Aabe Makanze Enu Ikubelekela Leza Kukabe Kutamani
Cibalo 18
Aabe Makanze Enu Ikubelekela Leza Kukabe Kutamani
1, 2. Ncinzi ciyandika kunze lyakubaa luzibo lwa Leza?
AMWEEZEEZYE kuti muliimvwi amulyango uukkiidwe uuya mukaanda kajisi lubono lunji. Atwaambe muntu uulaa nguzu zyakumupa kkii wacita oobo amane wamwaambila kuti mulibwezele zintu zyomuyanda. Ooyo kkii takoomugwasya pe ccita kuti mwamubelesya. Mbubwena buyo, luzibo mweelede kulubelesya kutegwa lumugwasye nywebo.
2 Eeci cili masimpe ikapati kujatikizya luzibo lwa Leza. Ncobeni, luzibo lwini-lwini lwa Jehova Leza a Jesu Kristo mbubuumi butamani. (Johane 17:3) Nokuba boobo oobo bulangizi tabukonzi kuzuzikizigwa imwalo mukubaa luzibo. Mbuli mbomunga mulabelesya kkii uuyandika, mweelede kubelesya luzibo lwa Leza mubuumi bwenu. Jesu wakaamba kuti aabo ibacita kuyanda kwa Leza “[mba]bayoonjila mu-Bwami.” Bantu bali boobu bakali kuzoobaa coolwe cakubelekela Leza kukabe kutamani!—Matayo 7:21; 1 Johane 2:17.
3. Ncinzi Leza ncayanda kulindiswe?
3 Twamana kwiiya kuyanda kwa Leza, kulayandika kapati kukucita. Mwayeeya ncinzi ncayanda Leza kulindinywe? Cilakonzya loko kufwiinsigwa mumajwi aaya: Amumwiiye Jesu. Bbuku lya 1 Petro 2:21 litwaambila kuti: “Nciconya eco ncimwakaitilwa, nkaambo Kristo alakwe wakamucisilwa, wakamusiila cibonesyo, kuti mukatobele mumikondo yakwe.” Aboobo kutegwa mucite kuyanda kwa Leza, mweelede kucitobelesya cikozyanyo ca Jesu mbuli mbomukonzya. Mbombubo oobo mbomubelesya luzibo lwa Leza.
JESU MBWAAKABELESYA LUZIBO LWA LEZA
4. Nkaambo nzi Jesu ncamuzi kapati boobu Jehova, alimwi mbuti mbwaali kulubelesya luzibo oolu?
4 Jesu Kristo ulabainda bambi kubaa luzibo lwa Leza. Wakakkala akubeleka a Jehova Leza kujulu kwaciindi cilamfwu katanaboola anyika. (Ba-Kolose 1:15, 16) Ninzi Jesu ncaakacita aluzibo loonse oolo? Taakakondwa kubaa ndulo kwalo. Jesu wakakkala kweendelana andulo. Ncencico ncaakali siluse, sicamba, alimwi siluyando mukweendelezya bantunyina. Jesu munzila eeyi wakali kwiiya Wisi wakujulu akubeleka mukweendelana aluzibo oolu lwa nzila zya Jehova ambwabede.—Johane 8:23, 28, 29, 38; 1 Johane 4:8.
