Imanyika Aambwa mu Bbaibbele

IBANA Israyeli nobakali kulibambila kunjila mu Nyika Yakasyomezyegwa, Musa wakaambila Leza zyakali kumoyo wakwe ategwa: “Sa inga ndazubuka kuyoobona nyika imbotu iili mutala lya-Jordano, eco cisi cibotu cazilundu-lundu?”—Dt 3:25.

Musa tanaakazumizyigwa kuzubuka pe, pele wakatanta cilundu cakalangene amunzi wa Jeriko akwiibona nyika eeyo—‘nyika ya Gileadi mane kusikila ku Dani, acisi coonse ca Juda kusikila kulwizi lwakumbo aku Negebi amumpata wa Jordano.’ (Dt 3:27; 34:1-4) Sena mwakaamvwa kale mazina aayo? Sena mulaazyi nkwaajanwa?

Mbasyoonto buyo akati kabantu ba Jehova sunu ibakonzya kuswaya masena manji ngobabala mu Bbaibbele. Tabakonzyi kucita eeco Leza ncaakaambila Abrahamu kuti acite, nkokuti ikweendeenda mubulamfwu amubwaamba boonse bwa Nyika Yakasyomezyegwa. (Ma 13:14-17) Nokuba boobo, Banakristo bakasimpe balayandisisya kuzyiba nkwaabede masena ngobabala mu Bbaibbele alimwi akubona mbwaaswaangene amasena aambi.

Ikabbuku aaka kakuti ‘Atubone Nyika Mbotu’ ncibelesyo ncomunga mwabelesya ikuyungizya luzibo lwanu lwamu Magwalo. Kalijisi zifoto zyamasena aaliko sunu, mbuli Gileadi, iitondezyedwe acivwumbyo. Alimwi icigwasya kapati mmamaapu, aayo aanga amupa kuti mwaazyibe kabotu masena aambwa mu Bbaibbele.

Imaapu iili apeeji 2 alimwi a 3 itondezya manyika mapati-pati naa zyooko. Mucikozyanyo, eelyo nomulanga aawo aakali Asuri alimwi a Egepita kweelana akooko kwakali Nyika Yakasyomezyegwa, mulakonzya kubuteelelesya businsimi boonse bwaamba manyika aayo. (Is 7:18; 27:13; Hos 11:11; Mik 7:12) Ikanyika kalamfwu ikategwa Nyika Yakasyomezyegwa kakali abusena aakali kuswaanganina migwagwa yamakwebo minji, alimwi imasi manji akayandisya kuba amyuunda yazisyango zyamaila iijisi mbolezi kapati, amyuunda yamasaansa alimwi ayamaolifa.—Dt 8:8; Bab 15:5.

Zimwi ziindi muyooyanda kweezyanisya mamaapu. Mucikozyanyo, Jona wakatumwa kuyoobelekela kumunzi mupati wa Asuri, pele wakatanta bwaato bwakali kugama ku Tarisi. (Jon 1:1-3) Sena mulakonzya kwaabona masena aayo amaapu eeyo yakutaanguna? Pele Tarisi tayeelede kunyonganizyigwa a Tarso pe, ooko kwakazyalilwa mwaapostolo Paulo. Mulakonzya kuujana munzi wa Tarso alimwi aminzi iimbi iidumide amaapu eeyi.

Kamuyeeya buyo mbowakali mulamfwu musinzo wa Abrahamu mwabona munzi wa Uri, Harani alimwi a Jerusalemu mpoyakabede. Jehova naakamwaambila kuti azwe mumunzi wa Uri, wakakkala-kkala ku Harani amane wakaunka ku Nyika Yakasyomezyegwa. (Ma 11:28–12:1; Ic 7:2-5) Muyoomvwisya mbowakabede musinzo wa Abrahamu nomwiiya cibeela cakuti “Inyika Yabamatata” amapeeji 6-7.

Imaapu yakusaanguna alimwi ayeeyi iili waawa taagaminide kuciindi cimwi pe. Kuzwa amamaapu aayo obile, oonse aatobela munsi alitobelene kweelanaa ciindi nozyakali kucitika zintu. Iminzi alimwi azimwi-zimwi zili amaapu zyaamba zintu zyakali kucitika kuciindi cimwi cigaminide. Nokuba kuti Mulongo Wamazina Aamasena Ankwaajanwa (amapeeji 34-35) taubikkilizyi masena oonse aambwa amamaapu, pele ulakonzya kumugwasya kujana mamaapu aaswaangene akaambo nkomuvwuntauzya ciindi eeco.

