Nguni Leza Mwini-Mwini?
Cibalo 3
Nguni Leza Mwini-Mwini?
1. Nkaambo nzi majwi aatalisya mu Bbaibbele ibanji ncobaazumina?
NOMULUNGUMANA mujulu masiku nokutakwe makumbi, sena tamugambwi kubona nyenyeezi zinji bobuya? Mukupandulula buti kuba kwazyo? Alimwi mbuti zintu zipona anyika—malubaluba aamabala-mabala, bayuni amilosi yabo iikondelezya, bazenimutende balaanguzu ibabbwa mulwizi? Imulongo wamazina aazintu ulaya mbubwena oobo. Zyoonse ezi tazikonzi pe kuti zyakalibeda zini. Ncencico banji ncobaazumina majwi aatalisya Bbaibbele aakuti: “Kumatalikilo Leza wakalenga ijulu anyika”!—Matalikilo 1:1.
2. Ino Bbaibbele lyaamba nzi kujatikizya Leza, alimwi ninzi ncolitukulwaizya kucita?
2 Bantu balaandeene kapati akaambo aaka kajatikizya Leza. Bamwi bayeeya kuti Leza ninguzu buyo iitakwe buntu. Mamiliyoni aabantu akomba bamasyaanenaabo bafwide kabasyoma kuti Leza uli kule cakuti takwe ambwasikilwa. Pesi Bbaibbele lilatondezya kuti Leza mmuntu wini-wini uulitondezya kubikkila maanu caluyando kuli umwi aumwi wesu. Ncencico ncolitukulwaizya kuti “[tu]muyandaule Leza,” kaliti: “Tali kule kuluumwi umwi wesu.”—Incito 17:27.
3. Nkaambo nzi ncocitakonzeki kupanga cinkozya ca Leza?
3 Ino Leza ulangika buti? Babelesi bakwe bali mbobabede bakabona zilengaano zyabulemu bwakwe. Muzilengaano eezi walitondezya kuti ukkede acuuno cabwami, kamweka ciyoosya. Pele, aabo bakabona zilengaano zili boobu tabakwe nobakapandulwide mbwaboneka kubusyu. (Daniele 7:9, 10; Ciyubunuzyo 4:2, 3) Nkaambo kakuti “Leza Muuya”; tajisi mubili wabuntunsi. (Joni 4:24, Ci) Atwaambe kuti tacikonzeki pe kupanga cinkozya cini-cini ca Mulengi wesu, nkaambo “takukwe muntu uwakabona Leza neciba ciindi comwe.” (Johane 1:18; Kulonga 33:20) Pesi Bbaibbele lilatwaambila zinji kujatikizya Leza.
LEZA MWINI-MWINI ULAA ZINA
4. Mmazina nzi aabulemu aazwide bupanduluzi alo aabelesegwa kwaamba Leza mu Bbaibbele?
4 Mu Bbaibbele, Leza mwini-mwini ulapandululwa kwiinda mukubelesya majwi mbuli aakuti “Leza Singuzuzyoonse,” “Mupatikampatila,” “Mulengi,” “Mwiyi,” “Simatwangeesu,” alimwi a “Mwami mupati uutamani walyoonse.” (Matalikilo 17:1; Intembauzyo 50:14; Mukambausi 12:1; Isaya 30:20; Incito 4:24; 1 Timoteo 1:17) Ikweezeezya mazina aabulemu mbuli yaaya kulakonzya kutugwasya kusumpuka muluzibo lwa Leza.
5. Nguni zina lyakwe Leza, alimwi libelesegwa ziindi zinji buti mu Magwalo aaci Hebrayo?
5 Nokuba boobo, Leza ulaazina lilibedelede lyalo lilibonya ziindi zitandila ku 7,000 mu Magwalo aaci Hebrayo alikke—ikwiinda zina lyakwe lyabulemu lili lyoonse. Myaka iisika ku 1,900 eeyi yainda, bama Juda mukuyoowa bakaleka kulyaamba zina eeli lya Leza. Ci Hebrayo camu Bbaibbele cakali kulembwa kakutakwe mavawelo. Aboobo kwiina nzila yakuba masimpe kuti naa Musa, Davida, abambi basikale bakali kwaa amba buti makkonsonanti aya one (יהוה) alo aali ndezina lya Leza. Bamwi bahaazibwene balati ndiza zina lya Leza lyakali kwaambwa kuti “Yahweh,” pele tabakonzi kuba masimpe pe. Ikwaambwa nkolyaambwa mu Cingisi kuti “Jehovah” kwabelesegwa kwamyaanda yamyaka, alimwi mabala aaelene aandilyo mumilaka minji alizuminidwe mumasena manji sunu.—Amubone Kulonga 6:3 alimwi a Isaya 26:4.
