“Taakwe Naba Omwe Uukkala mu Ziyoni Uuyooti, ‘Ndaciswa,’”
Cibalo 26
“Taakwe Naba Omwe Uukkala mu Ziyoni Uuyooti, ‘Ndaciswa,’”
1. Ino nkaambo nzi ncaaumbulizya imajwi aali kuli Isaya 33:24?
“KUSIKILA sunu zilenge zyoonse zilatongela akumyongwa antoomwe.” Mbwaakaamba oobo mwaapostolo Paulo. (Ba-Roma 8:22) Nokuba kuti kwaba kusumpuka kapati kumakani aabusilisi, imalwazi alufwu zyazumanana kubapenzya bantu. Taciliboteli kaka cisyomezyo calo icijala cibeela eeci cabusinsimi bwa Isaya! Amweezeezye buyo ciindi eeco ‘nokutakabi naba omwe iwaamba kuti ndaciswa.’ (Isaya 33:24) Ino ndilili nociyoozuzikizigwa cisyomezyo eeci alimwi muunzila nzi?
2, 3. (a) Muunzila nzi mocicisidwe icisi ca Israyeli? (b) Ino Asuri wabeleka buti mbuli “musako” wa Leza wacisubulo?
2 Kuciindi eeci Isaya nalemba makani aaya, ibantu ba Leza bacizuminano balicisidwe munzila yakumuuya. (Isaya 1:5, 6) Babbide buya mululeyo akutalilemeka icakuti bayandika cisubulo kuzwa kuli Jehova Leza. Icisi ca Asuri ngo “musako” ngwayoobelesya Jehova ikubasubula. (Isaya 7:17; 10:5, 15) Ikusaanguna, mumwaka wa 740 B.C.E. ibwami bwamyaambo iili kkumi bwazundwa kubana Asuri. (2 Bami 17:1-18; 18:9-11) Kwiinde buyo myaka misyoonto, Imwami Sanakeribu wa Asuri walwana Bwami bwakumusanza bwa Juda. (2 Bami 18:13; Isaya 36:1) Ikunyonyoonwa kwa Juda kwalibonya mbwayaabuzunda mu Asuri singuzu.
3 Pele walo Asuri waindilizya anguzu nzyapedwe zyakusubula bantu ba Leza, eelyo watalika kulwanina kuti azunde nyika yoonse buya. (Isaya 10:7-11) Sena Jehova uyoomuleka kuti azumanane kupenzya bantu bakwe kakunyina cisubulo? Sena cisi eeci ciyooponesyegwa munzila yakumuuya? Ibwiinguzi bwa Jehova kumibuzyo eeyi tulabubala kuli Isaya caandaano 33.
Ikusaala Sikusaala
4, 5. (a) Ino zintu ziyoomucincila buti Asuri? (b) Ino Isaya wabalombela buti bantu ba Jehova kwiinda mumupailo?
4 Ibusinsimi butalika boobu: “Maawe kulinduwe, webo owakasaala bamwi pele tonasaalidwe omwini, owakacitila bamwi bumpele pele tabana kukucitila bumpele yebo. Wamana kusaala uyoosaalwa omwini, waleka kucita bumpele uyoocitilwa bumpele ayebo.” (Isaya 33:1) Wamugama buya Isaya ikumwaambila Asuri sikusaala. Eeci cisi canguzu caboneka kuti kunyina uukonzya kucizunda ikapati nocaba anguzu kwiinda masi oonse. ‘Casaala calo kacitasaalwi pe,’ cazunda minzi ya Juda mane akubweza lubono muŋanda ya Jehova kaciboneka kuti tacikasubulwi calo pe. (2 Bami 18:14-16; 2 Makani 28:21) Pele lino izintu zilacinca. Isaya wamwaambila caantangalala ategwa “uyoosaalwa.” Bulakulwaizya kaka businsimi oobu kubasyomesi!
