Mbweendelezi Bwani Mbomweelede Kuzumina?
Cibalo 14
Mbweendelezi Bwani Mbomweelede Kuzumina?
1, 2. Sena yoonse misyobo yabweendelezi njaluciso? Amupandulule.
“BWEENDELEZI” ndibbala libacima bantu banji. Eeci ncintu cilimvwisya nkaambo bweendelezi kanjikanji bwali kubelesegwa bubyaabi—kumilimo, mumukwasyi, alimwi amumfwulumende. Ibbaibbele lyaamba mbozibede ncobeni zintu noliti: ‘Muntu waendelezya muntunyina kukumubisizya.’ (Mukambausi 8:9) Ee, banji balikweendelezya bambi kwiinda mumicito yakami-kami yakuligwasya beni.
2 Pesi tabuli boonse bweendelezi bwaluciso. Mucikozyanyo, kulakonzya kwaambwa kuti mubili wesu ulatweendelezya. “Ulatutuma” kuyoya, kulya, kunywa, akoona. Sena ooku nkudyaaminina? Peepe. Ikuzumina kucita zintu eezi ziyandika kulatugwasya. Nokuba kuti kulibombya kuzintu ziyanda mibili yesu kulakonzya kuba kwakutayanda, kuli bweendelezi bumwi bwa kulisungula buya kuti tulibombye. Amulange zikozyanyo zimwi eezi.
MWEENDELEZI MUPATI
3. Nkaambo nzi Jehova ncaelela kwiitwa kuti “Mwami”?
3 Mu Bbaibbele iziindi zisika kumyaanda, Jehova wiitwa kuti “Mwami.” Ibwami bwakwe bujatikizya bweendelezi bupati kwiinda. Ninzi cipa Jehova nguzu zyakubaa cuuno eeco? Ku Ciyubunuzyo 4:11 kulaingulwa ategwa: “Nduwe uuelede, O Mwami, kutambula bulemu alulemeko anguzu, nkaambo nduwe wakalenga zintu zyoonse, nkaambo kabukanze bwako nkizibeda, ankizyakalengelwa.”
4. Ino Jehova usala kubucita buti bweendelezi bwakwe?
4 Mbwali Mulengi wesu, Jehova ulaa nguzu zyakweendelezya kufwumbwa mbwayanda. Eeci inga cabaanga ncintu ciyoosya, ikapati twayeeya kuti Leza ngu “singuzu” zinji-zinji. Wiitwa kuti “Leza Singuzuzyoonse”—ibbala lyaamba nguzu zikoma muci Hebrayo. (Isaya 40:26; Matalikilo 17:1) Pesi Jehova ulatondezya nguzu zyakwe munzila iigwasya, nkaambo ibube bwakwe bupati nduyando.—1 Johane 4:16.
5. Nkaambo nzi ncocitakatazyi kulibombya kubweendelezi bupati bwa Jehova?
5 Nokuba kuti Jehova wakacenjezya kuti uyoopa cisubulo kulibasikubisya bateempwi, Musa wakamuzi kapati kuti ngu “Leza uusyomeka, uubamba cizuminano cakwe aluzyalo lwakwe kulibaabo bamuyanda akubamba imbeta zyakwe, mane kusikila kumazyalani aali cuulu.” (Deuteronomo 7:9) Amuyeeye buyo! Imweendelezi Mupati wakoonse-koonse takwe natusinikizya kumubelekela pe. Muciindi caboobo, tulaswena kulinguwe akaambo kaluyando lwakwe. (Ba-Roma 2:4; 5:8) Ikulibombya kubweendelezi bwa Jehova mane ncintu cikondelezya, nkaambo milawo yakwe njakuti limwi tugwasigwe.—Intembauzyo 19:7, 8.
6. Mbuti kaambo kabweendelezi mbukakabuka mumuunda wa Edeni, alimwi ncinzi cakazwa mumo?
6 Bazyali besu bakusaanguna bakabukaka bweendelezi bwa Leza. Bakali kuyanda kuti balisalile lwabo beni kuti icibotu acibi ncili. (Matalikilo 3:4-6) Aboobo cakacitika ncakuti bakatandwa mumunzi wabo wa Paradaiso. Kuzwa waawo Jehova wakazumizya bantu kubamba bweendelezi bunoobagwasya kukkala mubuleya cabulondo nokuba kuti tabalondokede. Mbweendelezi nzi bumwi oobu, alimwi Leza uyanda kuti katutaana ali kulibombya kulimbubo?
