Imusinsimi Wansiku Uujisi Mulumbe Wasunu
Cibalo 1
Imusinsimi Wansiku Uujisi Mulumbe Wasunu
1, 2. (a) Mbukkale nzi bweetezya mbotubona sunu munyika? (b) Ino mweendelezi umwi wakaamba buti kujatikizya kunyongana kwabukkale bwabantu?
INO nguni sunu uutalombozyi kulyookezya kuzwa kumapenzi aajisi bantu? Pele ibunji bwaziindi nzyotulombozya kunyina nozizuzikizyigwa pe. Inga tulombozya luumuno, pele icitusikila ninkondo. Tulombozya bululami alimwi alumvwano, pele tatukonzyi kulesya kubba, kujata bamakaintu alimwi akujayana, eezyo zyalo ziyaabuya kumbele. Tulayanda kubasyoma basimukoboma, pele tulazikkiya zijazyo zyesu ikutegwa tulikwabilile. Tulabayanda bana besu, aboobo tulasoleka ikubayiisya bukkale bubotu, pele bunji bwaziindi tulatyompwa notubabona kabazumina kucita zintu zitaluzi nzyobaambilwa kubeenzinyina.
2 Tulakonzya kucizuminizya ncaakaamba Jobu walo wakati, imuntu ujisi buyo mazuba mace “aazwide mapenzi.” (Jobo 14:1, BT) Mbozyibede ncobeni zintu oobo sunu, nkaambo inyika yanyonyooka citanabwenwe. Imweendelezi umwi waku U.S. wakaamba kuti: “Inkondo Yakukongana yamana lino, pele iceetezya ncakuti, inyika bwaba busena bwakulwanina nkondo yacijaye-jaye, yakumana musyobo alimwi ankondo yalunya iilwanwa azikombelo. . . . Twazyuubya-ubya zyeelelo zyakulilemeka icakuti bunji bwabakubusi banyongana mumizeezo, batyompwa alimwi banjila mumapenzi aataambiki. Ono tuli mukutebula butebuzi bwaletwa akutabikkila maanu kwabazyali, kulekana, kutundululwa kwabana basyoonto, kumita kwabana kabatanasika myaka iili 20, ikufweela kucikolo, kubelesya misamu iikola alimwi akuba amigwagwa iizwide buyo lupyopyongano. Cili mbuli kuti iŋanda yesu yalo yakafwutuka muzuzumo mupati, nkokuti Nkondo Yakukongana, lino yatalika kubumbwa.”
3. Ndibbuku nzi lyamu Bbaibbele ilitugwasya kuba abulangizi kujatikizya buumi bwakumbele?
3 Nokuba boobo, tulijisi bulangizi. Imyaka iitandila ku 2,700 yainda, Leza wakasololela mwaalumi umwi waku Nyika Yabasimalungu (Middle East) ikwaamba mulongo wabusinsimi walo uujisi bupanduluzi bulibedelede kulindiswe sunu. Eeyi milumbe ililembedwe mubbuku lyamu Bbaibbele lyalo ilijisi izina lyamusinsimi ooyo—Isaya. Ino Isaya wakali ni, alimwi nkaambo nzi ncotwaambila kuti ibusinsimi bwakwe bwalo bwakalembwa izyuulu zyamyaka izitandila kuli zyotatwe bulabamunikila bantu boonse sunu?
Imwaalumi Mululami Uupona Muciindi Camapenzi
4. Ino Isaya wakali ni, alimwi ndilili naakabeleka kali musinsimi wa Leza?
4 Isaya ulyaamba kuti ‘mmwana wa Amozi’ * mukapango kakusaanguna ikabbuku lyakwe alimwi utwaambila kuti, wakabeleka kali musinsimi wa Leza “mumazuba aa-Uziya, Jotamu, Ahazi a-Hezekiya, bami ba-Juda.” (Isaya 1:1) Nkokuti eeci inga caamba kuti Isaya wakazumanana kubeleka kali musinsimi wa Leza mucisi ca Juda ambweni kutalikila kumamanino aabulelo bwa Uziya mumwaka wa 778 B.C.E., eelyo wakabeleka kwamyaka iitaleli ku 46.
5, 6. Mmakani nzi aatadoonekwi aajatikizya buumi bwakali kupona mukwasyi wa Isaya, alimwi ino nkaambo nzi?
5 Nzisyoonto kapati nzyotuzyi kujatikizya buumi bwa Isaya ikuti naa twati tweelanye ambotubazyi basinsimi bamwi. Tulizyi kuti wakali muntu uukwete alimwi akuti wakali kwiita mukaintu wakwe kuti ngu “mukamusinsimi.” (Isaya 8:3) Ikweelana ambolyaamba bbuku lya McClintock alimwi a Strong litegwa Cyclopedia of Biblical, Theological, and Ecclesiastical Literature, ibukkale buli boobu butondezya kuti ibuumi bwa Isaya kali mwaalumi uukwete, “teebwakali kweendelana buyo akulyaaba kwakwe, pele cakali cintu cakajatene kapati akulyaaba ooko.” Alimwi inga twaamba kuti imukaintu wa Isaya wakalijisi mulimo wakwe wabusinsimi mbubwenya mbuli bamakaintu bambi banaleza ibamu Israyeli yansiku.—Babetesi 4:4; 2 Bami 22:14.
