Cibalo 15

Kuyaka mukwasyi uulemeka leza

1-3. Nkaambo nzi bamwi ncobatakonzi kupasulula mapenzi aafwini kuba mulukwatano amubuzyali, pesi nkaambo nzi Bbaibbele ncolinga lyagwasya?

ATWAAMBE mwakanza kuliyakila ŋanda. Mwaula nyika. Mukulangila kupati mulayeezeezya ŋanda yenu mpya. Pele ino kuti kamutajisi zibelesyo aluzibo lwakuyaka? Ino inga kaka mwatyompokelwa mukusola kwenu!

² Banabubili banji balanjila mulukwatano kabeezeezya mukwasyi uuli kabotu, pele tabajisi luzibo noziba zibelesyo ziyandika mukuuyaka. Wainda-inda buyo mucado, tumpenda tulatalika. Kulwana akuzwangana kuba kwabuzubaa buzuba. Ciindi bana nobazyalwa, ooyo taata mupya abaama mupya bajana kuti buzyali tababuzi mbubwena mbobatazi lukwatano.

³ Pesi mucoolwe Ibbaibbele lilakonzya kugwasya. Injiisyo zyalyo zili mbuli zibelesyo zimupa kukonzya kuyaka mukwasyi uuli kabotu. (Tusimpi 24:3) Atubone mbozicita.

IZIBELESYO ZYAKUYASYA LUKWATANO LULI KABOTU

4. Nkaambo nzi ncokweelede kulangilwa mapenzi mulukwatano, alimwi nzyeelelo nzi zipegwa mu Bbaibbele?

⁴ Nobalibonya buti kweendelana banabubili, baliindene mumyoyo, bukkale bwakubwana, amumikwasyi mobazwa. Aboobo kweelede kulangilwa mapenzi amwi  bakwatana. Ino ayakweendelezegwa buti? Basikuyaka balo nobayaka ŋanda balanga mapepa aabwaanze bwayo. Aaya mmalailile ngakutobela. Ibbaibbele lilapa zyeelelo zya Leza izyakuyaka mukwasyi uuli kabotu. Lino atuzilange zimwi zisyoonto.

5. Mbuti Bbaibbele mbolisimpya kwaamba mbokuyandika kusyomeka mulukwatano?

⁵ Kusyomeka. Jesu wakati: “Abo mbaakakakatizya Leza muntu atabapambukanyi.” * (Matayo 19:6) Mwaapostolo Paulo wakalemba ategwa: “Kukwatana kabakulemeka boonse, abulo bwakukwatanina kabusalala, nkaambo Leza uyoobabeteka baamu abasimalale.” (Ba-Hebrayo 13:4) Aboobo aumwi wabantu bakwetene weelede kulimvwa kuti utumidwe aa Jehova kusyomeka kumukaakwe.—Matalikilo 39:7-9.

6. Mbuti kusyomeka mbokunga kwabamba lukwatano?

⁶ Kusyomeka kupa lukwatano kubaa bulemu akuliiba. Banabubili basyomeka balizi kuti, cintu nociba buti, bayoogwasyanya. (Mukambausi 4:9-12) Ooku nkwiindana loko abaabo basiya lukwatano lwabo mbokwalibonya buyo mapenzi! Bantu bali boobu balafwambaana kusyoma kuti ‘bakalubizya kusala muntu ooyo,’ ‘tabaciyandani,’ akuti kujana umbi nkokunga kwagwasya. Pele eeci taku ngocipa ciindi cakukomena akati kabanabukwetene. Muciindi caboobo, uutasyomeki uuli boobo inga watolelezya ngaona mapenzi kumukaakwe mupya. Kuti muntu kajisi ŋanda mbotu amane wajana kuti ciluli cilasweka, ede ulasola kucibamba. Taide kulongela kuliimbi ŋanda. Mbubwena buyo ikucinca mukaako taili njenzila yakumana twaambo tuleta manjaka aamulukwatano. Ciindi mapenzi naasika, mutasoli kuzwa mulukwatano, amubeleke canguzu kubambulula. Kusyomeka kuli boobu kutondezya  kuti lukwatano mulubona kuba cintu ceelede kukwabilila, kubambwa, akuyandisigwa.

