Imwami a Beendelezi Bakwe
Cibalo 25
Imwami a Beendelezi Bakwe
1, 2. Ncinzi cikonzya kwaambwa kujatikizya malembe aa Mabbuku aaku Dead Sea aa Isaya?
KU PALESTINE, imabbuku aali mbwaabede akajanwa mumpako zyamabwe izili munsi-munsi a Dead Sea imyaka yakuma 1940 kaiya kumamanino. Bakatalika kwaaita kuti Mabbuku aaku Dead Sea alimwi ayeeyelwa kuti akalembwa akati kamwaka wa 200 B.C.E. alimwi a 70 C.E. Ilijisi mpuwo akati kangawo oonse ndibbuku lya Isaya ilyakalembelwa acikutu citanyonyooki kufwambaana mumwaambo wa Chihebrayo. Kusyeede buyo asyoonto kuti eeli bbuku limane kulembwa alimwi izilembedwe mulindilyo ziindene buyo asyoonto azili mumalembe aba Masoreti akazyoolembwa nokwakainda myaka iitandila ku 1,000. Aboobo eeli bbuku litondezya kuti izyakalembwa mu Bbabbele ikujatikizya bbuku eeli zililuzi.
2 Ikaambo kakondelezya ikujatikizya Mabbuku aaku Dead Sea aa Isaya nkakuti acibeela awo aabalwa kuti ngu Isaya caandaano 32, imulembi wakeenga “X” mumbali acibeela eeco. Tatukazi kaambo ncaakacitila boobo mulembi, pele masimpe ngakuti eeci cibeela ca Bbaibbele Lisalala ncaalubazu.
Ikweendelezya Mubululami Alimwi Amubuluzi
3. Mbweendelezi nzi ibwakasinsimwa kubbuku lya Isaya alimwi alya Ciyubunuzyo?
3 Icaandaano ca Isaya 32 citalika abusinsimi bukkomanisya bwalo ibuli mukuzuzikizigwa kuciindi cesu: “Amubone! Kuyooba mwami uuendelezya mubululami abasilutwe babeteka cakululama.” (Isaya 32:1) Inzya ulaamba “Amubone!” Ikugambwa kuli boobu kutuyeezya kooko ikujanika mubbuku lyamamanino lyamu Bbaibbele kwakuti: “Oyo uukede acuuno cabwami wakati, Amubone, ndalengulula zintu zyoonse, zibe zipya.” (Ciyubunuzyo 21:5) Ibbuku lya Isaya alimwi alya Ciyubunuzyo lyalo ilyakazyoolembwa kakwiindide myaka iili 900 kuzwa nolyakalembwa lya Isaya lilapandulula cakukkazika moyo kujatikizya bweendelezi bupya, nkokwaamba kuti “ijulu ipya,” ilibambwa a Mwami Kristo Jesu walo wakabikkwa acuuno cabwami mu 1914, abasikulelanyina ibali 144,000 balo ‘bakanununwa akati kabantu,’ antoomwe abantu bakamantene nyika yoonse mbwiizulwa nkokuti “nyika impya.” * (Ciyubunuzyo 14:1-4; 21:1-4; Isaya 65:17-25) Zyoonse eezi zyakonzyeka akaambo kacituuzyo cacinunuzyo ca Kristo.
4. Ninkamu nzi iyoojanika munyika mpya iiliko sunu?
4 Imwaapostolo Johane waamba boobu naazwa kubona cilengaano cabasikulelanyina a Kristo ibali 144,000 ategwa: “Ndakalanga, ndakabona inkamu impati yabantu batabaliki kumuntu naba omwe, bazwa kuzisi zyoonse akumisyobo yoonse akumikowa yoonse akumyaambo yoonse, baliimvwi kunembo lyacuuno cabwami akunembo lya-Mwanambelele.” Eeyi nenkamu yakusaanguna yanyika mpya, inkamu mpati lino iibalilwa kutuulunzuma iyabunganizigwa antoomwe abasyeede akati kabali 144,000 balo ibunji bwabo bacembaala lino. Eeyi nkamu mpati iyooafwutuka mapenzi mapati aayo aboola alimwi mu Paradaiso bayoobasangana babusyidwe ibasyomeka antoomwe amyaanda-myaanda yatuulunzuma twabantu bamwi ibayoopegwa coolwe cakutondezya lusyomo lwabo. Aabo boonse bayoocita boobo bayootambula buumi butamani.—Ciyubunuzyo 7:4, 9-17.
