Cibalo 4

Iŋanda ya Jehova Yasumpulwa

Isaya 2:1-5

1, 2. Ino mmajwi nzi aalembedwe abwaanda bwaŋanda ya United Nations, alimwi ino akazwa kuli?

“BAYOOFULA mapanga aabo abe maamba aakulimya, amasumo aabo abe zizibyo zyamisamu: Cisi tacikooyoobweza ipanga lyakulwisya cisinyina. Tabakooyooiya inkondo limbi pe.” Aaya ngamajwi aalembedwe abwaanda bwaŋanda ya United Nations mu New York City. Ikwakazwa kuzubulula ooko taakwe nokwakazyibidwe pe kwamakumi aamyaka aali mbwaabede. Mbwaanga imakanze aa UN ngakuleta luumuno munyika yoonse mbwiizulwa, cakali cuuba-uba ikuyeeya kuti ikuzubulula ooko kwakazwa kuli baabo ibakatalisya mbunga ya UN mu 1945.

² Nokuba boobo, mu 1975 izina lya Isaya lyakazekaulwa mubwaanda ansi aakuzubulula ooku. Mpoonya cakalibonya kuti aaya majwi tanaakazwa kubantu basunu pe. Mubwini akalembwa kaali businsimi kucaandaano cabili sunu mubbuku lya Isaya imyaka yiinda ku 2,700 yainda. Kwazyuulu zyamyaka, basikuyanda luumuno balikuyeeya mbozyakali kuyoocitika zintu nzyaakasinsima Isaya alimwi anozyakali kuyoocitika. Takuciyandiki kuzumbauzya lino pe. Tulalibonena sunu ikuzuzikizyigwa ikugambya kwabusinsimi oobu bwansiku.

3. Ino mmasi aali aafwula mapanga aabo kuti abe maamba aakulimya?

³ Ino mmasi aali aafwula mapanga aabo kuti abe maamba aakulimya? Masimpe, taali masi aamunyika alimwi amfwulumende zyasunu pe. Imasi aaya acuujisi asunu ikubamba mapanga naa zilwanyo zyakulwanya nkondo alimwi akuleta “luumuno” kwiinda mukubelesya nguzu. Kayi cali cilengwa buya lyoonse kumasi ikufwula maamba aabo kuti abe mapanga! Ibusinsimi  bwa Isaya bulazuzikizyigwa mubaiminizi ibazwa mumasi oonse, ibantu ibakomba Jehova ‘Leza waluumuno.’—Ba-Filipi 4:9.

Imasi Aawuumukila Kubukombi Busalala

4, 5. Ino asinsima nzi majwi aali mutupango twakusaanguna mucibalo ca Isaya caandaano ca 2, alimwi ncinzi citondezya kuti aaya majwi alasyomeka?

⁴ Icaandano cabili icabbuku lya Isaya citalika amajwi aaya ategwa: “Ngaaya majwi aa-Isaya mwana wa-Amozi, makani ngaakabona aa-Juda a-Jerusalemu. Kumamanino aaciindi cilundu caŋanda ya-Jehova ciyooimikwa atala lyazilundu akusumpulwa kwiinda tulundulundu toonse, nkabela masi oonse anooya bukunka kulincico.”—Isaya 2:1, 2.

⁵ Amuzyibe kwaamba kuti nzyaamba Isaya tazili zintu nzyayezeezya buyo pe. Isaya wasololelwa kuti alembe zintu izitadoonekwi kuti ziyoocitika ncobeni. Izintu zyoonse nzyakanza Jehova ‘zilazuzikizyigwa.’ (Isaya 55:11) Kulibonya kuti Leza wakasololela musaanyina Isaya imusinsimi Mika kuti alembe businsimi ibujanwa kuli Isaya 2:2-4 mubbuku lyakwe kutegwa akankaizye mbocisinizizye cisyomezyo cakwe.—Mika 4:1-3.

6. Ino ndilili nobuzuzikizyigwa businsimi bwa Isaya?

⁶ Ino ndilili nobuyoozuzikizyigwa businsimi bwa Isaya? “Kumamanino aaciindi.” Ibbaibbele lyamu 1996 lyaamba kuti: “Kumazuba aamamanino.” Imagwalo aa Bunakristo aa Chigiliki akazyaamba zintu iziyootondezya kuti tuli kuciindi eeci. Inkondo, mizuzumo, imalwazi anzala alimwi ‘aziindi zikatazya’ zilibikkilizyidwe akati kazintu eezyo. * (2 Timoteo 3:1-5; Luka 21:10, 11) Ikuzuzikizyigwa kwabusinsimi buli boobu kutupa bumboni businizyidwe bwakuti tukkede “kumamanino aaciindi,” imazuba aamamanino aabukkale bwasunu. Aboobo  cililuzi ikulangila kuzuzikizyigwa kwazintu nzyaakasinsima Isaya kuciindi cesu ecino.

