Mulakonzya Kukondwa Kumbele!
Cibalo 1
Mulakonzya Kukondwa Kumbele!
1, 2. Ncinzi Mulengi wenu ncayanda kuti kamulaaco?
IKUJATANA cakukondwa amuntu ngomuyanda. Ikugwagwamuka kuseka ciindi nomulya cilyo cibotu antoomwe abeenzinyoko. Ikubotelwa kweebelela bana benu kabasobana cakutangala. Iziindi zili mbuli zeezi nziindi zikonda mubuumi. Pele kubantu banji, buumi bubaanga bwiide kuleta mulongo wamapenzi. Kuti kacili eeci ncecali kumucitikila, amulimbe camba.
2 Nkuyanda kwa Leza ikuti kamulaa kukkomana kukkalikide muziimo zibotu loko mucilawo cibotu. Eeci tacili ciloto buyo, nkaambo kayi Leza ulamutambikizya kkii wabukkale bwakukkomana boobu kumbele. Kkii ooyu nduzibo.
3. Nduzibo nzi lutegwa ngokkii wabukkale bwakukkomana, alimwi nkaambo nzi ncotunga twaba masimpe kuti Leza ulakonzya kupa luzibo oolo?
3 Aawa twaamba luzibo lwamusyobo uulibedelede lwalo lwiinda kule-kule abusongo bwabuntunsi. Lwalo ndondulo “luzibo lwa-Leza.” (Tusimpi 2:5) Ikutandila kumyaka 2,000 eeyi yainda, sikulemba Bbaibbele umwi wakati: “Maanda oonse alijisi bakaayaka, pele Leza walo ngowakayaka zintu zyoonse.” (Ba-Hebrayo 3:4) Amuyeeye iluzibo Sikupanga zintu zyoonse ndwajisi! Ibbaibbele lyaamba kuti Leza ulazibala akuzyuulika mazina inyenyeezi. Mmuzeezo ugambya kapati ooyo, nkaambo kayi kuli myaanda yazyuulu zyama miliyoni aanyenyeezi mubbalabala lyesu, alimwi basikwiiya zyamujulu balati kuli mabbalabala aasika ndiza kumwaanda wazyuulu zyama miliyoni! (Intembauzyo 147:4) Alimwi Leza ulizi zyoonse kujatikizya ndiswe, aboobo nguni umbi uunga ulapa kwiingula kubotu kumibuzyo mipati iijatikizya buumi ikwiinda nguwe?—Matayo 10:30.
4. Nkaambo nzi ncotunga Leza twamulangila kutupa malailile aakutweendelezya, alimwi ndibbuku nzi lizuzikizya kuyandika ooku?
4 Amweezyeezye baalumi bobile basola kubamba myootokala yabo. Umwi mukutyompokelwa watula zibelesyo. Uumwi amoyo omwe wacilulamika cilubide, wamunyona kkii, wiide kumwetamweta injini nkwiitalika kulila cakukkalikila. Inga tamukoopengana ikusola kuziba kuti nguuli uujisi bbuku lyamalailile kuzwa kuli basikupanga. Sena tuuli muzeezo wamaanu ikuti Leza inga ulapa malailile aakutweendelezya mubuumi? Mbuli mbomunga munoozi, mbubwena oobo Ibbaibbele mbolyaamba—ikuti ndibbuku lyamalailile abusolozi kuzwa kuli Sikutulenga, lyalo libambilidwe kupa luzibo lwa Leza—2 Timoteo 3:16.
5. Ino lugwasya buti luzibo luli mu Bbaibbele?
5 Ikuti naa mmasimpe mbuli mbolyaamba Ibbaibbele, amuyeeye buyo mbono zyaluzibo ndolyeelede kuti bbuku eelyo lilijisi! Ku Tusimpi 2:1-5, lilatukulwaizya kujana busongo akubuyandaula mbuli mbotunga tulayandaula lubono lusisidwe—kutali mumavwu aakuyeeya kwabuntunsi, pele mu Jwi lyakwe mwini Leza. Ikuti twayandaula moomo, tuya “kujana luzibo lwa-Leza.” Mbokunga Leza ulizi mpotugolela alimwi anzyotuyandika, ulatupa malailile aayootugwasya kupona buumi bwaluumuno akukondwa. (Intembauzyo 103:14; Isaya 48:17) Ikuyungizya ali ceeci, iluzibo lwa Leza lulatupa makani mabotu aakkomanisya.
BUUMI BUTAMANI!
6. Ino Jesu Kristo wakapa cisyomezyo nzi kujatikizya luzibo lwa Leza?
6 Imuntu uuzizilwe iwakaliko ncobeni Jesu Kristo ulacipandulula cibeela eeci caluzibo lwa Leza mumajwi aalimvwisya. Wakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Amuyeeye buyo—iluzibo lutola kubuumi butamani!
