Ijanza lya Jehova Lyasumpuka
Cibalo 21
Ijanza lya Jehova Lyasumpuka
1. Ino nkaambo nzi Isaya ncaamulumba Jehova?
ISAYA ulamuyanda kapati Jehova alimwi ulakukkomanina kumutembaula. Woongolola ategwa: “O Jehova, nduwe Leza wangu. Njookutembaula, njoolemeka izina lyako.” Ino ncinzi camugwasya musinsimi ooyu kutegwa amulumbe kapati boobu Mulengi wakwe? Ikaambo kapati nduzibo ndwajisi kujatikizya Jehova amilimo yakwe. Imajwi aa Isaya aatobela alalwaamba luzibo oolo nati: “Nkaambo wacita milimo iigambya, makani aakakanzwa kalekale cakusyomeka acalusinizyo.” (Isaya 25:1) Mbubwenya mbuli Joshua iwakali kupona musyule, Isaya ulizyi kuti Jehova ulasyomeka alimwi ngusilusinizyo alimwi ‘makani’ aakwe oonse—nkokuti izintu nzyakanza zilazuzikizyigwa.—Joshua 23:14.
2. Mmulumbe nzi wa Jehova ngwaambilizya lino Isaya, alimwi mulumbe ooyu ulangilwa kuti ugamikidwe kuli ni?
2 Imakani aa Jehova abikkilizya milumbe yalubeta kuli basinkondonyina bana Israyeli. Lino Isaya waambilizya umwi wamilumbe eeyi ategwa: “Wakamwaya munzi kuti ube citantaala, amunzi uuli alubaya kuti ube matongo. Iŋanda yabwami bwabazwakule wainyonyoona, aboobo tuucili munzi, tuukooyooyakululwa limbi.” (Isaya 25:2) Ino ooyu munzi uutabandidwe zina mmunzi nzi? Isaya ulakonzya kaamba Ari wa Moabu—ooyu Moabu wali sinkondonyina abantu ba Leza kuzwa kaindi. * Naa ambweni ulakonzya kaamba munzi umbi wanguzu—Babuloni.—Isaya 15:1; Zefaniya 2:8, 9.
3. Muunzila nzi basinkondonyina mobamulemeka Jehova?
3 Ino basinkondonyina Jehova bayoocita buti aakuzuzikizyigwa makani aajatikizya munzi wabo wanguzu? “Bantu bayumu bayookulemeka, awalo munzi wamisyobo iiyoosya uyookuyoowa.” (Isaya 25:3) Kalalimvwisya kaambo basinkondo ba Leza singuzu zyoonse ncobayoomuyoowela. Pele ino mbuti mbobamulemeka? Sena bayooleka kukomba baleza bakubeja akutalika bukombi busalala? Peepe! Pele mbubwenya mbuli Farao a Nebukadinezara, balemya Jehova nobasinikizyigwa kuzyiba bupati bakwe.—Kulonga 10:16, 17; 12:30-33; Daniele 4:37.
4. Ino “munzi wamisyobo iiyoosya” uuliko sunu mmunzi nzi, alimwi ino awalo umulemeka buti Jehova?
4 Sunu “imunzi wamisyobo iiyoosya” “munzi mupati uujisi bwami kubami boonse banyika” iwiitwa kuti “BABULONI MUPATI,” ibwami bwanyika bwabukombi bwakubeja. (Ciyubunuzyo 17:5, 18) Icibeela cipati cabwami oobu Mbunakristo bwanyika. * Ino basololi bazikombelo mu Bunakristo bwanyika bamulemeka buti Jehova? Nkwiinda mukuzuminizya cansoni zintu zibotu nzyaazuzikizya Jehova kuli Bakamboni bakwe. Ikapati mu 1919 Jehova naakapilusya babelesi bakwe kumulimo wabo mupati ciindi nobakaangululwa kubuzike bwa Babuloni Mupati, ibasololi aaba “bakaliyoowede, bakalemeka Leza wakujulu.”—Ciyubunuzyo 11:13.
