Iciindi Nyika Niiyoozula Luzibo lwa Leza
Cibalo 19
Iciindi Nyika Niiyoozula Luzibo lwa Leza
1, 2. Mbuti zilenge zya Jehova mbuzyakazoonyonganizigwa?
ATWAAMBE kuti sikuzekaula mupati umwi wazwa akumanizya cifwanikiso citaliboteli. Mbuli mbweelede ucibona kubota loko—mmulimo wabuhaazibwene! Pesi masiku sinkondonyina simunyono wacizilinganya. Mulakonzya kuzumina anywebo kuti eeci cilamucisa kapati sikuzekaula ooyo. Ino ulimukanzide ooyo munyoonyoosi kuti aangwe! Alimwi mulakonzya kweezeezya sikuzekaula mbwayandisisya kuti cifwanikiso cakwe cipilusigwe mbucabede kubota.
2 Mbuli sikuzekaula ooyo, Jehova wakalenga mulimo wabuhaazibwene mukubamba nyika akubikka bantu alinjiyo. Amane kulenga mwaalumi amukaintu, zyoonse ncito zyakwe zyaansi wakazyaamba kuti “zyabota loko.” (Matalikilo 1:31) Ba Adamu a Eva bakali bana bakwe mwini Leza, alimwi wakali kubayanda. Wakali kubalangila bukkale bubotu kumbele. Mmasimpe, Saatani wakabayunga kuti bazange, pesi zilenge zya Leza zibotu teezyakanyonyooka kusika nkozitacikwe abubambe pe.—Matalikilo 3:23, 24; 6:11, 12.
3. Ino “buumi bwini-bwini” mbuumi nzi?
3 Leza ulikanzide kululamika zintu. Uyandisya kuti atubone katupona mbuli mbwaakakanza kumatalikilo. Ooku kupona kwesu kufwiifwi kwamapenzi tabuli “[mbo]buumi bwinibwini” pe, bulasyaala kule-kule kuliboobo Jehova mbwaakali kuyeeya. “Buumi bwinibwini” Leza mbwayanda kuti tube ambubo “[m]buumi butagoli” muziimo zilondokede.—1 Timoteo 6:12, 19.
4, 5. (a) Mbuti bulangizi bwa Paradaiso mbobuyoozuzikizigwa? (b) Nkaambo nzi ncotweelede kubuyeeya bulangizi bwesu bwakumbele?
4 Iluzibo lwa Leza luleta mukuli kuzwa kuli Jehova. (Jakobo 4:17) Pesi amuyeeye zilongezyo eezyo nzyomuyoojana kuti mwabelesya luzibo oolo akusoleka kujana buumi butamani. Mu Jwi lyakwe, Bbaibbele, Jehova Leza wapa cifwanikiso cibotu icambuli mbobunoobede buumi munyika ya Paradaiso yalo iiswenede loko. Aino, tobantu ba Jehova tatubelekeli Leza akaambo kakuyanda bulumbu bwalo. Tulamubelekela Leza nkaambo tulamuyanda. (Marko 12:29, 30) Kunze lyaboobo tatubujani buumi kwiinda mukubelekela Jehova. Buumi butamani ncipego kuli Leza. (Ba-Roma 6:23) Ciyootugwasya kuyeeya buumi buli boobu nkaambo ibulangizi bwa Paradaiso butwiibalusya kuti Jehova ngu Leza siluyando “uupa cilumbo kulibaabo bamuyandaula.” (Ba-Hebrayo 11:6) Ibulangizi bwamasimpe mumizeezo yesu amumyoyo bulatupa kukonzya kuliyumya notujana buyumuyumu munyika ya Saatani.—Jeremiya 23:20.
5 Lino atulange bulangizi buzwa mu Bbaibbele ibwabuumi butamani mu Paradaiso iiza yaanyika. Ino buumi buyooba buti ciindi nyika niiyoozula luzibo lwa Leza?
YAAKUMANA ARMAGEDONI—INYIKA YA PARADAISO
6. Ino Armagedoni ninzi, alimwi iyakubajatikizya buti bantu?
6 Mbuli mbokutondezedwe musule oomu, ino-ino Jehova Leza uyakubunyonyoona bweende bwazintu oobu ibubi. Inyika iyaabuswena cakufwambaana kuliceeco Bbaibbele ncoliita kuti Har–Magedoni, antela Armagedoni. Eelyo bbala bamwi bantu libayeezya kunyonyoona kwanyukkiliya ikuletwa amasi aalwana, pesi yalo Armagedoni tiikwe ambwiikozyenye aceeco pe. Mbuli butondezya Ciyubunuzyo 16:14-16, Armagedoni “[ni]nkondo yabuzuba bupati bwa-Leza Singuzuzyoonse.” Ninkondo iijatikizya “bami boonse banyika,” antela imasi. Mwanaa Jehova Leza, Mwami uubikkidwe, ino-ino uyoonjila munkondo. Ilizizilwe mbwiiyoomana. Boonse bakazya Bwami bwa Leza abalaa lubazu mubweende bwa Saatani bubi bayoogwisigwa. Ibalo-balo aabo basyomeka kuli Jehova mbabayoofwutuka.—Ciyubunuzyo 7:9, 14; 19:11-21.
