naa mfwulumende zyanyika abulemu bwanzizyo. Mpoonya Saatani wakaambila Jesu kuti: ‘Zyoonse eezyi inga ndakupa, ikuti naa wavwundama akundikomba.’

Kociyeeya buyo cipego Diabolosi ncaakali kuyanda kumupa. Sena ncobeni izisi naa mfwulumende zyabantu zyoonse nzizya Saatani?— Jesu kunyina naakakazya kuti tiizyakali zya Saatani. Naakakazya ikuti nozyatakali zya Saatani. Masimpe, Saatani ngomweendelezi wazisi zyoonse zyamunyika. Ibbaibbele mane limwaamba kuti “mwami wenyika ino.”—Johane 12:31.

Ino inga wacita buti ikuti Diabolosi wasyomezya kukupa cintu cimwi ikuti naa wamukomba?— Jesu wakalizyi kuti tiicakaluzi ikumukomba Diabolosi, kunyina makani abulumbu mbwaakali kunoopegwa mukucita boobo. Aboobo Jesu wakati: ‘Kozwa Saatani! Nkaambo Bbaibbele lyaamba kuti alikke ngoyelede kukomba akubelekela ngu Jehova Leza wako.’—Matayo 4:1-10; Luka 4:1-13.

Aswebo tulatepaulwa munzila zinji. Sena ulaazyi masunko amwi aaliko?— Nceeci cikozyanyo. Banyoko balakonzya kujika cakulya cibotu kapati mbuli nyama yaŋombe naa yankuku. Balakonzya kukwaambila kuti utalyi nokuba kulabila kusikila ciindi cakulya nsima cisike. Pele ulifwide nzala kapati, aboobo inga wayanda kulya asyoonto. Sena uyoobamvwida banyoko?— Saatani uyanda kuti utabamvwidi pe.

 Koyeeya cakacitikila Jesu. Wakalifwide nzala kapati awalo. Pele wakalizyi kuti ikukkomanisya Leza ncecakali kuyandika kapati kwiinda kulya. Utondezya kuti uli mbuli Jesu eelyo nocita caamba banyoko.

Ambweni bana bamwi balakonzya kukwaambila kuti unywe mapiilusi amwi. Balakonzya kukwaambila kuti alakupa kuti ukkomane kapati. Pele mapiilusi aaya alakonzya kaali misamu iikola. Alakonzya kupa kuti uciswe kapati alimwi mane  akufwa. Ambweni umwi ulakonzya kukupa kasanga katombwe, ikajisi misamu iikola akukusungilizya kuti ukafwebe. Ino ncinzi ncoyoocita?—

Koyeeya mbwaakacita Jesu. Saatani wakasola kusinikizya Jesu kubikka buumi bwakwe muntenda kwiinda mukumwaambila kuti asotoke kuzwa ansonje yatempele. Pele Jesu wakakaka kucita boobo. Ino ncinzi ncoyoocita ikuti muntu umwi wakusungilizya kucita cintu cimwi cikonzya kukunjizya muntenda?— Jesu tanaakamuswiilila pe Saatani. Ayebo toyelede kumuswiilila muntu uuli woonse uusoleka kukupa kuti ucite zintu zitaluzi.

Ambweni bumwi buzuba uyoowambilwa kuti uvwundame naa kukomba cikozyanyo munzila imwi, eeco Bbaibbele ncolyaamba kuti tatweelede kucicita. (Kulonga 20:4, 5) Cilakonzya kacili cibeela cacisobano kucikolo. Ulakonzya kwaambilwa kuti uyootandwa cikolo ikuti wakaka kucicita. Ino ncinzi ncoyoocita?—

Ncuuba-uba ikucita zintu ziluzi eelyo boonse nobacita zintu eezyo. Pele ikucita zintu ziluzi cilakonzya kuyuma kapati eelyo bamwi nobasola kutuyunga kucita cintu cimwi citaluzi. Balakonzya kwaamba kuti ncobacita tacili cibyaabi pe. Pele imubuzyo uuyandika kapati ngwakuti, Ino ncinzi Leza ncaamba kujatikizya cintu eeco? Walo nguuwazyi kabotu makani oonse.

Aboobo, kunyina makani ancobakonzya kwaamba bamwi, tatweelede kucita zintu Leza nzyaamba kuti taziluzi. Ikuti twacita oobo, lyoonse buyo tunoomukkomanisya Leza, alimwi kunyina notuya kukkomanisya Diabolosi pe.

Imakani aambi aakonzya kukugwasya kuzunda masunko kujatikizya zintu zitaluzi alakonzya kujanwa ku Intembauzyo 1:1, 2; Tusimpi 1:10, 11; Matayo 26:41; alimwi a 2 Timoteo 2:22.

[Cifwanikiso icili apeeji 52]

Ino nzinzyi nzyalangilwa kuti nzyaakatalika kuyeeya Jesu naakabbapatizyigwa?

[Cifwanikiso icili apeeji 53]

Mbuti Diabolosi mbwaakabelesya mabwe kusunka Jesu?

[Cifwanikiso icili apeeji 55]

Ino nkaambo nzi Saatani ncaakali kukonzya kupa Jesu mfwulumende eezyi zyoonse?

[Zifwanikiso izili apeeji 55]

Ino ncinzi ncoyoocita ikuti naa wasunkwa?

[Cifwanikiso icili apeeji 56]

Nkaambo nzi ncocitaluzi ikubelesya zikozyanyo mubukombi?