7. Nkaambo nzi kubandika ncokufwini kubayumina bantu bakwetene, pesi mbuti kusama “buntu bupya” mbokunga kwagwasya?

⁷ Kubandika. “Makanze alasinkinizigwa na kwabula lulayo, pele na kuli basinkuta banji alazuzikizigwa,” mbukaamba kasimpi kamwi kamu Bbaibbele. (Tusimpi 15:22) Pele cilabakatazya kubandika banabukwetene banji. Nkaambo nzi ncokuli boobo? Nkaambo bantu bajisi nzila ziindene-indene zyakubandika. Aaka kaambo kalifwini kuleta kutateelelana akutyompokelwa kunji. Kukomezegwa kwabo kulakonzya kakulaa mbokujatikizidwe mukaambo aaka. Mucikozyanyo, bamwi inga kabali bakalelwa kubazyali bakali kuzwangana-zwangana. Lino bakomena bakwata naa bakwatwa, inga kabatazi mbokwaambaulwa kabotu kumweenzinyina munzila yaluse alimwi aluyando. Nokuba boobo, iŋanda yenu tayeelede buya kuti mane isampuke kusika nkwiiba ‘iŋanda iizwide nkondo.’  (Tusimpi 17:1) Ibbaibbele lilasimpya kwaamba kusama “buntu bupya,” talizumizyi ndutiluti, kubwenta, akutukilana.—Ba-Efeso 4:22-24, 31.

8. Ninzi cinga cagwasya ciindi mwaimpana amukaako?

⁸ Ncinzi ncomunga mwacita ciindi nokuli kwiimpana? Kuti kwatalika kubuka bukali, inga cagwasya kuti mwatobela kulaya kwa Tusimpi 17:14 kwakuti: “Kozwa buyo, inkondo niitana kubuka.” Ee, mulakonzya kukaleka kaambo kwaciindi eco akukaleta aakale, iciindi nyoonse yebo amukaako nomwatontomana. (Mukambausi 3:1, 7) Kufwumbwa mbocinga caba, amusoleke ‘kufwambaana kuswiilila, pele kutafwambaana kwaamba, nikuba kunyema.’ (Jemusi 1:19, Ci) Muzeezo wenu weelede kauli wakubamba kaambo, kutali kuzunda mukukazyanya. (Matalikilo 13:8, 9) Amusale majwi aŋambilo iziyoomutontozya nywebo amweenzinyoko. (Tusimpi 12:18; 15:1, 4; 29:11) Icipati kwiinda, mutacaali kamunyemede, amulombe lugwasyo antoomwe kwiinda mukwaambaula a Leza mumupailo wakulibombya.—Ba-Efeso 4:26, 27; 6:18.

9. Nkaambo nzi ncokunga kwaambwa kuti kubandika kutalikila mumoyo?

⁹ Kasimpi kamu Bbaibbele kamwi kaamba kuti: “Moyo wamusongo ulasongwaazya milomo yakwe, alimwi ulayungizya luzibo kukwaamba kwakwe.” (Tusimpi 16:23) Ncobeni nkokuti kkii wakuzwidilila mukubandika uli kumoyo, kutali kumulomo. Umulanga buti mukaako? Ibbaibbele likulwaizya Banakristo kutondezyanya “kweetelelana.” (1 Petro 3:8) Sena ulakonzya kucicita eeci ciindi mukaako nakatazidwe mumizeezo? Kuti koli ulakonzya kucita boobo ciyookugwasya kuciziba kwiingula.—Isaya 50:4.

10, 11. Mbuti mulumi mbwanga wabelesya kulaya kwa 1 Petro 3:7?

¹⁰ Kulemeka. Bamalumi Banakristo balaambilwa kukkala ‘kabotu abakazi babo, nkaambo mukazi uli mbuli cilongo cikompeme, mulumi nguuinda inguzu.’ (1 Petro 3:7) Kulemeka mukaintu wako kujatikizya kuziba mpindu  yakwe. Imulumi uukkala “kabotu” amukaintu wakwe ulayeeya kapati mbwalimvwa, inguzu zyakwe, maanu akwe, abulemu bwakwe. Alimwi weelede kuyanda kwiiya mbuli mbwalanga bamakaintu Jehova ambwayanda kuti kabeendelezegwa.

