Leza Ncaakacita Ikuvwuna Bantu
Cibalo 7
Leza Ncaakacita Ikuvwuna Bantu
1, 2. (a) Mbuti silutwe wabasikalumamba mu Roma mbwaakamuziba Mwanaa Leza? (b) Nkaambo nzi Jehova ncaakalekela kuti Jesu afwe?
BUMWI buzuba masikati kumwaka, imyaka iitandila ku 2,000 eeyi yainda, umwi silutwe wabasikalumamba mu Roma wakeebela baalumi botatwe kabafwa buce-buce ilufwu lucisa kapati. Ikapati ooyu silumamba wakalangisya umwi akati kabo—Jesu Kristo. Jesu wakalikankaminidwe acisamu. Naaba masikati ijulu lyakasiya nocakaamba kusika ciindi calufwu lwakwe. Naakafwa, inyika yakazuzuma canguzu, eelyo silumamba wakakankamuka wati: “Anu ncobeni oyu muntu wakali Mwana a-Leza.”—Marko 15:39.
2 Imwanaa Leza! Ooyo silumamba wakaliluzi. Wakazwaa kubona cintu cipati kwiinda icalina citikide anyika. Kuziindi zimbi zyamusule, Leza lwakwe mwini wakamwiita Jesu kuti mMwanaakwe uuyandwa. (Matayo 3:17; 17:5) Ino nkaambo nzi Jehova ncaakamulekela kufwa Mwanaakwe? Nkaambo eeyi yakali njenzila ya Leza yakufwutula bantu kuzwa kucibi akulufwu.
WAKASALILWA MULIMO UULIBEDELEDE
3. Nkaambo nzi ncocakeelela ikuti Mwanaa Leza simuzyalwa alikke abe nguusalwa kucita mulimo oyu uulibedelede kujatikizya bantu?
3 Mbuli mbutwaiya kale mubbuku eeli, Jesu wakaliko kale katana kuba muntunsi. Utegwa “[m]Mwana a-Leza simuzyalwa alike” nkaambo Jehova lwakwe nguwakamulenga. Kuzwa waawo, Leza wakamubelesya Jesu mukulenga zintu zimbi zyoonse. (Johane 3:18; Ba-Kolose 1:16) Ikapati bantu Jesu wakali kubayandisya. (Tusimpi 8:30, 31) Anu Jehova ncaakasala Mwanaakwe simuzyalwa alikke kuti acite mulimo uulibedelede ciindi bantu nobakapegwa cisubulo cakufwa!
4, 5. Ntwaambo nzi Bbaibbele ntolyakaamba kujatikizya Lunyungu lwabu Mesiya, Jesu katana kusika anyika?
4 Ciindi naakali kukosola makani aa Adamu, Eva, alimwi a Satani mumuunda wa Edeni, ooyo muntu iwakali kuzooba Muvwuni kumbele, Leza wakamwaamba kuba “lunyungu.” Oolu Lunyungu, antela luzubo, lwakali kuza kuti lumane mapenzi oonse aakaleta Saatani Diabolosi, “muzoka waciindi.” Mane oolu Lunyungu lusyomezedwe lwakali kuzoomupwaya Saatani abaabo boonse bamutobela.—Matalikilo 3:15; 1 Johane 3:8; Ciyubunuzyo 12:9.
5 Mukwiinda kwamyaanda yamyaka, Leza bucebuce wakayubununa azimbi kujatikizya Lunyungu, lwalo munzila imwi ilwiitwa kuti Mesiya. Mbuli mbokutondezedwe accaati iili apeeji 37, ibusinsimi bunji-bunji bwakaamba tupango-pango tujatikizya zintu zinji zyamubuumi bwakwe bwaanyika. Mucikozyanyo, wakeelede kupenzegwa ciyoosya kutegwa azuzikizye mulimo wakwe mumakanze aa Leza.—Isaya 53:3-5.