Imulundu Wakukombela

7. Ino businsimi bwa Isaya butondezya nzi?

⁷ Isaya watupa bupanduluzi bubotu bwabusinsimi mumajwi masyoonto buyo. Twaubona mulundu mulamfwu kapati alimwi uujisi ŋanda yabulemu, itempele lya Jehova. Imulundu ooyu ulaayinda malundu atulundu-lundu tuli mumbali-mbali. Pele tauyoosyi pe nokuba kukonga, ulakondelezya. Ibantu bamisyobo yoonse balombozya kutanta kuya kucilundu caŋanda ya Jehova; bawuumukila nkuko. Tacikatazyi pe kweezyeezya eeci, pele ino caamba nzi?

8. (a) Ino itulundu-lundu alimwi azilundu ziswaanganizyigwa anzi kuciindi ca Isaya? (b) Ino ikuwuumukila ku “cilundu caŋanda ya-Jehova” ikucitwa amasi kwiiminina nzi?

⁸ Kuciindi ca Isaya, itulundu-lundu alimwi azilundu ikanji-kanji ziliswaangene abukombi. Mucikozyanyo, mmasena aabelesyegwa kukomba mituni alimwi azipaililo zyabaleza bakubeja. (Deuteronomo 12:2; Jeremiya 3:6) Nokuba boobo, iŋanda naa itempele lya Jehova ndelibotya Cilundu ca Moriya icili ku Jerusalemu. Ibana Israyeli basyomeka baleenda iziindi zyotatwe mumwaka ikuunka ku Jerusalemu alimwi ooko batanta Cilundu ca Moriya kuyookomba Leza wakasimpe. (Deuteronomo 16:16) Aboobo ikuwuumuka kwamasi kuya ‘kucilundu caŋanda ya-Jehova’ kwiiminina kubunganizyigwa kwabantu banji kubukombi bwakasimpe.

9. Ino “cilundu caŋanda ya-Jehova” ciiminina nzi?

⁹ Masimpe, sunu ibantu ba Jehova tababungani kumulundu wini ikuli tempele lyakayakwa amabwe. Itempele lya Jehova ilyakali ku Jerusalemu lyakanyonyoonwa abasikalumamba bana Roma mu 70 C.E. Kunze lyaboobo, imwaapostolo Paulo wakacisalazya kwaamba kuti itempele yaku Jerusalemu alimwi atente lyakali kubelesyegwa musyule kuli ncozyakali kwiiminina. Zyakali kwiiminina cintu cipati cakumuuya, ‘cikombelo cinicini eco cakayakwa a-Jehova, kutali kumaanza aabantu  pe.’ (Ba-Hebrayo 8:2) Eelyo tente lyakumuuya mbubambe bwakusikila Jehova kwiinda mukukomba ikubelesya cituuzyo ca Jesu Kristo. (Ba-Hebrayo 9:2-10, 23) Mukweendelana amakani aaya, “cilundu caŋanda ya-Jehova” icaambidwe kubbuku lya Isaya 2:2 ciiminina ibukombi bwa Jehova busalala ibusumpukide kuciindi cesu ecino. Aabo ibali mubukombi busalala tababunganini kubusena bumwi bubikkidwe pe, pele balabungana antoomwe mukuti balikamantene mubukombi.

Ikusumpulwa kwa Bukombi Busalala

10, 11. Ino muunzila nzi mubwasumpulwa bukombi bwa Jehova kuciindi cesu?

¹⁰ Imusinsimi waamba kuti “cilundu caŋanda ya-Jehova” naa  bukombi busalala ‘buyooimikwa atala lyazilundu,’ alimwi ‘buyoosumpulwa kwiinda tulundulundu toonse.’ Musyule katanazyalwa Isaya, Imwami Davida wakaleta ibbokesi lyacizuminano ku Cilundu ca Zioni ku Jerusalemu calo cakali kulampa mamita aali 760 kuzwa aayiila maanzi aamulwizi. Ibbokesi lyakakkala ooko mane kusikila nolyakalonzyegwa kutolwa kutempele ilyakamanizyigwa kuyakwa ku Cilundu ca Moriya. (2 Samuele 5:7; 6:14-19; 2 Makani 3:1; 5:1-10) Aboobo ikuzyoosika kuciindi ca Isaya ibbokesi lisalala lyakalisumpwidwe kale akubikkwa mutempele abusena ibusumpukide kwiinda tulundulundu tunji twakali kubelesyegwa mubukombi bwakubeja.

