MU May 1963, kwakabuka manyongwe aakulwana bama Chinese mu West Java moonse. Mudolopo lya Sukabumi mwaakaindide kubija manyongwe, oomo mukwasyi wesu mowakajisi makwebo aakususa mpasya amyoota. Bantu banji ibanyemede—kubikkilizya abasimukoboma—bakapwaya cijazyo akunjila muŋanda yesu. Kumwi katuyoowede twakalibunga antoomwe ciindi basimanyongwe nobakali kupwaya akubweza zintu zyesu.

Nkamu yabasimanyongwe noyakaunka, basimukoboma bambi bakaboola kuzyootuyumya-yumya. Bataata bakakkala ambabo aansi muŋanda. Kabakkede momunya mozyakabede zintu zyesu izyakanyonyoonwa, bakajana Bbaibbele lyabo lipati lyamuci Sundanese. Bakalijalula akwaambila basimukoboma kuti mapenzi aali boobu akasinsimwa. Mpoonya bakapandulula bulangizi bukkomanisya bwa Bwami.

Bataata kunyina nobakabikkilide maano kukuyobola lubono lwaanyika. Ziindi zinji bakali kutuyeezya kuti: “Zintu zyakumuuya zyeelede kubikkwa mubusena bwakusaanguna!” Akaambo kacikozyanyo cabo cabusungu, bamaama, banabokwesu ibali cisambomwe, basyaanene ibakajisi myaka yakuzyalwa iili 90, bacibbululu babo banji alimwi abasimukobonyina bakakatambula kasimpe.