5. Nkaambo nzi Jesu ncaakabbapatizigwa, alimwi mbuti mbwaakatobela caamba lubbapatizyo lwakwe mubukkale bwakwe?
5 Alimwi luzibo Jesu ndwaakajisi lwakamupa kuti atole ntaamu mpati. Wakaboola kuzwa ku Galilaya kuza ku Mulonga Jordano, kwalo Johane nkwaakazoomubbapatizya. (Matayo 3:13-15) Ino kubbapatizigwa kwa Jesu kwakali kwiiminina nzi? Mbwaakali mu Juda, wakazyalwa mucisi cakalyaabide kuli Leza. Aboobo Jesu wakali muntu wakalyaabide kuzwa kukuzyalwa. (Kulonga 19:5, 6) Kwiinda mukulipa kuti abbapatizigwe, wakali kulipa kuli Jehova kuti acite ciyanda Leza kuciindeeco. (Bahibulu 10:5, 7, Ci) Alimwi Jesu wakabuzuzikizya bupanduluzi bwakubbapatizigwa kwakwe. Wakabeleka canguzu mumulimo wa Jehova, kaabila bantu luzibo lwa Leza kufwumbwa kwajanika ciindi. Jesu kwakamukkomanisya kucita kuyanda kwa Leza, mane kaamba kuti eeci cakali mbuli cakulya kulinguwe.—Johane 4:34.
6. Muunzila nzi Jesu mwaakaliimya?
6 Jesu wakalizi kabotu-kabotu kuti akaambo kakucita kuyanda kwa Jehova uyoopenga kapati—ikuti mane kuyoomutolela buumi buya. Nokuba boobo Jesu wakaliimya, wabikka nzyayanda walo musule. Kucita kuyanda kwa Leza lyoonse kwakali ambele. Mukaambo aaka mbuti mbomukonzya kutobela cikozyanyo ca Jesu cilondokede?
INTAAMU ZITOLA KUBUUMI BUTAMANI
7. Nintaamu nzi zimwi muntu nzyeelede kutola kutegwa aelele kubbapatizigwa?
7 Swebo tuliindene a Jesu mukuti tatulondokede, eelyo ccita buyo kuti twatola ntaamu zimwi notukonzya kusika ambaakani yalubbapatizyo. Eeci citalikila mukujana luzibo lwini-lwini lwa Jehova Leza a Jesu Kristo mumyoyo yesu. Kucita ceeci kutupa kuti tube alusyomo alimwi tube aluyando lupati kuli Leza. (Matayo 22:37-40; Baloma 10:17, Ci; Ba-Hebrayo 11:6) Ikutobela milawo, injiisyo azyeelelo zya Leza kweelede kutupa kuti tweempwe, tutondezye buusu bwabuna Leza kuzibi zyesu zyamusule. Eeci citola kukusanduka, nkokwaamba kuti, ikunyona akufwutatila kufwumbwa nzila ilubide njotwakali kutobela ciindi notwatakajisi luzibo lwa Leza. (Incito 3:19) Mbuli mbokunga kwalangilwa, kuti katuli tucisisikizya kucita cibi cimwi muciindi cakucita zibotu, tatukwe notwanyona ncobeni, alimwi tatukwe notwamucenga Leza pe. Jehova ulakubona koonse kuupaupa ameso.—Luka 12:2, 3.
8. Nintaamu nzi njomweelede kutola ciindi mwayanda kubaa lubazu mumulimo wakukambauka Bwami?
8 Lino mbomwali kujana luzibo lwa Leza, sena taceeleli kuti mulange twaambo twakumuuya mbuli mbotumugeme nywebo lwenu? Ambweni muliyandide kwaambila basazinyoko, beenzinyoko, abambi zintu nzyomwiiya. Atwaambe kuti ndiza mulitalikide kale kucita ceeci, mbubwena Jesu mbwaakaabila bambi makani mabotu muziindi zyakwiizya. (Luka 10:38, 39; Johane 4:6-15) Lino ndiza muyanda kuyungizya aawo. Baalu Banakristo bayookondwa kwaambaula andinywe kubona naa muleelela alimwi akukonzya kubaa lubazu mumulimo wini-wini wa Bakamboni ba Jehova iwakukambauka Bwami. Kuti kamuli mulacita oobu, ibaalu balamubambila ciindi cakuti mukasindikile Kamboni umwi mumulimo. Basiciiya ba Jesu bakatobela malailile aakwe kutegwa bacite mulimo wakwe munzila yabulondo. (Marko 6:7, 30; Luka 10:1) Mulagwasigwa munzila iikozyenye mbomutola lubazu mukumwaisya mulumbe wa Bwami kuŋanda aŋanda amunzila zimbi.—Incito 20:20, 21.