5 Ibakombi ba Jehova ibasyomeka bayoosyoma nguwe kuti abagwasye kuciindi eeci ciyoosya. Aboobo Isaya wapaila ategwa: “O Jehova, kotufwida luzyalo, nkaambo twali kululangila. Koba kuboko kwesu zifumo zyoonse alufutuko lwesu kuciindi camapenzi. Lupyopyongano mbulwamvwigwa bamasi bacija. Mbowalibusya bantu bamwaika.” (Isaya 33:2, 3) Lino Isaya walomba Jehova kuti afwutule bantu bakwe mbubwenya mbwakacitide musyule. (Intembauzyo 44:3; 68:1) Aboobo mbwaakaupeda buyo mupailo ooyu Isaya wakatalika akusinsima bwiinguzi bwa Jehova!
6. Ncinzi ciyoocitika kuli Asuri alimwi nkaambo nzi ncoceelela eeco?
6 “Imbono [zyaba Asuri] zilasaalwa mbubasaala bacamusokonya; bantu balasotoka alinzizyo mbuzisotoka zisozi.” (Isaya 33:4) Balicizi kabotu-kabotu bana Juda mbocisaala cisozi. Pele lino mbaasinkondo ba Juda ibayoosaala. Asuri uyoozundwa camasampu, eelyo basikalumamba bakwe bayoocija akusiya lubono lunji ndobayoobweza ibana Juda! Cililuzi ikuti Asuri, walo uujisi mpuwo yakuba silunya kapati, lino asaalwe.—Isaya 37:36.
Asuri Wasunu
7. (a) Ino mbaani sunu ibakozyanisigwa acisi ca Israyeli cicisidwe kumuuya? (b) Nguni uyoobeleka mbuli “musako” wa Jehova walo uyoonyonyoona Bunakristo bwanyika?
7 Ino businsimi bwa Isaya butujatikizya buti sunu? Ikuciswa kwa Israyeli kwakumuuya kulakonzya kukozyanisigwa a Bunakristo bwanyika butasyomeki. Mbubwenya mbwaakabelesya Asuri kuti abe ngo “musako” wakwe Jehova wakusubuzya Israyeli, uyoobelesya “musako” ikusubula Bunakristo bwanyika antoomwe azibeela zimwi zyoonse zyabwami bwanyika bwabukombi bwakubeja, “Babuloni Mupati.” (Isaya 10:5; Ciyubunuzyo 18:2-8) “Imusako” ooyo anooli masi aali mu United Nations, imbunga yaambidwe ku Ciyubunuzyo kuti ncinyama cisalala tyu icijisi mitwe iili musanu aibili alimwi ameja aali kkumi.—Ciyubunuzyo 17:3, 15-17.
8. (a) Ino nguni uukonzyanisigwa a Sanakeribu sunu? (b) Mbaani mbayookulwaizyigwa kulwana Sanakeribu wasunu alimwi ncinzi ciyoocitika?
8 Asuri wasunu aakusaala bwami boonse bwabukombi bwakubeja, uyooboneka mbuli kuti kunyina uukonzya kumulesya pe. Mbwaanga Saatani Diabolosi unoojisi moyo mbuli wa Sanakeribu, uyoosinikizigwa kulwana Banakristo bakasimpe antoomwe ambunga zyabasiluleyo izyeelela cisubulo. Ituulunzuma twabantu ibazwa munyika ya Saatani kubikkilizya a Babuloni Mupati, bayooima kulubazu lwa Bwami bwa Jehova antoomwe abana ba Jehova bakumuuya ibasyeede akati kabananike. Saatani “leza waansi aano” uyoolwana Banakristo bakasimpe akaambo kakuti bayookaka kumukomba. (2 Bakolinti 4:4, Ci; Ezekieli 38:10-16) Nokuba kuti nkondo eeyi inooyoosya kapati, tabakayandiki kuyoowa pe ibantu ba Jehova. (Isaya 10:24, 25) Wabasyomezya Leza kuti walo uyooba ‘lufutuko lwabo kuciindi camapenzi.’ Uyoonjililila akunyonyoona Saatani ankamu yakwe. (Ezekieli 38:18-23) Mbubwenya mbucakabede insiku, aabo ibasoleka kusaala bantu ba Leza mbabayoosaalwa lwabo beni! (Amweezyanisye Tusimpi 13:22b.) Jehova uyoolemekwa abalo basikufwutuka bayoolongezyegwa akaambo kakubelesya ‘busongo aluzibo akulemeka Jehova.’—Amubale Isaya 33:5, 6.