NCAAKALI KUZOOFWIDA MESIYA
6. Mbuli bwaamba Daniele 9:24-26, ninzi Mesiya ncaakali kuzoocita, alimwi munzila nzi?
6 Ibusinsimi bulembedwe kuli Daniele 9:24-26 bwakaambilizya kuti Mesiya—Munanike wa Leza—wakali kuzoozuzikizya mulimo mupati. Wakali kuza kunyika “kuti insotoko zimane azibi zimanisigwe, milandu yabubi ilobelele, bululami buteeli buletwe.” Mesiya wakali kuzookugusya kusinganizigwa kwalufwu kubantu basyomeka. Ino wakali kuzoocicita buti eeci? Ibusinsimi oobo bulapandulula kuti “uyoonyonyoonwa,” antela kujaigwa.
7. Nkaambo nzi bama Juda ncobakali kupeda zituuzyo zyabanyama, alimwi eezi zyakali kwiiminina nzi?
7 Bana Israyeli bansiku bakaluuzi muzeezo wakumanya milandu. Mukukomba kwabo mu Mulawo Leza ngwaakabapa kwiinda muli Musa, bakali kutuula zipaizyo zyabanyama. Eezi zyakali kubayeezya bana Israyeli kuti bantu bayandika cimwi cintu cakumanya milandu, antela kuvwumba zibi zyabo. Mwaapostolo Paulo wakiifwiinsya-fwiinsya njiisyo eeyi munzila eeyi: “Takukwe kulekelelwa kwazibi mane do kukutila bulowa.” (Ba-Hebrayo 9:22) Banakristo tabali mu Mulawo wa Musa kubikkilizya anzyuuyanda, mbuli zipaizyo. (Ba-Roma 10:4; Ba-Kolose 2:16, 17) Alimwi balizi kuti zipaizyo zyabanyama tazikonzi kuleta kulekelelwa kwazibi kutamani alimwi kuzwide. Muciindi caboobo, eezi zituuzyo zyakupaizya zyakali kwiiminina cipaizyo camuulo mupati loko kwiinda wanzizyo—eeco ca Mesiya, antela Kristo. (Ba-Hebrayo 10:4, 10; amweezyanye a Ba-Galatiya 3:24.) Pele inga mwabuzya kuti, ‘Sena kwakali kuyandika ncobeni kuti mane Mesiya afwe?’
8, 9. Ndubono nzi ba Adamu a Eva ndubakasowa, alimwi mbuti micito yabo mbuyakajatikizya bazyalane babo?
8 Ee, Mesiya wakali kuyandika kufwa kutegwa bantu bafwutuke. Kutegwa tuteelele ncaakeelede kufwida, tweelede kuyeeya cakacitika mumuunda wa Edeni akusola kubona bupati bwaceeco ba Adamu a Eva ncobakasowa ciindi nobakazangila Leza. Bakabambilidwe buumi butamani! Mbubakali bana ba Leza, wakaliyanzene ambabo munzila iini-ini. Pele ciindi nobakakaka bulelo bwa Jehova, bakazisowa zyoonse eezyo akuleta cibi alufwu kubantu.—Ba-Roma 5:12.
9 Cakali mbuli kuti bazyali besu banyonyoona lubono lunji, akulinjizya mucikwelete cipati kapati. Ba Adamu a Eva bakacisiila bana babo eeco cikwelete. Akaambo kakuti teetwakazyalwa katulondokede katutakwe cibi, umwi aumwi wesu ulabisya alimwi ulafwa. Ciindi notuciswa antela notwaamba cimwi cintu caluciso ncotulombozya kuti kubota twacisyimbulula, tucitikilwa ceeco cakaletwa acikwelete ncotwakasiilwa—ikutalondoka kwabuntu. (Ba-Roma 7:21-25) Bulangizi bwesu buyeeme akujana ncaakasowa Adamu. Nokuba boobo, tatukonzi swebo kucita cimwi cintu cinga catupa kweelela buumi bwabuntu bulondokede pe. Akaambo kakuti bantu boonse mukutalondoka balabisya, toonse tweelela lufwu, kutali buumi.—Ba-Roma 6:23.
