1, 2. (a) Ncikozyanyo nzi Jesu ncaakapa kutondezya kutasyomeka kwabasololi babukombi bwama Juda? (b) Ino ncinzi ncotunga twaiya icijatikizya bakubusi mucikozyanyo ca Jesu?

KAKUSYEEDE mazuba masyoonto kuti afwe, Jesu wakabuzya mbunga yabasololi babukombi bwama Juda mubuzyo uupa kuyeeya cakuzinzibala. Wakati: “Muyeeyanzi? Muntu umwi kajisi bana bobile, nkabela wakeza kumutaanzi, wakati, Mwanaangu, koya ukabeleke sunu mumuunda wangu. Walo wakavuwa, wakati, Nsiyandi pe, nekubaboobo musule wakeempwa, wakaya. Alimwi wakeza kuliwabili, wakaamba  mbubonya. Walo wakavuwa kuti, Ndainka, taata. Nekubaboobo teewakaya pe. Ino nguli akati kabaabo bobile wakacita luyando lwawisi? Bakati, Mutaanzi.”—Matayo 21:28-31.

² Aawa Jesu wakali kutondezya kutasyomeka kwabasololi bama Juda. Bakali mbuli mwana wabili, nkaambo nokuba kuti bakasyomezya kucita luyando lwa Leza teebakazuzikizya cisyomezyo cabo pe. Pele bazyali banji balabona kuti cikozyanyo ca Jesu cakajisilidi aakuteelela kabotu bukkale bwamumukwasyi. Mbuli mbwaakatondezya, cilakatazya kanjikanji kuziba ncobayeeya bana baniini naa kubona ncobayanda kucita. Mwana ulakonzya kuleta mapenzi manji mubukubusi pele aakomena waba muntu ulaa maanu, uulilemeka. Eci ncintu ncotweelede kuyeeya ciindi twabandika makani aakuzanga kwabakubusi.

3. Ino nkaambo nzi bazyali ncobatayelede kubinda kumupa zina lyabuzangi mwana wabo?

³ Cimwi ciindi, mulakonzya kumvwa zyabakubusi banga wazangila limwi kubazyali bakwe. Ambweni nywebo lwenu kuli mukwasyi ngomuzi imuli mpengele yamukubusi. Pele tacili cintu cuubauba lyoonse kuziba naa mwana muzangi wini-wini. Kunze kwaboobo inga cakatazya kuteelela kaambo bana bamwi ncobazanga kakuli bamwi pe—nobaba baabo bakkala ŋanda yomwe. Kuti bazyali babona kuti umwi wabana babo ulangilwa kuba muzangi wini-wini, ino beelede kucita nzi? Kwiingula mubuzyo oyo, tulasaanguna kubandika tuzibe naa muzangi muntu uuli buti.

4-6. (a) Ino muzangi muntu wamusyobo nzi? (b) Ino ncinzi bazyali ncobeelede kuyeeya kuti naa mwana wabo mukubusi katamvwi cimwi ciindi?

⁴ Kucuubya-ubya twaamba kuti muzangi muntu  uukaka kuteelela naa uukazya bulelo acaali. Aino ‘ibufubafuba buli mumoyo wamwana.’ (Tusimpi 22:15) Aboobo bana boonse kuli ciindi nobakazya bulelo bwabazyali naa bumbi bulelo. Eci cilacitika kapati muciindi cabukubusi, ciindi nobalimukukomena bana muciimo amumizeezo. Ikucinca kwabuumi bwamuntu woonse kulaletelezya akupenga kwamoyo, alimwi ibukubusi nciindi cakucinca kapati. Mwana wanu mukubusi, imusankwa naa musimbi uyabukomena uli mumugwagwa wakuba mwaalumi naa mwanakazi. Nkakaambo kaako cilakatazya kubazyali bamwi kweendelana abana babo mumyaka yabukubusi yabana. Kanjikanji bazyali balasola kucelesya kukomena oku, kakuli balo bana bayanda kukubinzyaanya.

⁵ Mukubusi muzangi ufwutatila malailile aabazyali. Pele kamuyeeya kuti kutamvwa buyo kwaciindi ciindi takupi kuti muntu abe muzangi pe. Alimwi caboola kumakani aazyakumuuya bamwi bana balakonzya kutabikkila maanu mukasimpe kamu Bbaibbele kumatalikilo, pele tacaambi kuti mbazangi pe. Nobazyali mutafwambaani kumupa zina lyabuzangi mwana wanu.