7. Ino kuli citondezyo nzi cakuti Leza takwe nayanda kuti katufwa?
7 Mutaide kuti ibuumi butamani nciloto buyo. Amulange mbuli mubili wamuntu mbuupangidwe. Ulaanzidwe munzila mbotu kapati iyakukonzya kulabila, kumvwa, kununkizya, kubona, akwaampa. Kuli zinji anyika izibotela zizyo zyesu—bulotwe, kusiba kunoneezya ikwatuyuni, malubaluba aanunkilila, zilawo zyeebeka, azilongwe zikondelezya! Abwalo bongo bwesu bugambya bulawiinda kule-kule muncini wakompyuta mupati loko, nkaambo bulatugwasya kuziba zintu zyoonse zili boobu akubotelwa anzinzyo. Mwayeeya sena Mulengi wesu uyanda kuti katufwa akuzisiya zintu zyoonse eezi? Sena inga tacikooinda kumvwika ikwaamba kuti uyanda kuti katupona kabotu akubaa buumi kukabe kutamani? Ncencico eeci iluzibo lwa Leza ncolunga lwamuletela.
BUUMI MU PARADAISO
8. Ino Bbaibbele lyaamba nzi kujatikizya bukkale bwabantu kumbele?
8 Eeco Bbaibbele ncolyaamba kujatikizya mbuli bunooli nyika abantu kumbele cilakonzya kwaambwa mubbala lyomwe—Paradaiso! Jesu Kristo wakayaamba paradaiso kumuntu wakalaafwi kufwa naakati: “Tunooli ayebo mu-Paradaiso.” (Luka 23:43) Cakutadooneka, ikwaamba Paradaiso ooyu muntu kuleelede kwakamwiibalusya bukkale bubotu bwabazyali besu bataanzi, ba Adamu a Eva. Ciindi Leza naakabalenga, bakalilondokede alimwi bakakkede mumuunda mubotu ooyo Mulengi ngwaakaanzide akubikka. Wakeelelwa kwiitwa kuti muunda wa Edeni, icaamba kukondelezya.
9. Ino cakali buti ikukkala mu Paradaiso ntaanzi?
9 Ino wakali mubotu akaka munzi ooyo! Yakali paradaiso ncobeni. Akati kamasamu aanjiyo aaebeka kwakali imwi iizyala micelo inona. Kabayaabweendeenda mucilawo cabo, kunywa maanzi aaco mabotu, akucela micelo kumasamu aaco, ba Adamu a Eva teebakajisi kaambo kakulibilika antela kuyoowa pe. Nobaba banyama teebakali kuyoosya, nkaambo kayi Leza wakapede muntu amukaintu wakwe bweendelezi bwabo banyama boonse ibwaluyando. Ikuyungizya ali zeezi, aaba bantu bobile bakusaanguna bakali kupona kabotu loko. Kufwumbwa buyo kuti nibakamvwida Leza, buumi bubotu butagoli bwakali kubalindila kumbele. Bakapegwa mulimo uukkomanisya wakubamba munzi wabo wa Paradaiso. Kunze lyaboobo, Leza wakapa ba Adamu a Eva nguzu zyakuti “[ba]zuzye nyika akwiibombya.” Balo abana babo bakeelede kuti batantamune minyinza ya Paradaiso mane nyika yoonse bube busena bweebeka akukondelezya.—Matalikilo 1:28.
10. Ciindi Jesu naakaamba zya Paradaiso, ninzi ncaakali kuyeeya?
10 Nokuba boobo, ciindi Jesu naakaamba Paradaiso, takwe naakali kulomba muntu ooyu wakalaafwi kufwa kuti ayeeye zyamuparadaiso kaindi. Peepe, Jesu wakali kwaamba zyakumbele! Wakalizi kuti woonse munzi wesu anyika uyooba paradaiso. Oobu Leza wakali kuzoozuzikizya makanze aakwe mataanzi kubantu akunyika yesu. (Isaya 55:10, 11) Ee, Paradaiso iyoopilusigwa! Ino nkooko inooli buti yalo? Aliingule Jwi lya Leza, Ibbaibbele Lisalala.
BUUMI MU PARADAISO IIPILUSIDWE
11. Mu Paradaiso iipilusidwe, kuciswa, kucembaala, alufwu ziyoocitwa nzi?
11 Kuciswa, kucembaala, alufu tazicinooliwo. “Lino meso aaboofu ayoobononona, amatwi aabasinke ayoosinkuka. Cilema unooya busotauka mbuli insya, alulimi lwasyataambi luyooimbisya.” (Isaya 35:5, 6) “Leza mwini uzookala ku[bantu], azoobe Leza wabo. Nkabela uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:3, 4.
12. Nkaambo nzi ncotunga twaba masimpe kuti takukabi milandu, lunya, abumpelenge mu Paradaiso iiza kumbele?
12 Milandu, lunya, abumpelenge ziyoolobela limwi. “Nkaambo basizibi balanyonyooka . . . Kaba kaindi kaniini sizibi takooyooba wo . . . takooyooba nkuko. Pele babombemyoyo bayoovuba nyika.” (Intembauzyo 37:9-11) “Pele basizibi bayoonyonyoonwa munyika, abasilweeno bayoogwisigwa.”—Tusimpi 2:22.
