Ninzi Cicitika Kubayandwa Besu Bafwide?
Cibalo 9
Ninzi Cicitika Kubayandwa Besu Bafwide?
1. Ino bantu balimvwa buti ciindi lufwu nolutola muyandwa wabo?
“MUNTU ulapenga ciindi muyandwa nafwa nkaambo lufwu nkusweekelwa kutakwe ambokucitwa.” Mbuboobo mbwaakaamba mwana umwi ciindi bawisi nobakafwa kumane banyina abalo bafwa mukaindi kasyoonto buyo. Cakamucisa akumupa kulimvwa kusweekelwa cakuti “inguzu zyoonse zyakamumana.” Ndiza anywebo kuli nomwakapenga munzila iili boobu. Inga kamuli mwakali kweezeezya kuti naa bayandwa benu bali kuli akuti naa muciyoobabona limbi.
2. Mibuzyo nzi iikatazya iibuzigwa kujatikizya lufwu?
2 Bamwi bazyali bali mubuumba baambilwa kuti, “Malubaluba aainda kubota Leza ngacela kwaatola kulinguwe kujulu.” Sena ncobeni mbombubo oobo? Sena bayandwa besu bafwide bali kucisi camyuuya? Sena bali muciimo bamwi ncobati Nirvana calo ciluulwa kuti cizwide kukondwa kwalo-kwalo kakutakwe kucisa kuli koonse akulombozya? Sena aabo mbotuyanda bainda kumulyango uutola kubuumi butafwi muparadaiso? Naa mbuli bwaamba bamwi, sena lufwu nkuwida mukupenzegwabulanga kutamani kuli baabo bakabisizya Leza? Sena bafwu balakonzya kubujatikizya buumi bwesu munzila ili yoonse? Kutegwa tujane kwiingula kwamasimpe kumibuzyo iili mbuli yeeyi, tuyandika kulanga Jwi lya Leza, Ibbaibbele.
INO “MUUYA” UULI MUBANTU NINZI?
3. Muzeezo nzi ba Socrates a Plato ngobakajisi kujatikizya bafwide, alimwi eeci bantu cibajatikizya buti sunu?
3 Basibusongo Bagiliki ba Socrates a Plato bakali kusyoma kuti kweelede kakuli cintu cimwi citafwi mukati kamuntu naba mulombwana naba mukaintu—isoolu yalo itajatikizigwi alufwu iitakwe niifwa ncobeni. Nyika yoonse mbwiizulwa mamiliyoni aabantu alacisyoma eeci sunu. Ooku kusyoma kuleta kuyoowa bafwu kapati mbubwena mbuli kulibilika kuti naa bapona buti. Ikuyiisya kwa Bbaibbele kwalo kulaandeene mukaambo aaka kajatikizya bafwu.
4. (a) Ino bbuku lya Matalikilo litwaambila nzi kujatikizya musoolu? (b) Ninzi Leza ncaakabika muli Adamu kutegwa abe muumi?
4 Notuyeeya ciimo cabafwu, tweelede kuyeeya kuti taata wesu wakusaanguna, Adamu, takwe naakajisi soolu. Walo mwini nguwakali musoolu. * Kwiinda mumulimo wakulenga uugambya, Leza wakabumba muntu—musoolu—kubelesya zeezyo zipangizidwe nyika mpoona wakamufwulidila “muuya wabuumi.” Ibbuku lya Matalikilo 2:7 lilatwaambila kuti: “Jehova Leza wakabumba muntu. Wakamubumbya bulongo bwaansi, wamufulida mumpemu zyakwe muuya wabuumi, nkabela mpawo muntu wakaba muumi [“musoolu,” NW].” Buumi bwa Adamu bwakagwasilizigwa akuyoya. Pesi Leza tanaakamufwulidila muuya ulikke mumapunga ciindi naakabikka muuya wabuumi muli Adamu. Ku Matalikilo 7:22, Ibbaibbele lyaamba “kuyoya” kwalo kuletwa aanguzu zyabuumi izili muzintu zyaanyika zyuumi.