NCOMWEELEDE KULIBELESYA ZINA LYA LEZA
6. Intembauzyo 83:18 yaamba nzi kujatikizya Jehova, alimwi nkaambo nzi ncotweelede kubelesya zina lyakwe?
6 Izina lya Leza lilibedelede lyakuti Jehova, ligwasya kumwaandaanya abaleza bambi. Ncencico eelyo zina ncolilibonya ziindi zinji boobu mu Bbaibbele, ikapati mumalembe aaci Hebrayo. Basikusandulula banji tabalibelesyi zina lya Leza, pesi Intembauzyo 83:18 ilacisalazya kwaamba kuti: “Nduwe olike oojisi izina lya-Jehova, nduwe Mupatikampatila atala anyika yoonse.” Aboobo ncibotu ikuti swebo tulibelesye zina lyakwe mwini Leza ciindi notwaamba zyanguwe.
7. Ino bupanduluzi bwazina lya Jehova butuyiisya nzi kujatikizya Leza?
7 Izina lya Jehova ninzila imwi yakwaamba bbala cciti lyaci Hebrayo ilyaamba “kuba.” Aboobo izina lya Leza lyaamba “Uupa Kuti Kube.” Munzila eeyi Jehova Leza ulalitondezya kuba Simakanze Mupati. Lyoonse makanze aakwe ulaapa kuti abe ncobeni. Alikke Leza mwini-mwini nguuluzi kubaa zina eeli, nkaambo bantunsi tabakwe nobanga baba masimpe kuti nzyobakanza ziyoozwidilila. (Jakobo 4:13, 14) Jehova alikke nguunga waamba kuti: “Mbubonya obo mbuliyooba ijwi lyangu lizwa kumulomo wangu. . . . Liyoozuzikizya makanze aangu akucita kabotu makani ngendalitumina.”—Isaya 55:11.
8. Mmakanze nzi Jehova ngaakaambilizya kwiinda muli Musa?
8 Bamasyaanene baci Hebrayo ba Abrahamu, Isaka, alimwi a Jakobo boonse “[baka]komba izina lya-Jehova,” pele tabakwe nobakazi bupanduluzi buzwide bwazina lya Leza. (Matalikilo 21:33; 26:25; 32:9; Kulonga 6:3) Kuzwa waawo ciindi Jehova naakatondezya makanze aakwe aakuvuna mazyalani abo, ibana Israyeli kubagusya mubuzike mu Egepita akubapa “nyika iikunka malili abuci,” eeci ndiza cakali kubaanga tacikonzeki. (Kulonga 3:17) Nokuba boobo, Leza wakasimpya kwaamba bupanduluzi bwazina lyakwe butamani kwiinda mukwaambila munsinsimi wakwe Musa kuti: “Mbuboobu mboelede kwaambila bana ba-Israyeli. Jehova Leza wabamausowanu, Leza wa-Abrahamu, Leza wa-Izaka, Leza wa-Jakobo, wandituma kulindinywe, Ndendilyo izina lyangu lyoonse; mbuboobo mbunjeelede kwiibalukwa mumazyalani amazyalani.”—Kulonga 3:15.
9. Ino Farao wakali kumulanga buti Jehova?
9 Musa wakalomba Farao, mwami wa Egepita, kuti abaleke bana Israyeli bakakombe Jehova munkanda. Pele Farao, walo wakali kubonwa kuba leza alimwi iwakali kukomba abambi baleza bana Egepita, wakaingula ategwa: “Ma! Nguni Jehova? Sa ndakonzya kuswiilila ijwi lyakwe akuleka ba-Israyeli? Nsizi Jehova na nguni, abalo ba-Israyeli nsikoobaleka pe.”—Kulonga 5:1, 2.
10. Mu Egepita yansiku, nintaamu nzi Jehova njaakatola kuzuzikizya makanze aakwe aajatikizya bana Israyeli?
10 Mpoona Jehova wakatola ntaamu bucebuce kuzuzikizya makanze aakwe, kweelana abupanduluzi bwazina lyakwe. Wakaleta zipenzyo zili kumi ali Egepita yansiku. Cipenzyo camamanino cakajaya bana bataanzi kuzyalwa bamu Egepita boonse, kubikkilizya amwanaa Farao oyo sikulisumpula. Lino bana Egepita bakayandisya kuti bana Israyeli baazwe. Pele bamwi bana Egepita bakalamwa kapati kubona nguzu zya Jehova cakuti bakavwelana abana Israyeli akuzwa ambabo mu Egepita.—Kulonga 12:35-38.