¹¹ Atwaambe muŋanda yenu kakuli nongo iigwasya kapati ingubauba loko. Sena inga tamukooibambilila na? Ijwi lyakuti “cilongo cikompeme” Petro wakalibelesya munzila njiyona eeyi, eelyo mulumi Munakristo ceelede kumupa kuti atondezye lweetelelo kumukaintu wakwe uuyandwa.

12. Mbuti mukaintu mbwanga watondezya kuti ulamulemeka kapati mulumaakwe?

¹² Ino Bbaibbele limupa malailile nzi walo mukaintu? Paulo wakalemba: “Mwanakazi alemye mulumi wakwe.” (Ba-Efeso 5:33) Mbubwena mukaintu mbwayandika kulimvwa kuti ulalemekwa akuyandwa kumukaakwe, mulumi awalo uyandika kulimvwa kuti ulalemekwa amukaintu wakwe. Mukaintu uulaa bulemu inga tanakwaambilizi tumpenda twamulumaakwe mubutaka, naba Munakristo na pe. Inga takoomusamununa bulemu bwakwe kwiinda mukumutongooka akumuubya-ubya kumbali naa kubuleya.—1 Timoteo 3:11; 5:13.

13. Mbuti mizeezo mbwiinga yaambwa munzila yaluumuno?

¹³ Eeci tacaambi kuti mukaintu takonzi kwaamba mbwayeeya. Kuti kakuli cimukatazya, ulakozya kucaamba mubulemu. (Matalikilo 21:9-12) Ikwaamba muzeezo wakwe kumulumaakwe kulakonzya kweezyanisigwa akumufwusila bbola. Ulakozya kulifwusa kabotu-kabotu kutegwa cimuubile kulijata, naa ulakonzya kulifwusa canguzu cakuti mane lyamucisa. Ino kaka cilainda kubota kuti boonse bobile kabaambaula caluse ikabotu-kabotu akulikasya kufwusana matongoosi!—Matayo 7:12; Ba-Kolose 4:6; 1 Petro 3:3, 4.

14. Ninzi ncoyelede kucita kuti mukaako katabikkili maanu kukubelesya njiisyo zyamu Bbaibbele mulukwatano?

¹⁴ Mbuli mbotwabona, injiisyo zya Bbaibbele zilakonzya  kumugwasya kuyaka lukwatano luli kabotu. Pele ino kuti mukaako tazibikkili maanu izyaamba Bbaibbele? Ncimwi buyo, nzinji zikonzya kucitwa ikuti mwalubelesya luzibo lwa Leza kulubazu lwenu. Petro wakalemba ategwa: “Anywebo nobanakazi, amulibombye kubalumi banu nobeni, kuti kwanooli bamwi bataswiililisyi kumakani, basanduke nkaambo kanyendelo zyabakazi babo, kuti tabaambilwi zintu, kukulangilila inyendelo zyanu zisalala nzimweendela cakuyoowa.” (1 Petro 3:1, 2) Aino inga cabeleka ncicona buyo eeco kumulumi uulaa mukaintu uutakwe amakani aamu Bbaibbele. Kufwumbwa mukaako ncanga wasala kucita, yebo injiisyo zyamu Bbaibbele azikupe kuba mukaakwe uuli kabotu. Luzibo lwa Leza alimwi lulakonzya kumupa kuba bazyali babotu.

KULELA BANA KWEENDELANA A LUZIBO LWA LEZA

15. Ino kulela kwabuzyali ikulubide mbuti mbokusiilwa bana, pesi mbuti ciyanza eeci mbocinga calesegwa?

¹⁵ Kubaa saha ansando ikwalo takupi muntu kuba sikufwala musongo. Mbubwena buyo, kubaa bana ikwalo takupi muntu kuba muzyali musongo. Ibazyali, mukuziba naa mukutaziba, balifwini kukomezya bana babo munzila eeyo balo njobakakomezegwa. Munzila eeyi ikulela kwabuzyali kulubide zimwi ziindi kusiilwa zyalani litobela. Kaambyo kaci Hebrayo kansiku kaamba kuti: “Bamawisi bakalya masaansa aapapa, lino meno aabana akaba abuye.” Nokuba boobo Imagwalo atondezya kuti muntu tayandiki buya kuti mane atobele nzila yakasiya bazyali bakwe. Ulakonzya kusala nzila imbi, yalo yeendelezegwa amilawo ya Jehova.—Ezekiele 18:2, 14, 17.

