Mutabayoowi pe Bana Asuri
Cibalo 12
Mutabayoowi pe Bana Asuri
1, 2. (a) Ikweelana akulanga kwabuntunsi, nkaambo nzi ncocakalibonya mbuli kuti Jona wakajisi kaambo kabotu ikakamulenzyaanya kuzumina mulimo wakuya kukambaukila bana Asuri? (b) Ino bana Nineve bakacita buti nobakaumvwa mulumbe wa Jona?
AKATI-KATI kamwaanda wamyaka wa 9 B.C.E., imusinsimi muna Hebrayo wazina lya Jona imwana wa Amitai wakanjila mu Nineve imunzi mupati wa Bwami bwa Asuri. Wakajisi mulumbe mupati ngwaakeelede kwaamba. Jehova wakamwaambilide kuti: “Buka, koya ku-Nineve, kumunzi ulya mupati, ukakambauke kulinguwo, nkaambo bubi bwabo bweza kunembo lyangu.”—Jona 1:2, 3.
2 Naakautambula lwakusaanguna mulimo ooyu, Jona wakatijila kulubazu lwaandeene ankwaakatumidwe, wakagama ku Tarisi. Ikweelana akulanga kwabuntunsi, tulakonzya kwaamba kuti kakali kumvwika kaambo kakamulenzyaanya Jona. Ibana Asuri bakali bantu basilunya kapati. Amuswiilile muleli umwi muna Asuri mbwaakabacita basinkondonyina: “Ndakali kukosola zizo zyabasololi . . . Ibanji akati kabaabo ibakajatwa buzike ndakali kubaumpa mumulilo, alimwi ibambi banji ndakali kubatola buzike kabalanga. Bamwi ndakali kubakosola maanza alimwi aminwe, alimwi bamwi ndakali kubakosola mpemo.” Nokuba boobo, Jona naakaamba mulumbe wa Jehova, ibana Nineve bakeempwa zibi zyabo, eelyo Jehova taakaunyonyoona munzi ooyo pe kuciindi eeco.—Jona 3:3-10; Matayo 12:41.
Jehova Wabweza “Nkoli”
3. Ino bana Israyeli baandaana buti abana Nineve kujatikizya mbubaatambula makani aakucenjezya aaletwa kwiinda mubasinsimi ba Jehova?
3 Sena abalo bana Israyeli mbaakakambaukila Jona bakabweza ntaamu? (2 Bami 14:25) Peepe. Bakafwutatila bukombi busalala. Inzya mane bakali “kukomba makamu makamu aakujulu, akumanina Baala milimo.” Kunze lyaboobo, “bana babo balombe abana babo basimbi boonse bakabatuuzya mumulilo wacipaililo, alimwi bakali kusonda akucita bulozi, aboobo bakalyaaba kukucita bubi mumeso aa-Jehova akumukalazya.” (2 Bami 17:16, 17) Ibana Israyeli kwiina nobacinca pe ciindi Jehova naatuma basinsimi kuti babacenjezye mbuli bwakacita bana Nineve. Aboobo Jehova wakanza kubweza ntaamu zimbi.
4, 5. (a) Ino ikwaamba kuti “mu-Asuri” caamba nzi, alimwi Jehova uyoomubelesya buti kali “nkoli”? (b) Ino Samariya wakazundwa lili?
4 Ibulwani bwaceya-ceya kubana Asuri kwaciindi cili mbocibede ikuzwa ciindi Jona naakaswayide ku Nineve. * Nokuba boobo, kumatalikilo aamwaanda wamyaka walusele B.C.E., icisi ca Asuri calitondezya kuti ncecijisi nguzu kapati kumakani aabusinkondo, eelyo Jehova wacibelesya munzila iigambya. Imusinsimi Isaya waamba mulumbe wakucenjezya uuzwa kuli Jehova kubwami bwakunyika ibwa Israyeli ategwa: “Webo mu-Asuri! Nduwe inkoli yabukali bwangu. Musako wamujanza lyako ndolunyemo lwangu. Njoomutuma kukulwisya cisi citalemeka. Njoomulailila mbwaelede kucitila bantu mbundikalalila, kuti asaale lusaalo akunyanzya lunyanzyo akubalyataula mbuli intimba yamumigwagwa.”—Isaya 10:5, 6.