6 Isaya amukaintu wakwe bakalijisi bana basankwa bobile alimwi umwi aumwi wabo wakalipedwe izina lyabusinsimi. Iwakusaanguna walo iwakali kwiitwa kuti Searijasubu nguwakasindikila Isaya naakatola mulumbe wa Leza ku Mwami mubyaabi Ahazi. (Isaya 7:3) Takudoonekwi pe kwaamba kuti Isaya amukaintu wakwe bakacita bukombi bwa Leza kuti cibe cintu cicitwa amukwasyi woonse—icikozyanyo cibotu kapati kubanabukwetene sunu!
7. Amupandulule bukkale ibwakaliko mucisi ca Juda kuciindi ca Isaya.
7 Isaya amukwasyi wakwe bakali kupona kuciindi icisi ca Juda nocakali mumapenzi kapati. Bantu tiibakakkomene abweendelezi, basinkuta bakali kutambula cisinka mulomo alimwi muzikombelo kwakavwulide kuupaupa ameso kwalo kwakasofwaazya bukkale bwabantu. Atala aamilundu kwakazwide zipaizyo zyabaleza bakubeja. Mane bamami bamwi bakali kukulwaizya bukombi bwabamasi. Mucikozyanyo, Ahazi wakabazumizya bantu bakwe ikukomba mituni alimwi awalo lwakwe wakali kwiikomba mane wakazumizya abana bakwe ‘kutuulwa mumulilo’ kutuulila Moleki leza wabana Kanana. * (2 Bami 16:3, 4; 2 Makani 28:3, 4) Izintu zyoonse eezyi zyakali kucitika akati kabantu ibakapangene bulongwe a Jehova!—Kulonga 19:5-8.
8. (a) Ino Mwami Uziya alimwi a Mwami Jotamu bakapa cikozyanyo nzi, alimwi sena ibantu bakabutobela busolozi bwabo? (b) Ino Isaya wakabutondezya buti busicamba bwakwe akati kabantu bazangi?
8 Imakani aakkomanisya ngakuti, ibamwi mbaakali kupona limwi kuciindi eeco Isaya kubikkilizya abeendelezi bamwi, bakasoleka kukulwaizya bukombi bwakasimpe. Imwami Uziya wakali akati kabaabo, eelyo wakacita “ziluleme mumeso aa-Jehova.” Nokuba boobo, mubweendelezi bwakwe, ibantu bakali ‘kupaila akutenta tununkilizyo kuzipaililo izyakali kuzilundu.’ (2 Bami 15:3, 4) Awalo Mwami Jotamu “wakacita ziluleme mumeso aa-Jehova.” Pele “bantu bakacili kubisya-bisya.” (2 Makani 27:2) Icibeela cipati caciindi ncaakali kucita mulimo wakwe wabusinsimi Isaya, ibwami bwa Juda bwakali nyonyookede kapati munzila yakumuuya alimwi ayakumubili. Ibantu teebakayanda kutobela mizeezo mibotu yakali kuzwa kubami babo. Icakutadooneka, imulimo wakutola mulumbe wa Leza teewakali kulangilwa kuba mulimo muuba-uba akaambo kabantu aaba ibatakali kumvwa. Nokuba boobo, Jehova naakabuzya kuti “Ino nguni ngunti tume? Nguni uukonzya kutwiinkila?” Isaya tanaakawayawaya pe. Wakaingula ategwa: “Mpendi! Unditume mebo!”—Isaya 6:8.
Imulumbe Walufwutuko
9. Ino izina lya Isaya lyaamba nzi, alimwi eeci ciswaangene buti amutwe wamakani iwabbuku lyakwe?
9 Izina lya Isaya lyaamba kuti “Ilufwutuko ndolwa Jehova,” alimwi inga kwaambwa kuti ooyo ngumutwe wamulumbe wakwe. Ee, ibusinsimi bwa Isaya bumwi bulakonzya kwaambwa kuti mbwalubeta. Pele imakani mapati ngalufwutuko. Isaya wakali kuluula lyoonse-lyoonse kujatikizya ciindi Jehova mbwaakali kuyoofwutula bana Israyeli kuzwa mubuzike mu Babuloni akuzumizya kakamu kasyoonto kuti kapiluke ku Zioni alimwi akupilusya bubotu kucisi bwalo mbucakajisi kaindi. Icoolwe cakwaamba alimwi akulemba businsimi bujatikizya kupilusyigwa kwacisi cokwabo cibotu ica Jerusalemu kwakamuletela lukkomano lupati kapati Isaya!