16. Nkaambo nzi ncocili cintu cipati kusanina mukwasyi wenu, alimwi eeci cibikkilizya nzi?

¹⁶ Jehova uyanda kuti bazyali Banakristo kababasololela bana babo akubabamba. Paulo wakalemba ategwa: “Na muntu tabambi basazinyina, kwaambisya bamuŋanda yakwe, wati oyo ulisowede lusyomo lwakwe, ulaindilila  akuliyooyo uutazumina.” (1 Timoteo 5:8) Ma! Akalala majwi aayo. Ikuzuzikizya mulimo wako wakusanina, walo uubikkilizya akupa nzyobayandika bana benu izyakumubili, zyakumuuya, alimwi azyakumoyo, ncoolwe kumuntu muna Leza alimwi mmukuli. Ibbaibbele lilapa njiisyo zyalo zinga zyagwasya muzyali kubabambila cilawo cibotu bana babo. Amulange zimwi eezi.

17. Ninzi ciyandika kuti bana benu babe amulawo wa Leza mumyoyo yabo?

¹⁷ Amupe cikozyanyo cibotu. Bamazyali bana Israyeli bakalaililwa: “Muleelede kwaaiyisya bana banu [majwi aa Leza], akwaambaula ngawo lyoonse, ciindi cakukala muŋanda aciindi cakweenda munzila, ciindi cakoona aciindi cakubuka.” Bamazyali bakeelede kuyiisya bana babo zyeelelo zya Leza. Pesi ooku kulaililwa kwakatalisigwa amajwi aakuti: “Aya majwi ngendamulailila buzuba obuno abe amyoyo yanu.” (Deuteronomo 6:6, 7) Ee, bamazyali tabakonzi kupa ncobatajisi. Milawo ya Leza ileelede kusaanguna kulembwa amyoyo yenu kuti kamuyanda kwiilembya amyoyo yabana benu.—Tusimpi 20:7; amweezyanye Luka 6:40.

18. Mukutondezya luyando, mbuti Jehova mbwapede cikozyanyo cibotu kapati kubazyali?

¹⁸ Amusyomezye luyando lwenu. Lyakabbapatizigwa Jesu, Jehova wakaambilizya ategwa: “Nduwe Mwanaangu ooyandwa, ndakondwa anduwe.” (Luka 3:22) Oobu Jehova wakazumina Mwanaakwe, ikumulumbaizya caantangalala akumusyomezya luyando Lwakwe. Kumbele Jesu wakazooambila Wisi ategwa: “Wakali kundiyanda nyika kiitanaanzwa.” (Johane 17:24) Aboobo mbomuli bazyali bana Leza amupe bana benu zitondezyo zyaluyando lwenu mukwaamba amumicito—alimwi eeci kamucicita kanjikanji. Lyoonse kamuyeeya kuti “luyandano lulayaka.”—1 Ba-Korinto 8:1.

19, 20. Ino kubalulamika kabotu bana kujatikizya nzi, alimwi mbuti bazyali mbobanga bagwasigwa acikozyanyo ca Jehova?

¹⁹ Kululamika. Ibbaibbele lilasimpya kwaamba mbokuyandika  kululamika muluyando. (Tusimpi 1:8) Ibazyali beeleba mukuli wabo wakusololela bana babo sunu inga bategwa mbaimbai baya kwaajana ncobeni mapenzi aacisya moyo. Nokuba boobo bamazyali balacenjezegwa kuti akwalo ooku bataciindilizi pe. “Anywebo numawisi, mutanoonyenukili bana banu, kuti batanoosululwi,” Paulo mbwaakalemba. (Ba-Kolose 3:21) Bamazyali beelede kulikasya kwiindilizya kululamika bana babo naa kuzumanana kubabwentela kulubizya kwabo akutongooka milimo njobasoleka.