5, 6. (a) Ino nguzu zyabuumi ninzi? (b) Ninzi cicitika ciindi “muuya” ooyo waambwa ku Intembauzyo 146:4 nuuleka kupa buumi kumubili?
5 Ino nguzu zyabuumi ninzi? Ninguzu ziyandika kutalisya buumi eezyo Leza nzyaakabikka mumubili wa Adamu watakajisi buumi. Kuzwa waawo nguzu eezi zyakatolwa ambele akuyoya. Ino “[m]muuya” nzi waambwa ku Intembauzyo 146:4? Ikwaamba muntu uufwa, kapango ako kalati: “Muuya wakwe wazwa, ulabweeda kubulongo; mubuzuba obo mbubonya makanze aakwe oonse alamana.” Ciindi basikulemba Bbaibbele nobakabelesya bbala eeli lya “muuya” munzila eeyi, teebakali kuyeeya kuti kuli soolu iyaandaana amubili iizumanana kupona nuufwa mubili pe.
6 “Muuya” uuzwa mubantu ciindi nobafwa ninguzu zyabuumi nzizyona izizwa ku Mulengi wesu. (Intembauzyo 36:9; Incito 17:28) Eezi nguzu zyabuumi tazikwe bube buli boonse bujanika mucilenge ncozipa buumi pe, mbubwena magesi mbwaatali muciwa camincini eeyo njoapa kuti ibeleke. Ciindi muntu nafwa, imuuya (nguzu zyabuumi) ulaleka kupa buumi kumaseelo aamubili, mbubwena mbuli mumuni mbuuzima ciindi magesi naajalwa. Ciindi nguzu zyabuumi nozileka kugwasilizya mubili wamuntu, musoolu ulafwa.—Intembauzyo 104:29; Mukambausi 12:1, 7.
“KUBULONGO NKOELEDE KUPILUKA”
7. Ninzi cakali kuzoocitika kuli Adamu kuti watamvwida Leza?
7 Jehova wakacisalazya kupandulula lufwu mbulwakali kuzooba kuli Adamu sicibi. Leza wakati: “Uyoolya insima cakufwa mitukuta mane ukapiluke kunyika, nkaambo mulinjiyo mowakagwisigwa, nkaambo uli bulongo buyo, akooko kubulongo nkoelede kupiluka.” (Matalikilo 3:19) Adamu wakali kuzoopiluka kuli? Ansi, kubulongo oobo bwalo mbwaakalengezegwa. Kulufwu Adamu wakali kuzooleka kubawo!
8. Mbozili zisoolu, muunzila nzi bantu mobatabaindi banyama?
8 Munzila eeyi, lufwu lwa muntu talwaandaani alufwu lwazinyama. Azyalo nzisoolu, alimwi nguwena muuya, antela nguzu zyabuumi, nzezizipa nguzu. (Matalikilo 1:24) Ku Mukambausi 3:19, 20, imusongo Solomoni ulatwaambila kuti: “Balo balafwa, abalo balafwa mbubonya. Boonse balijisi muuya omwe, nkabela [mulufwu] muntu tali mubotu kwiinda banyama . . . Bakazwa kubulongo, alimwi balapiluka kubulongo.” Muntu wakali ulabainda banyama akaambo kakuti wakalengwa mucinkozya ca Leza katondezya bube bwa Jehova. (Matalikilo 1:26, 27) Pele caboola kulufwu, bantu abanyama boonse balapiluka kubulongo.
9. Ino bafwide bali muciimo nzi, alimiwi nkuli nkobaya?
9 Solomoni wakayaambele kupandulula lufwu mbolubede, kati: “Baumi balizi kuti balafwa, pele bafwide tabezi cintu niciba comwe.” Ee, bafwide tabakwe nokaceya nkobazi. Mbokuli boobu Solomoni wakakulwaizya kuti: “Kufumbwa milimo njaajana maanza aako, kocita canguzu, nkaambo taakwe milimo niiba miyeeyo neluba luzibo nebuba busongo mukabanda moyoonjila.” (Mukambausi 9:5, 10) Ino bafwide baya kuli? Mukabanda (muci Hebrayo, sheʼohlʹ), kucuumbwe ikuya bantunsi boonse. Bayandwa besu tabakwe ncobazi pe. Tabali mukupenga, alimwi tabakonzi kubujatikizya buumi bwesu munzila iili yoonse pe.