10. Ncinzi cakali kuyandika ikunununa ceeco Adamu ncaakasowa?
10 Nokuba boobo, sena kuli cakali kunga capegwa kucincanya abuumi obuya Adamu mbwaakasowa? Iceelelo ca Leza cabululami ciyanda kweelanya, “buumi kubuumi.” (Kulonga 21:23) Aboobo buumi bwakeelede kutuulwa kubbadelela buumi bwakasoogwa. Tabuli buyo kufwumbwa buumi ibwakali kunga bwazulizya. Intembauzyo 49:7, 8 ibaamba boobu bantu batalondokede: “Taakwe muntu uukonzya kunununa mweenzinyina, nanka kupa Leza cilubuzyo cabuumi bwakwe, (nkaambo cinunuzyo cabuumi bwabo tacuuliki, aboobo ulacileka lyoonse).” Sena lino nkokuti tacicikwe ambocicitwa? Peepe, tacili boobo pe.
11. (a) Ino bbala lya “cinunuzyo” lyaamba nzi muci Hebrayo? (b) Nguni alikke wakali kukonzya kunununa bantu, alimwi nkaambo nzi?
11 Mumulaka waci Hebrayo, ibbala lya “cinunuzyo” lyaamba mweelwe wamali uubbadelwa kunununa mwaange alimwi lyaamba a kweelanya. Ccita muntu uulaa buumi bulondokede nguukonzya kupa cituuzyo ceelene ancaakasowa Adamu. Kuzwa kuli Adamu, alikke muntu uulondokede iwakazyalwa anyika ngu Jesu Kristo. Aboobo Jesu, Ibbaibbele limwiita kuti “Adamu musyaalizi” alimwi lilatusyomezya kuti Kristo “wakalisanga mwini kuti anunune bantu boonse.” (1 Ba-Korinto 15:45; 1 Timoteo 2:5, 6) Kakuli Adamu wakasiila bana bakwe lufwu, Jesu walo upa kukona buumi butamani. Bbuku lya 1 Ba-Korinto 15:22 lilapandulula: “Nkaambo mbuli mbubafwa boonse muli-Adamu, mbubonya obo mbubayooponezegwa boonse muli-Kristo.” Aboobo Jesu munzila yeelela wiitwa kuti “Taateesu Uuteeli.”—Isaya 9:6, 7.
MBUCAKABBADELWA CINUNUZYO
12. Ndilili Jesu naakaba Mesiya, alimwi ninzila nzi njaakatola kuzwa waawo?
12 Icilimo mu 29 C.E., Jesu wakaunka kumusazinyina Johane kuyoobapatizigwa ikutondezya kulyaaba kwakwe kukucita kuyanda kwa Leza. Kuciindi eeco Jehova wakamunanika muuya uusalala Jesu. Oobu Jesu mbwaakaba Mesiya, antela Kristo, ooyo wakananikwa a Leza. (Matayo 3:16, 17) Kuzwa waawo Jesu wakuutalika mulimo wakwe wamyaka yotatwe acisela. Wakeenda mucisi cakwabo coonse, kayaabukambauka zya Bwami bwa Leza akuyobolola basikutobela basyomeka. Pele mbuli mbukwakaambilizidwe, kukazigwa kwakwe kwakavwula kufwambaana.—Intembauzyo 118:22; Incito 4:8-11.