5 Mmasampu kaka aaya kubana Israyeli! Leza wabelesya cisi citakombi nkokuti “mu-Asuri” kuti cibe “inkoli” yakubasubuzya. Mu 742 B.C.E., Imwami wa Asuri Salimaneseri Wasanu walwana Samariya imunzi mupati wacisi ca Israyeli cizangi. Ikuzwa abusena bubotu kapati ibuli amulundu uulampa mamita aali 90, Samariya walicingilila kuli basinkondonyina kwamyaka iitandila kuli yotatwe. Pele kunyina nzila zyabusongo zyabantunsi izikonzya kusinkilila makanze aa Leza. Samariya wakazundwa mu 740 B.C.E., walyataulwa abana Asuri.—2 Bami 18:10.
6. Ino muunzila nzi mu Asuri mwaaciindizya kuyeeya kwiinda nzyamubikkilide Jehova?
6 Ibana Asuri lwabo taakwe nobamuzyi Jehova pe, nokuba kuti wababelesya kuti basubule bantu bakwe. Nkakaambo kaako wazumanana kwaamba kuti: Pele walo [mu-Asuri] tayeeyi obo pe. Moyo wakwe tuukanzi obo. Nkaambo mumoyo wakwe ulayeeya kunyonyoona bantu akumana zisi zinji loko.” (Isaya 10:7) Jehova uyanda kuti mu Asuri abe cibelesyo mujanza lyakwe. Pele walo mu Asuri ulimvwa bumbi. Imoyo wakwe umukulwaizya kujana zintu zipati—ikuzunda nyika yoonse yakaliko kuciindi eeco!
7. (a) Amupandulule ncokaamba kaambo kakuti, “Basilutwe bangu sa tabali bami?” (b) Ncinzi ncobeelede kwiiya aabo ibasiya Jehova sunu?
7 Ibunji bwamasi aatakali aamu Israyeli aakazundwa amu Asuri akali kweendelezyegwa abami kaindi. Lino aaba ibakali bami mumasi aayo beelede kutobela mwami wa Asuri akuba bami basyoonto, kutegwa alidunde kabotu kuti: “Basilutwe bangu sa tabali bami?” (Isaya 10:8) Baleza bakubeja ibamuminzi mipati-pati tiibakabagwasya pe bakombi babo kuti batanyonyoonwi. Baleza ibakombwa abana Samariya mbuli Baala, Moleki alimwi aboombe bangolida kunyina nobayooukwabilila munzi ooyo. Akaambo kakuti cisi ca Samariya cakamusiya Jehova, taceelede kulangila kuti inga ulakonzya kucikwabilila pe. Boonse aabo bamusiya Jehova sunu baleelede kwiiya kumapenzi aakasikila Samariya! Imu Asuri uleelede kulidunda kujatikizya Samariya aminzi iimwi njaazunda kuti: “Sa Kalino tuuli mbuli Karikemesi? Sa Hamati tuuli mbuli Aripadi? Sa Samariya tuuli mbuli Damasko?” (Isaya 10:9) Boonse buyo balikozyene amu Asuri, ncikono cakuti atole.
8, 9. Ino nkaambo nzi mu Asuri ncaaciindizya ciindi naakanza kusaala Jerusalemu?
8 Nokuba boobo, imu Asuri waciindizya kulisumpula. Ulaamba: “Ijanza lyangu lyatana akuzisi zyamituni izyakajisi zikozyano kwiinda Jerusalemu a-Samariya. Lino sa nsikooyoocitila Jerusalemu azikozyano zyawo mbubonya mbuli mbundakacitila Samariya azikozyano zyawo?” (Isaya 10:10, 11) Imami aazundidwe kale amu Asuri akajisi zikozyanyo zinji kwiinda zya Jerusalemu alimwi azya Samariya. Walo ulaamba, ‘Ncinzi cikonzya kundisinkilila kucitila Jerusalemu nzyondakacita kuli Samariya?’