11. Mmaleele nzi Jehova ngaakacita ku Lwizi Lusalala, alimwi basinkondonyina cakabasinikizya kuzumina nzi?
11 Farao sinkazi antoomwe abasikalumamba bakwe, amyaanda yankalaki zyabo zyankondo, bakabweza lweendo kuti babajate bazike bakwe alimwi. Nobakali kuyaabuvwulaafwi bana Egepita, Leza wakacita maleele aakwaandulula Lwizi Lusalala cakuti bana Israyeli bakakonzya kuzubuka anyika njumu. Basikubatandaanya nobakanjila mukati kalwizi, Jehova “wakaangatizya mavili aankalaki zyabo, wazyeenzya cakusililika.” Basikalumamba bana Egepita bakalila ategwa: “Atucije ba-Israyeli, nkaambo Jehova nguubalwida kuba-Egepita.” Pele bakamukide kale. Imaanzi aali mbuli bwaanda butalikomeneni akoolomoka “[aku]vumba inkalaki abasimbizi ampi yoonse ya-Farao.” (Kulonga 14:22-25, 28) Munzila eeyi Jehova wakalipa mpuwo kapati zina lyakwe, alimwi eeci cakacitika tacikwe nocalubwa kusikila mubuzuba buno.—Joshua 2:9-11.
12, 13. (a) Izina lya Leza lilaabupanduluzi nzi kulindiswe sunu? (b) Ncinzi bantu ncobayandika kubinda kwiiya, alimwi nkaambo nzi?
12 Izina Leza ndyalibambilide lilaa bupanduluzi bupati kulindiswe sunu. Izina lyakwe lyakuti, Jehova, ncisinizyo cakuti zyoonse nzyakanzide uyoozipa kuti zizwidilile. Eeci cilabikkilizya akuzuzikizya makanze aakwe akusaanguna aakuti nyika yesu ikabe paradaiso. (Matalikilo 1:28; 2:8) Mukucita ceeci, Leza uyoobalobya boonse aabo bakazya bulelo bwakwe sunu, nkaambo waamba kuti: “Nkabela bayooziba kuti ndime Jehova.” (Ezekiele 38:23) Mpoona Leza uyoocizuzikizya cisyomezyo cakwe cakuvuna basikumukomba kubanjizya munyika mpya yabululami.—2 Petro 3:13.
13 Boonse bayanda lubomba lwa Leza baleelede kwiiya kulilila zina lyakwe mulusyomo. Ibbaibbele lilasyomezya kuti: “Umwi aumwi uulilila izina lya-Mwami ulafutuka.” (Ba-Roma 10:13) Ee, izina lya Jehova lilaabupanduluzi bupati. Ikulilila Jehova kuti ngu Leza wenu alimwi ngo Muvwuni wenu kulakonzya kumutola kulukkomano lutamani.
BUBE BWA LEZA MWINI-MWINI
14. Mbube nzi bupati bwa Leza Ibbaibbele mbolitondezya?
14 Ikwiiya zyakufwutulwa kwa Israyeli kuzwa mu Egepita kutondezya zibeela zipati zyone zyabube bwa Leza izyeelene kabotu-kabotu mulinguwe. Ncaakacita kuli Farao citondezya nguzu zyakwe ziyoosya. (Kulonga 9:16) Inzila yabupampu Leza njaakeendelezya kaambo kaya kakakatazizye itondezya busongo butakwe bweelanye. (Ba-Roma 11:33) Wakatondezya bululami bwakwe kwiinda mukupa cisubulo kuli basikumukazya basinkazi abasikudyaaminina bantu bakwe. (Deuteronomo 32:4) Ibube bwa Leza bupati kwiinda nduyando. Jehova wakatondezya luyando lupati kwiinda mukuzuzikizya cisyomezyo cakwe kumazyalani aa Abrahamu. (Deuteronomo 7:8) Alimwi wakatondezya luyando kwiinda mukuzumizya bana Egepita bamwi kusiya baleza bakubeja akugwasigwa kapati kwiinda mukwiiminina Leza mwini-mwini uuli alikke.
15, 16. Muunzila nzi Leza mwatondezezye luyando?
15 Mbomuyaabubala Bbaibbele, muyoobona kuti luyando mbobube bwa Leza bupati, akuti ulalutondezya munzila zinji. Mucikonzyanyo, nduyando lwakamupa kuba Mulengi akwaabila kukondwa kwakubaa buumi kwalo nkwaakatalikila kuzilenge zyamuuya. Eeyo myaanda yamamiliyoni aabangelo balamuyanda Leza akumutembaula. (Jobu 38:4, 7; Daniele 7:10) Alimwi Leza wakatondezya luyando mukulenga nyika akwiibamba kabotu-kabotu kuti bantu bakkale mulukkomano lunji.—Matalikilo 1:1, 26-28; Intembauzyo 115:16.
