Ividiyo yakuti Nkaambo Nzi Ncomweelede Kwiiya Bbaibbele? lino ilisanduludwe mumyaambo iili lusele yamu Canada kutegwa igwasye bantu banji mucilawo icilanganizyigwa amutabi wa Canada. Mumulimo iwakacitwa mumazuba aali kkumi mubusena butegwa Nunavik Arctic mu October 2014, bunji bwamikwasyi yakayeebelela vidiyo eeyi mumwaambo wa Inuktitut mumasena aali 14, nkokuti kumweelwe wabantu wiinda ku 12,000.

Mu September 2014, kwakacitwa muswaangano wamasi ku Seoul mubbuwa lyakusobanina bbola litegwa Sangam World Cup Stadium mucisi ca South Korea. Ibantu bainda  ku  56,000 ibakajanika bakaukkomanina muswaangano. Mupati uulanganya mboibelesyegwa bwabbuwa lyakusobanina bbola wakatondezya kulumba akaambo kakulilemeka alimwi akubelekela antoomwe kwa Bakamboni ciindi camuswaangano. Wakaamba kuti: “Boonse bakali kulilemeka kabotu. Ndakagambwa kubona mbobakalisalazya kabotu bbuwa eeli ikwiinda babelesi besu bacibwene. Nicali kwiinda kubota kuti abalo babelesi besu nobalijisi muuya ngoonya ooyu ciindi nobabeleka. Ikuti katuyanda kuba bakombi ncobeni, tweelede kuba mbuli Bakamboni ba Jehova.”

Mu May 2012, mfwulumende yacisi ca Sweden yakakaka kulomba kwa Bakamboni ba Jehova nkobakalembela kuti abalo kabatatelesyegwi mbubonya mbuli mbunga zyabukombi zimbi. Ba Kabunga Keendelezya bakazumizya kuti kucitwe  apiilu kunkuta mpati yacisi iitegwa Supreme Administrative Court.

Nkuta eeyi yakasala kuti ilimvwide kubakwesu kaitanaakosola makani. Bakwesu bali mbobabede kuzwa kumasi aaindeene-indene bakaswaangana kutegwa babandike mbobakonzya kuyakwiingula mibuzyo njobakali kuyeeyela kuti inga yabuzyigwa ankuta. Kulibambila kucita boobo kwakacitwa mu Ŋanda ya Bwami mudolopo lya Stockholm.

Ciindi nobakali kulibambila, bakamvwa muntu uukonkomona kumulyango wa Ŋanda ya Bwami. Mukwesu umwi naakajalula mulyango, wajana bana basimbi bobilo, ibajisi myaka yakuzyalwa iili 13 a 14 ibakalyaamba mazina aabo. Bakaamba kuti bakali kuyanda kubuzya mibuzyo imwi kujatikizya Bakamboni ba Jehova. Mukwesu ooyo ulayeeya ategwa: “Ndakali kuyanda kubaambila kuti bakaboole buzuba bumbi, akaambo kakuti twakajisi bubi alimwi tiitwakali kuyanda kunyonganizyigwa aaciindi eeci.”

Nokuba boobo, mukwesu wakasala kuti aambaule ambabo. Basimbi aaba bakajisi mibuzyo minji, imibuzyo imwi yakaligaminide kapati kujatikizya mbobapona Bakamboni ba Jehova, zintu nzyobabikkila maano alimwi amakani aakuvwoota. Kuzwa waawo, mukwesu wakapiluka mukati akwaambila bakwesu boonse mibuzyo njobakamubuzya basimbi aabo alimwi ambwaakabaingula.

Buzuba bwakatobela, bakwesu bakagambwa kuti mibuzyo minji njobakali kubuzyigwa-buzyigwa ankuta yakali yeeyo njobakababuzyide basimbi baya bobilo. Mukwesu iwakali kwiiminina mbunga waamba kuti: “Moyo wangu wakalikkede, nokuba kuti ndakalilibilikide akaambo kakuti ndakaimvwi kumbele lyabamaloya balemekwa kapati mucisi. Pele ndakalimvwa kuti Jehova wakalitondezyede kale kuti wakalaandiswe kwiinda mukutuyiisya buzuba bwakuti juunza tuyaakwiima kumbele aankuta.”