9. Mbuti muntu mbwalyaaba kuli Leza, alimwi mbuti kulyaaba mbokujatikizya bukkale bwamuntu?
9 Ikukambauka makani mabotu kubantu bamisyobo yoonse ibali mulubazu lwamuunda ilwambungano ninzila yakujana baabo baluleme alimwi kuli akati kamilimo mibotu iisinizya kuti mulaa lusyomo. (Incito 10:34, 35; Jakobo 2:17, 18, 26) Kujanika kumiswaangano ya Bunakristo lyoonse akubaa lubazu lwini-lwini mumulimo wakukambauka azyalo ninzila zyakutondezya kuti muleempedwe alimwi mulisandukide, eelyo lino mukanzide kukkala mukweendelana aluzibo lwa Leza. Lino nintaamu nzi iinga yeelela kuzwa waawa? Nkulyaaba kuli Jehova Leza. Eeci caamba kuti mumupailo wamoyo omwe, mwaambila Leza kuti mwapa buumi bwenu cakulisungula alimwi camoyo woonse kulinguwe kukucita kuyanda kwakwe. Eeyi njenzila yakulyaaba kuli Jehova akutambula jokwe lya Jesu Kristo lyaluse.—Matayo 11:29, 30.
LUBBAPATIZYO—NCOLWAAMBA KULINDINYWE
10. Nkaambo nzi ncomweelede kubbapatizigwa mwamana kulyaaba kuli Jehova?
10 Mbuli bwakaamba Jesu, boonse ibaba basiciiya bakwe baleelede kubbapatizigwa. (Matayo 28:19, 20) Nkaambo nzi eeci ncociyandika mwamana kulyaaba kuli Leza? Mbokunga mwalyaaba kuli Jehova, ulizi kuti mulamuyanda. Pesi cakutadooneka muyooyanda kutola azimbi ntaamu kutegwa muzibye bambi luyando lwenu kuli Leza. Ilubbapatizyo lulamupa ciindi cakuti muzibye buleya kulyaaba kwenu kuli Jehova Leza.—Baloma 10:9, 10, Ci.
11. Ino lubbapatizyo lwaamba nzi?
11 Lubbapatizyo lulizwide bupanduluzi. Eliya mwabbizigwa, antela “[mwa]zikkwa,” kunsi lya maanzi, inga kubaanga mwafwa kubukkale bwenu bwamusule. Ciindi mwanuka kuzwa mumaanzi, kubaanga mwanjila mubuumi bupya, bwalo bweendelezegwa akuyanda kwa Leza, kutali kwenu nobeni. Aino, eeci tacaambi kuti tamucilubizyi limbi, nkaambo toonse kayi tatulondokede, tulabisya buzubaa buzuba. Pesi mbumuli babelesi ba Jehova balyaabide, munooli mwayanzana anguwe munzila iilibedelede. Akaambo kakweempwa kwenu akulipa cakulibombya kukubbapatizigwa, Jehova ulilisungwide kulekelela zibi zyenu kwiinda mucituuzyo ca Jesu cacinunuzyo. Aboobo kubbapatizigwa kuletela manjezeezya aasalala kuli Leza.—1 Petro 3:21.
