ZIINDI zinji mizuzumo yanyika, masunami (nkokuti, mayuwe mapati aacitika akaambo kamuzuzumo wanyika) alimwi azilundu izizwa mulilo inga zinyonganya maumi aabantu mu Indonesia. Nokucitika ntenda eezyi, bantu ba Jehova balafwambaana kugwasya baabo bacitikilwa ntenda, kwaambisya ibakombinyina. Mucikozyanyo, mu 2005, muzuzumo wanyika mupati wakanyonyoona Gunungsitoli, idolopo lipati lyansumbu ya Nias mu North Sumatra. Mbungano zyamunsumbu iilaafwaafwi ya Sumatra alimwi aofesi yamutabi cakufwambaana bakatuma zintu ziyandika zyakugwasya bakwesu kubusena oobu. Mulangizi wabbazu wakubusena oobu alimwi amwiiminizi waofesi yamutabi bakaunka andeke kunsumbu eeyi kuyookulwaizya alimwi akuyumya bakwesu. Mwaalu wakunsumbu ya Nias, mukwesu Yuniman Harefa wakaamba kuti: “Bantu mbotwakali kukkala limwi bakaliyoowede kapati. Pele lugwasyo ndotwakapegwa cakufwambaana ambunga ya Leza lwakatupa kubona kuti tatuli tolikke pe.”