⁶ Sena myaka yabana boonse yabukubusi njabuzangi kubulelo bwabazyali? Peepe. Kuli citondezyo cakuti bakubusi bazanga bwini mbasyoonto buyo. Pele ino kuti mwana katamvwi, kazanga lyoonse? Ino buzangi obu bubooola buti?

7. Ino mwana inga woongelezegwa buti abukkale bwabuna Saatani kuti azange?

⁷ Cintu cipati cileta buzangi muuya wanyika yabuna Saatani. “Bantunsi boonse mba Mubi.” (1 Joni 5:19, Ci) Inyika iili mumaanza aa Saatani yabaa ciyanza  caluciso icibi, Banakristo ncobalimukulwana aaco. (Johane 17:15) Kanjikanji ciyanza eci cilinyongene, cilayoosya kapati alimwi cilijisi muuya mubi uuyambukila kapati sunu kwiinda kaindi. (2 Timoteo 3:1-5, 13) Kuti bazyali batabayiisya bana babo, batabacenjezya, akubakwabilila, balakonzya kuzundwa “[a]muuya uubeleka sunu mumyoyo yabana bakasampusampu.” (Ba-Efeso 2:2) Cintu cili mbuli ceeci nkuyungana kwamisela. Ibbaibbele lyaamba kuti: “Muzwalani wabafubafuba ulabisizigwa.” (Tusimpi 13:20) Awalo muntu uuyanzana abaabo bajisi muuya wanyika eyi ulalangilwa kuyambukilwa amuuya ooyo. Ibana bayandika lugwasyo lyoonse kutegwa bateelele kuti kutobela njiisyo zya Leza nintalisyo yabuumi bubotu.—Isaya 48:17, 18.

8. Ino nzintu nzi zinga zyapa kuti mwana azange?

⁸ Acimbi cintu cikonzya kuleta buzangi mmuuya uujanika muŋanda. Mucikozyanyo kuti naa muzyali umwi muŋanda mmudakwi, ufweba lubanje, naa ulalwana amukaakwe, ulakonzya kunyonyonganya ciimo camwana mukubusi. Nomuba mumaanda mukkedwe kabotu buzangi bulakonzya kubuka kuti mwana walimvwa kuti bazyali bakwe tabamubikkili maanu. Nokuba boobo buzangi bwabakubusi tabuletwi aanzintu zyaanze lyoonse pe. Bamwi bana bafwutatila malailile aabazyali nokuba kuti bajisi bazyali batobela njiisyo zya Leza alimwi ibasola kubakwabilila kunyika mobakkede. Ino nkaambo nzi? Ambweni nkaambo kapenzi limbi lipati—kutalondoka kwabuntunsi. Paulo wakati: “Mbuboobo cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti babisya.” (Ba-Roma 5:12) Adamu wali muntu muzangi uuliyanda, alimwi boonse bana bakwe wakabasiila  nzila mbyaabi. Bamwi bakubusi basala kuzanga mbweena mbuli bwakacita wisi wakusaanguna.

9. Ino ninzila nzi ziteelede izyakulela bana izinga zyapa kuti mwana azange?

⁹ Acimbi cintu caleta buzangi bwabakubusi ninzila iteelede bazyali njobalanga mbuli mbokulelwa bana. (Ba-Kolose 3:21) Bazyali bamwi balaindizya kubaangilila alimwi akubalaya bana babo. Bamwi balabalekelezya bana babo bakubusi ibatajisi luzibo, tababapi malailile aanga abakwabilila. Talili lyoonse nocili cuubauba kuziba nzila yeelede iyaakati-kati. Alimwi aumwi mwana uyandika nzila yakwe. Umwi inga wayandika kulangilila kwiinda umwi. Zikozyanyo zya Bbaibbele zyobile zilagwasya kutondezya bubi bwakwiindizya kupa lulayo naa kulekelezya.