12. Ino caamba nzi kubbapatizigwa (a) “muzina lya Taata”? (b) ‘muzina lya Mwana’? (c) ‘muzina lyamuuya uusalala’?
12 Jesu wakalailila basikumutobela kuti babbapatizye basiciiya bapya “muzina lya-Taata alya-Mwana alya-Muuya Uusalala.” (Matayo 28:19) Ncinzi Jesu ncaakali kwaamba? Lubbapatizyo “muzina lya-Taata” citondezya kuti ooyo muntu uubbapatizigwa wamuzumina Jehova Leza amoyo woonse kuti ngo Mulengi alimwi nguweelede kuba Mwami wazyoonse. (Intembauzyo 36:9; 83:18; Mukambausi 12:1) Kubbapatizigwa ‘muzina lya Mwana’ caamba kuti ooyo muntu ulamuzumina Jesu Kristo—alimwi ikapati cituuzyo ca Nguwe cacinunuzyo—kuti alikke njenzila yalufwutuko iipedwe a Leza. (Incito 4:12) Lubbapatizyo ‘muzina lyamuuya uusalala’ kutondezya kuti sikubbapatizigwa uluuzi muuya wa Jehova uusalala, antela inguzu zyakwe zibeleka, kuti ncibelesyo ca Leza mukucita makanze Aakwe akupa nguzu kubabelesi Bakwe kuti bacite kuyanda Kwakwe kululeme antoomwe ambunga Yakwe yeendelezegwa amuuya.—Matalikilo 1:2; Intembauzyo 104:30; Johane 14:26; 2 Petro 1:21.
SENA MULILIBAMBILIDE KUBBAPATIZIGWA?
13, 14. Nkaambo nzi ncotuteelede kuyoowa kusala kubelekela Jehova Leza?
13 Mbokunga lubbapatizyo lwaamba zinji boobu alimwi njembaakani mpati kwiinda mubuumi bwamuntu, sena nintaamu njomweelede kuyoowa? Naaceya! Nokuba kuti ikusala kubbapatizigwa ncintu citeelede kuubizigwa, cakutadooneka ncecintu ciinda kuba camaanu ncomunga mwacita.
14 Lubbapatizyo lulapa citondezyo cakusala kwenu kwakuti mubelekele Jehova Leza. Amuyeeye bantu mbomuzibene limwi. Nomuba munzila ili buti, sena aumwi takwe simalelaakwe ngwabelekela? Bamwi babelekela lubono. (Matayo 6:24) Bamwi bafwundumanina milimo yabo naa balalibelekela kwiinda mukubikka ambele akuzuzikizya kwa nzyobayanda mubuumi. Ibambi babelekela baleza bakubeja. Pesi nywebo mwasala kubelekela Leza mwini-mwini, Jehova. Kwiina umbi uutondezya luse, luzyalo, aluyando lunji boobu. Leza ulabapa bulemu bantu bakwe mumulimo uulaa mpindu iini-ini, walo uubatola kulufwutuko. Ulabalumbula bantu bakwe abuumi butamani. Ncobeni kutobela cikozyanyo ca Jesu akupa buumi bwenu kuli Jehova tiili nzila yakuyoowa pe. Mane atwaambe kuti njenzila yelikke iimubotela Leza iyamaanu loko.—1 Bami 18:21.
15. Nzintu nzi zimwi zisinkilizya lubbapatizyo?
15 Pesi lubbapatizyo tiili ntaamu yeelede kutolwa akaambo kakusinikizigwa pe. Ncintu cijatikizya ndinywe nobeni a Jehova. (Ba-Galatiya 6:4) Mbuli mbomwayaambele munzila yakumuuya, inga kamuli mwalibuzya: “Ncinzi ino icindikasya kubapatizigwa?” (Incito 8:35, 36) Mulakonzya kulibuzya kuti, ‘Sena kukazigwa abanamukwasyi nkokundijatilide? Sena ndicilaa lubazu muzintu zimwi zitazuminani a Magwalo naa micito mibi? Sena kunooli kuti ndiyoowa kusulaikwa abuleya?’ Ootu ntwaambo tumwi twakuyeeya, pesi mutweeleke mbuli mbotubede ncobeni.