5-7. Ino “basilutwe” ibakasinsimwa babeleka mulimo nzi mubutanga bwa Leza?
5 Nokuba boobo, aaba ibankamu mpati bayandika lukwabililo kufwumbwa kuti eeci cisi cizwide lusulo kaciciliko. Ibunji bwaziindi lukwabililo oolu luzwa kuli “basilutwe” balo ‘ibeendelezya cakululama.’ Tabuliboteli kaka bubambe oobu! Ibusinsimi bwa Isaya bulazumanana kubapandulula aaba “basilutwe” mumajwi aakkazika moyo ategwa: “Umwi aumwi uyooba mbuli macijilo aakulivwuna kumuuwo aciyubilo cakucijila ciindi cakuwidwa imvula yamuyoba. Uyooba mbuli tulongalonga twamaanzi munkanda injumu, mbuli cenzule campangala impati munyika iikataazya.”—Isaya 32:2.
6 Inyika yoonse mbwiizwide mapenzi lino, kulayandika kuti kakuli “basilutwe,” ee ibaalu ‘ibayoojatisya butanga boonse,’ ikulanganya mbelele zya Jehova akweendelezya cakululama kweelana anjiisyo zya Jehova iziluleme. (Incito 20:28) Aaba “basilutwe” beelede kuti kabazijisi zyoonse izilembedwe kuli 1 Timoteo 3:2-7 alimwi a Tito 1:6-9.
7 Jesu mubusinsimi bwakwe ibupandulula “mamanino aaciindi” aakatazya wakati: “Mutayoowi.” (Matayo 24:3-8) Ino nkaambo nzi ncobatabuyoowi bukkale bwasunu basikutobela Jesu? Nkaambo kakuti “basilutwe,” ibananike naa ‘bambelele zimwi’ balabukwabilila butanga cakusyomeka. (Johane 10:16) Balabalanganya banabakwabo mane nomuba mumapenzi mbuli aankondo zyacijaye-jaye. Mbuli mbobakkede munyika eeyi iitakwe cakulya cakumuuya, balabayumya-yumya kapati aabo ibatyompedwe kwiinda mukubelesya Jwi lya Leza, Ibbaibbele.
8. Ino muunzila nzi Jehova mwabayiisya “basilutwe” ibali akati kambelele zimwi alimwi ubabelesya buti?
8 “Basilutwe” bazibwa kapati mumyaka eeyi iili 50 yainda. Aabo “basilutwe” ibali akati kambelele zimwi balayiisyigwa lino kuti bakabe nkamu ‘yabasilutwe,’ eelyo aabo bayoozwidilila aakumana mapenzi mapati bayoopegwa mulimo wabweendelezi ‘munyika impya.’ (Ezekieli 44:2, 3; 2 Petro 3:13) Nobasololela mumulimo wa Bwami kwiinda mukupa busolozi bwakumuuya, basinizya kwaamba kuti balo bali mbuli “ceenzule campangala impati,” balabukatalusya butanga bwabo mumasena mobakombela. *