10. Nkaambo nzi Eli ncaakali muzyali uutali kabotu nokuba kuti ulangilwa kuti wakali mupaizi uusyomeka?

¹⁰ Mupaizi wansiku wa Israyeli Eli wakali muzyali. Wakabeleka kwamyaka ili 40, aboobo waluuzi kabotu Mulawo wa Leza. Eli ulangilwa kuti wakalikubeleka cakusyomeka mumilimo yakwe yabupaizi alimwi ulakonzya wakali kubayiisya kabotu Mulawo wa Leza bana bakwe, ba Hofeni a Pinehasi. Nokuba boobo Eli wakali kubalendekezya kapati bana bakwe. Hofeni a Pinehasi bakali bapaizi beendelezya bumpiyo-mpiyo bwakukomba, pele bakali “bana-Saatani,” ibakali kuyanda buyo kuzuzikizya zisusi zyabo zyabwaamu. Nokuba boobo ciindi nobakacita zintu zisesemya mubusena busalala, Eli taakajisi nguzu zyakubatanda aamulimo. Wakaide kubatongookela munzila yakutasinizya. Kwiinda mukulendekezya kwakwe, Eli wakapa bulemu kubana bakwe kwiinda Leza. Aboobo bana bakwe bakazangila bukombi bwa Jehova busalala  elyo ŋanda ya Eli yoonse yakaba mumapenzi.—1 Samuele 2:12-17, 22-25, 29; 3:13, 14; 4:11-22.

11. Ino ncinzi bazyali ncobanga bayiya kuzwa kucikozyanyo cibi ca Eli?

¹¹ Bana ba Eli bakali bapati kale zintu ezi nozyakacitika, pele caano eci cakaindi citondezya bubi bwakutapa lulayo. (Amukozyanisye a Tusimpi 29:21.) Bamwi bazyali bayeeya kuti kulekelezya mwana nduyando, elyo balaalilwa kubikka milawo ini-ini akubona kuti yatobelwa. Tabapi lulayo lwaluyando nomuba muziindi njiisyo zya Leza nozyatatobelwa. Akaambo kakubalekelezya boobu bana, balatalika kutateelela bulelo bwabazyali alimwi abwabantu bambi.—Amukozyanisye a Mukambausi 8:11.

12. Ino Roboamu wakalubizya buti mukweendelezya bulelo?

¹² Roboamu ncikozyanyo camuntu wiindilizya kapati mubweendelezi. Wakali ngo mwami weelezya mubwami bwalukamantano bwa Israyeli, pele wakali mwami mubi. Roboamu wakakona cisi cabantu batakakkomene akaambo kamikuli iilema njobakakulikwa awisi Solomoni. Sena Roboamu wakabeengelela? Peepe. Ibantu bakatumidwe nobakamulomba kuti aigwisye imwi milawo miyumu yakali kubalemena, wakakaka kutobela lulayo lwabasinkuta bapati, wakalailila kuti jokwe lyabantu lilemesegwe kapati. Imapuwo akwe akaleta buzangi bwamikowa yakumbo iili kkumi, elyo bwami bwakaandaana muzibeela zyobile.—1 Bami 12:1-21; 2 Makani 10:19.

13. Ino ncinzi cinga cagwasya bazyali kutalubizya mbuli Roboamu?

¹³ Bazyali balakonzya kwiiya ziiyo zipati kumakani aa Roboamu aamu Bbaibbele. ‘Beelede bayandaule Jehova’ mumupailo alimwi bazilangisye nzila zyabo izyakulela bana kuti babone naa zyeendelana buti anjiisyo zya Bbaibbele. (Intembauzyo 105:4) “Kunyanzya kulasondosya musongo,” mbwaamba Mukambausi 7:7.  Malailile aamaanu agwasya bakubusi kuti bakomene kabotu alimwi akubakwabilila kuntenda. Pele bana tabeelede kusinkililwa akufwundilizigwa cakuti tabacikonzyi akulibonena alimwi akulisyoma. Mbasyoonto bakubusi banga bayanda kuzanga kuti naa bazyali bapa lwaanguluko lweelede alimwi amilawo iisinizizye.

14, 15. Ino bazyali beelede kukulanga buti kukomena kwamwana wabo?

¹⁴ Nokuba kuti bazyali balakkomana kuti bana babo batalika kukomena kuzwa kubuvwanda kusikila baba bapati, balakonzya kutakkomana ciindi mukubusi wabo naazwa aciimo cakulangila kulimbabo akusika aciimo cibotu cakulibonena. Ciindi eci mwana nalimukukomena, tamweelede kugambwa kuti zimwi ziindi utondezya kutamvwa naa kutaambilika. Mutalubi kuti mbaakani ya bazyali  Banakristo njakukomezya mwana kuti abe Munakristo ulaa maanu, uusitikide, alimwi uusimide.—Amukozyanisye a 1 Ba-Korinto 13:11; Ba-Efeso 4:13, 14.