9 Simatunta ooyu! Jehova takamulekeli kuti asaale Jerusalemu. Masimpe kuti Juda tamaninide pe mukugwasyilizya bukombi bwakasimpe. (2 Bami 16:7-9; 2 Makani 28:24) Jehova wamucenjezya kuti, akaambo kakubula lusyomo kwakwe, Juda uyoopenga kapati baakumusaala bana Asuri. Pele Jerusalemu uyoofwutuka. (Isaya 1:7, 8) Hezekiya ngumwami wa Jerusalemu ciindi nobabusya nkondo bana Asuri. Hezekiya tali mbuli wisi Ahazi pe. Kayi mumwenya mumwezi wakusaanguna wabulelo bwakwe Hezekiya wazijalula alimwi zitendele zyatempele akutalisya bukombi busalala!—2 Makani 29:3-5.
10. Ncinzi ncaasyomezya Jehova ikujatikizya mu Asuri?
10 Nkokwaamba kuti ikulwana Jerusalemu nkwakanzide Asuri takuzumizyidwe a Jehova pe. Jehova wasyomezya kucipa mulandu cisi eeco canguzu calo citakwe bulemu: “Lino Mwami naazoomaninina milimo yakwe yoonse mucilundu ca-Ziyoni amu-Jerusalemu, uyoobweedezya moyo uusumpwidwe wamwami wa-Asuri bulumbu bweelede akubonzya bulemu bwakulikankaizya kwameso aakwe.”—Isaya 10:12.
Ikugama ku Juda a Jerusalemu!
11. Ino nkaambo nzi mu Asuri ncayeeya kuti Jerusalemu takakatazyi kuzunda?
11 Nokwakainda myaka iili lusele kuzwa ciindi nobwakazundwa bwami bwakunyika mu 740 B.C.E., imwami mupya wa Asuri wazina lya Sanakeribu wakaunka kuyoolwana Jerusalemu. Munzila yakweema buya, Isaya wapandulula makanze aa Sanakeribu aamatunta aakwe ategwa: “Ndasandula minyinza yamisyobo yabantu, azyalo imbono zyabo ndazisaala. Mbundi singuzu ndafwiinsya abo ibakakede azyuuno zyabwami. Ijanza lyangu lyakajana buvubi bwabantu mbuli citeente camuyuni mbucijanwa. Mbubonya mbuli muntu mbwabunganya mai aasiidwe, mbuboobo mbundakabunganya nyika yoonse. Katakwe naba omwe iwakaputya ibbaba nanka kwaasama amulomo nanka kulila nsiyonsiyo.” (Isaya 10:13, 14) Sanakeribu uyeeya kuti mbwaanga minzi imwi yazundwa kale alimwi awalo Samariya taciko, awalo Jerusalemu taakwe natikatazye pe! Ooyu munzi ulakonzya kulwana cakulisinikizya, pele ibakkala mumo bayoofwambaana kuzundwa kakunyina akulila kuti nsiyo, izibelesyo zyabo ziyoozwisyigwa mbuli mayi aalekwa muyuni muciteente.
12. Ninzila nzi iiluzi Jehova njaatondezya mbuli mbozyeelede kulangwa zintu kujatikizya matunta aacisi ca Asuri?
12 Pele kuli cintu ncalubide Sanakeribu. Icisi ca Samariya cizangi cakaleelede kupegwa cisubulo eeco ncocakapegwa. Nokuba boobo, imunzi wa Jerusalemu bwaba busena ibucitilwa bukombi bwakasimpe alimwi mubweendelezi bwa Mwami Hezekiya. Kufwumbwa ooyo uuyanda kulwana Jerusalemu weelede kuyeeya kuti Jehova nkwali. Kanyemede, Isaya wabuzya kuti: “Ma! Sa kaleba kalakonzya kulikankaizya kuliyooyo uukatebbya. Sa isaha lilalisumpula kuliyooyo uulibelesya? Sa inkoli ilalyuumya oyo uuibwezede? Na musako sa ulabweza muumi uutali cisamu buyo?” (Isaya 10:15) Ibwami bwa Asuri ncibelesyo buyo mumaanza aa Jehova mbubwenya mbuli kaleba naa keembe asaha alimwi ankoli mbozikonzya kubelesyegwa asikugonka masamu, mubezi naa mweembezi. Pele lino inkoli yatalika buti kulisumpula kuli yooyo uuyibelesya?