10. Nkaambo nzi ncotunga twaamba kuti lufwu talweelede buya kuba mamanino aabuumi?
10 Sena lino swebo abayandwa besu tweelede kupona buyo myaka misyoonto akuleka kubawo mane kukabe kutamani? Ibbaibbele talizumini oobo pe. Ciindi Adamu naakazanga, Jehova Leza mpoona-mpoona wakatalisya bubambe bwakumana mapenzi aakaletwa akubisya kwabantu. Lufwu teelwakajisi lubazu mumakanze aa Leza aajatikizya bantu pe. (Ezekiele 33:11; 2 Petro 3:9) Aboobo lufwu talweelede buya kuti abe ngamamanino esu alimwi aabayandwa besu.
“ULOONA”
11. Mbuti Jesu mbwaakacipandulula ciimo camufwu Lazaro mulongaakwe?
11 Mmakanze aa Jehova aakutufwutula antoomwe abayandwa besu bafwide kuzwa kulufwu luna Adamu. Aboobo Jwi lya Leza ibafwide libaamba kuti baloona. Mucikozyanyo, naakamvwa buyo kuti mulongaakwe Lazaro wafwa, Jesu Kristo wakaambila basiciiya Bakwe ategwa: “Mulongweesu Lazaro uloona, pele ndainka mebo nkamusinsimune.” Akaambo kakuti basiciiya teebakakateelela kaambo aako ncokaamba, Jesu wakapozya kuti: “Lazaro wazaya [wafwa, Ci].” (Johane 11:11, 14) Mpoona Jesu wakaya kumunzi wa Betaniya, ooko bacizi ba Lazaro ba Marta a Mariya nkobakali kulila mwanaakwabo. Jesu naakaambila Marta kuti, “Mwanaakwanu ulabuka,” wakatondezya lusyomo mumakanze aa Leza aakumana penzi lyaletwa alufwu kumukwasyi wabantu. Wakati: “Ndilizi kuti uyoobuka mubuzuba bwakubuka bwakumamanino.”—Johane 11:23, 24.
12. Mbulangizi nzi sikufwidwa Marta mbwaakajisi kujatikizya bafwu?
12 Marta takwe naakaamba zyasoolu iitafwi iipona kubusena bumwi muntu nafwa. Takwe naakali kusyoma kuti Lazaro wakaunkide kale kucisi camyuuya kuti akazumanane ooko ikupona. Marta wakalaa lusyomo mubulangizi bubotu bwa kubuka kuzwa kubafwu. Taakali kuyeeya kuti kuli soolu iitafwi iyakazwa mumubili wa Lazaro, wakazi kuti mwanaakwabo taciwo pe. Icakali kuzoomupilusya mwanaakwabo nkubusigwa kwakwe.
13. Ninguzu nzi nzyajisi Jesu nzyapedwe a Leza, alimwi mbuti mbwaakazitondezya nguzu eezi?
13 Jesu Kristo ngonguwe uusungwidwe a Jehova Leza kuti anunune bantu. (Hosea 13:14, NW) Aboobo, kwiingula kaambo ka Marta, Jesu wakati: “Ndime kubuka abuumi. Oyo uusyoma ndime, naanooli wakafwa, unooli muumi [kumbele aamazuba].” (Johane 11:25) Jesu wakatondezya nguzu zyakwe nzyapedwe a Leza mukucita ceeci ciindi naakaya kucuumbwe ca Lazaro, walo wakafwide kwamazuba one, akuyoomubusya. (Johane 11:38-44) Amuyeeye buyo kukondwa kwabaabo ibakabona kubusigwa ooku akwabambi ikwakacitwa a Jesu Kristo!—Marko 5:35-42; Luka 7:12-16.