¹⁵ Ciyume cibe buti, bazyali beelede kucileka ciyanza cakwiide kukaka kufwumbwa ciindi bana nobalomba kuti bapegwe lumbi lwaanguluko kunze kwaloolo ndobajisi. Mwana weelede kulikomenena kabotu. Masimpe bakubusi bamwi balatalika kubaa maanu aabupati kabacili baniini. Mucikozyanyo, mboobu Bbaibbele mbolyaamba kujatikizya Mwami iwakali mwana muniini Josiya: “Naakacili mwanike [katandila myaka iili 15], wakatalika kuyandaula Leza wa-Davida.” Cakutadooneka, ooyu mukubusi mubotu kapati wakali muntu uulaa maanu.—2 Makani 34:1-3.

16. Ino ncinzi bana ncobeelede kuyeeya mbobayabuyungizigilwa mikuli?

 ¹⁶ Nokuba boobo lwaanguluko lulaletelezya amukuli. Aboobo amumuleke mwana wanu iwakomena kuti abone bubi abubotu bwanzila nzyaasala. Injiisyo yakuti, “kufumbwa ncabyala muntu, ulatebula eco nciconya,” ilabeleka kubakubusi alimwi akubapati. (Ba-Galatiya 6:7) Bana tabakonzyi kukwabililwa lyoonse. Ino ncinzi ncomweelede kucita kuti mwana wanu uyanda kutola ntaamu imwi iitaluzi? Mbomuli bazyali balaa maanu mweelede kwaamba kuti “Peepe.” Nokuba kuti inga mwapandulula cintu eco ncocitayelede kucitwa, taakwe ceelede kumupa kuti mucince, muzumine cintu ncomwakakide. (Amukozyanisye a Matayo 5:37.) Pele amusole kwaamba kuti “Peepe” munzila iili kabotu, nkaambo “kuvuwa kabotu kulalesya bukali.”—Tusimpi 15:1.

17. Ino nzintu nzi ziyandika kumukubusi muzyali nzyayelede kuzuzikizya?

¹⁷ Bana bayandika kukwabilila kwiinda mululayo lyoonse nokuba kuti cimwi ciindi balakonzya kabatakkomani amilawo eyo iibikkidwe. Cilatyompya kuti milawo kiicinca ciindi aciindi ikweelana ambwalimvwide muzyali kwaciindi eco. Kunze lyaboobo kuti bana kabakulwaizigwa alimwi akupegwa lugwasyo luyandika kutegwa bakonzye kuzwidilila mukulwana nsoni amizeezo yakutalisyoma, balalangilwa kukomena akuba bantu basitikide. Bakubusi balakkomana kuti bazyali babo kababasyoma mbweena mbobeelede.—Amukozyanisye a Isaya 35:3, 4; Luka 16:10; 19:17.

18. Nduzibo nzi lwamasimpe lujatikizya bakubusi?

¹⁸ Ibazyali inga bakkomana kuziba kuti bana bakomena kabotu muŋanda imuli luumuno, kusitikila alimwi aluyando. (Ba-Efeso 4:31, 32; Jakobo 3:17, 18)  Bakubusi banji bazwidilila, bakomena baba bantu babotu, nokuba kuti bazwa mumikwasyi iizwide budakwi, bulwani, alimwi amuuya umbi mubi. Nokuba kuti bana banu bakubusi balasinkililwa akupegwa lulayo munzila yeelede yeendelana anjiisyo zya Magwalo—balalangilwa kukomena kuba bantu mbomunookkomene aabalo kuti naa kabaliiba muŋanda alimwi kabazi kuti balayandwa, balafwidwa luse, alimwi balabikkilwa maanu.—Amukozyanisye a Tusimpi 27:11.

19. Nokuba kuti bazyali beelede kuyiisya mwana munzila yeelede, mmukuli nzi ngwajisi mwana?

¹⁹ Buleli bubotu bulakonzya kugwasya. Tusimpi 22:6 yaamba kuti: “Iyisya mwana aende munzila iielede, lino akomena takooyooleya mulinjiyo.” Ino kuti bana atwaambe balaa mapenzi mapati nokuba kuti bajisi bazyali bali kabotu? Sena eco cilakonzeka? Ee. Imajwi aakasimpi ayelede kuteelelwa kweelana atupango tumbi itusinizya kwaamba mukuli ngwajisi mwana “[iwaku]swiilila” akutobela caamba bazyali bakwe. (Tusimpi 1:8) Boonse bazyali abana beelede kubelekela antoomwe mukutobela njiisyo zya Magwalo kutegwa kube luumuno mumukwasyi. Kuti bazyali abana batabelekela antoomwe, kulaba mapenzi.