“BEENDELEZI”
7. Mbaani “beendelezi,” alimwi cili buti cuuno cabo kuceezyanya abweendelezi bwa Leza?
7 Mwaapostolo Paulo wakalemba ategwa: “Bantu boonse abalibombye kumaami aacisi. Nkaambo taakwe bwami cita buzwa kwa-Leza.” Mbaani aaba bategwa “maami”? Majwi aa Paulo mutupango tutobela atondezya kuti mbweendelezi bwamfwulumende zyabantu. (Ba-Roma 13:1-7; Tito 3:1) Jehova tali nguwe wakatalisya bweendelezi bwamfwulumende zyabantu pe, pesi nkozili akaambo kakuti ulizizumizizye. Aboobo Paulo wakali kukonzya kulemba kuti: “Maami aaliwo alibikidwe kwa-Leza.” Ino eci citondezya nzi kujatikizya bweendelezi bwaanyika? Citondezya kuti mbusyoonto antela mbuuba kubweendelezi bwa Leza. (Johane 19:10, 11) Aboobo ciindi nokuli kukazyanya akati kamulawo wamuntu amulawo wa Leza, Banakristo baleelede kusololelwa amanjezeezya abo aayiisidwe aa Bbaibbele. Beelede “kumvwa Leza kwiinda bantu.”—Incito 5:29.
8. Mbuti mbomugwasigwa abeendelezi, alimwi mbuti mbomunga mwatondezya kulibombya kulimbabo?
8 Pesi bunji bwaziindi beendelezi bamfwulumende balabeleka kabali ‘balanda ba-Leza bakutucitila cibotu.’ (Ba-Roma 13:4) Munzila nzi? Amuyeeye milimo minji-minji njobacita, mbuli kutola magwalo, bukwabilizi bwabamapulisa abwabasikuzima mulilo, kugwasilizya bulondo, alimwi alwiiyo. “Nciconya eco ncimutelela mutelo, nkaambo mbibasimilimo ba-Leza, bajatisya mulimo oyo nguwenya,” mbwaakalemba Paulo. (Ba-Roma 13:6) Mukutela naa muzintu zimbi ziyanda mulawo, tweelede “tubule akampenda.”—Ba-Hebrayo 13:18.
9, 10. (a) Mbuti beendelezi mbobali mububambe bwa Leza? (b) Nkaambo nzi ncokunga kwaba kulubila ikukazya beendelezi?
9 Zimwi ziindi beendelezi bazibelesya bubyaabi nguzu zyabo. Sena eeci cilatwaangulula kumukuli wakuzumanana kulibombya kulimbabo? Peepe taciciti obo. Jehova uliibona micito yabeendelezi aaba imibi. (Tusimpi 15:3) Oobu mbwalekelede bulelo bwabantu tacaambi kuti ulalupuulazya lweeno lwambubo; aswebo takwe natuyanda kucita boobo pe. Ncobeni, Leza ino-ino “uyoopwayaula akumanisya mami aya oonse,” akubikka bulelo bwamfwulumende yakwe mwini iiluleme mubusena bwangawo. (Daniele 2:44) Pele mane cikacitike eeci, beendelezi babeleka mulimo uugwasya.
10 Paulo wakapandulula ategwa: “Oyo uulwisya bwami ulakazya cintu cibikwa kwa-Leza.” (Ba-Roma 13:2) Beendelezi “[n]cintu cibikwa” kuli Leza mukuti balabamba bulondo buli mbobubede, bwalo bunga bwatanooliwo kunoovwulide manyongwe alupilingano. Kubukazya inga takuzuminani amagwalo pe alimwi nkufwubaala. Mucikozyanyo: Amuyeeye kuti mwalyaandwidwe kucibbadela eelyo cicisa cisumidwe ntali. Nokuba kuti ntali tazili zyamumubili, kuli mulimo ngozibeleka kwakaindi kasyoonto. Kuzibindila kuzigusya inga kwaba kutoneka. Munzila njiyona, bweendelezi bwamfulumende zyabantu tanaakali makanze aa Leza aakusaanguna. Pesi kusikila Bwami bwakwe bukalele anyika cakumaninina, mfwulumende zyabantu nzezijisilizi maleya antoomwe, imulimo weendelana ancayanda Leza kuciindi cino. Aboobo tweelede kuzumanana kulibombya kubeendelezi, kumwi katubikka mulawo wa Leza abweendelezi bwakwe ambele.