¹¹ Munzila yakumuuya, ibukombi bwa Jehova bwalisumpukide ciindi coonse kwiinda zilengwa zyabukombi zyabaabo  babelekela baleza bakubeja. Nokuba boobo, kuciindi cesu ecino Jehova wabusumpula bukombi bwakwe mane kusikila kujulu ikwiinda misyobo yoonse yabukombi butasalali, nkokwaamba kuti ikwiinda “tulundulundu toonse” alimwi ‘aatala lyazilundu.’ Ino wacita buti oobo? Ikapati nkwiinda mukubunganya baabo ibayanda kumukomba “mumuuya amubwini.”—Johane 4:23.

12. Ino mbaani “bana ba-Bwami” alimwi ino nkubunganya kwamusyobo nzi ikwacitika?

¹² Kristo Jesu wakaamba makani aajatikizya “mamanino aaciindi” kuti nceciindi cakutebula lyalo ibangelo nobayoobunganya “bana ba-Bwami”—aabo ibajisi bulangizi bwakuyoolela antoomwe a Jesu mubulemu bwakwe bwakujulu. (Matayo 13:36-43) Ikuzwa mu 1919 Jehova wabapa nguzu ‘ibasyeede’ akati kabana aaba kuti babelekelaamwi abangelo mumulimo wakutebula. (Ciyubunuzyo 12:17) Aboobo “bana ba-Bwami” balo bali mbanabakwabo Jesu ibananike mbebasaanguna kubunganizyigwa. Mpoonya babelekelaamwi mumulimo wakubunganya uuyaabuzumanana.

13. Ino Jehova wabalongezya buti bananike basyeede?

¹³ Kuciindi eeci cakutebula, Jehova wabagwasya bananike basyeede buce-buce ikuteelela alimwi akucita nzyolyaamba Jwi lyakwe, Ibbaibbele. Acalo eeci cagwasya kapati kumakani aakusumpula bukombi busalala. Nokuba kuti ‘mudima ulavumba nyika alimwi akusiya mbi kumisyobo yoonse,’ balo ibananike bali mbuli ‘mimuni iimunika’ akati kabantu akaambo kakuti balisalazyidwe a Jehova. (Isaya 60:2; Ba-Filipi 2:15) Aaba bananikidwe amuuya ‘balabala mbuli izuba mu-Bwami bwawisaabo’ nkaambo ‘bazuzyidwe luzibo lwakuzyiba makanze aakwe mbwaabede akuba abusongo bunji bwakumvwisya makani aamuuya.’—Ba-Kolose 1:9.

14, 15. Kunze lyakubunganizyigwa kwa “bana ba-Bwami,” nkubunganizyigwa kuli akumbi ikwacitika alimwi wakacisinsima buti eeci Hagai?

¹⁴ Kunze lyaboobo, abambi bawuumuka kuya ‘kucilundu  caŋanda ya Jehova.’ Aaba balo Jesu mbaakaita kuti ‘nimbelele zimwi’ bajisi bulangizi bwakupona anyika kukabe kutamani. (Johane 10:16; Ciyubunuzyo 21:3, 4) Ikutalikila kuma 1930 bakali kubalilwa kuzyuulu mpoonya kumyaanda yazyuulu eelyo sunu babalilwa kutuulunzuma! Mucilengaano ncaakabona mwaapostolo Johane, bapandululwa kuti “[ni]nkamu impati yabantu batabaliki kumuntu naba omwe, bazwa kuzisi zyoonse akumisyobo yoonse akumikowa yoonse akumyaambo yoonse.”—Ciyubunuzyo 7:9.