Ncenjezyo Kubantu Batakwe Lusyomo
9. (a) Ino ncinzi ncobayoocita “basilumamba” ‘abatumwa baluumuno’? (b) Ncinzi ncayoocita Asuri ikujatikizya makanze aa Juda aakubamba luumuno?
9 Ino ncinzi ciyoocitikila bana Juda batasyomi? Isaya waamba makani aatakkomanisyi pe ikujatikizya mapenzi aayoobasikila kwiinda muli Asuri. (Amubale lsaya 33:7.) Basikalumamba ba Asuri nobaswenaafwi, “basilumamba” bana Juda boompolola icakulila. “Batumwa baluumuno,” ibatumwa kuyoobandika makani aa aaluumuno abana Asuri ibaweelwa akusampaulwa. Bayoolila kapati akaambo kakukakilwa kubandika. (Amweezyanisye Jeremiya 8:15.) Asuri silunya takoobafwida luse pe. (Amubale Isaya 33:8, 9.) Takazibikkili maano zizuminano nzyaakabamba abana Juda. (2 Bami 18:14-16) Asuri ‘wasampaula minzi’ ya Juda akwiibona kuti ncisesemyo, eelyo kunyina analemeka buumi bwamuntu pe. Eeyi nkondo inooli mbyaabi kapati cakuti inyika ini, iyoolila. Abalo ba Lebano, Saroni, Basani alimwi a Karimeri bayoolila akaambo kakusaalwa.
10. (a) Ino bayookakilwa buti kuzwidilila “basilumamba” ba Bunakristo bwanyika? (b) Ino nguni uyoobagwasya Banakristo bakasimpe kuciindi camapenzi ayoosikila Bunakristo bwanyika?
10 Kakunyina akudooneka, eezi nzyeziyoocitika lino-lino ibamasi baakutalika kulwana bukombi. Ikuyuba naa ikulivwuna kunkondo ili boobu tacikagwasyi pe mbubwenya mbuli kuciindi ca Hezekiya. “Basilumamba” ba Bunakristo bwanyika, basitwaambo twacisi, basimbunga zipa mali abantu buyo bambi basimpuwo kunyina nobayookonzya kubuvwuna pe. ‘Izipangano’ izyakaanzidwe kuti zikwabilile Bunakristo bwanyika zyalo zyakabambwa amasi alimwi ambunga zipa mali tazikabikkilwi maano. (Isaya 28:15-18) Ikusolekesya koonse ikuyoocitwa ikubuvwuna kulunyonyooko oolu kwiinda mukubandika takukazwidilili. Ilubono lwa Bunakristo bwanyika loonse luyoobwezegwa naa kunyonyoonwa aboobo milimo yoonse yabusambazi naa makwebo iyooima. Boonse banoocijisi cilongwe a Bunakristo bwanyika bayooide kwiima buyo alamfwu-lamfwu akweebelela kumwi kabalila lunyonyooko lwakwe. (Ciyubunuzyo 18:9-19) Sena Bunakristo bwakasimpe buyoomanina amwi abwakubeja? Peepe, nkaambo Jehova mwini usyomezya kuti: “Lino Jehova wati, Ndabuka, nkasumpulwe, nkalemekwe.” (Isaya 33:10) Jehova uyoobalwanina basyomeka mbubwenya mbuli Hezekiya akupa kuti bana Asuri batazwidilili.—Intembauzyo 12:5.
11, 12. (a) Ndilili naayoozuzikizigwa imajwi aali kuli Isaya 33:11-14 alimwi muunzila nzi? (b) Ino majwi aa Jehova atucenjezya nzi sunu?