10, 11. (a) Nkaambo nzi ibbuku lya Isaya ncoliyandika kapati kulindiswe sunu? (b) Ino ibbuku lya Isaya litusololela buti kumakani aa Mesiya?
10 Pele ino milumbe eeyi yalubeta alimwi alufwutuko itujatikizya buti swebo? Mucoolwe, Isaya tasinsimi ikugwasya bwami bwa Juda bwamisyobo yobile buyo pe. Pele imilumbe yakwe ilaabupanduluzi bulibedelede kuciindi cesu cino. Isaya ulapandulula munzila iikondelezya kujatikizya zilongezyo zipati iziyooletwa a Bwami bwa Leza ino-ino kunyika yesu. Aboobo, icibeela cipati camalembe aa Isaya cijatikizya Mesiya wakasinsimwa walo wakali kuzyoolela kali Mwami mubwami bwa Leza. (Daniele 9:25; Johane 12:41) Ee, takuli kulubizya pe ikuti mazina obile aaya, ilya Jesu alimwi alya Isaya apandulula cintu comwe buyo nkaambo alyalo izina lya Jesu lyaamba kuti “Jehova Ndolufwutuko.”
11 Jesu wakazoozyalwa nokwakainda myaanda yamyaka iili ciloba kuzwa ciindi naakali kupona Isaya. Pele ibusinsimi ibwaamba zya Mesiya ibuli mubbuku lya Isaya bulipandulwidwe kabotu-kabotu alimwi buliluzi icakuti bulimvwisya mbuli kuti ncibalo icakalembwa amuntu iwakaliko ciindi Jesu naakali kupona anyika. Akaambo kaboobo, sikwiiya umwi wakakulwaizyigwa ikwaamba bbuku lya Isaya kuti ndibbuku lya “Makani Mabotu Lyasanu.” Aboobo tacigambyi pe ikuti Jesu abasikwiiya bakwe bakali kuvwula kuzubulula bbuku lyamu Bbaibbele lya Isaya ikutegwa bamupandulule kabotu-kabotu Mesiya.
12. Ino nkaambo nzi ncotusungwaalila ikubala bbuku lya Isaya?
12 Isaya ulapandulula munzila iikondelezya zya “ijulu ipya anyika impya” mwalo ‘imwami mwayooyendelezya mubululami’ abasilutwe mobayoobeteka cakululama. (Isaya 32:1, 2; 65:17, 18; 2 Petro 3:13) Aboobo ibbuku lya Isaya lyaamba bulangizi bubotu bwa Bwami bwa Leza, mubweendelezi bwa Mesiya Jesu Kristo kali Mwami uubikkidwe. Toonse twakulwaizyigwa kuti mubuzuba bumwi abumwi tweelede kuti katulangila ‘lufwutuko lwa Jehova’ cakukondwa. (Isaya 25:9; 40:28-31) Aboobo atuulingule cabusungu imulumbe mubotu uuli mubbuku lya Isaya. Ilusyomo lwesu muzisyomezyo zya Leza luyooyumizyigwa kapati mbotuyaabucita boobu. Alimwi tuyoogwasyigwa kapati ikusyoma kuti ncobeni Jehova ngu Leza wesu walufwutuko.
Bupanduluzi buyungizidwe
^ munc. 4 Izina lya Amozi bausyi Isaya talyeelede kunyonganizyigwa alya Amosi walo wakasinsima kumatalikilo aabulelo bwa Uziya alimwi iwakalemba bbuku lijisi zina lyakwe.
^ munc. 7 Bamwi baamba kuti ‘ikutuulwa mumulilo’ caamba kusalazyigwa buyo. Nokuba boobo, mucibalo eeci kuboneka kuti caamba kutuulwa kwini buya. Tacidoonekwi pe kuti icilengwa cakutuula bana cakali kucitwa abana Kanana antoomwe abana Israyeli bazangi.—Deuteronomo 12:31; Intembauzyo 106:37, 38.
[Mibuzyo yaciiyo]
[Kabbokesi/Cifwanikiso icili apeeji 7]
Ino Isaya Wakali ni?
NCOLYAAMBA IZINA LYAKWE: “Ilufwutuko ndolwa Jehova”
MUKWASYI: Wakalikwete alimwi wakalijisi bana basankwa bobile
NKWAAKALI KUKKALA: Ku Jerusalemu
MYAKA NJAAKABELEKA MULIMO WAKWE: Tayileli pe ku 46 ikuzwa mumwaka wa 778 B.C.E. kusikila ambweni nowakainda mwaka wa 732 B.C.E.
IBAMI BA JUDA IBAKALELA KUCIINDI CAKWE: Uziya, Jotamu, Ahazi, Hezekiya
IBASINSIMI BASAANYINA: Mika, Hosea, Odedi
[Cifwanikiso icili apeeji 6]
Isaya amukaintu wakwe bakacita bukombi bwa Leza kuti cibe cintu cicitwa amukwasyi woonse