9. Mbukkale buli buti ibutondezya kuti “basilutwe” balayandika kapati sunu?
9 Ibanakristo balyaabide mbabayandika lukwabililo luli boobu ikapati kumazuba aano aakatazya aamamanino aanyika ya Saatani mbyaabi. (2 Timoteo 3:1-5, 13) Iguwo lyanjiisyo zyakubeja alimwi atwaambo tupilingene lilaunga. Imizuzumo ilazuma kwiinda munkondo zyaakati kamasi alimwi azyamucisi mumona alimwi abalo ibakombi ba Jehova Leza ibasyomeka bali mukulwanwa. Ibanakristo bayandika tulonga-longa twamaanzi aakasimpe aasalala alimwi aatasofweede ikutegwa bamane nyota yakumuuya njobajisi munyika eeyi iili mbuli nkanda munzila yakumuuya. Mucoolwe, Jehova wasyomezya kuti uyoobakulwaizya akubasololela aabo batyompedwe ikwiinda mu Mwami wakwe uuendelezya antoomwe abanabakwabo bananike alimwi ‘abasilutwe’ ibambelele zimwi. Aboobo Jehova uyoobona kuti zintu zilacitwa munzila iiluleme alimwi iluzi.
Ikubonesya, Ikuswiililisya Akubikkila Maano
10. Mbubambe nzi mbwaacita Jehova ikutegwa bantu bakwe bakonzye ‘kubona’ alimwi ‘akuteelela’ zintu zyakumuuya?
10 Ino bubambe bweendelezyegwa a Jehova bwabajatikizya buti bankamu mpati? Ibusinsimi bwazumanana ategwa: “Meso aabaabo babona taakooyoofwinyisigwa, amatwi aabaabo bamvwa ayooswiililisya.” (Isaya 32:3) Mukuya kwaciindi, Jehova wapa malailile alimwi wabagwasya babelesi bakwe bayandisi kusima kumuuya. Imuswaangano wa Cikolo Camulimo Weendelezyegwa a Leza amiswaangano imwi iicitwa mumbungano zya Bakamboni ba Jehova inyika yoonse mbwiizulwa; imiswaangano yacooko, iyamucisi mumona alimwi ayaakati kamasi kubikkilizya akuyiisigwa kwacigaminina nkobayiisigwa “basilutwe” kuti bazibe mbozyeendelezyegwa mbelele icalubomba, zyoonse eezi zyapa kuti kube bunyina bukamantene bwatuulunzuma twabantu nyika yoonse mbwiizulwa. Ikuli koonse nkobajanika beembezi aaba munyika, balilibambilide ikucinca kumakani aakuteelelesya kasimpe ikweelana ambokayaabucinca. Ikwiinda mukubelesya manjezeezya aayisidwe, balilibambilide lyoonse ikuswiilila akutobela.—Intembauzyo 25:10.
11. Ino nkaambo nzi bantu ba Leza ncobakanana calusyomo sunu akunongosola?
11 Mpoonya businsimi bulacenjezya ategwa: “Moyo wamuntu uubinzya makani uyooswiilila luzibo, alulimi lwasicibebe luyoofwamba kwaamba cakuswiililika.” (Isaya 32:4) Kutabi naba omwe uubinda kwaamba kuti eeci cililuzi naa cililubide. Ibbaibbele lyaamba kuti: “Sa ulibwene muntu uufwanzya kwaamba? Mufubafuba ulasyomeka kwiinda nguwe.” (Tusimpi 29:20; Mukambausi 5:2) Abalo bantu ba Jehova bakali kuzitobela njiisyo zyabana Babuloni kautanasika mwaka wa 1919. Pele ikutalika mumwaka ooyo, Jehova wakabasalazila makanze aakwe. Aboobo lino baajana masimpe ngaakaamba, ikutali cakubinda, pele cakukkazika moyo alimwi lino balabandika calusyomo, tabakanani mbuli sicibebe.