11 Ibantu batakwe lusyomo tabakagwasyigwi pe alukwabililo oolu. Jehova ulaamba: “Muyoominta buungu, muyoozyala zisikosiko buyo. Luyooyo lwanu luyooba mulilo wakumutenta. Bantu bayooba mbuli kutentwa kwamulambo, mbuli mamvwa aagonkedwe aatentwa mumulilo. Inywe nemuli kule, amuswiilile ncindacita. Anywebo nemuli kufwaafwi, amuzibe inguzu zyangu mbuzibede. Basizibi bamu-Zioni balayoowa, basimasampu bajatwa kukankama. Nguni akati kesu uuti kale amulilo uutentesya? Nguni akati kesu uuti kale akutentwa kutamani?” (Isaya 33:11-14) Cakutadooneka aaya majwi ajatikizya Juda ikapati ciindi naakaba asinkondonyina mupya, Babuloni. Naakafwa Hezekiya, iba Juda bakapilukila kunzila zyabo zibyaabi. Imakumi aamyaka misyoonto yainda, ibukkale bwa Juda bwanyongana kapati cakuti mane cisi coonse ceelela buyo mulilo wabukali bwa Leza.—Deuteronomo 32:22.
12 Imakanze mabyaabi aakatalikwa abantu batamvwi ikutegwa lubeta lwa Leza lutabasikili, taagwasyi pe, ngabuyo. Iciimo cakulisumpula cacisi alimwi abuzangi nzeziyooletelezya lunyonyooko. (Jeremiya 52:3-11) Basizibi bayoonyonyoonwa cakumaninina, mbuli “kutentwa kwamulambo.” Ibazangi aaba bana Juda bayoowa kapati mbobayaabuyeeya mapenzi ayoobasikila. Imajwi ngaakaambila Juda uutasyomeki Jehova atondezya ciimo cabantu ba Bunakristo bwanyika sunu. Ikuti kabatatobeli ncenjezyo ya Leza, mapenzi alabalindila.
‘Ikweenda Mubululami’
13. Ncisyomezyo nzi ncasyomezyedwe ooyo ‘uuenda mubululami’ alimwi cakazuzikizigwa buti eeco?
13 Pele lino Jehova waamba boobu: “Oyo uuenda mubululami, uuamba zintu ziluleme, uusampaula impindu iizwa kukupenzya bantu, uukaka kutambula masinkamulomo, uusinka matwi aakwe kuti atamvwi makani aabulowa, akufwinya meso aakwe kuti atalangi bubi, ngonguwe uuti kale kujulu. Macijilo aakwe ayooba mampangala aasyomeka aamumandomba. Cilyo cakwe uyoocipegwa, amaanzi aakwe akunywa taakooyoobulika.” (Isaya 33:15, 16) Mbubwenya mbwaakazyooamba mwaapostolo Petro kumbele ategwa, “Jehova ulizi kuvuna bamukomba kumasukusyo, akuyobola bataluleme mulukomo mane kusikila kubuzuba bwalubeta.” (2 Petro 2:9) Jeremiya wakafwutulwa mbubwenya oobu. Kuciindi cakusaala kwabana Babuloni, ibantu bakali kulya “insima cakupimapima bulemu, acakukankama.” (Ezekieli 4:16) Mane bamwi bamakaintu bakali kulya bana babo bakulizyalila. (Malilo 2:20) Pele Jehova wakamukwabilila Jeremiya.
14. Ino muunzila nzi Banakristo mobakonzya kuzumanana ‘kweenda mubululami’?
14 Abalo Banakristo sunu beelede ‘kweenda mubululami’ kabatobela zyeelelo zya Jehova ciindi coonse. (Intembauzyo 15:1-5) Baleelede ‘kwaamba ziluleme’ akutaamba zyakubeja. (Tusimpi 3:32) Ibumpelenge amakulo zilakonzya kazidumide kapati mumasi manji-manji, pele zilasesemya eezi kumuntu ‘weenda mubululami.’ Alimwi Ibanakristo beelede kuzumanana kuba ‘amanjezeezya mabotu’ ciindi nobajatikizigwa mumakwebo, kabasungweede kuti batanjili muzintu zyabumpelenge. (Ba-Hebrayo 13:18; 1 Timoteo 6:9, 10) Alimwi ooyo “uusinka matwi aakwe kuti atamvwi makani aabulowa akufwinya meso aakwe kuti atalangi bubi” unoosala nyimbo nzyaswiilila alimwi akulikondelezya. (Intembauzyo 119:37) Jehova uyoobakwabilila alimwi akubagwasya ibakombi bakwe aabo ibatobela njiisyo zili boobu mubuzuba bwakwe bwalubeta.—Zephaniya 2:3.