7. Nkuli nkwanoobede Saatani abadaimona bakwe mu Bulelo bwa Kristo bwa Cuulu Camyaka, alimwi mbuti eeci mbociyoogwasya bantu?
7 Atwaambe nywebo mwakufwutuka kunyonyoona ooko. Inga buumi bunooli buti anyika mubweende bwa Leza bupya? (2 Petro 3:13) Tatuyandiki akuzumbauzya buya pe, nkaambo Bbaibbele lilatwaambila, alimwi nzyolitwaambila zilakondelezya. Twiiya kuti Saatani abadaimona bakwe bayoolesegwa kubeleka, bakajalilwe mumulindi uutagoli iciindi ca Bulelo bwa Jesu Kristo bwa Cuulu Camyaka. Eezyo zilenge zibi, zyaluciso tazicinooyubilili kazituletela mapenzi akusola kutuyunga kuti tucite micito yakutasyomeka kuli Leza. Ino kuyooba kulemununwa kaka ooko!—Ciyubunuzyo 20:1-3.
8, 9. Munyika mpya, ikupenga, kuciswa, akucembaala kuyoocitwa buti?
8 Mukuya kwaciindi kuciswa koonse kuyoozimaana. (Isaya 33:24) Ibalemenye baya kwiimikila, kweenda, kuzuza alimwi kuzyana amaulu aali kabotu mayumu. Kakwiindide myaka mubukkale bwabo buumuzi, basicuulutwi baya kwaamvwa majwi aakutangala aabazingulukide. Boofwu bayookankamuka cakugambwa yaakulibonya kumeso aabo inyika iizwide mibala aziwa. (Isaya 35:5, 6) Limwi, baya kwaabona masyu aabayandwa babo! Ndiza lino kwakaindi-indi buyo meso aabo ayoozula misozi yakukondwa.
9 Amuyeeye buyo! Kucinyina magilazi aakumeso, kucinyina madoombe ankoli, kucinyina misamu, kucinyina zibbadela ziniini zyameno noziba zipati! Imalwazi aakumoyo akutyompokelwa taaciyoobabuzyi limbi kukkomana bantu. Kunyina buumi bwakubwana ibuyoonyonganizigwa abulwazi. Mapenzi aabucembele ayoogwisigwa. (Jobu 33:25) Tuyoopona kabotu alimwi tunooli bayumu. Mbobuceda tunoobuka kuzwa kuŋonzi zikatalusya kazipilukide nguzu, katunyanyaala katusungweede kunjila buzuba bupya bwabuumi buzwide amilimo iikonda.
10. Mulimo nzi basikufwutuka Armagedoni ngobayootalika?
10 Kuyooba maunda-maunda aamilimo yakucita kuli basikufwutuka Armagedoni. Inyika baya kwiibambulula ikabe paradaiso. Kufwumbwa nuuba mukondo buyo wabweende oobu bwakaindi ibusofweede uyoogwisigwa. Myuunda yamicelo ayazisyu iyoolibonya ikwakali maanda aacinjilane-njilane amasena aanyonyookede. Boonse bayoobaa maanda mabotu aakondelezya kukkala. (Isaya 65:21) Mukuya kwaciindi, aayo masena aanyika aaparadaiso ayookomena akaswaangane mane nyika yoonse ikasike aceelelo ca Mulengi cabubotu ncaakabikka eelyo mumuunda wa Edeni. Ino kunooli kubotu kubaa lubazu mumulimo ooyo wakubambulula!
11. Ino bantu kumbele banookkede buti mucilawo cabo anyika alimwi antoomwe abanyama?
11 Zyoonse eezi ziyoocitwa mubusolozi bwa Leza kutegwa kutakabi bunyonyoosi bwacilawo. Ibantu bayoobaa luumuno abanyama. Muciindi cakubajayaula cabuyamba, imuntu uyooubweza alimwi mukuli wakwe wakulela nyika, kababamba kabotu balo. Amweezeezye baumpe atubelele, basyuumbwa aboombe, kabalya antoomwe—abalo banyama baamunzi tabakwe cinga cabacisa. Naba mwana musyoonto takooyooba acakuyoowa kubanyama, alimwi kuliiba kwanyika mpya takukanyonganizigwi abantu bakali, basiluciso pe. (Isaya 11:6-8) Ino iyooba nyika mbotu eeyo!