14. Nkaambo nzi kubusigwa amuzeezo wasoolu iitafwi ncozitakonzi kweendelana?
14 Amukayeeyesye kaambo aaka: Kwiina uunga ulayandika kubusigwa, antela kupilusigwa kubuumi, kuti kalaa soolu iitafwi iitajatikizigwi alufwu. Atwaambe kuti inga talukooba luse ikubusya muntu uuli mbuli Lazaro kumupilusya kubuumi butalondokede anyika kuti kali waunkide kale kuyootambula bulumbu bwakwe bwakujulu. Kujanika kuti Bbaibbele taakwe nolyaamba kuti “soolu itafwi.” Muciindi caboobo Magwalo aamba kuti musoolu uubisya ulafwa. (Ezekiele 18:4, 20, NW) Aboobo Bbaibbele litondezya cipo cakubuka kuti nenzila yakusilika lufwu.
“BOONSE ABALI MUZYUUMBWE”
15. (a) Ninzi bbala lya “kubuka” ncolyaamba? (b) Nkaambo nzi kubusya muntu umwi aumwi ncocitakamukatazi Jehova Leza?
15 Ibbala basiciiya ba Jesu ndyobakabelesya kwaamba “kubuka” lipandulula “kwiimikizya” antela “kunyamuka.” Ooku nkwiimikizya kuzwa muciimo calufwu—naa inga twati nkunyamuka kuzwa mucuumbwe imuya bantu boonse. Jehova Leza inga camuubila kubusya muntu. Nkaambo nzi? Nkaambo Jehova ne Ntalisyo yabuumi. Sunu bantunsi balakonzya kuyobola majwi aziwa zyabaalumi abanakazi mumavidiyo alimwi akuzilizya antela kuzitondezya bantu aabo kabali bafwide kale. Tee kayi Sikutulenga singuzu zyoonse ulakonzya kuyobola bupanduluzi bwatupango-pango toonse twamuntu uli woonse amane wamubusya nguwena ooyo, kumupa mubili mupya.
16. (a) Ncisyomezyo nzi Jesu ncaakapa icijatikizya baabo bali muzyuumbwe? (b) Ninzi ciyoopa kuti bubuke bwamuntu bukabe kulubazu nkoluyooba?
16 Jesu Kristo wakati: “Ciindi ciyoosika ncobati kamvwe ijwi lyakwe [Jesu] boonse abali muzyuumbwe, bayoozwa mpoonya, abo abakacita kabotu bayoobusigwa kubuumi, abaabo abakacita bubi bayoobusigwa kukubetekwa.” (Johane 5:28, 29) Boonse mbayeeya Jehova bayoobusigwa akuyiisyigwa nzila zyakwe. Kuli baabo bacita zyeendelene aluzibo lwa Leza, ooku kuyooba kubusigwa kubuumi. Pele kuyoojanika kuba kubusigwa kwakubetekwa akusinganizigwa kuli baabo bakaka ziyiisyo zya Leza abulelo bwakwe.
17. Mbaani bayoobusigwa?
17 Mbuli mbokunga kwalangilwa, aabo babelesi ba Jehova basoleka kutobela nzila yabululami bayoobusigwa. Atwaambe kuti bulangizi bwakubusigwa bwakayumya banji nobakasikilwa lufwu, nomuba mukupenzegwa kwalunya. Bakalizi kuti Leza ulakonzya kubapilusya kubuumi. (Matayo 10:28) Pele mamiliyoni aabantu afwa kabatanatondezya naa inga bazitobela zyeelelo zya Leza iziluleme. Abalo bayoobusigwa. Akaambo kalusyomo mumakanze aa Jehova aaya, mwaapostolo Paulo wakaamba kuti: “Ndijisi lusyomo kuli-Leza . . . kuti kulaba kubuka kwabafu, akwabaluleme akwabataluleme.”—Incito 24:15.