5. Ino Jehova ubakwabilila buti aabo ibamusyoma cakumaninina?
5 Nokuba kuti ulayoosya Jehova kuli basinkondonyina, mmayubilo kubabombe myoyo ibayanda kumubelekela. Bakombi alimwi abasitwaambo twacisi basilunya balasolekesya kunyonyoona lusyomo lwabakombi bakasimpe, pele balakakilwa nkaambo aaba balamusyoma cakumaninina Jehova. Mukuya kwaciindi ulabaumuzya basikukazya kakunyina penzi kwiinda mukuba mbuli kkumbi livwumbilila zuba lyamucimpayuma ambuli bulambo businkilila guwo.—Amubale Isaya 25:4, 5.
‘Ipobwe lya Bantu Boonse’
6, 7. (a) Ino ndipobwe lyamusyobo nzi ndyabamba Jehova, alimwi walibambila bani? (b) Ino pobwe lyakasinsimwa aa Isaya liiminina nzi?
6 Jehova ulabakwabilila akubasanina bana bakwe ikapati munzila yakumuuya, mbuli bucita usyi siluyando. Naakabaangulula bantu bakwe mu 1919, wakababambila pobwe lyakuzunda, cakulya cakumuuya citalivwulili: “Jehova wamakamu uyoocitila bantu boonse mucilundu ecino ipobwe lyazintu zyamafuta, ipobwe lyawaini uulwela, zintu zyamafuta zibotu, waini uulwela uusefedwe kabotu.”—Isaya 25:6.
7 Ipobwe lyabikkilwa “mucilundu” ca Jehova. Ino cilundu eeci ninzi? ‘Ncilundu caŋanda ya Jehova’ ikuyobolokela masi oonse “kumamanino aaciindi.” ‘Ncilundu ca Jehova cisalala’ kwalo bakombi bakwe basyomeka nkobatanoonyonyooni. (Isaya 2:2; 11:9) Jehova wabamba pobwe lyakwe litaliboteli kapati lyabantu basyomeka abusena oobu bwakukombela ibusumpukide. Alimwi eezyi zintu zibotu zyakumuuya nzyatupa lino cabwaabi ziiminina zintu zibotu zyakumubili nzyayootupa kwaakusyaala buyo mfwulumende ya Bwami bwa Leza iilela bantu. Nkabela takukabi limbi nzala. “Maila avule ansi, atala lyazilundu. Ayoome mbuli lusaka.”—Intembauzyo 72:8, 16.
8, 9. (a) Mbaasinkondo bali bapati bobile babantu ibayoogwisyigwa? Amupandulule. (b) Ncinzi ncayoocita Leza ikugwisya masampu aajatikizya bantu bakwe?
8 Aabo lino ibalya zyakulya izipegwa aa Leza kupobwe lyakumuuya balijisi bulangizi bubotu kapati. Amuswiilile majwi aa Isaya aatobela. Kakozyanisya cibi alufwu ‘kucivwumbyo’ naa ‘civwunisyo’ wati: “Mucilundu ecino [Jehova] uyoomenenena civunisyo civunikidwe kumisyobo yoonse acivumbyo civumbide zisi zyoonse. Lufu walumenenena mane kukabe kutamani. Mwami Jehova uyoosindula misozi kumasyu oonse.”—Isaya 25:7, 8a.
9 Inzya, takukabi limbi cibi alufwu! (Ciyubunuzyo 21:3, 4) Kunze lyaboobo, imasampu ngobasampaulwa babelesi ba Jehova akuliyumya kwazyuulu zyamyaka ayoomanisyigwa aalo. “Kusampaulwa kwabantu bakwe uyookumanisya, nkaambo mbuboobo Jehova mbwaamba.” (Isaya 25:8b) Ino eeci ciyoocitika buti? Jehova uyoozwisya uuleta masampu aayo, nkokuti Saatani alunyungu lwakwe. (Ciyubunuzyo 20:1-3) Ibantu ba Leza ncobayookulwaizyigwa kukankamuka kuti: “Amubone! Ngooyu Leza wesu. Twali kumulindila kuti atufutule. Ngooyu Jehova. Twali kumulindila. Atukondwe akusekelela mulufutuko lwakwe.”—Isaya 25:9.
Bafwiinsigwa Basikulikankaizya
10, 11. Ncisubulo nzi cibyaabi Jehova ncabikkilide Moabu?