MUNTU WABAMBULULWA
12. Mbuti Isaya 11:9 mbwiizuzikizigwa sunu, alimwi mbuti mbwiiyoozuzikizigwa mu Paradaiso?
12 Isaya 11:9 ilatwaambila ncokutakacitwi bunyonyoosi munyika yoonse. Yaamba kuti: “Nyika iyoozula luzibo lwa-Jehova mbubonya mbuli maanzi mbwaazuzya lwizi.” Aaka kaambo kajatikizya bantu nkaambo banyama tabakonzi kujana “luzibo lwa-Jehova” akucinca, kayi balo beendelezegwa aaziyanza zyabo kutali maanu. Pesi luzibo lwa Mulengi wesu ncobeni lulacinca bantu. Cakutadooneka nywebo lwenu mulicincide kale munzila zimwi akaambo kakubelesya luzibo lwa Leza mubuumi bwenu. Mamiliyoni aabantu alicitide oobo. Aboobo oobu businsimi bulitalikide kale kuzuzikizigwa mulibaabo babelekela Jehova. Nokuba boobo, bulatondeka aciindi bantu munyika yoonse mbwiizulwa nobayoosamununa tumpenda tuli toonse twabunyama antela twakulwana kutegwa bakabe basiluumuno kukabe kutamani.
13. Mmulimo nzi walwiiyo uuyootola busena anyika?
13 Ino kuyoobota akaka ciindi nyika niiyoozula luzibo lwa Leza! Kuyooba mulimo mupati walwiiyo mubusolozi bwa Mwami Jesu Kristo abasikulelanyina bali 144,000. “Mabuku” mapya lino ayootalika kubelesegwa. Kulibonya kuti aaya mmalailile aa Leza aalembedwe alo aayoobelesegwa kuyiisya baabo bakede anyika. (Ciyubunuzyo 20:12) Muntu uyooiya luumuno, kutali nkondo. Zyoonse zilwanyo zinyonyoosi ziyoolobelela. (Intembauzyo 46:9) Basinyika mpya bayooyiisigwa kweendelezya bantunyina caluyando, abulemu.
14. Mbuti nyika mbwiiyoocinca ciindi bantu baakukamantana kuba mukwasyi omwe?
14 Bantu bayooba mukwasyi omwe uukamantene. Kunoonyina zisinkilila lukamantano abunyina. (Intembauzyo 133:1-3) Kunyina munzi wamuntu uunooyandika kukkiya ikujalila babbi. Luumuno luya kweendelezya moyo uuli woonse, ŋanda iili yoonse, amubusena buli boonse bwanyika.—Mika 4:4.
KUBUSIGWA KWAKUTANGALA
15. Ninkamu nzi zyobile iziyoobusigwa aanyika?
15 Mu Cuulu Camyaka eeco, kubusigwa kuyoocitika. Aabo babisizya muuya uusalala wa Leza, antela nguzu zyakwe acaali, kwiinda mukupuulazya zitondezyo naa busolozi bwawo tabakabusigwi pe. (Matayo 23:15, 33; Ba-Hebrayo 6:4-6) Aino Leza nguuyoobona naa nguni uubisizye boobo. Pesi kuli nkamu zyabantu zyobile ziindene iziyoobusigwa—‘baluleme abataluleme.’ (Incito 24:15) Mbokunga zintu ziyoocitwa cabulondo, ncintu camaanu kusyoma kuti ibayoosaanguna kutambulwa kubuumi anyika mbabaabo baluleme, aabo bakabelekela Jehova cakusyomeka.—Ba-Hebrayo 11:35-39.
16. (a) Mbaani bayooba akati “[ka]baluleme” ibayoobusigwa anyika? (b) Mbantu bali basyomeka bansiku mbomuyandisisya kuzooswaangana, alimwi nkaambo nzi?