“Mufubafuba”
12. Ino mbaani ‘bafubafuba’ sunu, alimwi muunzila nzi mobatali baabi?
12 Ibusinsimi bwa Isaya lino bwagama makani aasiyene ategwa: “Mufubafuba takooyooambwa limbi kuti watembaulika, alakwe sikweena takooyooambwa kuti ngumulemu. Nkaambo mufubafuba ulaamba bufubafuba.” (Isaya 32:5, 6a) Ino nguni “mufubafuba”? Mbuli kuti uyanda kuti akankaizye, Imwami Davida waingula ziindi zyobile ulaamba: “Mufubafuba waamba mumoyo wakwe kuti, Taakwe Leza. Balibolede; milimo yabo ilasesemya. Taakwe uucita kabotu pe.” (Intembauzyo 14:1; 53:1) Ee, aabo bantu batasyomi muli Leza baamba kuti Jehova tako pe. Mbubasyoma abalo “basongo” abaabo ibalilemeka mbuli kuti kunyina Leza, kabayeeya kuti kunyina uukonzya kubapa mulandu pe. Aaba bantu tabakazi pe kasimpe. Tabali bantu baabi. Banyina makani mabotu aaluyando. Mukwiindana abucita Banakristo beni-beni, aaba balo tababindi pe ikugwasya bapengede mane akutabagwasyila limwi.
13, 14. (a) Muunzila nzi mobacita bubi ibasiluleyo basunu? (b) Ino basiluleyo babaima nzi bantu bafwide nzala anyota, pele ncinzi ciyoocitika kumamanino?
13 Ibunji bwabafwubafwuba balibasulide aabo batolaambele kasimpe ka Leza. “Moyo wakwe ulacita bubi, kuti acite masampu, aambe aa-Jehova zyakubeja.” (Isaya 32:6b) Eeci ncecicitika ncobeni kuli basiluleyo basunu! Mumasi aali mbwaabede mu Europe alimwi aku Asia basiluleyo babelekela antoomwe abasikukazya kasimpe bambi ibaamba twaambo twakubeja kubeendelezi ikutegwa mulimo wa Bakamboni ba Jehova ukasyigwe. Batondezya ciimo cakajisi “muzike mubi” walo Jesu ngwaakasinsima kuti: “Kuti oyo muzike mubi ulaamba mumoyo wakwe kuti, Mwami wangu wamuka, nkabela ulasaanguna kuuma bazikenyina akulya akunywa aabo bakolwi, lino mwami wamuzike oyo uzoosika mubuzuba mbwatalangili akuciindi ncatezi, nkabela uzoomugonka akumwaabila mbuli mbubaabilwa basikuupaupa ameso. Oko kuyooba kulila akuluma ntwino.”—Matayo 24:48-51.
14 Pele balo basiluleyo baluujisi ‘kwiima uufwa inzala cilyo akukasya oyo uufwa nyota kunywa.’ (Isaya 32:6c) Aaba basikukazya kasimpe balabaunyina cakulya cakumuuya aabo baciyanda alimwi aabo bafwide nyota yamulumbe wa Bwami tababapi meenda aakatalusya. Pele iciyoocitika wacaambilizya Jehova kwiinda mumusinsimi wakwe umbi ulaamba: “Bayookulwisya, pele tabakooyookuzunda pe, nkaambo ndi ayebo, nzookuvuna, mbwaamba Jehova.”—Jeremiya 1:19; Isaya 54:17.
15. Sunu mbaani ‘basikweena’ alimwi ‘majwi nzi aakubeja’ ngobaamba, alimwi ncinzi catobela?
15 Ikutalilemeka kwayaambele kapati mumasi aa Bunakristo bwanyika, ikutalikila buyo akati kamwaanda wamyaka wa 20. Nkaambo nzi? Ibusinsimi bwakaamba kaambo komwe ategwa: “Sikweena zibelesyo zyakwe nzibi. Ulayeeya makanze mabi kuti anyonyoone babombu myoyo amajwi aakubeja, nekuba kuti mubombumoyo ulaamba makani aaluleme.” (Isaya 32:7) Ikuzuzikizya majwi aayo, ibunji bwabasololi bazikombelo baide kuzumizya koonana kwabantu batanakwatana, ikukkala antoomwe kwabantu batakwetene, ikoonana kwabaalumi naa bamakaintu balo-balo, icakutadooneka oobo ‘mbwaamu amisyobo yoonse yabusofwaazi.’ (Ba-Efeso 5:3) Aboobo, ‘banyonyoona’ butanga bwabo amajwi aabo aakubeja.