10 Jehova ulabafwutula bantu bakwe balibombya. Pele Moabu simukobonyina a Israyeli ulalisumpula, kumane Jehova ulikusulide kulisumpula. (Tusimpi 16:18) Aboobo Moabu wabikkwa amundando uukanzidwe kufwiinsigwa. “Ijanza lya-Jehova liyoolazikwa acilundu ecino, elyo cisi ca-Moabu ciyoolyataulwa mbubonya mbuli bwizu mbubulyataulwa mukati kamaanzi aacitantala. Elyo uyootandabika maanza aakwe mukati kaco mbubonya mbuli sikuyamba mbwatandabika maanza aakwe mukuyamba, nkabela uyoofwiinsya kulikankaizya kwakwe alweeno lwamaanza aakwe. Ncobeni malambo aako malamfu aalompolokede uyooafwiinsya, uyooabombya, uyooaboozya ansi akati kalusuko.”—Isaya 25:10-12.
11 Ijanza lya Jehova ‘liyootandabikwa’ kukwabilila cilundu cakwe cisalala. Pele Moabu sikulisumpula uyooumwa akulyataukwa mbuli “bufumba,” (BT). Kuciindi ca Isaya, ibwizu bulalyataukwa antoomwe abufwumba ikutegwa kubambwe camutuzya; aboobo Isaya usinsima masampu aayo kuli Moabu nokuba kuti ujisi malambo aaboneka kuti ayakidwe kabotu alimwi malamfwu.
12. Ino nkaambo nzi Moabu ncaagantwa kuti luli mweelede lubeta lwa Jehova?
12 Ino nkaambo nzi Jehova ncaamuganta buya Moabu kuti akapegwe cisubulo cibyaabi boobu? Ibana Moabu mmukowa wa Loti, imuntu wa Abrahamu alimwi imukombi wa Jehova. Aboobo tabali basimukobonyina buyo a Israyeli pe, pele mbaasimukowa. Nokuba boobo, bakomba baleza bakubeja alimwi balitondezya kuba basinkondonyina batazyokoloki abana Israyeli. Cilibeelede cisubulo eeco. Mumakani aaya, Moabu uli mbuli basinkondonyina ababelesi ba Jehova sunu. Ikwaambisya uli mbuli Bunakristo bwanyika ibutaminina kuti bwakatalikila kumbungano ya Banakristo yamumwaanda wamyaka wakusaanguna, pele mbubwenya mbutwabona musyule, ncecibeela cipati ca Babuloni Mupati.
Ilwiimbo Lwalufwutuko
13, 14. ‘Mmunzi nzi muyumu’ ngobajisi bantu ba Leza sunu, alimwi mbaani bazumizyigwa kunjila mulinguwo?
13 Ino mbuti kujatikizya bantu ba Leza? Akaambo kakukondwa kuti Jehova wabalanganya akubakwabilila, boongolola ikwiimba. “Mubuzuba obo kuyooimbwa lwiimbo olu munyika ya-Juda. Tulijisi munzi muyumu. Uyoobika lufutuko lube bulambo bwesu alubaya lwesu. Amujalule milyango kuti musyobo uululeme uusyomeka unjile.” (Isaya 26:1, 2) Nokuba kuti cakutadooneka aaya majwi akazuzikizyigwa nsiku, alazuzikizyigwa asunu caantangalala. “Musyobo uululeme” wa Jehova, Israyeli wakumuuya ulipedwe mbunga njumu iili mbuli munzi. Elo kaka eeco cipa kusekelela alimwi akwiimba!
14 Ino mbantu bali buti banjila mu “munzi” ooyu? Ilwiimbo lwiingula kuti: “Oyo uupangika moyo wakwe kulinduwe [Leza], uyoomukazika muluumuno lwakasimpe, nkaambo kakuti ulakusyoma. Amusyome Jehova lyoonse, nkaambo mu-Mwami Jehova momujenwe indomba iitamani.” (Isaya 26:3, 4) ‘Ikupangika moyo’ nkwagwasyilizya Jehova nkuyandisisya kumvwida njiisyo zyakwe ziluleme akumusyoma, ikutali kusyoma bweende bwanyika eeyi bwamakwebo, twaambo twacisi alimwi atwabukombi. “Mwami Jehova” alikke Nendomba iisyomeka iipa kuliiba. Aabo bamusyoma cakumaninina Jehova balakwabililwa alimwi balijisi “luumuno lwakasimpe” lutamani.—Tusimpi 3:5, 6; Ba-Filipi 4:6, 7.