16 Tulagwasigwa aluyando lwa Leza munzila zinji zitakwe bubandauke. Mucikonzyanyo, Leza wakiilenga mibili yesu munzila iigambya kapati cakuti tulakonzya kutangala abuumi. (Intembauzyo 139:14) Luyando lwakwe lulatondezegwa mukuti ulapa “imvula eziindi zyazilyo izizwa kujulu, wazuzya myoyo [yesu] kulya akubotelwa.” (Incito 14:17) Mane Leza “ulapasuzya izuba lyakwe kubabi akubabotu, ulawisizya boonse imvula yakwe, baluleme abataluleme.” (Matayo 5:45) Luyando alimwi lupa Mulengi wesu kuti atugwasye kujana luzibo lwa Leza akumubelekela katuli basikumukomba. Ncobeni, “Leza nduyando.” (1 Joni 4:8, Ci) Pesi kucili zinji loko kujatikizya mbwabede.
“LEZA SILUZYALO ASIBUUYA”
17. Ninzi ncotwiiya kujatikizya Leza kubbuku lya Kulonga 34:6, 7?
17 Nobakamana kuzubuka Lwizi Lusalala bana Israyeli, bakacili kuyandika kuti bamuzibe kabotu Leza. Musa wakalimvwa kuti ncintu ncakali kuyandika, aboobo wakapaila: “Na ncobeni ndijene luzyalo mumeso aako, kondizibya inzila zyako, nkakuzibe akujana luzyalo mumeso aako.” (Kulonga 33:13) Musa wakamuziba kabotu Leza naakamvwa kwaambilizya kwa Leza mwini kwakuti: “Jehova! Jehova! Leza siluzyalo asibuuya uutafwambi kukalala, uuzwide luse alusyomo, uufwida bantu bali zyuulu luzyalo, uujatila milandu andeyo azibi, nekubaboobo talulamiki bataluleme.” (Kulonga 34:6, 7) Leza weelanya luyando lwakwe abululami kwiinda mukutavwuninina basikubisya acaali kuli zeezyo ziletwa akubisya kwabo.
18. Ino Jehova wasinizya buti kuti ngusiluzyalo?
18 Mbuli mbwaakaiya Musa, Jehova ulatondezya luzyalo. Muntu siluzyalo uleetela bantu nobapenga alimwi ulasola kubalemununa. Munzila eeyi Leza watondezya lubomba kubantu kwiinda mukubabambila kulemununwa kutamani kuzwa kukupenga, kuciswa, akufwa. (Ciyubunuzyo 21:3-5) Basikukomba Leza inga bajanika mumapenzi akaambo kabukkale buli munyika eeyi mbyaabi, antela inga bayambaala mukucita zimwi zintu akujana mapenzi. Pesi kuti balomba lugwasyo kuli Jehova cakulibombya, uyoobaumbulizya akubagwasya. Ino nkaambo nzi? Nkaambo ulabalanganya muluzyalo basikumukomba.—Intembauzyo 86:15; 1 Petro 5:6, 7.
19. Nkaambo nzi ncotunga twaamba kuti Leza ngusibuuya?
19 Bantu banji bali mubweendelezi balacita lunya kubantu bambi. Kwiindana abamwi Jehova walo ngusilubomba kapati kubabelesi bakwe babombe! Nokuba kuti ngomweendelezi mupati koonse koonse, ulatondezya luse lupati lwakutasalulula kubantu boonse. (Intembauzyo 8:3, 4; Luka 6:35) Jehova kumwi ngusibuuya kumuntu omwe omwe, ubagama buya kubaingula nobalomba lubomba. (Kulonga 22:26, 27; Luka 18:13, 14) Aino Leza takwe cimusinikizya kucitila muntu lubomba. (Kulonga 33:19) Aboobo tweelede kutondezya kulumba kupati kuluzyalo lwa Leza abuuya.—Intembauzyo 145:1, 8.