16. Ncinzi cipa kuti Banakristo beni-beni bakkomane?
16 Pele cilakkazika moyo kaka ikubona kuzuzikizigwa kwamajwi aamusinsimi aaya aatobela! “Pele mulemu nguuyeeya makanze aalemekeka, nkabela mpoonya awo amakanze aalemekeka mpayooima nji.” (Isaya 32:8) Jesu lwakwe wakakulwaizya bwaabi naakati: “Amupe, anywebo munooyoopegwa. Kuyoopedwa mucamba canu iceelelo cibotu cisindaidwe, cuumidwe-umidwe, cizywide mwa. Nkaambo ceelelo ncomweelela bamwi, anywebo muyooelelwa nciconya.” (Luka 6:38) Awalo mwaapostolo Paulo wakalemba zilongezyo izijanika kuti muntu kali mwaabi ategwa: “Muyeeye ijwi ndyaakaamba Mwami Jesu mwini kuti, Kupa kuli coolwe kwiinda kupegwa.” (Incito 20:35) Ibwaabi mbobukkomanisya Banakristo beni-beni mbubwenya mbuli Leza wabo Jehova, ikutali buvwubi naa mpuwo. (Matayo 5:44, 45) Iciinda kubakkomanisya nkucita kuyanda kwa Leza, ikulyaaba lwabo beni ikutegwa bazibye bamwi “Makani Mabotu aabulemu bwa-Leza uuli acoolwe.”—1 Timoteo 1:11.
17. Mbaani mazuba aano ibali mbuli ‘basimbi baliibide’ mbakaamba Isaya?
17 Ibusinsimi bwa Isaya bulazumanana ategwa: “Inywe nubanakazi baliibide, amubuke, muswiilile ijwi lyangu. Nubasimbi batalipenzyi amumvwe majwi aangu. Wamana mwaka akaindi buyo, muyookankama inywe nubanakazi batalipenzyi, nkaambo misaansa tiikooyootebulwa, tamukooyoojana micelo yabutezi pe. Amuyoowesye nubanakazi baliibide! Amukankame inywe nubatapengede!” (Isaya 32:9-11a) Eeci ciimo cabanakazi aaba cituyeezya baabo mazuba aano ibaamba kuti babelekela Leza, pele batasungweede pe mumulimo wakwe. Ibali boobu bajanika muzikombelo zya “Babuloni Mupati uuzyala basibwaamu.” (Ciyubunuzyo 17:5) Mucikozyanyo, basizikombelo zya Bunakristo bwanyika balikozyene kapati ambwabapandulula Isaya ‘abanakazi’ aaba. Nokuba kuti balizi kuti ciindi calubeta alimwi ciyoosya cilasika lino-lino, balo ‘baliliibide’ kapati.