13. Ino mbaani alimwi ncinzi cibacitikila (a) “baneneede”? (b) ‘mamvwa amitubetube’? (c) “bulemu bwalusaka lwakwe”?
13 Ino ncinzi ciyoocitika kumu Asuri? “Mwami Jehova wamakamu uyootuma bulwazi bwakukotezya baneneede bakwe, alimwi kunsi lyabulemu bwakwe kuyooyaka kuyaka mbuli kuyaka kwamulilo. Mumuni wa-Israyeli uyooba mulilo, alakwe Musalazi wakwe uyooba mabangabanga. Uyooyaka akutenta mamvwa aakwe aamitubetube yakwe mubuzuba bomwe. Uyoomaninina bulemu bwalusaka lwakwe abwamuunda wakwe wambolezi. Mubili amuuya woonse, zyoonse ziyootentwa. Kuyooba mbuli sikuyumuna citondezyo naawizuka. Nkabela misamu iisyeede mulusaka lwakwe iyooba mice buyo; mwana uyookonzya kumana kwiilemba yoonse.” (Isaya 10:16-19) Inzya Jehova uyoofwiinsya “nkoli” yamu Asuri kusika aciimo ceelede! Basikalumamba “baneneede” bamu Asuri, nkokuti basinguzu bayootuminwa ‘bulwazi bukotezya.’ Kwiina nobatikaboneke kuti mbaasinguzu! Mbubwenya mbuli mitubetube minji amamvwa manji, basilumamba bakwe ibeenda amaulu bayooumpwa a Jehova Leza, Imumuni wa Israyeli. Alimwi “bulemu bwalusaka lwakwe,” nkokwaamba kuti beendelezi babasilumamba bakwe bayoomana. Jehova aakumanizya kunyonyoona mu Asuri, kuyoosyaala buyo beendelezi babasikalumamba basyoonto cakuti mwana musyoonto uyookonzya kubabala!—Amubone a Isaya 10:33, 34.
14. Amupandulule mbwaya buswena mu Asuri munyika ya Juda kuzikusika mu 732 B.C.E.
14 Nokuba boobo, bama Juda ibapona mu Jerusalemu mu 732 B.C.E. cilabayumina ikusyoma kuti uyoozundwa mu Asuri. Basilumamba ba Asuri baluujisi kuya kumbele. Amubone mulongo waminzi ya Juda yazundwa kale: “Wasika ku-Aiati . . . Migroni . . . Mikimasi . . . Geba . . . Rama . . . Gibeya wa-Saulo . . . Galimu . . . Laisi . . . Anatotu . . . Madimena . . . Gebimu . . . Nobi.” (Isaya 10:28-32a) * Limwi basikusaala basika ku Lakisi makkilomita aali 50 buyo kuzwa ku Jerusalemu. Muciindi cisyoonto buyo, inkamu mpati yabasikalumamba yabamba zivwuka naa zilabba anze aamalambo aa Jerusalemu. “Ulazungaanya ijanza lyakwe kumwana musimbi wa-Ziyoni, cilundu caku-Jerusalemu.” (Isaya 10:32b) Ino ncinzi cikonzya kusinkilila mu Asuri?
15, 16. (a)Ino nkaambo nzi Hezekiya ncayandika lusyomo luyumu? (b) Nzintu nzi izimupa kusyoma Hezekiya kuti Jehova uyoomugwasya?
15 Imwami Hezekiya walibilika kapati kuŋanda yakwe yabwami mumunzi mupati. Wazapaula zyakusama zyakwe akusama masaka. (Isaya 37:1) Watuma musinsimi Isaya kuti akabuzye Jehova kujatikizya Juda. Ndilyonya, Isaya wapiluka abwiinguzi kuzwa kuli Jehova ategwa: “Utayoowi . . . Nzootabilila munzi uno.” (Isaya 37:6, 35) Pele inkamu yabasikalumamba iili anze aamalambo aa Jerusalemu iluujisi kukonga alimwi ilikanzide kapati.