13. Ino Leza uyooleta buti luumuno?
13 Luumuno luyoozula munyika yoonse. “[Leza] ulalesya inkondo mane kusikila kumamanino aanyika, uladunsaula mata akutyolaula masumo.” (Intembauzyo 46:9) “Mumazuba aakwe bululami bukomene, aluumuno luvule ciindi coonse mwezi nuuciliwo.”—Intembauzyo 72:7.
14, 15. Ino Bbaibbele lyaamba nzi kujatikizya maanda, milimo azyakulya mu Paradaiso iipilusidwe?
14 Kubaa maanda kunoosyomezedwe alimwi milimo inookondelezya. “Lino bayooyaka maanda akukala mulingao . . . Maanda ngebayaka taakooyookalwa umbi, amicelo njibabyala tiikooyooligwa umbi pe, nkaambo mazuba aabantu bangu ayooba mbuli mazuba aamusamu, abantu mbensalide bayoongozya milimo yamaanza aabo. Tabakooyoobeleka cabuyo nikuba kubelekela mapenzi, nkaambo bayooba bana bacoolwe ca-Jehova, alunyungu lwabo mbubonya.”—Isaya 65:21-23.
15 Izyakulya zigwasya zinooli maunda-maunda. “Maila avule ansi, atala lyazilundu.” (Intembauzyo 72:16) “Nyika yapa micelo yayo; Leza, Leza wesu, watulongezya.”—Intembauzyo 67:6.
16. Nkaambo nzi buumi mu Paradaiso ncobunookkomanisya?
16 Buumi butamani anyika yaparadaiso bunookondelezya. “Balulami bayookona nyika, bayookala alinjiyo lyoonse.” (Intembauzyo 37:29) “Inkanda amatongo zyoonse ziyoosekelela, alyalo igundu liyookondwa akusyuuka malubaluba aaebeka.”—Isaya 35:1.
LUZIBO ABUKKALE BWENU KUMBELE
17. (a) Ninzi ncomweelede kucita kuti buumi mu Paradaiso kamubulombozya? (b) Ino tuzi buti kuti Leza uyooleta kucinca kupati anyika?
17 Ikuti Paradaiso kacili cintu ncomulombozya, kutabi cimusinkilila kuti mujane luzibo lwa Leza. Ulabayanda bantu alimwi uyooleta kucinca ooko kuyandika mukwiipanga kuba paradaiso nyika. Nkaambo kayi kuti nywebo nomwalijisi nguzu zyakumanizya kupenga akutalulama ooko kwalo kuvwulide kapati munyika, sena inga tamuciti oobo? Ino walo Leza inga twamulangila kulezya aawo? Kujanika kuti Bbaibbele mumabala aamvwika kapati lilaamba zyaciindi Leza nayoogusya bweende oobu ibuzwide manjaka akubikka bulelo bululeme mubusena bwambubo. (Daniele 2:44) Pesi Bbaibbele taligoleli buyo akutwaambila zintu eezi. Lilatutondezya mbuli mbotunga twafwutuka kuya munyika ya Leza mpya iisyomezedwe.—2 Petro 3:13; 1 Johane 2:17.
18. Ninzi luzibo lwa Leza ncolunga lwamucitila lino?
18 Alimwi luzibo lwa Leza lulakonzya kumugwasya kapati ndilyona lino. Mibuzyo yabuumi eeyo mipati loko yiinda kukatazya ilaingulwa mu Bbaibbele. Ikuzumina busolozi bwalyo kuyoomugwasya kuyaka bulongwe a Leza. Ino ncoolwe akaka eeco! Alimwi ciyoopa kuti mukonzye kubaa luumuno oolo Leza alikke ndwanga ulapa. (Ba-Roma 15:13, 33) Mbumwatalika kujana luzibo oolu luyandika kapati, mwautalika mulimo mupati walo uuya kwiinda kumulumbula mubuumi bwenu. Talukabi nolumutyompya luzibo lwa Leza oolo lutola kubuumi butamani.
19. Mmubuzyo nzi ngotuyoolanga-langa mucibalo citobela?
19 Ibbaibbele twalyaamba kuti ndebbuku liyumwide luzibo lwa Leza. Pele ino tuzi buti kuti talili buyo bbuku lyabusongo bwabuntunsi pele lilainda loko aawo? Tulaulanga-langa ooyu mubuzyo mucibalo citobela.
AMULISUNKE LUZIBO LWENU
Nkaambo nzi luzibo lwa Leza ncolunga lwamutola kukukkomana kutamani?
Ino buyooba buti buumi mu Paradaiso izooba anyika?
Nkaambo nzi ncomutigwasigwe akujana luzibo lwa Leza lino?
[Mibuzyo yaciiyo]