Ikubona Mwami Wabo
15. Ncisyomezyo nzi iciyoobakulwaizya bama Juda basyomeka ibali mubuzike?
15 Mpoonya lino Isaya waamba kujatikizya makani aakumbele aakondelezya ategwa: “Meso aako ayoobona mwami mubweebesi bwakwe, ayoobona cisi cakwe citandabede kule. Moyo wako nuuyeeya bantu ibakayoosya, uyoolibuzya kuti, Ino uli kuli mabbalani? Uli kuli oyo iwakali kupimya mali aamutelo? Uli kuli oyo iwakali kubala maanda malamfu? Tokooyoobona limbi bantu bakali, bantu abo baamba mwaambo muyumu ngotamvwi, mulaka mweenzu ngotakonzyi kuswiililisya.” (Isaya 33:17-19) Nokuba kuti Bwami babubonena alaale bama Juda basyomeka, icisyomezyo ca Mwami Mesiya antoomwe a Bwami bwakwe zilabagwasya kapati mumakumi aamyaka njobakkede mubuzike mu Babuloni. (Ba-Hebrayo 11:13) Bwaakutalika kweendelezya bulelo bwa Mesiya, ibulelo bwa Babuloni bwalunya buyoolubwa. Aabo ibayoofwutuka nkondo yabana Asuri bayoolibuzya ategwa: “Ino bali kuli babelesi bamwami silunya ibakali kututelesya, kutubbadelesya akubweza mbono zyesu?”—Isaya 33:18, Moffatt.
16. Ino bantu ba Leza bakatalika lili ‘kumubona’ Mwami Mesiya alimwi ncinzi cacitika?
16 Nokuba kuti aaya majwi aa Isaya asyomezya kupilusigwa ikuzwa kubuzike mu Babuloni, imu Juda aumwi weelede kulindila bubuke ikutegwa akabone kuzuzikizigwa kuzwide ikwacibeela eeci cabusinsimi. Ino mbuti kujatikizya babelesi ba Leza sunu? Ibantu ba Jehova ‘bamubona’ Mwami Mesiya, Jesu Kristo ikuzwa mu 1914 abubotu bwakwe boonse bwakumuuya. (Intembauzyo 45:2; 118:22-26) Aboobo bafwutulwa kuzwa kukudyaamininwa alimwi akubweendelezi bwanyika ya Saatani mbyaabi. Ikwiinda mubweendelezi bwa Zioni, icuuno ca Bwami bwa Leza, balaliiba cini-cini munzila yakumuuya.
17. (a) Ncinzi ncaasyomezyegwa Zioni? (b) Ino izisyomezyo zya Jehova kujatikizya Zioni zyazuzikizigwa buti ku Bwami bwa Mesiya alimwi akuli baabo ibali kulubazu lwambubo ibali anyika?