20. Kuti naa bana balubizya akaambo kakubula maanu, nintaamu nzi yabusongo njobanga batola bazyali?

²⁰ Ino bazyali beelede kucita nzi kuti naa mukubusi walubizya, amane walinjizya mumapenzi? Eco nceciindi mwana nayandika kugwasya kapati. Kuti bazyali kabayeeyede kuti beendelezya mwana mukubusi utajisi luzibo cilabagwasya kubombya moyo. Paulo wakabalaya bantu bakasimide mumbungano: “Kuti muntu wajanwa uli mukubisya, nywebo  nomuli basimuuya muleelede kumuboozya, nkabela nimucita obo muleelede kuba amyoyo iibombede.” (Ba-Galatiya 6:1) Bazyali beelede kutobela nzila njoonya eyi nobagwasya mwana walubizya nkaambo kakubula maanu. Nobapandulula kaambo mwana nkaalubizya alimwi antaamu njayelede kutola kutegwa atakainduluki, bazyali beelede kumuzibya kuti talimubi pe, ncintu ncaacita icibi.—Amukozyanisye a Juda 22, 23.

21. Kuti naa mwana wacita cinyonyoono cipati ncinzi bazyali ncobanga bacita kutobela cikozyanyo cambungano ya Bunakristo?

²¹ Ino kuti mwana wacita cinyonyoono cipati kapati? Weelede lugwasyo lwaalubazu alulayo lwabusongo. Kuti naa umwi mumbungano wacita cinyonyoono cipati, ulakulwaizigwa kweempwa alimwi akuunka kubaalu kuti agwasigwe. (Jakobo 5:14-16) Kuti naa weempwa, baalu balabeleka anguwe kutegwa apiluke munzila yakumuuya. Mumukwasyi bazyali mbobapedwe mukuli wakugwasya mukubusi walubizya, nokuba kuti inga bayandika kwaabandika aayo makani abaalu. Tabeelede pe kusoleka kusisa cinyonyoono cipati icacitwa amwanaabo umwi.

22. Kuti naa mwana wacita cinyonyoono cipati, nciimo nzi bazyali ncobeelede kubaaco kwiiya Jehova?

²² Cilakonzya cabanyonganya kapati bazyali kuti bana babo babaletela penzi lipati. Akaambo kakucisa kwamoyo, bazyali balakonzya bayeeya kumunyemena cabukali mwana utamvwi; pele eci inga caide buyo kumunyemya. Kamuyeeya kuti nzila njomutimweendelezye mwana ciindi eco cikatazya ilakonzya kujatikizya mbwatikabe kumbele aamazuba. Kamuyeeya alimwi kuti Jehova wakalikuyanda kubalekelela bantu bakwe ciindi nobakazanduka kusiya nzila mbotu—kuti nobakali kukonzya kweempwa. Amuteelele  majwi aakwe aaluyando: “Amuboole, tubuzyanye makani, mbwaamba Jehova. Nekuba kuti zibi zyanu zyasalala pyu, ziyootuba buu mbuli lukobo. Nekuba kuti zili mbuli zisani zisalalisya ziyooba mbuli boya bwambelele.” (Isaya 1:18) Cabota cikozyanyo eci kubazyali!

23. Kuti naa mwana wabo umwi wacita cinyonyoono cipati, nintaamu nzi bazyali njobeelede kutola, alimwi ncinzi ncobateelede kucita?

²³ Aboobo amusole kukulwaizya mwana muzangi kuti acince nzila yakwe. Amuyandaule lugwasyo ilulaamaanu kuzwa kubazyali abaalu bajisi luzibo. (Tusimpi 11:14) Mutaintili kwaamba majwi naa kubweza ntaamu inga yapa kuti cimuyumine mwana kupiluka kulindinywe. Mutanyemi cakuti mwaalilwa akulyeendelezya. (Ba-Kolose 3:8) Mutafwambaani kutyompwa. (1 Ba-Korinto 13:4, 7) Nokuba kuti mweelede kusula cibi, tamweelede kucibikkilila kumoyo cibi ncaacita mwana cakuti lyoonse kamutongooka. Cintu cipati kapati ncobanga bacita bazyali nkusola canguzu kupa cikozyanyo cibotu alimwi akuyaa mbele mulusyomo lwabo muli Leza.