15. Ino “munzi usumpwidwe” wafwiinsigwa buti sunu, alimwi muunzila nzi moulyataulwa “zituta zyabacete”?
15 Elo kuli kwiindana kaka azintu zicitikila basinkondonyina babantu ba Leza! “Wafwiinsya abo bakede kujulu, nkukuti munzi usumpwidwe. Wauselusya, wauselusizya ansi, wausisya akubulongo. Uyoolyataulwa zituta. Uyoolyataulwa zituta zyabacete azilyatililo zyabatengwana.” (Isaya 26:5, 6) Alimwi, aawa Isaya ulakonzya kaamba Moabu kuti “munzi usumpwidwe” naa imunzi uumbi buyo mbuli Babuloni, uusumpwidwe ncobeni akaambo kakulikankaizya. Pele kufwumbwa naa zintu zili buti, Jehova wayendelezya “munzi uusumpwidwe” kwiinda mukucinca bukkale bwakwe, eelyo ‘ibacete abatengwana’ bamumunzi ooyu baulyatauka. Oobu businsimi bweelela Babuloni Mupati sunu, ikwaambisya Bunakristo bwanyika. Ooyu “munzi usumpwidwe” wakasinikizyigwa kwaangulula bantu ba Jehova mu 1919—kwakali kuwa kwamasampu ooko—mpoonya abalo bakatalika kulyatauka sikubaanga wansiku. (Ciyubunuzyo 14:8) Munzila nzi? Kwiinda mukwaambilizya bukali bwa Jehova buyoomusikila kubuleya.—Ciyubunuzyo 8:7-12; 9:14-19.
Ikuyandisya Bululami “Aciibalusyo” ca Jehova
16. Ncikozyanyo nzi cibotu ncaatupa Isaya kujatikizya kulyaaba?
16 Nolwamana lwiimbo oolu lwakuzunda, Isaya wayubulula kulyaaba kwakwe alimwi abulumbu bujanika ikuti muntu wabelekela Leza uululeme. (Amubale Isaya 26:7-9.) Imusinsimi watupa cikozyanyo cibotu ‘cakulindila Jehova’ alimwi akuyandisya “zina” lyakuti Jehova “aciibalusyo” cakwe. Ino ciibalusyo ca Jehova ncinzi? Ibbuku lya Kulonga 3:15 lyaamba kuti: “Jehova . . . ndendilyo izina lyangu lyoonse; mbuboobo mbunjeelede kwiibalukwa mumazyalani amazyalani.” Isaya ulaliyandisya zina lyakuti Jehova ancoliiminina coonse kubikkilizya azyeelelo alimwi anzila zyakwe ziluleme. Aabo ibajisi luyando luli boobu kuli Jehova basinizyidwe kuyoolongezyegwa.—Intembauzyo 5:8; 25:4, 5; 135:13; Hosea 12:5.
17. Nzyoolwe nzi nzyobatakaboni basizibi?
17 Pele tabali boonse ibamuyanda Jehova azyeelelo zyakwe zisumpukide. (Amubale Isaya 26:10.) Basizibi balakaka kwiiya bululami nociba ciindi nobatambwa buya kuti bacite boobo ikutegwa banjile “munyika yabulome,” munyika iikkala babelesi ba Jehova ibalomenye mubukkale alimwi akumuuya. Icitobela ncakuti aaba basizibi ‘tabakaboni bulemu bwa-Jehova.’ Tabakaziboni pe zilongezyo nzyobayoopegwa bantu lyaakusalazyigwa zina lyakuti Jehova. Bamwi bayookakilwa ikutobela luyando lwa Jehova nomuba munyika mpya lyalo inyika yoonse noyinooli “nyika yabulome.” Imazina aabantu bali boobu taakalembwi pe mubbuku lyabuumi.—Isaya 65:20; Ciyubunuzyo 20:12, 15.