16 Iciyoogwasya Mwami Hezekiya ikuzwidilila mumapenzi aaya ndusyomo. Ilusyomo ‘nkusinizya kuti zintu nzyotutaboni nkozili ncobeni.’ (Bahibulu 11:1, Ci) Lujatikizya kulanga kwiindilila azintu eezyo zikonzya kubonwa. Pele lusyomo luyeeme aluzibo. Kulalangilwa kuti Hezekiya ulayeeya kuti Jehova wakamwaambila majwi aakkazyika moyo kazitanacitika eezyi aakuti: “Nobantu bangu mukede mu-Ziyoni, mutayoowi mu-Asuri . . . Nkaambo kwasyaala kaindi kaniini loko, elyo bukali bwangu buyoomana, lunyemo lwangu luyooleka. Jehova wamakamu uyoomubusizya mitatula, mbubonya mbwaakacita ciindi eciya ba-Midyani nibakazundwa kundomba ya-Orebi. Musako wakwe uyooba ajulu lyalwizi, uyoousumpula mbubonya mbwaakacitila ba-Egepita.” (Isaya 10:24-26) * Inzya bantu ba Jehova bakajanika kale mumapenzi mapati. Basikale ba Hezekiya bakalibonya kuzyingwa citaambiki ku Lwizi Lusalala ciindi nobakali kutandilwa abana Egepita ibanji kapati. Wisi wansiku, Gideoni bakamuvwulila kapati ba Midyani aba Amaleki ciindi nobakasaala Israyeli. Pele Jehova wakafwutula bantu bakwe ziindi zyoonse eezyo zyobile.—Kulonga 14:7-9, 13, 28; Babetesi 6:33; 7:21, 22.
17. Ino joko lyabana Asuri ‘lyanyonyoonwa’ buti alimwi nkaambo nzi?
17 Sena Jehova ulacita mbuli mbwaakacitide kuziindi eezyo zyamusule? Inzya. Jehova wasyomezya kuti: “Mubuzuba obo mukuli wakwe uyoogwisigwa amakuko aako, alyalo ijoko lyakwe liyoozwa kunsingo yako. Ijoko liyoonyonyooka nkaambo kakunanikwa.” (Isaya 10:27) Ijoko lyabana Asuri liyoozwisyigwa akkuko alimwi ansingo yabantu ba Leza bacizuminano. Ee, ijoko “liyoonyonyooka” alimwi lyanyonyoonwa ncobeni! Mubusiku bomwe buyo, imungelo wa Jehova wajaya bana Asuri basikusaala Jerusalemu ibali 185,000. Bacileka kusaala eelyo bana Asuri kunyina nobalangilwa kupiluka alimwi munyika ya Juda. (2 Bami 19:35, 36) Nkaambo nzi? “Nkaambo kakunanikwa.” Eeci cilakonzya kacaamba kunanikwa ikwakacitwa kuli Hezekiya kuti abe mwami mumulongo wa Davida. Aboobo Jehova wazuzikizya cisyomezyo cakwe cakuti: “Nzootabilila munzi uno akuuvuna nkaambo kangu ndemwini akaambo kamulanda wangu Davida.”—2 Bami 19:34.
18. (a) Sena kuzuzikizyigwa kwabusinsimi bwa Isaya kujatikizya ziindi zimbi? Amupandulule. (b) Nimbunga nzi sunu iikozyenye a Samariya wansiku?
18 Eeci cibalo ca Isaya icibandikwa mucibalo eeci cijatikizya zintu zyakacitika mu Juda imyaka yiinda ku 2,700 musyule. Pele izintu eezyo zilayandika kapati sunu. (Ba-Roma 15:4) Sena eeci caamba kuti inkamu zyabantu baambwa mukuluula ooku, nkokuti bana Samariya abana Jerusalemu kubikkilizya abana Asuri kuli mbobakozyanisyigwa limwi sunu? Inzya. Mbubwenya mbuli Samariya sikukomba mituni, Bunakristo bwanyika sunu bulitaminina kukomba Jehova, pele mbuzangi cini-cini. Mubbuku litegwa An Essay on the Development of Christian Doctrine, umwi mwaalumi wacikombelo caba Katolika wazina lya John Henry Cardinal Newman wakazumina kwaamba kuti, izintu zyali kubelesyegwa a Bunakristo bwanyika kwazyuulu zyamyaka mbuli tununkilizyo, nkandela, meenda aasalala, izisani zyabupaizi alimwi azikozyanyo “zyoonse zyakatalisyigwa abantu batakombi Leza.” Kunyina nakukkomanina pe Jehova ikukomba kwa Bunakristo bwanyika ikwabuhedeni mbubwenya mbwaatakali kukkomanina kukomba mituni kwakali kucita bana Samariya.