BWEENDELEZI MUMUKWASYI
11. Mbuti mbomunga mulapandulula njiisyo yabusilutwe?
11 Imukwasyi ncecibeela cabuleya icisyoonto. Mukati mulinguwo, mulumi alimwi amukaintu balakonzya kujana cilongwe cikkomanisya, alimwi bana balakonzya kukwabililwa akuyiisigwa mbokukkalwa wakomena. (Tusimpi 5:15-21; Ba-Efeso 6:1-4) Bubambe oobu bubotu buyandika kweendelezya munzila iipa banamukwasyi kukkala muluumuno alukamantano. Inzila ya Jehova yakucita ceeci nkwiinda munjiisyo yabusilutwe, yalo yaambwa mumajwi masyoonto aaya aajanika ku 1 Ba-Korinto 11:3: “Mutwe wamwaalumi umwi aumwi ngu-Kristo, awalo mutwe wamwanakazi ngumwaalumi, awalo mutwe wa-Kristo ngu-Leza.”
12, 13. Nguni mutwe mumukwasyi, alimwi ninzi cinga cayiigwa munzila ya Jesu yakucita busilutwe?
12 Mulumi ngo mutwe wamukwasyi. Pesi awalo ulaa mutwe wakwe—ooyu ngu Jesu Kristo. Paulo wakalemba ategwa: “Anywebo nobalumi, amuyande banakazi banu, mbuli Kristo mbwaakayanda imbungano akulyaaba nkaambo kanjiyo.” (Ba-Efeso 5:25) Mulumi ulatondezya kulibombya kwakwe kuli Kristo ciindi naendelezya mukaintu wakwe munzila yalo Jesu mwaali kweendelezya mbungano lyoonse. (1 Johane 2:6) Jesu ulipedwe bweendelezi bupati, nokuba boobo ulabucita kabotu-kabotu, caluyando, alimwi amububombe moyo. (Matayo 20:25-28) Naakali muntunsi Jesu takwe naakazibelesya bubyaabi nguzu zyakwe zyabweendelezi. Wakali mbubwena mbwaakaamba naakati “ndilibombede, ndi mutete moyo,” alimwi basikumutobela wakabaita kuti “beenzuma” kutali kuti “bazike.” Wakabasyomezya ategwa: “Mulakatulukwa mumyoyo yanu,” eelyo ncencico ncicona eeco ncaakabagwasya kucita.—Matayo 11:28, 29; Johane 15:15.
13 Cikozyanyo ca Jesu ciyiisya bamalumi kuti busilutwe bwa Bunakristo tacili cuuno cakukoma kwabukali pe. Muciindi caboobo ncuuno cabulemu aluyando lwakulyaaba. Eeci caamba kuti kwiina kupenzya mukaako naaba amubili nomuba mumajwi. (Ba-Efeso 4:29, 31, 32; 5:28, 29; Ba-Kolose 3:19) Kuti mulumi Munakristo kamupenzya boobu mukaintu wakwe, micito yakwe imbi imibotu inga yaba yabuyo, alimwi mipailo yakwe inga yaingwa.—1 Ba-Korinto 13:1-3; 1 Petro 3:7.
14, 15. Ino mbuti luzibo lwa Leza mbolugwasya mukaintu kulibombya kumulumaakwe?