18. Ino nguni waambilwa kuti ‘asame zisani zyamasaka mucikungu cakwe’ alimwi nkaambo nzi?
18 Aboobo basizikombelo zyakubeja baambilwa kuti: “Amusamunune, mube acinswe. Amusame zisani zyamasaka muzikungu zyanu. Amulyuume azyamba zyanu cakulila myuunda mibotu amasaansa aazyala micelo. Anyika yabantu bangu ayoomena mamvwa amitubetube buyo. Ayoomena atala lyamaanda oonse aakukondwa mumunzi wabusekelezi.” (Isaya 32:11b-13) Kuboneka kuti aaka kaambo kakuti “amusamunune, mube acinswe” takaambi kuti mane basyaale mutuku buyo naa mutundulu. Ikweelana acilengwa cansiku, ibantu bakali kusama cikobela caatala kakuli akwalo kunsi kabasamide cisani cimbi. Ikanji-kanji icaatala cakali cakuti muntu azibwe kuti ngwani naa ngwakuli. (2 Bami 10:22, 23; Ciyubunuzyo 7:13, 14) Aboobo oobu businsimi bulailila basizikombelo zyakubeja kuti basamunune zikobela izyaatala izyalweeno kabati mbabelesi ba Leza akusama zyamasaka zyalo zitondezya kuti bali amalila akaambo kalubeta lwabo ilwaswena. (Ciyubunuzyo 17:16) Akati kazikombelo zya Bunakristo bwanyika zyalo zyaamba kuti bali “mumunzi wabusekelezi,” naa akati kabantu babwami bwanyika yoonse bwabukombi bwakubeja kunyina micelo ya Leza iijanwa pe. Munyika yabo kwamena buyo “mamvwa amitubetube” iyakwiide kusiigwa mbuli nsima yabula balya.
19. Nciimo nzi ncaayubulula Isaya ikujatikizya “Jerusalemu” siluleyo?
19 Aaya makani aamapenzi ajatikizya cisi ca “Jerusalemu” coonse cabasiluleyo: “Iŋanda yabwami iiyoolekwa. Munzi uuli abantu banji uyooba itongo. Cilundu ca-Ofeli aŋanda yakulangilila, zyoonse ziyooba malyango aabanyama mazuba oonse mane kukabe kutamani. Ziyooba butelo bwambongolo zyamusokwe amacelelo aamatanga.” (Isaya 32:14) Awalo Ofeli woonse ulibikkilizidwe. Ofeli uyakidwe abusena busumpukide mu Jerusalemu bwalo bugwasya kusompa basinkondo. Ikwaamba kuti Ofeli uyooba malyango aabanyama caambilizya kuti munzi ooyu uyoonyonyoonwa cakumaninina. Imajwi aa Isaya atondezya kwaamba kuti “Jerusalemu” siluleyo naa Bunakristo bwanyika tabubikkili maanu pe kukucita kuyanda kwa Leza. Tabuzyali pe munzila yakumuuya alimwi kunyina kasimpe abululami mulinguwe, uli buyo mbuli munyama wabutambo.
Ibulemu Bwiindene!
20. Ino muuya wa Leza iwatilwa kubantu bakwe wagwasya buti?
20 Mpoonya lino Isaya waamba bulangizi ibukkazika moyo kujatikizya baabo ibacita kuyanda kwa Jehova. Ikusaala kucitwa kubantu ba Leza kuyoozumanana “mane lumwi tukatililwe Muuya kuzwa kujulu, elyo inkanda iyooba muunda wambolezi, awalo muunda wambolezi uyooyeeyegwa kuti ndusaka.” (Isaya 32:15) Mucoolwe, ikuzwa mumwaka wa 1919, imuuya wa Jehova walikutilwa mubunji kubantu bakwe balo baba mbuli kuti muunda wambolezi wabukulusyigwa iwa Bakamboni bananike mpoonya akusaka liyaabukomena lyambelele zimwi. Imbunga yakwe yaanyika yazwidilila akukomena kapati sunu. Muparadaiso yakumuuya iipilusyidwe, “bulemu bwa-Jehova, bweebesi bwa-Leza wesu” bulabonwa ciindi bantu bakwe nobakambauka kujatikizya Bwami bwakwe ibuboola.—Isaya 35:1, 2.