¹⁵ Imusinsimi Hagai wakasinsima mboyakali kuzyoobako nkamu mpati eeyi. Wakalemba kuti: “Mbuboobu mbwaamba Jehova wamakamu. Kusyeede kaindi kaniini buyo, elyo njoozungaanya ijulu anyika alwizi ansi injumu. Njoozungaanya zisi zyoonse, kuti zintu ziyandisi zyazisi zyoonse ziboole [aabo basangana Banakristo bananike mubukombi busalala], elyo njoozuzya iŋanda eyi bulemu, mbwaamba Jehova wamakamu.” (Hagai 2:6, 7) Ikubako kwa “nkamu impati” eeyi iizumanana kukomena antoomwe abeenzinyina bananike kulasumpula alimwi akulemya bukombi busalala muŋanda ya Jehova. Kunyina nkamu yabantu banji boobu iyakaambidwe musyule kuti ilikamantene mukukomba Leza mwini-mwini, aboobo eeci cileta bulemu kuli Jehova alimwi aku Mwami ngwabikkide Jesu Kristo. Imwami Solomoni wakalemba kuti: “Mubantu banji mwami mwaajana bulemu.”—Tusimpi 14:28.

Ibukombi Bwasumpulwa Mubukkale Bwabantu

16-18. Nkucinca kuli buti nkobacita bamwi ikutegwa bakombe Jehova munzila iimukkomanisya?

¹⁶ Kuciindi cesu cino, Jehova uleelede kulumbaizyigwa akaambo kakusumpuka kwabukombi busalala. Nokuba boobo, aabo bamusikila balijisi coolwe cakutola lubazu mumulimo ooyu. Kuyandika kusoleka kapati ikwiiya alimwi akupona mukweendelana azyeelelo zya Leza iziluleme mbubwenya mbokuyandika kusolekesya ikutanta mulundu. Ibantu ba Leza sunu babusiya bukkale alimwi azilengwa iziteendelani abukombi  bwakasimpe mbuli mbubakacita Ibanakristo bamumwaanda wamyaka wakusaanguna. Basibwaamu, basikukomba mituni, basimamambi, ibabbi, ibalyatu, badakwi alimwi abamwi bacinca bukkale bwabo eelyo ‘basanzyigwa’ mumeso aa Leza.—1 Ba-Korinto 6:9-11.

¹⁷ Ikujatikizya makani aaya, imukaintu umwi wakalemba kuti: “Aciindi cimwi ndakanyina bulangizi nobuceya. Ndakali mwaamu alimwi mudakwi. Ndakaciswa malwazi aaboola kwiinda mukoonana. Alimwi ndakali kuulisya misamu iikola eelyo kunyina ncondakali kulibilika pe.” Naakaiya Bbaibbele, wakacinca kapati ikutegwa ayendelane azyeelelo zya Leza. Lino waamba kuti: “Ndikkomene alimwi ndilisitikene, ndilimvwa kuti ndimuntu, ndilijisi bulangizi kujatikizya buumi bwakumbele, imukwasyi wini-wini alimwi ikwiinda zyoonse eezyi, ndilijisi cilongwe a Taateesu, Jehova.”

¹⁸ Toonse tweelede kuzumanana kusumpula bukombi busalala kwiinda mukububikka mubusena bwakusaanguna mubukkale bwesu neliba leelyo notwaba aciimo ncakkomanina Jehova. Ikwiinda muli Isaya izyuulu zyamyaka iili mbwiibede yainda, Jehova wakatondezya kuti kwakali kuyooba maunda-maunda aabantu sunu ibanooyandide kubikka bukombi bwakwe busalala kuba cintu ciyandika kapati mubuumi bwabo. Sena muli akati kambabo?

Ibantu Bayiisyidwe Nzila zya Jehova

19, 20. Ino bantu ba Leza bayiisyigwa nzi alimwi nkuukuli nkobayiisyilwa?

¹⁹ Isaya ulatwaambila aambi makani aajatikizya baabo ibazumina bukombi busalala sunu. Ulaamba: “Misyobo minji inooya bwaamba kuti, Atwiinke, tukaye kucilundu ca-Jehova, kuŋanda ya-Leza wa-Jakobo, elyo uyootwiisya inzila zyakwe, nkabela tuyooenda muziyanza zyakwe. Nkaambo mu-Ziyoni muyoozwa mulao, alyalo ijwi lya-Jehova liyoozwa mu-Jerusalemu.”—Isaya 2:3.

²⁰ Jehova talekeli bantu bakwe kuti kabaide kwiimpita mbuli  mbelele zisweekede. Ulabayiisya “mulao” wakwe a “jwi” lyakwe ikutegwa bazyibe nzila zyakwe ikwiinda mu Bbaibbele alimwi amabbuku aapandulula Bbaibbele. Iluzibo oolu lubapa kuti kabeenda “muziyanza zyakwe.” Akaambo kakulumba alimwi akweendelana abusolozi bwa Leza, balaambilana kujatikizya nzila zya Jehova. Balabungana antoomwe kumiswaangano mipati alimwi amisyoonto—ku Maanda aa Bwami alimwi amumaanda aabantu ikutegwa baswiilile akwiiya nzila zya Leza. (Deuteronomo 31:12, 13) Aboobo bayiya cilengwa ca Banakristo bakusaanguna balo bakali kuswaangana antoomwe kuti bayumizyanye akugwasyanya kuti bayaambele ‘mukuyandana amukucita milimo mibotu.’—Ba-Hebrayo 10:24, 25.