18. Ino bamwi balisalila buti koofwaala kuciindi ca Isaya, alimwi ndiilili nobayoosinikizyigwa ‘kubona’ Jehova?
18 “O Jehova, ijanza lyako lilisumpwidwe, nekubaboobo tababoni. Babone busungu mbosungwaalila bantu bako, bafwe insoni. Ii, mulilo utente basinkondonyoko.” (Isaya 26:11) Ijanza lya Jehova lyasumpulwa kuciindi ca Isaya Jehova naakwabilila bantu bakwe kwiinda mukulwana basinkondo babo. Pele ibunji bwabo kunyina anobaabona makani aaya. Aaba ibalisalila koofwaala munzila yakumuuya bayoosinikizyigwa ‘kubona’ naa kuzuminizya Jehova, ibaakuumpwa amulilo wabusungu bwakwe. (Zefaniya 1:18) Kumbele Leza wakaambila Ezekieli kuti: “Bayooziba kuti ndime Jehova.”—Ezekieli 38:23.
“Kufumbwa Muntu Ngwayanda Jehova, Ulamukoma”
19, 20. Nkaambo nzi alimwi mbuti Jehova mbwaabasubula bantu bakwe, alimwi ino mbaani bagwasyigwa acisubulo cili boobu?
19 Isaya ulizyi kuti iluumuno abuvwubi nzyobajisi basicisinyina zilaboola akaambo kazilongezyo zya Jehova. “O Jehova, kotubambila luumuno, nkaambo milimo yesu yoonse nduwe waicita mukati kesu.” (Isaya 26:12) Nokuba kuti zintu zili boobu akuti Jehova wakabikkila bantu bakwe coolwe cakuti babe “cisi cabapaizi, musyobo uusalalisya,” icisi ca Juda cali kucita zintu zibotu azibi. (Kulonga 19:6) Cakwiinduluka-induluka, ibantu bakwe bali kukomba baleza bakubeja. Akaambo kakucita boobo, bali kusubulwa ciindi aciindi. Pele ikusubulwa kuli boobu kutondezya luyando ndwajisi Jehova nkaambo “kufumbwa muntu ngwayanda Jehova, ulamukoma.”—Ba-Hebrayo 12:6.
20 Ikanji-kanji Jehova ulabasubula bantu bakwe kwiinda mukuzumizya masi aambi, “bami bambi,” kuti babeendelezye. (Amubale Isaya 26:13.) Wazumizya bana Babuloni kuti babatole mubuzike mu 607 B.C.E. Sena cabagwasya eeci? Ikupenga kunyina nokumugwasya muntu pe. Pele ikuti naa ooyo sikupenga wayiya ciiyo kuzintu zyacitika, weempwa akutalika kukomba Jehova alikke, ulagwasyigwa. (Deuteronomo 4:25-31) Sena kuli ba Juda batondezya kweempwa kwabunaleza? Inzya! Mubusinsimi Isaya wati: “Tulatembaula izina lyako olike.” Nobapiluka kuzwa mubuzike ba Juda mu 537 B.C.E., bayandika kusubulwa ciindi aciindi akaambo kazinyonyoono zimbi, pele kunyina nobapiluka limbi kubukombi bwa baleza bamabwe.
21. Ncinzi ciyoocitikila basikudyaaminina bantu ba Leza?
21 Ino mbuti kujatikizya basikwaanga Juda? “[Balifwide], tabakooyoobuka pe. Nkaambo kako wabaswaya, wabanyonyoona, wajaya ciibalusyo cabo coonse.” (Isaya 26:14) Babuloni uyoopenga akaambo kalunya loonse ndwaakacitila cisi ca Jehova cisale. Ikwiinda mukubelesya ba Medi abana Persia, Jehova uyoowisya Babuloni uulisumpula akwaangulula bantu bakwe bali mubuzike. Ooyo munzi mupati wa Babuloni taukabi anguzu pe, unooli buyo mbuli kuti ulifwide. Mukuya kwaciindi, uyoolobela limwi.