16 Muciindi cakumvwa makani aajatikizya nkondo, ntenda, alufwu, babelesi ba Jehova bayootambula milumbe mibotu yakubusigwa. Cinookondelezya kumvwa nkobapiluka baalumi abamakaintu basyomeka mbuli ba Abelo, Enoki, Nowa, Abrahamu, Sara, Jobu, Musa, Rahabu, Rute, Davida, Eliya, Esita. Elyo kunoneezya twaambo twazyaciindi twalo ntobayoopa tupango-pango twamakani manji aamu Bbaibbele! Cakutadooneka balo antoomwe abalulami bakafwa muziindi zyaino-ino banooyandisisya kumvwa zyamamanino aabweende bwa Saatani ambuli Jehova mbwaakasalazya zina lyakwe lilemu akusimpya buleli bwakwe.
17. Ndugwasyo nzi bantu basyomeka ndobayoopa kubantu bambi abo bayoobusigwa?
17 Ino bayoogwasya loko basyomesi aaba mucibeela citobela cakubusigwa, iciindi zyuulu zyamamiliyoni aa bantu “bataluleme” naaya kwaangululwa kunsimbi zyalufwu! Bunji bwabantu taakwe nobakabede aciindi cakuziba Jehova. Saatani wakali ‘koofwaazya meso aabo.’ (2 Ba-Korinto 4:4) Pesi milimo ya Diabolosi iyoonyonyoonwa. Ibataluleme bayoopiluka kunyika yeebeka alimwi yaluumuno. Bayootambulwa abantu babelekelaamwi kuti babayiisye nzila zya Jehova a Mwanaakwe uulela, Jesu Kristo. Izyuulu zyamamiliyoni aabantu babusidwe mbwaanooyaa buziba akuyanda Mulengi wabo, iluzibo lwa Jehova luyoozuzya nyika munzila iitanabwenwe.
18. Nywebo mwayeeya muyoolimvwa buti mwanootambula bayandwa benu babusigwa?
18 Ino kaka kubusigwa kuyooleta kukondwa kumyoyo yesu! Nguni uutanapengede akaambo kasinkondoma ilufwu? Ee ncobeni, nguni uutanalimvwide kunyongana ciindi luyando naa bulongwe bwesu nozyakakosolwa alufwu iluletwa akuciswa, kucembaala, intenda, naa kulwana? Aboobo amuyeeye buyo mbokuyoobota kuswaangana alimwi mu Paradaiso. Bamamama abamatata, bana basankwa abasimbi, balongwe abasazinyoko, bayoojatililana, kabaseka akulila akaambo kakukondwa.
IBULONDOSI LIMWI!
19. Mmaleele nzi aayootola busena mu Cuulu Camyaka?
19 Mu Cuulu Camyaka coonse, kunoocitika maleele mabotu. Kubantu ambweni ciyooba ncecintu ciinda kukondelezya mu Bulelo bwa Kristo bwa Cuulu Camyaka. Jehova uyoolailila Mwanaakwe kuti abelesye mpindu yacituuzyo cacinunuzyo kumwaalumi amukaintu woonse uusyomeka uumvwa. Munzila eeyo, cibi coonse ciyoogwisigwa eelyo bantu bayoolondolwa.—1 Johane 2:2; Ciyubunuzyo 21:1-4.
20. (a) Ino kuyooba buti kulondoka? (b) Ndelili basikufwutuka Armagedoni abasikubusigwa nobayootalika kupona bwini-bwini?
20 Ikulondolwa! Ino kunooli kutyani ooko? Kunooli kupiluka kubuumi mbuli mbobakajisi ba Adamu a Eva nobatakaningabisizya Jehova Leza. Kumubili, kumizeezo, kumoyo, mukulilemeka, akumuuya—munzila yoonse iinga yayeeyelwa—bantu balondokede bayoozuzikizya zyeelelo zya Leza. Pele sena nkokuti bantu boonse bana kwiide kukozyenye? Nkule-kule loko! Izilenge zya Jehova—imasamu, maluba, banyama—zyoonse zituyiisya kuti ulakuyanda kwiindanya-indanya zintu. Bantu balondokede banooindene mbobabede azipego zyabo. Aumwi uyoobaa buumi mbuli mbwaakabuyandide kuba Leza. Ciyubunuzyo 20:5 yaamba kuti: “Bamwi bafu boonse ibakasyaala teebakabuka pe mane do myaaka iili cuulu imaninine.” Mbuli nkamu mpati yabasikufwutuka Armagedoni, basikubusigwa bayoopona buumi buzwide ciindi baakusika akulondoka kabatacibisyi.
21. (a) Ncinzi ciyoocitika kumamanino aa Bulelo bwa Kristo bwa Cuulu Camyaka? (b) Ncinzi ciyoocitika limwi kuli Saatani abaabo boonse bali kulubazu lwakwe?