Imaapu iili akati (amapeeji 18-19) njiijisi madolopo alimwi aminzi minji yamu Nyika Yakasyomezyegwa kwiinda maapu iimbi. Ibupanduluzi Bwazitondezyo zili amamaapu buyoomugwasya kujana minzi yaba Levi alimwi aminzi iili cisambomwi yakuyubila, alimwi buyoomugwasya kuzyiba naa busena oobo bwakaambwa mu Magwalo aa Cihebrayo, aa Cigiliki naa muzibeela zyoonse zyobile.

 Ikwakali masena amwi aambwa mu Bbaibbele takunazyibwa asunu pe, aboobo ibunji bwamazina aamasena aayo taako pe aamaapu iili akati. Alimwi tiicakali kukonzyeka pe kubikkilizya dolopo amunzi uuli woonse aamaapu eeyo, mbuli minzi yoonse yaambidwe mubwaapauzi bwaminyinza yamisyobo yabantu. (Jos, zyaand. 15-19) Nokuba boobo, bunji bwaziindi imaapu eeyo ilabikkilizya aminzi iili afwaafwi, calo cikonzya kumugwasya kweezyeezya aakali minzi eeyo. Izimwi zijatikizya buyale bwanyika (malundu, milonga alimwi amimpata yatulonga) zilitondezyedwe, alimwi kusumpuka kwazyo alimwi amboyibede nyika aawo kulitondezyedwe amisyobo yiindene-indene. Ibupangopango buli boobo bulakonzya kumugwasya kweezyeezya mbazu zijatikizyidwe muzintu zyakacitika kuciindi cakali kulembwa Bbaibbele.

Imakani aambi aajatikizya kwakali masena aambwa mu Bbaibbele alajanika mubbuku lyakuvwuntauzya zili mu Bbaibbele litegwa Insight on the Scriptures, ilili mumwaambo wa Cingisi. * Nomubelesya bbuku eelyo alimwi amabbuku aambi aagwasya kwiiya Bbaibbele, mweelede kulibikka afwaafwi broshuwa lya ‘Atubone Nyika Mbotu.’ Amulilange-lange ciindi nomwiiya Magwalo oonse aagwasya kapati mubukkale bwanu.—2Ti 3:16, 17.

Bupanduluzi buyungizidwe

[Kabbokesi kali apeeji 5]

MABBUKU AAMU BBAIBBELE AKALEMBELWA KU

Babuloni

Kaisareya

Korinto

Egepita

Efeso

Jerusalemu

Makedoniya

Moabu

Patmo

Nyika Yakasyomezyegwa

Roma

Susani

[Maapu iili apeeji 4, 5]

(Kutegwa mubone bwini mbwaakkede mabala, amubone bbuku lini)

Imanyika Aambwa mu Bbaibbele

A1 ITALIYA

A2 ROMA

A3 SISILIYA

A3 MELITA

C2 MAKEDONIYA

C2 Filipi

C2 GILISI

C3 ATENE

C3 Korinto

C3 KRETE

C4 LIBIYA

D3 Antiokeya (yaku Pisidiya)

D3 Efeso

D3 PATMO

D3 RODE

D4 MOFI

D5 EGEPITA

E2 ASIA MINOR

E3 Tarso

E3 Antiokeya (yaku Aramu)

E3 KUPRO

E4 Sidoni

E4 Damasko

E4 Turo

E4 Kaisareya

E4 NYIKA YAKASYOMEZYEGWA

E4 JERUSALEMU

E4 MOABU

E4 Kadesi

E4 EDOMU

F3 Muunda wa Edeni?

F3 ASURI

F3 Harani

F3 ARAMU

F5 ARABIYA

G3 NINEVE

G4 BABULONI

G4 Susani

G4 Uri

H3 MEDIYA

[Malundu]

Cilundu ca Sinai

ZILUNDU ZYA ARARATI

[Zizyiba zyamaanzi]

C3 Lwizi lwa Mediterranean (Lwizi Lupati)

E1 Lwizi Lusiya

E5 Lwizi Lusalala

H2 Lwizi lwa Caspian

H5 Kankolola ka Persia

[Milonga]

D5 Mulonga wa Nile

F3 Mulonga wa Firate

G3 Mulonga wa Tigrisi