²⁰ Jehova Leza, Taateesu wakujulu, ulapa citondezyo cibotu mukululamika. Kululamika kwakwe takwe nakwiindilizya pe. “Njoomuuma muciyanza ceelede buyo,” Leza mbwaakabaambila bantu bakwe. (Jeremiya 46:28) Bamazyali beelede kwiiya Jehova mukaambo aaka. Ikululamika kunga mane kwaakuzwa amumaanu antela ikwiindilila amulimo ngokucitilwa iwakubambulula akuyiisya ncobeni kulanyemya.

21. Mbuti bamazyali mbobanga babona naa kululamika kwabo kulabeleka?

²¹ Mbuti bamazyali mbobanga babona naa kululamika kwabo kulabeleka? Balakonzya kulibuzya kuti, ‘Ino kululamika kwangu kuleta nzi?’ Kweelede kakuyiisya. Mwana wenu weelede kuteelela ncali mukululamikwa. Bamazyali kumwi beelede kabayeeyede iziletwa akululamika kwabo. Masimpe, bunji bwabana cisaanguna kubacisa kululamikwa. (Ba-Hebrayo 12:11) Pesi kululamika takweelede kupa mwana kulimvwa kuyoowa naa kufwutatilwa naa kumupa muzeezo wakuti walo mbwabede buyo bumpelenge. Katanabalulamika bantu bakwe, Jehova wakati: “Utayoowi, . . . nkaambo mebo ndi anywe.” (Jeremiya 46:28) Ee, kululamika kweelede kucitwa munzila mwana wenu njanga waziba kuti muli anguwe alimwi muli bazyali basiluyando bagwasilizya.

 KULIJANINA “LULAYO”

22, 23. Mbuti mbomunga mwalijanina lulayo lwalo luyandika mukuyaka mukwasyi uuli kabotu?

²² Tulalumba kuti Jehova utupede zibelesyo nzyotuyandika kuti tuyake mukwasyi uuli kabotu. Pele kubaa zibelesyo ikwalo takuzulili pe. Tweelede kulizibizya kuzibelesya buluzi. Mucikozyanyo, sikuyaka ulakonzya kutalika ziyanza zibi zyakubelesya zibelesyo zyakwe. Ulakonzya kusika nkwabelesya zimwi mpoziteelede. Ikuti kwaba boobo inzila zyakwe zilalangilwa kapati kubamba zintu zitalondoledwe. Munzila iikozyenye, ndilyona lino mulakonzya kamuzi ziyanza zimwi zitagwasyi izyabendelela kunjila mumukwasyi wenu. Zimwi zilakonzya kazili zipati loko alimwi ziyumu kucinca. Nokuba boobo, amutobele malailile aa Bbaibbele: “Kuti musongo aswiilile akuliyungizizya lwiiyo, asimaanu alijanine lulayo.”—Tusimpi 1:5.

²³ Mulakonzya kulijanina lulayo kwiinda mukuzumanana kujana luzibo lwa Leza. Lyoonse kamusola kwiiya njiisyo zya Bbaibbele izijatikizya buumi bwamumukwasyi, kamubambulula bukkale bwanu mpobuyandika kucitwa boobo. Amubalangisye Banakristo basimide aabo ibapa citondezyo cibotu mulukwatano amubuzyali bwabo. Amubandike ambabo. Icipati kwiinda, amuzibikke mumaanza aa Jehova nzyomulibilika kwiinda mukupaila. (Intembauzyo 55:22; Ba-Filipi 4:6, 7) Ulakonzya kumugwasya kubaa buumi bwamukwasyi uuli kabotu bwalo bumulemeka.

Bupanduluzi buyungizidwe

AMULISUNKE LUZIBO LWENU

Mbuti kusyomeka, kubandika akulemekana ncokugwasya kuleta lukwatano luli kabotu?

Mmuunzila nzi bamazyali mobanga basyomezya bana babo kuti balabayanda?

Nzintu nzi zijatikizigwa mukululamika kabotu?

[Mibuzyo yaciiyo]

 [Cifwanikiso icili apeeji 147]