Bantu Ba Leza Bapilukila Ku Nyika Yokwabo

KULI malundu aadumide obile aazingulukide cisi ca Iran—nkokuti aa Elburz (kumusanza kwa Lwizi lwa Caspian) alimwi aa Zagros (kumusanza lwaajwe kugama ku Kankolola ka Persia). Imalundu aaya ali amimpata milamfwu iijisi mbolezi alimwi ajisi mingenyu iilaa masamu manji. Mumimpata eeyi tamupyi kapati pe, pele izibanda zipati-pati zilaatala-tala alimwi izyuungwa guwo zilatontola kapati lyamupeyo. Munsi-munsi kuli cimpayuma citakkali bantu banji. Mucooko eeci, nkokuti kujwe aa Mesopotamiya, nkokwakatalikila Bulelo bwa Mediya a Persia.

Ibana Mediya bakakkede kunyika kwabusena oobo, nokuba kuti kumbele bakamwaikizyanya kusika ku Armenia alimwi a Kilikiya. Pele ibana Persia bakakkede kumusanza lwaambo lwabusena oobo, kujwe aa Mumpata wa Tigrisi. Mubweendelezi bwa Koresi akati-kati kamwaanda wamyaka wacisambomwi B.C.E., imami aaya obile akaswaangana akuba Bulelo Bweendelezya Nyika bwa Mediya a Persia.

Koresi wakazunda Babuloni mu 539 B.C.E. Ibulelo bwakwe bwakasakana kujwe kusikila ku India. Kuya kumbo, bwakazyoojatikizya Egepita alimwi acisi citegwa Turkey lino. Cakweelela, Daniele wakapandulula Bulelo bwa Mediya a Persia kuti ngu “masekese” imulyatu kapati iwakali ‘kulya nyama nyingi.’ (Da 7:5) Koresi wakatalisya bweendelezi bubotu kubantu, ibweendelezi butali bwalunya. Wakaabanya bulelo bwakwe muzyooko. Icooko acimwi cakali kulanganyizyigwaa mweendelezi, ooyo kanji-kanji iwakali muna Persia, pele wakali kulibombya kulinguwe. Ooyo mweendelezi munyenzi  wakalijisi nguzu zimwi zyabweendelezi. Ibalelwa boonse mubulelo oobo bakali kukulwaizyigwa kubamba zilengwa zyabo alimwi abukombi.

Kwiinda mukutobela mulawo ooyu, Koresi wakazumizya ba Juda kupilukila kuyoobukulusya bukombi bwakasimpe alimwi akuyakulula Jerusalemu mbubwenya mbobapandulula ba Ezara alimwi a Nehemiya. Sena muyeeya kuti eeyi nkamu yabantu mpati yakapilukila kwiinda mukubelesya nzila njaakabelesya Abrahamu kusikila ku Firate munsi aa Karikemesi, naa ambweni bakabelesya mfwaafwi yiinda ku Tadimori alimwi a Damasko? Ibbaibbele talicaambi pe eeci. (Amubone mapeeji 6-7.) Muciindi, iba Juda alimwi bakakkala mumasena aambi aamucooko cabulelo oobo mbuli ku Mulomo wamulonga Nile alimwi amasena aasakene kugama kumusanza. Iba Juda bali mbobabede bakazumanana kukkala mu Babuloni, icipandulula eeco cakapa kuti mwaapostolo Petro aswaye Babuloni nokwakainda myaanda yamyaka iili mbwiibede. (1Pe 5:13) Mmasimpe, Bulelo bwa Mediya a Persia bwakalijisi mulimo mukumwaisya ba Juda mumasena manji mumalelo aakatobela aaba Giliki alimwi aba Roma.

Nobakamana kuzunda Babuloni, bana Mediya a Persia bakabelesya munzi ooyo iwakali kupya kapati ciindi camainza ikuba munzi wabweendelezi. Susani, iwakali munzi mupati waba Elami, wakali umwi waminzi yamwami. Kumbele, mumunzi ooyo nguwenya Mwami wa Persia Ahasuera (uulangilwa kuti wakali Xerxes I) nkwaakacita Esita kuba mwami mwanakazi akutyokezya muzeezo wabumpelenge wakunyonyoona bantu ba Leza mubulelo oobo boonse. Aimbi minzi mipati ya Mediya a Persia yakali Akimeta (wakali abusena busumpukide amamita aali 1,900 iwakali mubotu kapati ciindi camainza) alimwi a Pasargadae (wakasumpukide mamita ngoonya, wakali kumusanza lwaajwe imusinzo uulampa makkilomita aatandila ku 650).