14 Ciindi mulumi naiya cikozyanyo ca Kristo, cilamuubila mukaintu wakwe kutobela majwi aali ku Ba-Efeso 5:22, 23 aakuti: “Nubanakazi, amulibombye kubalumi banu mbuli mbumulibombya kuli-Leza. Nkaambo mulumi ngumutwe wamukakwe, mbubonya mbuli Kristo mbwali mutwe wambungano.” Mbubwena mulumi mbweelede kulibombya kuli Kristo, mukaintu weelede kulibombya kumulumaakwe. Alimwi Bbaibbele lilacisalazya nolyaamba kuti bamakaintu bali kabotu baleelede kulemekwa akutembaulwa nkaambo kabusongo bwabo bwabuna Leza abusungu kumilimo.—Tusimpi 31:10-31.
15 Kulibombya kwamukaintu Munakristo kumulumaakwe nkwakweeleka. Eeci caamba kuti Leza nguweelede kumvwigwa mubusena bwamuntu naa kulibombya mukaambo kamwi kakulangilwa kutyola mulawo wa Leza. Neliba leelyo, eeco mukaintu ncasala kucita ceelede kuubizigwa “amoyo mubombe mutontozi.” Ceelede kulibonya kuti luzibo lwa Leza lwamupa kuba mukaintu uuli kabotu. (1 Petro 3:1-4) Ncicona eeci cilakonzya kwaambwa kujatikizya mwaalumi Munakristo uulaa mukaintu uutasyomi. Kutobela njiisyo zya Bbaibbele kweelede kumupa kuba mulumi uuli kabotu.
16. Mbuti bana mbobanga balaiya cikozyanyo ncaakapa Jesu ciindi naakali mukubusi?
16 Ba-Efeso 6:1 ilaamba mukufwiinsya-fwiinsya ncobeelede kucita bana, kaiti: “Amulemeke bazyali banu mu-Mwami, nkaambo cililuleme kucita obo.” Banakristo bana batobela cikozyanyo ca Jesu, walo wakazumanana kulibombya kubazyali bakwe naakali kuyaabukomena. Kali musankwa uumvwa, “wakakomena mubusongo aciimo, amukukonda Leza abantu.”—Luka 2:51, 52.
17. Munzila iili yoonse oomo bazyali mobacitila bweendelezi ikonzya kubapa kuba buti bana babo?
17 Inzila bazyali njobeendelezya mikuli yabo ilakonzya kupa kuti bana bakabe bantu balemeka bweendelezi naa bazangi. (Tusimpi 22:6) Aboobo bazyali balakonzya kulibuzya kuti, ‘Sena bweendelezi bwangu ndilabucita caluyando antela cabukali? Sena ndimuntu uuzumizya bubi?’ Muzyali muna Leza weelede kuba siluyando silweetelelo, pesi kali muyumu kukutobelesya njiisyo zina Leza. Cileelela Paulo ncaakalemba kuti: “Anywebo numawisi, mutanooluvukili bana banu [icaamba kuti, ‘kubasoka kuti banyeme’], pele amubalele mulwiiyo lwa-Mwami amumilazyo yakwe.”—Ba-Efeso 6:4; Ba-Kolose 3:21.
18. Mbuti kululamika kuzwa kubazyali mbokweelede kucitwa?
18 Bazyali beelede kulangisya nzila zyabo zyakuyiisya, ikapati kuti kabayanda kuti bana babo kabali bana bamvwa kutegwa kababapa kukondwa. (Tusimpi 23:24, 25) Mu Bbaibbele lulayo ncecintu cakutaanguna kumakani aamalailile. (Tusimpi 4:1; 8:33) Kuswaangene aaluyando abubombe, kutali aabukali aluciso. Aboobo bazyali Banakristo beelede kubelesya busongo akubaa camba ciindi nobalulamika bana babo.—Tusimpi 1:7.
BWEENDELEZI MUMBUNGANO
19. Mbuti Leza mbwapede bulondo bubotu mumbungano ya Bunakristo?
19 Akaambo kakuti Jehova ngu Leza mulondo, ncintu camaanu ikuti inga ulabikka busolozi mbwapede nguzu ibweendelene kabotu akati kabantu bakwe. Aboobo ubikkide Jesu kuti kali Mutwe wambungano ya Bunakristo. (1 Ba-Korinto 14:33, 40; Ba-Efeso 1:20-23) Mubusololi bwa Kristo butalibonyi ameso, Leza wasungula bubambe bwalo baalu babikkidwe mumbungano imwi aimwi mobeembela butanga cakuyandisya, cakulisungula, acaluyando. (1 Petro 5:2, 3) Bakutausi balabagwasya munzila zyaandeene-andeene akucita milimo iigwasya mukati mumbungano.—Bafilipi 1:1, Ci.