21. Ino mmuumulimo nzi mmobatola lubazu babelesi ba Jehova?

²¹ Balabatamba abambi kuti ‘bainke’ kubukombi bwa Jehova Leza busumpukide. Elo eeci cileendelana kapati kaka amulawo ngwaakapa basikwiiya bakwe Jesu kakusyeede buyo ciindi cisyoonto kuti aunke kujulu! Wakabaambila kuti: “Kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila.” (Matayo 28:19, 20) Bakamboni ba Jehova balautobela mulawo ooyu, eelyo balaunka kuya buyiisya alimwi akugwasya bantu kuti babe basikwiiya alimwi akubabbapatizya nyika yoonse mbwiizulwa kwiinda mukugwasyigwa a Leza.

Mapanga Abe Maamba

22, 23. Ino bbuku lya Isaya 2:4 lisinsima nzi, alimwi ncinzi ncaakaamba umwi mubelesi wa UN kujatikizya ncico?

²² Lino twaboola kukapango katobela kalo ikajisi cibeela icilembedwe abwaanda bwaŋanda ya UN. Isaya ulemba kuti: “Uyoobeteka akati kamasi akukosola makani aamisyobo minji. Lino bayoofula mapanga aabo abe maamba aakulimya, amasumo aabo abe zizibyo zyamisamu. Cisi tacikooyoobweza ipanga lyakulwisya cisinyina. Tabakooyooiya inkondo limbi pe.”—Isaya 2:4.

²³ Ikukonzya kucita boobu wakali kunooli mulimo mupati  kapati. Federico Mayor, walo uuli ngumweendelezi mupati wa United Nations Educational, Scientific, and Cultural Organization cimwi ciindi wakaamba kuti: “Ibubi bwankondo boonse bwalo mbotubona akumvwa kwiinda mucipekupeku alimwi amulisikapepele mazubaano tabulibonyi kuti bulakonzya kukasya kuyaambele mukubamba zilwanyo zikali zibelesyegwa munkondo zyalo zyali kubambwa akuyobolwa kwamyaanda yamyaka minji. Ciboneka kuti tacikonzyeki pe kumazyalani aasunu ikucita mulimo waambwa mu Bbaibbele ‘wakufwula mapanga kuti abe maamba aakulimya’ akucinca kuzwa kukubikkila maanu kunkondo kutayeeyelwi nokwakatalika akuba bantu bayandisisya luumuno. Ikuzwidilila kucita ceeci inga yaba ntaamu yiinda kubota bantu bamunyika yoonse njobakonzya kuzuzikizya acipego ciinda zyoonse cinga capegwa mazyalani eesu aakumbele.”

24, 25. Ino majwi aa Isaya azuzikizyigwa muli bani alimwi munzila nzi?

²⁴ Kunyina lwawo naayookonzya kuzuzikizya mbaakani eeyi iisumpukide imasi oonse. Ncintu citakonzyeki pe kulingawo. Imajwi aa Isaya azuzikizyigwa abantu ibazwa mumasi manji balo ibakamantene mubukombi busalala. Jehova ‘waakosola makani’ akati kabo. Wabayiisya bantu bakwe mbokukkalwa muluumuno abeenzinyina. Inzya munzila yamaambilambali, nokuba kuti bali munyika eeyi yaandeene alimwi iizwide mapenzi, bacikonzya ‘kufwula mapanga aabo kuti abe maamba aakulimya  alimwi amasumo aabo kuti zibe zizibyo zyamasamu.’ Munzila nzi?

²⁵ Kunyina nobatola lubazu munkondo zyamasi. Kakusyeede ciindi cisyoonto kuti Jesu afwe, bamaalumi ibajisi zilwanyo bakaboola kuzyoomujata. Petro naakafwuumuka apanga lyakwe kuti avwune Mwami wakwe, Jesu wakamwaambila kuti: “Bwedezya ipanga lyako mucikanda calyo, nkaambo boonse babweza ipanga bazoovwinyaunwa kupanga.” (Matayo 26:52) Ikuzwa ciindi eeco, basikutobela Jesu bafwula mapanga aabo kuti abe maamba aakulimya alimwi balikasya ikubweza zilwanyo kutegwa bajaye bantunyina alimwi tabagwasyilizyi nkondo munzila zimbi zili zyoonse. ‘Balasoleka kukkala muluumuno abantu boonse.’—Ba-Hebrayo 12:14.