21. Nkuli nkobujanwa bululami, luumuno akuliiba sunu?
21 Amuswiilile lino icisyomezyo cabulemu ncaamba Jehova: “Lubeta lubotu luyookala munkanda, abululami buyookalilila mumuunda wambolezi. Nkabela milimo yabululami iyooba luumuno, acilenge cabululami ciyooba luumuno alusyomo lutamani.” (Isaya 32:16, 17) Elo capandululwa kaka ciimo cakumuuya cabantu ba Jehova sunu! Ibanakristo balikamantene nyika yoonse mbwiizulwa nokuba kuti “bazwa kuzisi zyoonse akumisyobo yoonse akumikowa yoonse akumyaambo yoonse,” eelyo eeci ciliindene kapati abunji bwabantu balo ibaandeene akaambo kalusulo, kulwana alimwi anzala yakumuuya. Aaba balo balapona akubeleka kweelana abululami bwa Leza, balacita oobo kabasyomede kuti balo bayoolyookezya akuliiba kusikila kukabe kutamani.—Ciyubunuzyo 7:9, 17.
22. Ino ndwaandaano nzi luliko akati kaciimo cabantu ba Leza alimwi abaabo ibali mubukombi bwakubeja?
22 Ibbuku lya Isaya 32:18 lilazuzikizigwa lino muparadaiso yakumuuya. Lyaamba boobu: “Bantu bangu bayookala mucikalilo caluumuno amumaanda aalusyomo amumasena aacilyokezezyo aakuliiba.” Pele Ibanakristo bakubeja, “lusaka niluyootemwa kuyooloka civulamabwe, elyo kufwinsigwa munzi uyoofwinsigwa ncobeni.” (Isaya 32:19) Ee, mbubwenya mbuli civulamabwe caguwo, ilubeta lwa Jehova lugamide kunyonyoona munzi walucengo wabukombi bwakubeja akusampaula “lusaka” lwabasikugwasilizya akubamanizyila limwi!
23. Mulimo nzi uucitwa nyika yoonse uuli afwaafwi kumana, alimwi balangwa buti aabo ibatola lubazu mulinguwo?
23 Cibeela cabusinsimi oobu cimana boobu: “Muli acoolwe inywe numubyala kumbali lyamaanzi oonse akutuma nkuko myeendo yabasune ayambongolo.” (Isaya 32:20) Imusune alimwi ambongolo bakali banyama mbobakali kubelesya bantu ba Leza mumyuunda kuciindi cakulima akusyanga. Sunu ibantu ba Jehova babelesya mincini yakulembya, imaanda alimwi azyakweendela izyasunu alimwi ambunga yeendelezyegwa a Leza ikulemba akumwaya mabbuku aamba makani aamu Bbaibbele. Ibabelesi balyaabide balazibelesya zibelesyo eezi ikusyanga mbuto zyakasimpe ka Bwami nyika yoonse mbwiizulwa elyo basyangila kwini “kumbali lyamaanzi oonse.” Ituulunzuma twabaalumi abanakazi ibamuyoowa Leza batebulwa kale, eelyo aimbi myaanda-myaanda balabasangana. (Ciyubunuzyo 14:15, 16) Aaba boonse baambwa kuti “bali acoolwe”!
Bupanduluzi buyungizidwe
^ munc. 3 Oyo “mwami” iwaambwa kuli Isaya 32:1 kukusaanguna wakali Mwami Hezekiya. Pele ikuzuzikizigwa kwini-kwini kwacaandaano 32 ca Isaya kujatikizya Mwami Kristo Jesu.
^ munc. 8 Amubone Ngazi Yamulindizi ya March 1, 1999 mapeeji 22-27, yakamwayigwa aba Watchtower Bible and Tract Society of New York, Inc.
[Mibuzyo yaciiyo]
[Zifwanikiso izili apeeji 331]
Mumabbuku aaku Dead Sea, ibbuku lya Isaya 32 lyeengedwe “X”
[Zifwanikiso izili apeeji 333]
‘Silutwe’ aumwi uli mbuli macijilo aakulivuna kumuwo, ciyubilo kumvula, maanzi munkanda njumu alimwi aceenzule kuzuba
[Cifwanikiso icili apeeji 338]
Imunakristo ulakondwa nakambauka makani mabotu kuli bambi