22. Ino bantu ba Leza balongezyegwa buti sunu?
22 Mukuzuzikizyigwa kwasunu, ibasyeede akati kaba Israyeli bakumuuya bakasubulwa bakaangululwa kuzwa ku Babuloni Mupati akutalika mulimo wa Jehova alimwi mu 1919. Mbwaanga bakabukulusyigwa, Ibanakristo bananike bakajata bubi alimwi mumulimo wabo wakukambauka. (Matayo 24:14) Eelyo Jehova wabagwasya kwiinda mukuyungizya mweelwe wabo mane akuleta nkamu mpati ‘yambelele zimwi’ kuti ibelekele amwi ambabo. (Johane 10:16) “Wavuzya bantu bacisi, O Jehova, wavuzya bantu bacisi. Nduwe walemekwa. Wakomezya migaano yoonse yanyika. O Jehova, mumapenzi aabo balibikide myoyo yabo kulinduwe. Bakakukomba ciindi eco niwakali kubakoma.”—Isaya 26:15, 16.
‘Bayoobuka’
23. (a) Ninguzu zili buti zya Jehova zigambya izyakatondezyegwa mu 537 B.C.E.? (b) Ninguzu zili buti zikozyenye izyakatondezyegwa mu 1919 C.E.?
23 Isaya wapiluka kubukkale bwa Juda naakacili mwaange mu Babuloni. Weezyanisya cisi eeci kumwanakazi uumyongwa pele wakakilwa kutumbuka akaambo kakubula sikumutumbusya. (Amubale Isaya 26:17, 18.) Ilugwasyo oolo lwakaboola mu 537 B.C.E., eelyo bantu ba Jehova bakapilukila kumunzi wabo kabasungweede kapati kuyooyakulula tempele akutalisya bukombi bwakasimpe alimwi. Cili mbuli kuti eeci cisi cabusyigwa kuzwa kubafwu. “Bafu bako bayoopona, mitunta yangu iyoobuka. Amubuke, mwiimbe, inywe nobakede mubulongo, nkaambo mume wako uli mbubonya mbuli mume wamumuni. Nyika iyoobusya [bantu bafwide] bayo.” (Isaya 26:19) Elo watondezya nguzu kaka Jehova! Kunze lyaboobo, zyakalibonya kaka nguzu zyakwe ciindi majwi aaya naakazuzikizyigwa munzila yakumuuya mu 1919! (Ciyubunuzyo 11:7-11) Tulacilangila kaka ciindi majwi aaya naayoozuzikizyigwa munyika mpya kweelana ambwaalembedwe, eelyo bafwide mbayeeya Leza ‘nobayoomvwa jwi lya Jesu akuzwa’ muzyuumbwe!—Johane 5:28, 29.
24, 25. (a) Ino bama Juda bakuciindi ca Isaya bakeelede kucita nzi mukutobela mulawo wakuti bayube? (b) Ino ‘maanda aamukati’ alangilwa kuti ayiminina nzi sunu, alimwi ino tweelede kwaalanga buti?
24 Nokuba boobo, ikuti naa basyomesi kabayanda kutambula zilongezyo zyakumuuya izyakasyomezyegwa kwiinda muli Isaya, beelede kutobela malailile aa Jehova aakuti: “Amuboole nubantu bangu, munjile mumaanda aanu aamukati, mulijalile milyango ya[nu], muyube kaindi kaniini, mane bukali bukamane. Nkaambo amubone! Jehova ulazwa kubusena bwakwe kuti abweedezye bantu bakede munyika mulandu wabubi bwabo. Ayalo nyika iyooyubununa bulowa bwayo, tiikooyoovumba limbi bajayidwe bayo.” (Isaya 26:20, 21; amweezyanisye a Zefaniya 1:14.) Eeci cibalo cilakonzya kuti cakazuzikizyigwa kusaanguna ciindi ba Medi abana Persia ibakali kusololelwa a Mwami Koresi nobakazunda Babuloni mu 539 B.C.E. Ikweelana abwaamba Xenophon sikwiiya zyansiku mu Giliki, ciindi Koresi naakanjila mu Babuloni, wakalailila bantu boonse kuti batazwi pe mumaanda aabo nkaambo basikalumamba bakwe basimabbiza “bakalailidwe kujaya kufwumbwa muntu ngubajana anze.” Maanda “aamukati” aasunu aambidwe mubusinsimi oobu alakonzya kaaswaangene kapati amakumi-makumi aazyuulu zyambungano zyabantu ba Jehova nyika yoonse mbwiizulwa. Imbungano eezyi zilazumanana kutugwasya mubuumi bwesu, mane akuciindi ‘camapenzi mapati.’ (Ciyubunuzyo 7:14) Aboobo cilayandika kaka kuti tuzumanane kwiilanga munzila yeelede mbungano akuyanzana anjiyo lyoonse!—Ba-Hebrayo 10:24, 25.