Ikutobela Nzila Zyaluumuno

26, 27. Ino bantu ba Leza ‘baluyandaula buti luumuno akulutobela’? Amupe cikozyanyo.

²⁶ Iluumuno lujisi bantu ba Leza talugoleli buyo aakukaka kutola lubazu munkondo. Nokuba kuti balajanika mumasi aainda ku 230 alimwi baiminina myaambo iitabaliki alimwi azilengwa, balakkala muluumuno akati kabo. Ikuzuzikizyigwa kwasunu kwamajwi aa Jesu kulajanika mulimbabo, walo wakaambila basikwiiya bakwe bamumwaanda wamyaka wakusaanguna kuti: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Johane 13:35) Sunu Ibanakristo ‘mbaasikuyanzanya.’ (Mateyo 5:9, Ci) ‘Balaluyandaula luumuno akulutobela.’ (1 Petro 3:11) Jehova “Leza waluumuno” nguubagwasyilizya.—Ba-Roma 15:33.

²⁷ Kuli zikozyanyo zikkomanisya izijatikizya baabo ibayiya kuba basiluumuno. Imulombwana umwi wakalemba boobu kujatikizya buumi bwakwe bwamusyule ulaamba: “Imapenzi mapati akandiyiisya mbondikonzya kulikwabilila. Akandipa kuba muntu mukali kapati alimwi uunyemede mubuumi. Ndakali sikulwana ciindi coonse. Abuzuba ndakali kulwana abana  baandeene-andeene basimukoboma, zimwi ziindi amfwaindi, zimwi ziindi kubelesya mabwe naa mabbodela. Ndakakomena kandili sinkondo kapati.” Nokuba boobo, kumbele wakazyoozumina kukutambwa kwiinka ku “cilundu caŋanda ya-Jehova.” Wakayiya nzila zya Leza nkabela wakaba mubelesi wa Leza siluumuno.

28. Ncinzi ncobakonzya kucita Banakristo ikutegwa batobele luumuno?

²⁸ Ibunji bwababelesi ba Jehova teebakakomena abusinkondo buli boobu pe. Pele nomuba mutuntu tusyoonto mbuli luzyalo, kulekelela alimwi alubomba balasolekesya ikusumpula luumuno akati kabo. Nokuba kuti tabalondokede balasoleka ikutobela lulayo lwa Bbaibbele ‘ilwakukkazikilana myoyo akulekelelana, na umwi ulijisi kaambo kumweenzinyina.’—Ba-Kolose 3:13.

Ibuumi Bwakumbele Ibwa Luumuno

29, 30. Mbulangizi nzi buliko kujatikizya nyika?

²⁹ Jehova wacita zintu zibotu kapati ‘kuciindi ecino cakumamanino.’ Ikuzwa mumasi oonse wabunganya bantu ibayanda kumubelekela. Wabayiisya kweenda munzila zyakwe, inzila zyaluumuno. Aaba mbabayoofwutuka “mapenzi mapati” aaboola, akunjila munyika mpya yaluumuno mwalo imutakabi limbi nkondo kusikila kutamani.—Ciyubunuzyo 7:14.

³⁰ Imapanga—nkokuti zilwanyo, tazikabiko limbi. Sintembauzyo wakalemba kujatikizya ciindi eeco ulaamba: “Amuze, mubone milimo ya-Jehova mbwiibede, malweza ngaacitide ansi. Ulalesya inkondo mane kusikila kumamanino aanyika, uladunsaula mata akutyolaula masumo; ulatenta inkalaki mumulilo.” (Intembauzyo 46:8, 9) Akaambo kabulangizi buli boobu, ikulailila kwa Isaya kutobela kuleelela kapati sunu mbubwenya mbokwakabede ciindi naakakulemba kwakuti: “O luzubo lwa-Jakobo, amuboole, tweende mumumuni wa-Jehova.” (Isaya 2:5) Ee, imumuni wa Jehova aumunikile nzila zyesu lino, eelyo tuyooenda munzila zyakwe kusikila kutamani.—Mika 4:5.

Bupanduluzi buyungizidwe

[Mibuzyo yaciiyo]