20. Nkaambo nzi ncotweelede kuba bantu balibombya kubaalu Banakristo babikkidwe, alimwi nkaambo nzi eeci ncocigwasya?
20 Kujatikizya baalu Banakristo, Paulo wakalemba ategwa: “Kamubaswiililisya baalu banu, mulitesye kulimbabo, nkaambo mbabalangilila myuuya yanu, alimwi babaanga basikuyoolyaambilila lwabo beni. Amusungwaale kuti kabacita boobo cakubotelwa, citali cakuusa, nkaambo eco tacimuleteli kululama pe.” (Ba-Hebrayo 13:17) Mubusongo Leza wapa balangizi Banakristo mukuli wakulanganya ziyandika kulubazu lwakumuuya kulibaabo bali mumbungano. Aaba baalu tacili ciinga cabasololi babukombi pe. Mbabelesi alimwi mbazike ba Leza, ibabelekela zintu ziyandika kubakombinyina, mbubwena mbuli bwakacita Simaleleesu, Jesu Kristo. (Johane 10:14, 15) Ikuziba kuti kuli bamaalumi beelela munzila ya Magwalo ibabikkila maanu kukusumpuka akukomena kwesu kwakumuuya kulatukulwaizya kuba bantu bamvwida alimwi balibombya.—1 Ba-Korinto 16:16.
21. Mbuti baalu babikkidwe mbobasola kugwasya Banakristonyina munzila yakumuuya?
21 Zimwi ziindi mbelele zilakonzya kuleya naa kuba muntenda kuzintu zyakunyika zinga zyabaletela mapenzi. Kabasolwedwa a Mweembezi Mupati, ibaalu mbobali beembezi basyoonto balazilanganya eezyo nzyobayandika aabo bali mumaanza abo akusungwaala kubapa lugwasyo lubageme. (1 Petro 5:4) Balabaswaya basimbungano akubakulwaizya. Mbobazi kuti Diabolosi ulayanda kunyonganya luumuno lwabantu ba Leza, baalu balabelesya busongo buzwa kujulu mukweendelezya penzi lili lyoonse. (Jakobo 3:17, 18) Balabeleka canguzu kubamba lukamantano mulusyomo, icintu calo Jesu lwakwe ncaakapailila.—Johane 17:20-22; 1 Ba-Korinto 1:10.
22. Ndugwasyo nzi baalu ndobapa ciindi nokuli kubisya?
22 Ino kuti Munakristo wapenzegwa abubi naa watyompokelwa akaambo kakubisya? Kulaya kwa Bbaibbele ikuumbulizya amipailo yabaalu iizwa kunsi aamoyo kwiiminina nguwe zilakonzya kumusilika munzila yakumuuya. (Jakobo 5:13-15) Aaba baalumi babikkidwe aamuuya uusalala, alimwi bajisi nguzu zyakululamika akusinsa baabo kufwumbwa batola nzila yakucita zibi naa ibabubikka muntenda busalali bwambungano bwakumuuya abwakulilemeka. (Incito 20:28; Tito 1:9; 2:15) Kutegwa mbungano icaale kiisalala, umwi aumwi uyandika kuti aambe ibambi nobabisya kapati. (Levitiko 5:1) Kuti Munakristo wacitide cibi cipati wakutambula kululamikwa akusinswa kwamu Magwalo akulitondezya kweempwa ncobeni, uyoogwasigwa. Aino basikutyola mulawo wa Leza bazumanana alimwi bateempwi balagwisigwa.—1 Ba-Korinto 5:9-13.