25 Imamanino aanyika ya Saatani alasika lino-lino. Tatunazyiba pe mbwayoobakwabilila bantu bakwe Jehova kuciindi eeco ciyoosya. (Zefaniya 2:3) Nokuba boobo, tulizyi kuti lufwutuko lwesu luyooyaama aalusyomo ndotujisi muli Jehova, kusyomeka kwesu alimwi ambotumumvwida.
26. Ino nguni “Leviyatani” kuciindi ca Isaya alimwi akuciindi cesu, alimwi ncinzi cicitika ‘kuntale yamulwizi’ eeyi?
26 Kujatikizya ciindi eeco, Isaya wasinsima kuti: “Mubuzuba obo Jehova uyoobelesya ipanga lyakwe litakonkomani ipati ijumu kuti akome Leviyatani inzoka iicijisya a-Leviyatani inzoka iilizingaila, alimwi uyoojaya intale iili mulwizi.” (Isaya 27:1) Mukuzuzikizyigwa kwakusaanguna, “Leviyatani” wiiminina masi ikwakamwayikila bana Israyeli mbuli Babuloni, Egepita alimwi a Asuri. Aaya masi taakakonzyi kusinkilila kupiluka kwabantu ba Leza kumunzi wabo kuciindi ceelede. Pele ino Leviyatani wasunu nguni? Kuboneka kuti ngu Saatani—“muzoka waciindi,” antoomwe abukkale bwakwe bubyaabi, icibelesyo ncabelesya kulwana ba Israyeli bakumuuya. (Ciyubunuzyo 12:9, 10; 13:14, 16, 17; 18:24) “Leviyatani” wakanyanzyigwa bweendelezi kubantu ba Leza mu 1919, eelyo ino-ino uyoolobela limwi Jehova aakujaya “intale iili mulwizi.” Pele kuciindi cino, kunyina cintu ncakonzya kusoleka kucita “Leviyatani” kubantu ba Jehova iciyoozwidilila ncobeni.—Isaya 54:17.
“Muunda Mubotu Wamasaansa”
27, 28. (a) Ino muunda wa Jehova wamasaansa wazuzya nyika yoonse anzi? (b) Ino Jehova uukwabilila buti muunda wakwe wamasaansa?
27 Isaya lino watondezya munzila mbotu kujatikizya mbobayoozwidilila bantu ba Jehova baangulwidwe kabelesya lwiimbo lumbi ategwa: “Mubuzuba obo muunda mubotu wamasaansa muyoouimbila. Mebo nde-Jehova ndaulanga, ndautuntulwida lyoonse. Ndaulanga masiku asikati kuti kutabi uubisizya.” (Isaya 27:2, 3) Ibasyeede akati kaba Israyeli bakumuuya antoomwe abeenzinyina ibabeleka canguzu bazuzya nyika yoonse amicelo yakumuuya. Cilapa kukondwa kaka eeci alimwi akwiimba! Kulumba koonse kupegwa kuli Jehova uulanganya muunda wakwe wamasaansa caluyando.—Amweezyanisye a Johane 15:1-8.