ULAMUKA KUKALALA, TASALULULI, ULILULEME
20. Ninzi citondezya kuti Jehova ulamuka kukalala akuti tasalululi?
20 Jehova ulamuka kukalala. Pesi eeci tacaambi kuti tatoli ntaamu, eeci wakacitondezya naakanyonyoona Farao sinkazi abasikalumamba bakwe mu Lwizi Lusalala. Alimwi Jehova tasalululi pe. Aboobo mukuya kwaciindi taakacijisi lubomba kubantu bakwe bayandika, ibana Israyeli, akaambo kakuzumanana kwabo mukucita zibi. Leza ulatambula basikukomba mumasi oonse, pele balikke aabo batobela nzila zyakwe ziluleme.—Incito 10:34, 35.
21. (a) Ino Ciyubunuzyo 15:2-4 cituyiisya nzi kujatikizya Leza? (b) Ninzi ciyoocuubyaubya kulindiswe kucita ceeco Leza ncaamba kuti cililuzi?
21 Ibbuku lyamu Bbaibbele lya Ciyubunuzyo lilatondezya ncocili cintu cipati kwiiya “imbeta” zya Leza ziluleme. Lilaamba zilenge zyakujulu nkoziimba ategwa: “Milimo yako mipati, ilagambya, Mwami Leza Singuzuzyoonse. Ziyanza zyako nzyalusinizyo, zililuleme. Nduwe Mwami waciindi coonse. Nguni uutakuyoowi, Mwami, akulemeka izina lyako? Nkaambo nduwe olike uusalala. Ncobeni bantu bazisi zyoonse balaboola kukukomba kunembo lyako, nkaambo imbeta zyako zyaboneka.” (Ciyubunuzyo 15:2-4) Jehova tulamutondezya kuyoowa kweelede akulemeka kwiinda mukutobela ceeco ncaamba kuti cililuzi. Eeci cilaubisigwa kwiinda mukuliyeezya busongo bwa Leza aluyando. Yoonse milawo yakwe njakuti tugwasigwe.—Isaya 48:17, 18.
“LEZA WESU, JEHOVA NGUMWI”
22. Nkaambo nzi aabo bazumina Bbaibbele ncobateelede kukomba Butatu?
22 Bana Egepita bansiku bakali kukomba baleza banji, pesi Jehova ngu “Leza sibuzuba.” (Kulonga 20:5) Musa wakabaibalusya bana Israyeli kuti “Jehova ngu-Leza wesu, Jehova ngumwi.” (Deuteronomo 6:4) Jesu Kristo wakaaindulula majwi aayo. (Marko 12:28, 29) Aboobo aabo bazumina Bbaibbele kuba Jwi lya Leza tabakombi Butatu bujisi bantu antela baleza botatwe muli omwe pe. Ikwaamba masimpe ibbala lya “Butatu” talimo akubamo mu Bbaibbele. Leza mwini-mwini Mmuntu omwe, waandeene a Jesu Kristo. (Johane 14:28; 1 Ba-Korinto 15:28) Muuya wa Leza uusalala tuuli muntu pe. Ninguzu zya Jehova, nzyabelesya Singuzuzyoonse kumana makanze aakwe.—Matalikilo 1:2; Incito 2:1-4, 32, 33; 2 Petro 1:20, 21.
23. (a) Ino luyookomena buti luyando lwenu lwa Leza? (b) Ino Jesu wakaamba nzi kujatikizya kuyanda Leza, alimwi ninzi ncotweelede kwiiya kujatikizya Kristo?
23 Mwayeeya bubotu bwakwe Jehova, sena tamuzumini kuti uleelede kuti mumukombe? Mbomuyaabwiiya Jwi lyakwe, Ibbaibbele, munooyaabumuziba kabotu alimwi munooyaabwiiya ncamuyanzya kucita kutegwa mupone kabotu akukkomana kukabe kutamani. (Matayo 5:3, 6) Kuyungizya ali zeezi, luyando lwenu a Leza lunookomena. Eeci ncintu cibotu, nkaambo Jesu wakati: “Uleelede kuyandisya Jehova Leza wako amoyo wako woonse, akumuuya wako woonse, akukuyeeya kwako koonse, akunguzu zyako zyoonse.” (Marko 12:30) Cakutadooneka, Jesu wakalijisi luyando luli boobu kuli Leza. Ino ninzi Bbaibbele ncolitondezya kujatikizya Jesu Kristo? Ino ulaa lubazu nzi mumakanze aa Jehova?
AMULISUNKE LUZIBO LWENU
Ino Leza nguni zina lyakwe, alimwi libelesegwa
ziindi zinji buti mu Magwalo aaci Hebrayo?
Nkaambo nzi ncomweelede kubelesya zina lya Leza?
Mbube nzi bwa Jehova Leza bumubotela kapati nywebo?
[Mibuzyo yaciiyo]
[Cifwanikiso icili apeeji 29]
Mumuzi kabotu buti Mulengi wazyoonse?