16. Mbuti mbokunga kwamugwasya kubelekela Jehova?
16 Tacili camaanu kuyeeya mapenzi ngomunga mwajana kuti naa kamutayeeyi ampindu yakubelekela Jehova. Mucikozyanyo, amuyeeye kaambo kakukazigwa abanamukwasyi. Jesu wakasyomezya kuti nokuba kuti basiciiya bakwe basweekelwa basazinyina akaambo kakumutobela, bayoojana mukwasyi wiinda kukomena iwakumuuya. (Marko 10:29, 30) Aaba basilusyomonyoko balamutondezya luyando lwabunyina, balamugwasya kuliyumya nomupenzegwa, akumugwasilizya munzila yakubuumi. (1 Petro 5:9) Ikapati baalu mumbungano balakonzya kumugwasya mumapenzi alimwi akuzwidilila kubuyumuyumu. (Jakobo 5:14-16) Kujatikizya kusulaikwa nyika, inga mwalibuzya kuti, ‘Ncinzi cinga ceelana akubotezya Mulengi wazyoonse, ikumupa kukondwa abukkale mbwendisalide?’—Tusimpi 27:11.
IKUPONA MUNZILA IITONDEZYA KULYAABA AKUBBAPATIZIGWA KWENU
17. Nkaambo nzi lubbapatizyo lwenu ncomweelede kulubona kuba matalikilo kutali mamanino?
17 Ncintu cipati kuti kamuyeeyede kuti lubbapatizyo taali ngamananino aakusumpuka kwenu kwakumuuya. Mmatalikilo aabubelesi kuli Leza ibwabuumi boonse koli mulanda, umwi wa Bakamboni ba Jehova. Nokuba kuti lubbapatizyo ncintu cipati, tacili cisinizyo calufwutuko pe. Jesu takwe naakati: ‘Muntu woonse uubbapatizidwe uyoofwutuka.’ Ncaakaamba ncakuti: “Oyo uuliyumya kusikila kumamanino uzoofutuka.” (Matayo 24:13) Aboobo ncintu ciyandika kapati kuti musaangune kuyandaula Bwami bwa Leza kwiinda mukububikka ambele mubuumi bwenu.—Matayo 6:25-34.
18. Mwamana kubbapatizigwa, nimbaakani nzi zimwi zyakusola kusika?
18 Kutegwa muliyumye mumulimo wenu kuli Jehova, muyooyanda kulibikkila mbaakani zyakumuuya. Imwi mbaakani nkuliyungizizya luzibo lwa Leza kwiinda mukuliyiisya lyoonse mu Jwi lyakwe. Amukanze kubala Bbaibbele buzubaa buzuba. (Intembauzyo 1:1, 2) Amujanike kumiswaangano ya Bunakristo cakusitikila, nkaambo ookuya muyooswaangana abaabo bayoogwasya kumupa nguzu zyakumuuya. Anywebo lwenu, sena tamukoolibikkila mbaakani yakwiingula mibuzyo kumiswaangano yambungano eelyo munzila eeyi kamutembaula Jehova akusola kugwasya bambi? (Baloma 1:11, 12, Ci) Aimbi mbaakani inga yaba yakululamika mipailo yenu.—Luka 11:2-4.
19. Mbube nzi muuya uusalala mbuunga ulamugwasya kutondezya?
19 Kutegwa mukkale mukweendelana alubbapatizyo lwenu, muyandika kuzumanana kubikkila maanu kuzintu nzyomucita, kamulekela muuya uusalala wa Leza kuti uzyale micelo mulindinywe iili mbuli luyando, kukondwa, luumuno, busicamba, buuya, bubotu, lusyomo, lubombo, akulyeendelezya. (Ba-Galatiya 5:22, 23; 2 Petro 3:11) Amuyeeye kuti Jehova ulapa muuya wakwe uusalala kulibaabo boonse baupailila akumumvwa kabali babelesi bakwe basyomeka. (Luka 11:13; Incito 5:32) Aboobo amupailile muuya wa Leza kulinguwe alimwi mumulombe kumugwasya mukutondezya bube bumubotela. Bube buli boobu buyooinda kulibonya mukwaambaula kwenu amubukkale bwenu mbomuyaabutobela busolozi bwamuuya wa Leza. Aino, muntu woonse mumbungano ya Bunakristo usola kubaa “buntu bupya” kutegwa abe mbuli Kristo. (Ba-Kolose 3:9-14) Aumwi wesu ujana buyumuyumu bwiindene mukucita ceeci akaambo kakuti tuliindene mpotuteene mukusumpuka kwakumuuya. Mbokunga tamulondokede, mweelede kubeleka canguzu kuti mube mbuli Kristo mbwabede. Pesi mutabi nomutyompokelwa mukaambo aaka, nkaambo cilakonzeka mukugwasigwa a Leza.