Nkuta yakakuzumina kulomba kwesu, eelyo makani akapilusyigwa kumfwulumende kuti akakosolwe bumbi.

Ken, mwana uujisi myaka yakuzyalwa iili cisambomwe alimwi ukkala ku Haiti. Wakakkomana kuzyiba kuti lino-lino  mbungano yabo yakali kuyooyakilwa Ŋanda ya Bwami mpya. Wakayeeya kuti apange kabbokesi kakusangila mali alimwi wakakasisa muluumu yakwe mwaona. Muciindi cakwaabelesya mali aakulya kucikolo ngobakali kumupa bazyali bakwe, wakali kwaabikka mukabbokesi kakwe aako. Wakazumanana kucita oobo cakusyomeka kusikila mane kabunga kabasikuyaka Ŋanda ya Bwami kakasika kuti katalike mulimo wakuyaka. Mpoonya wakabapa kabbokesi kakwe nkaakasiside, kalo ikakajisi mali aakkwana kuula saka lyamupunga lipati. Kwamazuba manji, mupunga iwakaulwa amali aa Ken wakali kuligwa ciindi camasyikati aabusena bwamayake.

Mwaka wainda, bunji bwaziindi bantu bakali kuyandika kubweza pepa lyaalubazu kutegwa bazumizyigwe kunjila mumasena aacisi ca Sierra Leone aakazandudwe akaambo kabulwazi butambukila bwa Ebola. Mucikozyanyo, balangizi bamabbazu bakali kuyandika kubweza mabbaaji alimwi amapepa aabazumizya kunjila mumasena aayo amyoota yabo, ayalo myoota iinyamuna mabbuku amagwalo yakeelede kuzumizyigwa mbubonya. Bakwesu ibakali mukkomiti iilanganya makani aantenda zyacibukilambuta yiitwa kuti Disaster Relief Committee bakali kuyandika kutola misamu iijaya tuzunda (bleach), tuncini twakupimya kupya kwamubili muntu kali kulamfwu (infrared thermometers) alimwi azyakulya. Cilagambya kuti lyoonse bakali kucikonzya kwaajana mapepa aakali kuyandika.

Cintu cimwi icakacitika cakali kuyumya lusyomo. Bakwesu bakalemba lugwalo lwakulomba mabbaaji aali 34 alimwi amapepa aazumizya myoota iili 11, pele bakali kuyandika kuswaangana amupati wabasikalumamba kutegwa azumizye kulomba kwabo. Bakwesu bobilo kuzwa kuofesi yamutabi bakaswaangana amupati wabasikalumamba ibuzuba nobakali kuyanda kubweza mabbaaji alimwi amapepa aazumizya myoota. Pele lugwalo ndobakalembede lwakasoweka. Bakwesu bakaambilwa kuti baliyandaude lugwalo lwabo beni akati kamilwi yamapepa iyakaliko, pele tiibakalujana pe. Aciindi eeco, mupati wabasikalumamba wakaambila mulembi wakwe kuti wakali kuyanda kukotoka, aboobo kunyina magwalo  aambi ngaakali kuyoolanganya kuzwa waawo kusikila mane kukainde nsondo zyobilo. Bakwesu bakapaila mumoyo camoyo woonse ikulomba kuti Jehova abagwasye mumakani aaya. Mpoonya mupati wabasikalumamba wakabalanga bakwesu akubabuzya kuti, “Ino muyanda mapepa aazumizya myoota kunjila alimwi amabbaaji ongaye?” Nobakamwaambila mweelwe, wakanyampuka acuuno akwaamba ajwi lipati kuti, “Avwulisya mapepa aayo ngomuyanda!”

Bakwesu bakapandulula mboubede mulimo wesu alimwi ambozyakali kugwasyilizya kulwana bulwazi bwa Ebola zintu nzyobakali kuyanda kutola kubusena oobo. Mupati wabasikalumamba wakaumuna asyoonto, mpoonya wakalanga mulembi wakwe, akumwaambila kuti, “Kobapa zyoonse nzyobayanda.”