19. Ncinzi ncobwali kucenjezyegwa Bunakristo bwanyika, alimwi mbaani bali kucenjezya?
19 Bakamboni ba Jehova bali kucenjezya ibali mu Bunakristo bwanyika kwamyaka iili mbwiibede ikujatikizya mbwatakkomene Jehova. Mucikozyanyo, mu 1955 imakani aabuleya aakajisi mutwe wakuti “Bunakristo bwanyika naa Bunakristo Bwini-Bwini—Ino Nguuli ‘Mumuni Wanyika’ Akati Kazyeezi?” akakananwa nyika yoonse mbwiizulwa. Aaya makani akapandulula kabotu-kabotu mbuli mbobwapambuka Bunakristo bwanyika kunjiisyo amicito ya Bunakristo. Mpoonya imakkopi aamakani aaya akatuminwa kubasololi bazikombelo mumasi manji. Imbunga ya Bunakristo bwanyika yakakilwa ikutobela kucenjezya ooku. Icalo ncakonzya kucita Jehova kulinjiyo nkwiipa buyo cisubulo kwiinda mukubelesya “nkoli.”
20. (a) Ino ncinzi ciyoobelesyegwa kacili mu Asuri wasunu, alimwi ciyoobelesyegwa buti kacili nkoli? (b) Ino Bunakristo bwanyika buyoosubulwa kapati buti?
20 Ino nguni ngwayoobelesya Jehova ikusubula Bunakristo bwanyika buzangi? Bwiinguzi tubujana kubbuku lya Ciyubunuzyo caandaano 17. Kubbuku eeli tujana makani aasibwaamu, “BABULONI MUPATI” walo wiiminina zikombelo zyoonse zyabukombi bwakubeja kubikkilizya a Bunakristo bwanyika. Ooyu sibwaamu ukkede acinyama cisalala pyu calo cijisi mitwe iili ciloba ameja aali kkumi. (Ciyubunuzyo 17:3, 5, 7-12) Cinyama ciiminina mbunga ya United Nations. * Mbubwenya Asuri wansiku mbwaakanyonyoona Samariya, acalo cinyama eeci cisalala pyu ‘ciyoosula mwanakazi sikuvwuula, akumusyaazya alikke, ciyoomusamununa, ciyoolya mubili wakwe akumuumpa amulilo.’ (Ciyubunuzyo 17:16) Aboobo Asuri wasunu (masi oonse aaswaangene a UN) uyoonyonyoona Bunakristo bwanyika akubunyonyweeda limwi.
21, 22. Ino nguni uyookulwaizya cinyama kuti cilwane bantu ba Leza?
21 Sena Bakamboni ba Jehova basyomeka bayoonyonyoonwa antoomwe a Babuloni Mupati? Peepe. Leza tabasulide pe. Ibukombi busalala buyoozwidilila. Nokuba boobo, icinyama iciyoonyonyoona Babuloni mupati cibalanga cabulyatu bantu ba Jehova. Kwiinda mukucita boobu, eeci cinyama citondezya kuti ciyanda kucita kuyanda kwamuntu uumbi ikutali kuyanda kwa Leza pe. Ino nguni ooyo? Ngu Saatani Diabolosi.