28 Ee, lino muciindi cakukalala Jehova ulikondedwe kapati! “Nsikwe bukali. Nicakabota myuunga amitubetube niyakabikwa kuti indilwisye. Nindakailyataula, akwiiumpa yoonse antoomwe. Cita ajate inguzu zyangu kuti tuyanzane awe. Ncobeni atuyanzane awe.” (Isaya 27:4, 5) Ikutegwa abone kwaamba kuti masaansa aakwe azumanana kupa micelo yawaini ‘mibotu’ minji, Jehova walyatauka akukukulula nsaku zyoonse zikonzya kusofwaazya muunda wakwe mbuli kuti wazyuumpa amulilo. Aboobo kutabi naba omwe uunyonganya mbungano ya Bunakristo! Pele boonse ‘abajate nguzu zya Jehova,’ bacite zintu ziyoobapa kuti abayande akubakwabilila. Bacita boobo ncobeni bayooyanzana a Leza—icintu ciyandika kapati cakuti Isaya wacaamba ziindi zyobile. Ncinzi ciyoocitika? “Muziindi ziciza luzubo lwa-Jakobo luyoosimpa miyanda, aba-Israyeli bayoosyuuka akucita malubaluba, elyo bayoozuzya luwa loonse micelo.” (Isaya 27:6) * Takuliboteli kaka kuzuzikizyigwa kwakapango aaka, icitondezya bumboni bwanguzu zya Jehova! Ikuzwa mu 1919 Banakristo bananike bazuzya “micelo” munyika, icakulya cakumuuya cijisi busani. Akaambo kaboobo, basanganwa atuulunzuma twambelele zimwi zisyomeka ‘ibamumanina milimo Leza isikati amasiku’ antoomwe. (Ciyubunuzyo 7:15) Aaba balazumanana kutobela zyeelelo zyakwe zisumpukide cakukondwa nokuba kuti bali munyika iisofweede. Eelyo Jehova wazumanana kuyungizya mweelwe wabo. Kutabi notuciluba pe coolwe cipati cakulya “micelo” akuyaabila bamwi kwiinda mukutembaula nkotucita lwesu tobeni!
Bupanduluzi buyungizidwe
^ munc. 2 Izina lyakuti Ari ambweni lyaamba “Munzi.”
^ munc. 4 Amubone bbuku lya Revelation—Its Grand Climax At Hand!, apeeji 170.
^ munc. 28 Ibbuku lya Isaya 27:7-13 lyabandikwa mukabbokesi kali apeeji 285.
[Mibuzyo yaciiyo]
[Caption on page 285]
“Mweembo Mupati” Waambilizya Lwaanguluko
Imacise aa Juda ayindila mu 607 B.C.E. Jehova naasubula bantu bakwe bazangi kwiinda mukubalekela kutolwa mubuzike. (Amubale Isaya 27:7-11.) Imulandu wacisi eeci mmupati kapati cakuti taukonzyi kumanizyigwa azituuzyo zyabanyama. Aboobo mbubwenya muntu mbwakonzya kumwaya mbelele naa mpongo kwiinda ‘mukuzitanda’ naa ikumwaya matuvwu ‘aguwo,’ Jehova watanda bana Israyeli mumunzi wabo. Mpoonya ibantu bakompeme balo bayimininwa abanakazi bacikonzya kubelesya zintu zyasyaala mumunzi ooyo.
Nokuba boobo, ciindi casika cakuti Jehova azwisye bantu bakwe mubuzike. Wabaangulula mbubwenya mulimi mbwazwisya maolifa aali mbuli kuti alijatidwe mucisamu. “Mubuzuba obo Jehova uyoovwimbula maila aakwe kuzwa kulwizi kusikila kukalonga ka-Egepita [ka Firate], nkabela muyoobunganisigwa omwe omwe nubana ba-Israyeli. Mubuzuba obo kuyoolizigwa mweembo mupati, elyo abo ibakali kunyonyooka mucisi ca-Asuri, abaabo ibakatandidwe munyika ya-Egepita bayoosika boonse, bayookomba Jehova mucilundu cisalala caku-Jerusalemu.” (Isaya 27:12, 13) Koresi naazunda mu 539 B.C.E., wabikka mulawo wakwaangulula ba Juda boonse mubwami bwakwe ikubikkilizya abaabo boonse ibali mu Asuri a Egepita. (Ezara 1:1-4) Cili mbuli kuti “mweembo mupati” walizyigwa uutobelezya lwiimbo lwalukkomano akaambo kalwaanguluko kubantu ba Leza.
[Zifwanikiso izili apeeji 274]
“Ipobwe lyazintu zyamafuta”
[Cifwanikiso icili apeeji 275]
[Cifwanikiso icili apeeji 277]
Babuloni walyataulwa kuli baabo bakali baange
[Cifwanikiso icili apeeji 278]
“Munjile mumaanda aanu aamukati”