24. Ino nciimo nzi ceetezya cimwi ciindi cinga caba mumukwasyi wa Bunakristo, alimwi muzyali inga wacita buti?

²⁴ Cimwi ciindi inga calibonya kuti mukubusi wasala nzila yabuzangi, bukkale bwa Bunakristo wabukakila limwi. Aboobo kulayandika kunyona akutalika kubikka kapati maanu kukugwasya kuyaka buumi bwabana bacaala. Amucenjele, mutasowi ciindi canu coonse kusoleka kugwasya muntu omwe wazanga akuluba kugwasya bana bamwi. Muciindi cakusola kusisa penzi kubanamukwasyi bacaala, amulibandike ambabo munzila yeelede alimwi yakusyomezya.—Amukozyanisye a Tusimpi 20:18.

25. (a) Ino ncinzi bazyali ncobeelede kucita kweelana acikozyanyo cambungano ya Bunakristo kuti naa mwana wasala kuba muzangi? (b) Ino ncinzi bazyali ncobeelede kuyeeya kuti naa umwi mwana wabo wazanga?

 ²⁵ Mboobu mwaapostolo Johane mbwaakaamba kujatikizya muntu waba muzangi uutacinyoneki mumbungano: “Mutamutambuli muŋanda yanu, mutamujuzyi.” (2 Johane 10) Bazyali balakonzya kubweza ntaamo eyo kumwanaabo wazangila limwi kufwumbwa kuti kali wasika aciimo ceelede mumulawo. Ciyume cibe buti ntaamu eyo ilakonzya yayandika kukwabilila baabo bacaala mumukwasyi. Mukwasyi wanu uyandika kukwabilila akulangilila lyoonse. Aboobo amuzumanane kubikka milawo yabukkale iilibonya alimwi yamaanu. Amubandike abana bamwi. Amubikkile maanu kumilimo yabo yakucikolo amumbungano. Alimwi amubazibye kuti nokuba kuti tamwiiyandi micito yamwana wazanga, tamumusulide pe. Amukake cintu cibi muciindi camwana. Ciindi bana ba Jakobo bobile nobakaleta malweza mumukwasyi akaambo kamucito wabo walunya, Jakobo wakasinganya bukali bwabo kutali bana lwabo pe.—Matalikilo 34:1-31; 49:5-7.

26. Ino ncinzi cinga cabakulwaizya bazyali basinizizye kuti naa mwana wabo umwi wazanga?

²⁶ Ambweni inga mwayeeya kuti ndinywe mwaleta mapenzi aayo mumukwasyi. Pele kuti kamuli mwakasola mbuli mbomukonzya alimwi mwalikupaila akutobela lulayo lwa Jehova, tamweelede kulipa mulandu aatakwe akaambo pe. Amukkomane kuziba kuti taakwe muzyali uulondokede pe, pesi nywebo mwakasola kapati kuba muzyali mubotu. (Amukozyanisye a Incito 20:26.) Ikubaa muzangi wini-wini mumukwasyi cileetezya, elyo kuti cacitika kulindinywe amusyome kuti Leza ulateelela alimwi takabalekelezyi  babelesi bakwe bamubelekela amoyo woonse. (Intembauzyo 27:10) Aboobo amufwundumane kubelekela ŋanda yanu kuti ube munzi lyoonse walukwabililo, wakumuuya kubana boonse basyeede.

27. Ikuyeeya cikozyanyo camwana mutaka, ncinzi bazyali bamwana wazanga ncobakonzya kulangila?

²⁷ Kunze lyaboobo mutatyompwi pe. Lwiiyo lwakusaanguna lweelede ndomwakasola kumupa inga waluyeeya kumbele aamazuba. (Mukambausi 11:6) Mikwasyi ya Bunakristo minji yakajisi penzi ndyoonya ndyomujisi, pele bana bakazandukide mumikwasyi imwi bakapiluka kubazyali babo mbuli cakacitika kuli wisi wamucikozyanyo ca Jesu camwana mutaka. (Luka 15:11-32) Eci cilakonzya kucitika akulindinywe.