22 Jehova wayubununa makanze aa Saatani aamatunta ategwa: “Mubuzuba obo makani ayoobuka mumoyo wako [Saatani], nkabela uyooyeeya miyeeyo mibi, akwaamba kuti, Njiinke . . . nkalwisye bantu batontwede bakede caluumuno, batakwe malambo [aabakwabilila] . . . nkasaale imbono akunyanzya buvubi.” (Ezekiele 38:10-12) Saatani uyooyeeya kuti, ‘Ncobeni sena inga nsebayungi bamasi kuti balwane Bakamboni ba Jehova? Tabakatazyi pe kuzunda, tabakwabilidwe alimwi tabajatikizyigwi pe mutwaambo twacisi. Tabakonzyi kukazya pe. Tacikakatazyi kaka kubazwisya mbubwenya mbuli mayi aabwezyegwa muciteente citakwabilidwe!’
23. Ino nkaambo nzi mu Asuri wasunu ncayookakilwa kucita zintu nzyacitila Bunakristo bwanyika kubantu ba Leza?
23 Pele amucenjele numasi! Amuzyibe kuti kufwumbwa uutigume bantu ba Jehova, kazyi kuti unoolwana a Jehova mwini! Jehova ulabayanda bantu bakwe, alimwi uyoolwanina bantu bakwe mbubwenya mbwaakalwanina Jerusalemu kuciindi ca Hezekiya. Mu Asuri wasunu aakusoleka kunyonyoona babelesi ba Jehova, unoolwana Jehova Leza antoomwe a Mwanaambelele, Jesu Kristo. Eeyo ninkondo njatakonzyi kuzunda mu Asuri pe. Ibbaibbele lyaamba kuti: “Mwanambelele uyoobazunda, nkaambo ngonguwe mwami wabami, ngumweendelezi wabeendelezi.” (Ciyubunuzyo 17:14; amweezyanisye a Matayo 25:40.) Mbubwenya mbuli mu Asuri wansiku, icinyama cisalala pyu ‘ciyoonyonyooka.’ Kwiina nocicinooyoowegwa pe.—Ciyubunuzyo 17:11.
24. (a) Ino Banakristo bakasimpe ncinzi ncobakanzide kucita ikutegwa balibambile zyakumazuba aakumbele? (b) Ino Isaya walanga buti mbobuyooba buumi bwakumbele? (Amubone kabbokesi apeeji 155.)
24 Ibanakristo bakasimpe balakonzya kulanga kumbele kakunyina kuyoowa ikuti naa bazumanana kuyumya cilongwe cabo a Jehova alimwi akuti bacita kuyanda kwakwe kuti cibe cintu cakusaanguna mubuumi bwabo. (Matayo 6:33) Aboobo tabeelede ‘kuyoowa bubi.’ (Intembauzyo 23:4) Kwiinda mukubelesya meso aalusyomo, bayoobona janza lya Jehova kalinyampwidwe mujulu ikutali kuti libasubule pe, pele kuti libakwabilile kuli basinkondo bakwe. Alimwi imatwi aabo ayoomvwa majwi aaya aakulwaizya aakuti: “Mutayoowi.”—Isaya 10:24.
Bupanduluzi buyungizidwe
^ munc. 4 Amubone bbuku lya Insight on the Scriptures, Bbuku 1, apeeji 203.
^ munc. 14 Ikutegwa musalalilwe, makani aali kuli Isaya 10:28-32 apandululwa kusaanguna aayo aali kuli Isaya 10:20-27 kaatana.
^ munc. 16 Ikutegwa mujane mubandi wamakani aali kuli Isaya 10:20-23, amulange mutwe wakuti, “Isaya Walanga Mbobuyooba Buumi Bwakumbele” apeeji 155.
^ munc. 20 Imakani aayungizyidwe kujatikizya mbomukonzya kumuzyiba sibwaamu alimwi acinyama cisalala pyu alajanika kucibalo 34 alimwi a 35 cabbuku lyakuti Revelation—Its Grand Climax At Hand!, lyakamwayigwa a Bakamboni ba Jehova.