Ino oobu bulelo bwanyika bwakamana buti? Oobu bulelo bwa Mediya a Persia nobwakadumide kapati kunguzu, bwakakazya kulwisya kwakali kucitwaa ba Giliki kumunyinza wakunyika lwaambo. Aciindi eeco cisi caba Giliki cakalyaapaude muminzi yacooko yankondo, pele minzi eeyi yakabelekelaamwi kutegwa izunde mpi zyabana Persia munkondo zipati zyakalwanwa muzibanda zyaku Marathon a Salami. Eeci ncecakatalisya kusumpuka kwacisi caba Giliki ikwiinda aabulelo bwa Mediya a Persia.

Kabbokesi kali apeeji 25]

Mubweendelezi bwa Zerubabeli, ibaalumi batandila ku 50,000 bakeenda musinzo wamakkilomita aali 800 naa 1,600 (kweelana anzila njobakabelesya) kupilukila ku Jerusalemu. Icakabapenzya kapati nkubulikilwa zintu zyakubelesya. Inyika yabo kunyina noyakalimidwe kwamyaka iili makumi aali ciloba. Aabo ibakapilukide kwabo bakatalika kubukulusya bukombi bwakasimpe kwiinda mukuyakulula cipaililo alimwi akutuula zituuzyo kuli Jehova. Kumatalikilo aamupeyo mu 537 B.C.E., bakasekelela Pobwe Lyazilawo. (Je 25:11; 29:10) Mpoonya aabo bakapiluka bakasya ntalisyo yaŋanda ya Jehova.

[Kabbokesi kali apeeji 25]

MABBUKU AAMU BBAIBBELE AAKALEMBWA KUZWA KUCIINDI EECI AKALI:

Daniele

Hagai

Zekariya

Esita

Intembauzyo (cibeela buyo)

1 a 2 Makani

Ezara

Nehemiya

Malaki

[Maapu iili apeeji 24]

(Kutegwa mubone bwini mbwaakkede mabala, amubone bbuku lini)

Bwami bwa Mediya a Persia

A2 MAKEDONIYA

A2 THRACE

A4 Kurene

A4 LIBIYA

B2 Byzantium

B2 LYDIA

B3 Sarde

B4 Mofi (Nofi)

B4 EGEPITA

B4 No-amoni (Thebes)

B5 Sevene

C3 KILIKIYA

C3 Tarso

C3 Issus

C3 Karikemesi

C3 Tadimori

C3 ARAMU

C3 Sidoni

C3 Damasko

C3 Turo

C4 Jerusalemu

D2 Phasis

D2 ARMENIA

D3 ASURI

D3 Nineve

D3 Babuloni

E3 MEDIYA

E3 Ecbatana (Akimeta)

E3 HYRCANIA

E3 Susani (Susa)

E4 ELAMU

E4 Pasargadae

E4 Persepolis

E4 PERSIA

F3 PARTHIA

F4 DRANGIANA

G2 Maracanda (Samarkand)

G3 SOGDIANA

G3 BACTRIA

G3 ARIA

G3 ARACHOSIA

G4 GEDROSIA

H5 INDIA

[Masena aamwi]

A2 GILISI

A3 Marathon

A3 Atene

A3 Salami

C1 SKUTI

C4 Elati (Eloth)

C4 Tema

D4 ARABIYA

[Malundu]

E3 MALUNDU AA ELBURZ

C2 MALUNDU AA ZAGROS

[Zizyiba zyamaanzi]

B2 Lwizi lwa Mediterranean (Lwizi Lupati)

C2 Lwizi Lusiya

C5 Lwizi Lusalala

E2 Lwizi lwa Caspian

E4 Kankolola ka Persia

[Milonga]

B4 Nile

C3 Firate

D3 Tigrisi

H4 Indus

[Cifwanikiso icili apeeji 24]

Impi zya Koresi zyakeelede kukosola Malundu aa Zagros kutegwa zisike ku Babuloni

[Cifwanikiso icili apeeji 25]

Atala: Imulyango Wabantu Boonse, ku Persepolis

[Cifwanikiso icili apeeji 25]

Mukati: Icuumbwe ca Koresi ku Pasargadae