17 Isaya wazumanana ulaamba: “Pe! Langa Zioni munzi wamapopwe esu. Meso aako ayoobona Jerusalemu, cikalilo cakuliiba, itente litatuntuliki litanonkwedwa abuniini manembe aalyo, azyalo intambo zyalyo tazinunsuki. Nkaambo oko Jehova Mulemu uyootubeda mucibaka camilonga iikwazeme atulongalonga. Oko takukooyooinda bwaato bukwasulwa ankasi niciba cikwepe cilemu.” (Isaya 33:20, 21) Isaya utusyomezya kwaamba kuti Ibwami bwa Leza ibwa Mesiya tabukonzyi kuzyulwa naa kunyonyoonwa. Kunze lyaboobo, ibukwabilizi buli boobu bujatikizya buyo baabo ibasyomeka ibali kulubazu lwa Bwami anyika sunu. Ibalelwa ba Bwami bwa Leza balasyomezyegwa kwaamba kuti kunyina cintu niciba comwe iciyookonzya kubanyonyoona boonse mbwiili nkamu nokuba kuti umwi aumwi ulasukusyigwa kapati. (Isaya 54:17) Jehova uyookwabilila bantu bakwe mbubwenya mbuli kalonga mbukakwabilila munzi. Kufwumbwa sinkondo uyoobalwana—nozivwula buti nguzu nzyajisi abe mbuli “bwato bukwasulwa ankasi” naa “cikwepe cilemu”—uyoonyonyoonwa!
18. Mmukuli nzi ngwazuminide kuyumuna Jehova?
18 Ino ono nkaambo nzi ncobakonzya kuba alusyomo lunji boobo basikuyanda Bwami bwa Leza ikujatikizya lukwabililo lwa Leza? Isaya wapandulula ulaamba: “Jehova ngumubetesi wesu, Jehova ngusimilao wesu, Jehova ngumwami wesu, ngonguwe uuti katufutule.” (Isaya 33:22) Jehova uluuzuminide mukuli wakubakwabilila alimwi akubeendelezya ibantu bakwe balo ibazumina kuti ngo Mweendelezi Mupatikampatila. Aaba balabutobela bweendelezi bwakwe kwiinda mu Mwami Mesiya kabazi kwaamba kuti Jehova ulijisi nguzu zyakubamba milawo akwiibelesya. Nokuba boobo, mbwaanga Jehova ulabuyanda bululami, ibweendelezi bwakwe kwiinda mu Mwanaakwe tabubaminyi pe bakombi bakwe. Pele ‘mbabagwasigwa’ beni nobatobela bweendelezi bwakwe. (Isaya 48:17) Kunyina nayoobasiya bantu bakwe basyomeka.—Intembauzyo 37:28.
19. Ino basinkondonyina abantu ba Jehova ibasyomeka wabapandulula buti Isaya ikutondezya kuti kunyina ncobayoocita?
19 Isaya waambila basinkondonyina abantu bakwe ategwa: “Intambo zyatebununwa; teebakakonzya kuyumya munsemu wabwaato, teebakakonzya kuyanika zisani zyakweenzya. Elyo imbono zinji loko zyakaabwa, abalo balema bakasaala imbono.” (Isaya 33:23) Sinkondo uuli woonse uuyoosola kubalwana taakwe ncayoocita pe alimwi takakonzyi kwiima pe kuli Jehova mbubwenya mbuli bwaato bujisi ntambo yatebununwa, imusemu muteteete alimwi kakunyina azisani zyakweenzya. Ikunyonyoonwa kwabasinkondonyina Leza kuyooleta lubono lunji kapati cakuti nobaba balema bayakutola lubazu abalo mukusaala. Aboobo tulakonzya kusyoma kwaamba kuti Jehova uyoobazunda basinkondonyina ‘mumapenzi mapati’ aaboola ikwiinda mu Mwami Jesu Kristo.—Ciyubunuzyo 7:14.
Ikuponesyegwa
20. Nkuponesyegwa kwamusyobo nzi ikuyoocitikila bantu ba Leza alimwi ndilili nokuyoocitika?
20 Eeci cibeela cabusinsimi bwa Isaya cijisi cisyomezyo cikkazika moyo kumamanino cilaamba: “Taakwe naba omwe uukkala mu Ziyoni Uuyooti, ‘Ndaciswa.’ Zinyonyoono zyabaabo bakkala kooko ziyoolekelelwa.” (Izaya 33:24, BT) Ikuciswa nkwaamba Isaya awa ikapati nkwakumuuya nkaambo kuliswaangene acibi naa “milandu.” Ikusaanguna aaya majwi ajatikizya cisyomezyo ncaakasyomezya Jehova kuti baakuzwa mubuzike ku Babuloni, icisi ciyooponesyegwa munzila yakumuuya. (Isaya 35:5, 6; Jeremiya 33:6; amweezyanisye Intembauzyo 103:1-5.) Akaambo kakuti banoolekeledwe zibi zyabo zyamusyule, bana Juda basikupiluka bayootalisya bukombi busalala alimwi mu Jerusalemu.
