MU 1933, bakwesu bakabikka bubambe bwakuti ŋanda yasikapepele mu Jakarta kiilizya malekkoodi aamakani aamu Chingisi ngaakali kwaamba Mukwesu Rutherford. Makani aambi aamuci Dutch aalo akali kubalwa muluwo amwaalumi umwi iwakajisi luyandisisyo mukasimpe. Izyakali kwaambwa mulisikapepele zyakapa kuti bantu banji babe aluyandisisyo alimwi zyakagwasya bakwesu kumwaya mabbuku manji mumuunda.

Ŋanda yasikapepele noyakamwaya makani aanjila mumoyo ngaakaamba Mukwesu Rutherford aakuti “Effect of Holy Year on Peace and Prosperity,” basololi bacikombelo ca Katolika bakasululwa kapati. * Kwiinda mukubelesya basikubatobela, bakapa kuti Mukwesu De Schumaker apegwe mulandu “wakutamikizya, kusampaula, alimwi alusulo” akaambo kakuti ngowakapede ŋanda yasikapepele lekkoodi. Mukwesu De Schumaker wakaliiminina canguzu kumilandu njobakamupa, pele wakabbadelesyegwa magiluda aali 25 * alimwi amali aambi aakubbadela nkuta. Miteende mipati yotatwe yakaamwaya makani aalubeta oolo, calo icakapa kuti kupegwe bumboni kubantu banji kapati.

Mu July 15, 1935, bwato bwaba Watch Tower Society ibulampa mamita aali 16 ibutegwa Lightbearer (nkokuti, bwato bwamumuni) bwakasika mu Jakarta kuzwa ku Sydney, Australia, nobwakamana kweenda mumaanzi kwamyezi iili cisambomwe. Mubwato oobu kwakali bapainiya basungu ibali ciloba ibakakanzide kumwaya makani mabotu mucisi coonse ca Indonesia, ca Singapore, alimwi aca Malaysia.

 Kwamyaka yiinda kuli yobilo, bapainiya bakasika kuzito zipati alimwi aziniini mucisi ca Indonesia coonse kabali mubwato bwa Lightbearer, eelyo bakwesu bakamwaya mabbuku manji aapandulula Bbaibbele. Mucizyi Jean Deschamp wakaluula kuti: “Bwato oobu nobwakali kusika acito ciniini cimwi acimwi, basibwato bakali kulizya muncini wamajwi akulizya makani aamukwesu J. F. Rutherford, walo aciindi eeci iwakali mweendelezi wa Watch Tower Society. Amweezyeezye buyo mbobakali kugambwa bantu ibakkala muminzi yakulamfwu mu Malaysia nobakali kubona bwato bupati kabusika kucito cabo alimwi akumvwa jwi lyanguzu muzyaambawido. Bakali kukkomana kapati, nkaambo kunyina buzuba nobakabwene cintu cili boobo.”

Akaambo kakuti cakabacima kapati kubona bakwesu kabakambauka cabusungu munzila eeyi, basololi bazikombelo mukuya kwaciindi bakatyungilila mfwulumende kuti ilesye bwato bwa Lightbearer kunjila muzito zinji zyamucisi ca Indonesia. Mu December 1937, bwato bwa Lightbearer bwakapiluka ku Australia, pele musyule bwakasiya mpuwo mbotu kapati yamulimo wabumisyinali mucisi ca Indonesia.