20. Muunzila nzi momukonzya kwiiya Jesu mumulimo?
20 Akati kambaakani zyenu zyakumuuya kweelede kakuli ayeeyi yakuciiya loko cikozyanyo ca Jesu cakukondwa. (Ba-Hebrayo 12:1-3) Wakali kuuyanda mulimo. Kuti mwabaa coolwe cakutola lubazu mumulimo wakukambauka Bwami, mutaulekeli kuba buyo ciyanza. Amusoleke kukkomanina mulimo wakuyiisya bambi zya Bwami bwa Leza mbuli bwakacita Jesu. Amubelesye malailile ngoipa imbungano kumugwasya kusumpuka mubwiiyi. Alimwi kamusyomede kuti Jehova ulakonzya kumuyumya kukucita mulimo wenu.—1 Ba-Korinto 9:19-23.
21. (a) Mbuti mbotuzi kuti Jehova ulabayandisya bantu babbapatizidwe ibasyomeka? (b) Ncinzi citondezya kuti lubbapatizyo ncintu citacaali pe kuti tukafwutuke lwaakucitwa lubeta lwa Leza kubweende bwazintu oobu bubi?
21 Imuntu uulyaabide, uubbapatizidwe uusoleka kutobela Jesu mmuntu muyandisi loko kuli Leza. Jehova ulailingula yoonse myoyo yazyuulu zyamamiliyoni aabantu alimwi ulizi mbobatabonwi-bonwi bantu bali boobu. Ubabona kuba mbono, “izintu ziyandisi.” (Hagai 2:7) Businsimi bwamu Bbaibbele butondezya kuti Leza ibantu bali boobu ubabona kuba bantu balembedwe citondezyo cakuti bakafwutuke lwaakucitwa lubeta lwakwe iluza ino-ino kubweende bwazintu oobu bubi. (Ezekiele 9:1-6; Malaki 3:16, 18) Sena muli bantu “beelela buumi butamani”? (Incito 13:48, NW) Sena ncintu ncomulombozya ikulembwa citondezyo cakuba bantu babelekela Leza? Kulyaaba akubbapatizigwa zili akati kacitondezyo eeco, alimwi tazicaali pe kuti kufwutukwe.
22. Mbukkale nzi ‘[iba]nkamu mpati’ mbobakonzya kulangila?
22 Nolyakainda Zambangulwe, Nowa amukwasyi wakwe bakazwa mubwato kuza anyika iisalazidwe. Munzila iikozyenye, iba “nkamu mpati” balo babelesya luzibo lwa Leza mubuumi bwabo ibazuminwa a Jehova balaa bulangizi bwakufwutuka mamanino aabweende oobu bwazintu akubaa buumi butamani anyika yasalazilwa limwi. (Ciyubunuzyo 7:9, 14) Ino buyooba buti buumi oobo bwalo?
AMULISUNKE LUZIBO LWENU
Mbuti Jehova mbwayanda kuti mulubelesye luzibo lwakwe?
Nintaamu nzi zimwi zitola kulubbapatizyo?
Nkaambo nzi lubbapatizyo ncaatali mamanino pele ncaali matalikilo?
Mbuti mbotweelede kupona munzila iitondezya kulyaaba kwesu akubbapatizigwa?
[Mibuzyo yaciiyo]
[Cifwanikiso icili apeeji 172]
Sena mwalyaaba kuli Leza mumupailo?
[Zifwanikiso izili apeeji 174]
Ncinzi ino icimukasya kubbapatizigwa?