[Mibuzyo yaciiyo]
[Kabbokesi/Zifwanikiso izili apeeji 155, 156]
ISAYA WALANGA MBOBUYOOBA BUUMI BWAKUMBELE
Caandaano 10 cabbuku lya Isaya mmubandi uugaminide mbuli Jehova mbwayoobelesya kusaala kwabana Asuri ikucita lubeta lwakwe kuli Israyeli alimwi acisyomezyo cakwe cakukwabilila Jerusalemu. Mbwaanga Isaya 10 tupango 20 kusikila ku 23 tuli akati-kati kabusinsimi oobu, tulakonzya kubonwa kuti ikuzuzikizyigwa kwambubo kuli mumbazu zinji muciindi nciconya. (Amweezyanisye a Isaya 1:7-9.) Nokuba boobo, ikweelana ambotulembedwe tupango ootu, tulakonzya kubona kuti tujatikizya kapati ciindi cakumbele lyalo Jerusalemu awalo nanooyooliingwida milandu yazibi zyabantu bakwe.
Imwami Ahazi wasoleka kujana bukwabilizi kwiinda mukulomba lugwasyo kucisi ca Asuri. Imusinsimi Isaya wasinsima kuti kuciindi cakumbele, basikufwutuka bamuŋanda ya Israyeli kunyina nobayoobweza ntaamu yabufwubafwuba iili boobu alimwi pe. Ibbuku lya Isaya 10:20 lyaamba kuti “bayoosyoma ncobeni Jehova Uusalala wa-Israyeli.” Nokuba boobo, Isaya 10 ikapango ka 21 katondezya kuti mmweelwe musyoonto buyo uuyoocita boobo nokati: “Kulapiluka bamwi basyeede.” Eeci cituyeezya mwana wa Isaya wazina lya Searijasubu walo uuli ncitondezyo mu Israyeli, uuli azina lyaamba kuti, “Uusyeede Uyoopiluka.” (Isaya 7:3) Mucaandaano 10 kapango ka 22, tujana ncenjezyo iijatikizya ‘kumaninizya’ kusinizyidwe kucitwa. Ikumaninizya kuli boobu kunooli kwabululami nkaambo ncisubulo ceelede kubantu bazangi. Aboobo ibantu basyoonto buyo mbabakapiluka kuzwa kunyika yakajisi bantu banji kapati mbuli “musenga wakunkomwe yalwizi.” Ikapango ka 23 kacenjezya kuti ikumaninizya ooku kuyoojatikizya nyika yoonse. Icisi ca Jerusalemu tacikasyaali pe lino.
Ootu tupango tulacipandulula kabotu icakacitika mu 607 B.C.E., ciindi Jehova naakabelesya Bwami bwa Babuloni kuti bube “nkoli” yakwe. Inyika yoonse kubikkilizya a Jerusalemu yakasaalwa. Bama Juda bakatolwa buzike kwamyaka iili 70 ku Babuloni. Nokuba boobo, nozyakainda eezyo ‘bamwi basyeede’ basyoonto buyo bakapiluka akuyootalisya bukombi bwakasimpe mu Jerusalemu.
Ibusinsimi ibuli kuli Isaya 10:20-23 bwakazuzikizyigwa munzila iimbi mumwaanda wamyaka wakusaanguna mbubwenya mbokutondezyedwe ku Ba-Roma 9:27, 28. (Amweezyanisye a Isaya 1:9; Ba-Roma 9:29.) Paulo utupandulwida kuti munzila yakumuuya ‘ibasyeede’ akati kaba Juda bakapiluka kuli Jehova mumwaanda wamyaka wakusaanguna C.E., mbubwenya mbuli mweelwe musyoonto buyo waba Juda basyomeka mbubakazyooba basikutobela Jesu Kristo akutalika kukomba Jehova “mumuuya amubwini.” (Johane 4:24) Mukuya kwaciindi aaba bakazyoosanganwa a Bamasi akubamba cisi cakumuuya, “ba-Israyeli ba-Leza.” (Ba-Galatiya 6:16) Kuciindi eeci imajwi aali kuli Isaya 10:20 akazuzikizyigwa: ‘Kwiina limbi’ nocakamufwutatila Jehova cisi eeci cilyaabide kulinguwe akusyoma bantunsi kuti bacigwasye.
[Cifwanikiso icili apeeji 147]
Sanakeribu wakayeeya kuti ikubunganya masi ncuuba-uba mbuli mbucitakatazyi kubweza mayi muciteente