21. Muunzila nzi mobaponesyegwa bantu ba Jehova sunu kumuuya?
21 Nokuba boobo, ibusinsimi bwa Isaya bulazuzikizigwa akuciindi cesu cino. Ibantu ba Jehova sunu abalo balikkomene akuponesyegwa nkobaponesyedwe kumuuya. Balaangulukide kunjiisyo zyakubeja mbuli yakutafwa kwabuumi, kusyoma muli Leza wa Butatu alimwi ayakupya mulilo uutamani. Balalaililwa kumakani aakulilemeka kabotu calo icibagwasya kutajanika mumilimo iitali kabotu alimwi balagwasigwa akusala kabotu zyakucita. Alimwi akaambo kacituuzyo cacinunuzyo ca Jesu Kristo, balasalala mumeso aa Leza alimwi balijisi manjezeezya aasalala. (Ba-Kolose 1:13, 14; 1 Petro 2:24; 1 Johane 4:10) Ooku kuponesyegwa kwakumuuya kulagwasya amunzila yakumubili. Mucikozyanyo, ikutatola lubazu mubwaamu alimwi akutafweba tombwe kulakonzya kukwabilila Banakristo kumalwazi aayambukila kwiinda mukoonana amisyobo iimwi ya kkansa.—1 Ba-Korinto 6:18; 2 Ba-Korinto 7:1.
22, 23. (a) Ino nkuzuzikizigwa kuli buti kupati ikwabbuku lya Isaya 33:24 ikuyoocitika kumbele? (b) Mmakanze nzi ngobajisi ibakombi bakasimpe sunu?
22 Kunze lyaboobo, kuyooba kuzuzikizigwa kupati kwamajwi aali kuli Isaya 33:24 yaakwiinda Harmagedoni, nkokuti munyika ya Leza mpya. Mubweendelezi bwa Bwami bwa Mesiya ibantu bayooponesyegwa kumubili alimwi akumuuya. (Ciyubunuzyo 21:3, 4) Yaakumana buyo kunyonyoonwa nyika ya Saatani, imaleele mbuli ngaakacita Jesu naakali anyika yaansi ayoocitwa nyika yoonse mbwiizulwa. Iboofwu bayoobononona, basinkematwi bayoomvwa, ibalema bayooenda! (Isaya 35:5, 6) Eeci ciyoobapa coolwe basikufwutuka mapenzi mapati boonse kuti bakatole lubazu mumulimo mupati wakucinculula nyika eeyi kuti ibe paradaiso.
23 Mpoonya ibubuke bwaakutalika, aabo bayoobusigwa banoojisi buumi bubotu kapati. Pele bwaakubelesyegwa boonse bulemu bwacinunuzyo, ikuponesyegwa kuyoozumana mane lumwi bantu bakalondoke. Mpoonya ibaluleme ‘bayoobusyigwa’ ncobeni. (Ciyubunuzyo 20:5, 6) Kuciindi eeco, “Taakwe naba omwe Uuyooti, ‘Ndaciswa’” kumuuya alimwi akumubili. Taciliboteli cisyomezyo eeco! Bakombi bakasimpe boonse bakulwaizyigwa kuba amakanze akuyoojanika akati kabaabo ibayoobona kuzuzikizigwa kwancico!
[Mibuzyo yaciiyo]
[Cifwanikiso icili apeeji 344]
Isaya wakomba calusyomo kuli Jehova
[Zifwanikiso izili apeeji 353]
Ibantu ba Jehova bajisi ciimo cibotu kumeso akwe akaambo kacituuzyo cacinunuzyo
[Cifwanikiso icili apeeji 354]
Kuyooba kuponesyegwa kwakumubili munyika mpya