13. Nzintu nzi zyakacitika izyakaleta lufwu lwa Jesu ndwaakafwa kasyomeka?
13 Mubusicamba Jesu wakaluleta antangalala ilweeno lwabasololi babukombi, eelyo bakayandaula nzila yakuti afwe. Limwi bakatalisya muzeezo mubyaabi walo wakali kubikkilizya akumwaaba, kumujata munzila iiteendelani amulawo, lubeta lutali mumulawo, akumubejekezya mulandu wakusola kwaatula bulelo. Jesu wakaumwa mbayi, wakaswidwa mate, wakasampaulwa, wakaumwa acimboko cakabambilidwe kuti cinengaule mubili wakwe. Mpoona mweendelezi muna Roma Ponto Pilato wakamupa cisubulo cakufwa acisamu cakupenzezya. Wakakankaminwa acisamu mpaakalengelela bwiimvwi. Kufwumbwa ayoya cakali kucisa, alimwi cakatola mawoola buya aakubwene kuti afwe. Mumapenzi oonse aayo, Jesu wakasyomeka kuli Leza cakulondoka.
14. Nkaambo nzi Leza ncaakamulekela Mwanaakwe kuti apenge mane afwe?
14 Aboobo bwakali buzuba bwa Nisani 14, 33 C.E., Jesu naakapa buumi bwakwe “kuti cibe cinunuzyo cakununuzya banji.” (Marko 10:45; 1 Timoteo 2:5, 6) Ikuzwa kujulu, Jehova wakali kukonzya kumubona Mwanaakwe uuyandwa kapenga mane wafwa. Nkaambo nzi Leza ncaakalekela cintu cibyaabi boobu kuti cicitike? Wakacita oobu nkaambo ulabayanda bantu. Jesu wakati: “Obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Johane 3:16) Alimwi lufwu lwa Jesu lutuyiisya kuti Jehova ngu Leza uululeme cakulondoka. (Deuteronomo 32:4) Bamwi balakonzya kulibuzya Leza ncaatakiibikka ambali njiisyo yakwe yabululami iiyanda buumi kubuumi akutabikkila maanu kukulungila kubisya kwa Adamu. Nkaambo kakuti Jehova lyoonse uliitobela milawo yakwe nokuba kuti cilamudulila kapati kucita boobo.
15. Mbokunga teecakali kunoolulama ikulekela Jesu kuti afwidilile, ninzi Jehova ncaakacita?
15 Alimwi akaambo kabululami bwakwe, Jehova wakali kuyanda kuti lufwu lwa Jesu lube amamanino aali kabotu. Nkaambo sena inga cinooluleme ikulekela Jesu musyomesi kuti aone mulufwu kusikila kutamani? Peepe! Mu Magwalo aaci Hebrayo kwaalisinsimidwe kuti uusalala wa Leza takakkalilili mucuumbwe pe. (Intembauzyo 16:10; Incito 13:35) Wakoona mucuumbwe mukati kamazuba otatwe, kumane Jehova Leza wakamubusya kubuumi waba muntu wamuuya singuzu.—1 Pita 3:18, Ci.
16. Ninzi Jesu ncaakacita naakapiluka kujulu?
16 Naakafwa, Jesu wakaaba buumi bwakwe bwabuntunsi kusikila kukabe kutamani. Naakabusigwa buyo kuti abe abuumi bwakujulu, wakaba muuya uupa buumi. Alimwi ciindi Jesu naakatanta kuya kubusena bwiinda kusalala kuli zyoonse, wakaswaangana alimwi a Wisi uuyandwa alimwi wakapa kuli Nguwe bulemu bwabuumi bwakwe bwabuntunsi ibulondokede. (Hebrayo 9:23-28) Ibulemu bwabuumi oobo budula lino bwakali kukonzya kubelesegwa kugwasya bantu bamvwa. Ino eeco caamba nzi kulindinywe?