23. Ncinzi balangizi Banakristo ncobapa kugwasya mbungano?
23 Ibbaibbele mukusinsima lyakaamba kuti mubusolozi bwa Jesu Kristo Mwami, baalumi basimide kumuuya bayoobikkwa kuti kabaumbulizya, kabakwabilila, akukatalusya bantu ba Leza. (Isaya 32:1, 2) Bakali kuzoosololela mubukambausi, bweembezi, alimwi abufwundisi kutegwa basumpule kukomena kwakumuuya. (Ba-Efeso 4:11, 12, 16) Nokuba kuti balangizi Banakristo zimwi ziindi balakonzya kusinsa, kutapatila akukombelezya basilusyomonyina, ikwiinda mukubelesya Jwi lya Leza, baalu balagwasya kubamba boonse kuti kabali munzila yabuumi.—Tusimpi 3:11, 12; 6:23; Tito 2:1.
AMUZUMINE BWEENDELEZI MBULI MBWABULANGA JEHOVA
24. Muukaambo nzi motusunkwa buzubaa buzuba?
24 Mwaalumi amukaintu bakusaanguna bakasunkwa mukaambo aaka kakulibombya kubweendelezi. Tacili cintu cigambya ikuti musunko uukozyenye ayuulya ulatusikila buzubaa buzuba. Saatani Diabolosi wasumpula muuya wabuzangi akati kabantu. (Ba-Efeso 2:2) Inzila yalwaanguluko ilatondezegwa cakoongelezya mbuli kuti ninzila iili kabotu kwiinda yakulibombya.
25. Nimpindu nzi iijanika mukukaka muuya wanyika wabuzangi amukuba bantu balibombya kubweendelezi Leza mbwacita naa mbwazumizya?
25 Pesi tuleelede kukaka muuya wanyika wabuzangi. Mukucita boobu tuyoojana kuti kulibombya kwabuna Leza kuletela bulumbu bupati. Mucikozyanyo, tatukabi akulibilika nokuba kutyompokelwa ooko kufwini kuba kulibaabo baliletela mapenzi kuzwa kubeendelezi bacisi. Tulaacesya manjaka alo aavwulide mumikwasyi minji. Alimwi tuyoojana mpindu mukuyanzana caluyando abasilusyomoma Banakristo. Icipati cini-cini ncakuti kulibombya kwesu kwabuna Leza kuyootupa kuyanzana a Jehova, Mweendelezi Mupati.
AMULISUNKE LUZIBO LWENU
Ino Jehova ubucita buti bweendelezi bwakwe?
Mbaani “beendelezi,” alimwi mbuti mbotuzumanana kulibombya kulimbabo?
Mmukuli nzi njiisyo yabusilutwe ngwiipa umwi aumwi wabanamukwasyi?
Mbuti mbotunga twatondezya kulibombya mumbungano ya Bunakristo?
[Mibuzyo yaciiyo]
[Kabbokesi kali apeeji 134]
BALALIBOMBYA, TABANYONYOONI
Kwiinda muncito yabo yakukambauka kubuleya, Bakamboni ba Jehova batondezya kuti Bwami bwa Leza mbobulangizi bwelikke bwaluumuno lwini akuliiba. Pesi aaba bantu ibasungu kwaambilizya Bwami bwa Leza tabali basikunyonyoona mfwulumende pe eezyo zilela nkobakkala. Muciindi caboobo, Bakamboni bali akati kabana bacisi aabo bainda kukulemeka akukutobela milawo. “Kuti zikombelo zyoonse nozyali mbuli bakamboni ba Jehova, nokutakwe kujayana, kubbidana, kusunda, bakaili amabbomba aanyukiliya,” mbwaakaamba umwi walupatipati mucisi cina Afulika. “Inga milyango tiinookkiigwi buzubaa buzuba.”
Mbobakazi kaambo aaka, balupatipati mumanyika manji balikuzumizizye kukambauka kwa Bakamboni kuti kakuzumanana cakutasinkililwa. Mumanyika ambi, kukasya antela kusinkilila kwagwisigwa ciindi beendelezi nobabona kuti Bakamboni ba Jehova mbantu baleta bubotu. Cili mbubwena bwakaamba mwaapostolo Paulo kujatikizya kumvwida beendelezi naakati: “Mbubo cita ziluleme, eelyo muleli uyookulumbaizya.”—Baloma 13:1, 3, Ci.