21 Bantu balondokede bayoosunkwa ciindi comwe camamanino. Kumamanino aa Cuulu Camyaka, Saatani abadaimona bakwe baya kwaangululwa kuzwa mumulindi uutagoli kwakaindi-indi akuzumizigwa kusoleka lwamamanino kunyona bantu kuzwa kuli Jehova. Bamwi bayoolombozya akusala zintu zitaluzi muciindi ca Leza, pesi ooku kuzanga kuyookosolwa. Jehova uyoobajaya aaba basikuliyanda antoomwe a Saatani abadaimona bakwe boonse. Eelyo boonse basimucita zibi bayoolobelela.—Ciyubunuzyo 20:7-10.
MUYOOCITA NZI NYWEBO?
22. Ncinzi ncomulangila kuyoocita mu Paradaiso?
22 Kuzwa ciindi eeco aabo bamuyanda Jehova Leza banoopona akukkala munyika ya Paradaiso kukabe kutamani. Tatukonzi pe kweezeezya kukondwa kwabo, alimwi nywebo mulakonzya kubaa lubazu muliceeci. Ikwiimba nyimbo, busongo bwakwaanza, akupanga zintu—atwaambe kuti izinoocita bantu balondokede zinooinda amilimo yabahaazibwene beni-beni bamunyika yakaindi! Nkaambo kayi bantu banoolondokede alimwi bayoobaa ciindi citagoli kumbele lyabo. Amuyeeye nzyomuyookonzya kucita kamuli bantu balondokede. Alimwi amuyeeye nywebo abantunyoko nzyomuyooiya kujatikizya zilenge zya Jehova—kuzwa muzyuulu zyamamiliyoni aamabbalabala aanyenyeezi ijulu lyoonse kusika kutubeela twamaatomu twiinda kuceya. Coonse cintu muntu ncayoocita ciyooyungizya kubotelwa kumoyo wa Taateesu wakujulu siluyando, Jehova.—Intembauzyo 150:1-6.
23. Nkaambo nzi buumi mu Paradaiso ncobutanoocimi?
23 Kuciindi eeco buumi tabunoocimi pe. Bunooyaabwiindila kukondelezya mbociyaabuya ciindi. Ede mwabona, iluzibo lwa Leza talumani pe. (Ba-Roma 11:33) Mubuumi boonse butamani, lyoonse kunooli zimbi zyakwiiya azimbi zipya. (Mukambausi 3:11) Alimwi mbomuyaabwiiya zya Jehova Leza, muyoozumanana kupona—kutali buyo kwamyaka misyoonto, pele kukabe kutamani!—Intembauzyo 22:26.
24, 25. Nkaambo nzi lino ncomweelede kukkala mukweendelana aluzibo lwa Leza?
24 Sena buumi bwakumbele bukondelezya anyika yaparadaiso tacili cintu iceelela kubelekela canguzu naa kuliimya nkomucita? Aino buleelela! Jehova wamutambikizya kkii yabuumi oobo bwakumbele bubotu. Ooyo kkii nduzibo lwa Leza. Sena muyoolubelesya?
25 Kuti kamumuyanda Jehova, muyakubotelwa kucita kuyanda kwakwe. (1 Johane 5:3) Mbomuyaabutobela nzila eeyo, tazitegwa nzilongezyo nzyomuyoojana! Kuti mwabelesya luzibo lwa Leza, lulakonzya kumuletela buumi bwakukondwa nomuba munyika eeyi yamapenzi. Abwalo bulumbu buli kumbele mbupati, kayi oolu ndoluzibo lutola kubuumi butamani! Lino nceciindi ceelede icakuti mutole ntaamu. Kamukanzide kukkala mukweendelana aluzibo lwa Leza. Amulutondezye luyando lwenu lwa Jehova. Amulilemeke zina lyakwe akusinizya kuti Saatani mmubeji. Walo Jehova Leza, Ikasensa kabusongo bwini-bwini aluzibo, uyootangala akaambo kandinywe mumoyo wakwe mupati waluyando. (Jeremiya 31:3; Zefaniya 3:17) Alimwi uyoomuyanda kukabe kutamani!
AMULISUNKE LUZIBO LWENU
Ino “buumi bwini-bwini” mbuumi nzi?
Yaakumana Armagedoni, ninzi ciyoocitika anyika?
Mbaani bayoobusigwa anyika?
Mbuti bantu mbobayoolondoka akusunkwa kumamanino?
Mulaa bulanginzi nzi kujatikizya Paradaiso?
[Mibuzyo yaciiyo]
[Cifwanikiso icili apeeji 188, 189]
Sena mulangila kupona kukabe kutamani mu Paradaiso, iciindi nyika niiyoozula Luzibo lwa Leza?