CINUNUZYO CA KRISTO MBOCIMUJATIKIZYA
17. Mbuti mbokunga kwagwasya ikulekelela ooko kuyeeme acituuzyo ca Kristo cacinunuzyo?
17 Amuyeeye nzila zyotatwe mwalo cinunuzyo ca Kristo mocimugwasya noliba lino. Kusaanguna, cileta kulekelelwa kwazibi. Kwiinda mubulowa bwa Jesu butikide, tulaa “lunununo,” ee, “lulekelelo lwamilandu yesu.” (Ba-Efeso 1:7) Aboobo nokuba kuti tucitide cibi cipati, tulakonzya kulomba Leza kutulekelela muzina lya Jesu. Kuti naa tweempwa ncobeni, Jehova ulabubelesya bulemu bwacituuzyo ca Mwanaakwe ca cinunuzyo kulindiswe. Leza ulatulekelela, ikutupa cilongezyo camanjezeezya mabotu, muciindi cakusesa kulunga kwalufwu kwalo nkotweelede akaambo kakubisya.—Incito 3:19; 1 Petro 3:21.
18. Muunzila nzi cituuzyo ca Jesu mocitupa bulangizi?
18 Icabili, cituuzyo ca Kristo ca cinunuzyo citupa ntalisyo ya bulangizi bwakumbele. Mucilengaano, mwaapostolo Johane wakabona kuti “inkamu impati yabantu batabaliki kumuntu naba omwe” iyakufwutulwa kuzwa manyongwe aayoomanya bweende oobu bwazintu. Nkaambo nzi ncobayoofwutuka kakuli Leza wajaya bamwi ibanji boobo? Mungelo wakaambila Johane kuti ibamunkamu mpati “bakasanzya zikobela zyabo akuzitubya mubulowa bwa-Mwanambelele,” Jesu Kristo. (Ciyubunuzyo 7:9, 14) Kufwumbwa kuti katulaa lusyomo mubulowa bwa Jesu Kristo ibutikide alimwi katupona kweelana ambwayanda Leza, tunooli basalali kumeso aa Leza alimwi tunooli abulangizi bwabuumi butamani.
19. Mbuti cituuzyo ca Kristo mbocisinizya kuti walo a Wisi balamuyanda nywebo?
19 Icatatu, cituuzyo cacinunuzyo nce cisinizyo caluyando lwa Jehova icipati kwiinda. Lufwu lwa Kristo lwakatondezya micito yaluyando yobile yiinda kukomena muciindi coonse, koonse-koonse: (1) luyando lwa Leza mukututumina Mwanaakwe kuzootufwida; (2) luyando lwa Jesu mukulisungula kulituuzya kuti abe cinunuzyo. (Johane 15:13; Ba-Roma 5:8) Kuti katulaa lusyomo ncobeni, luyando oolu lulabeleka kuli umwi aumwi wesu. Mwaapostolo Paulo wakati: “Mwana a-Leza, nguwe wakandiyanda akulyaaba nkaambo kangu.”—Ba-Galatiya 2:20; Hebrayo 2:9; 1 Johane 4:9, 10.
20. Nkaambo nzi ncotweelede kubaa lusyomo mucituuzyo ca Jesu cacinunuzyo?
20 Aboobo atutondezye kulumba kuluyando lwakatondezya Leza a Kristo kwiinda mukubaa lusyomo mucituuzyo ca Jesu cacinunuzyo. Kucita boobu kutola kubuumi butamani. (Johane 3:36) Nokuba boobo, kufwutuka kwesu takali nkakaambo kapati kwiinda, kalo Jesu nkaakaponena mane akufwa anyika. Peepe, ikaambo kapati kwiinda nkaakali kubelekela nkaambo kainda ali kaaka, kalo kajatikizya zintu zyoonse. Mbuli mbotuyoobona mucibalo ciboola, ikaambo aako kalatujatikizya toonse nkaambo kalatondezya Leza ncalekelede bubi akupenga kuti zizumanane kwaciindi cilamfwu boobu munyika eeyi.
AMULISUNKE LUZIBO LWENU
Nkaambo nzi Jesu ncaakeelede kufwa kuti afwutule bantu?
Mbuti cinunuzyo mbucakabbadelwa?
Muunzila nzi momugwasigwa acinunuzyo?
[Mibuzyo yaciiyo]
[Cifwanikiso icili apeeji 67]