18. (a) Mwaapostolo Johane wakapegwa cilengaano nzi cakubusigwa? (b) Ninzi cinyonyoonwa mu “ziba lyamulilo,” alimwi ncinzi ncoliiminina eeli “ziba”?
18 Mwaapostolo Johane wakapegwa cilengaano cikondelezya icabantu babusidwe kabaimvwi kumbele lyacuuno ca Leza cabwami. Mpoona Johane wakalemba kuti: “Lwizi lwakabweedezya bafu bali mulindulo, alwalo lufu acikalilo cabafu zyoonse zyakabweedezya bafu bali mulinzizyo. Lino bakabetekwa muntu umwi aumwi mbuli milimo yakwe. Mpoonya awo lufu acikalilo cabafu zyoonse zyakasowelwa muziba lyamulilo. Eli iziba lyamulilo ndilyonya ndolufu lwabili.” (Ciyubunuzyo 20:12-14) Amuyeeye buyo! Boonse bafwide mbayeeyede Leza balaa bulangizi bwakwaanguluka kuzwa kucikalilo cabafwu, (muci Giliki, haiʹdes), antela Mukabanda icuumbwe imuya bantu boonse, (Intembauzyo 16:10; Milimo 2:31, Ci) Bayoopegwa aciindi cakutondezya kwiinda mumicito yabo naa inga bamubelekela Leza. Mpoona awo “lufu acikalilo cabafu” ziyoosowelwa mubusena bwiitwa kuti “ziba lyamulilo,” iliiminina kunyonyooka kutamani mbuli bwaamba abbala lyakuti “Gehena.” (Luka 12:5) Nociba cuumbwe imuya bantu boonse cinooli cakubizigwa tacicinooliwo pe bantu baakumana kubusigwa. Ino kaka ncintu cikkazika moyo ikwiiya kuzwa mu Bbaibbele ikuti Leza kwiina ngwapenzya bulanga!—Jeremiya 7:30, 31.
NKUBUKILA KULI?
19. Nkaambo nzi bamwi akati kabantu ncobayoobusilwa kujulu, alimwi mmubili uuli buti Leza ngwayoobapa?
19 Mweelwe musyoonto wabaalumi abamakaintu uyoobusigwa kubuumi bwakujulu. Kabali bami abapaizi antoomwe a Jesu, bayootola lubazu mukumana mapenzi aaletwa alufwu oolo bantu ndobakasiilwa kumuntu wakusaanguna, Adamu. (Ba-Roma 5:12; Ciyubunuzyo 5:9, 10) Mbangaye Leza mbayootola kujulu kuyoolela a Kristo? Mbuli bwaamba Bbaibbele, bali buyo 144,000. (Ciyubunuzyo 7:4; 14:1) Jehova uyoopa umwi aumwi wabaabo balo bayoobusigwa imubili wamuuya, kutegwa bakakonzye kukkala kujulu.—1 Ba-Korinto 15:35, 38, 42-45; 1 Pita 3:18, Ci.
20. Ninzi ciyoocitikila bantu bamvwa, kubikkilizya abaabo babusidwe?
20 Bunji bwabaabo bafwide bayoobusigwa kuba anyika yaparadaiso. (Intembauzyo 37:11, 29; Matayo 6:10) Kamwi kaambo bamwi ncobabusilwa kuya kujulu nkuyoozuzikizya makanze aa Leza aajatikizya nyika. Jesu Kristo alimwi abaabo bali 144,000 kabali kujulu bayoolulamika bantu bamvwa buce-buce kutegwa basike akulondoka kuya nkobakasowa bazyali besu bakusaanguna. Eeci ciyoobikkilizya abasikubusigwa, mbuli bwakatondezegwa a Jesu ciindi naakaambila muntu wakakankaminidwe kumbali lyakwe kuti: “Tunooli ayebo mu-Paradaiso.”—Luka 23:42, 43.
21. Kweelana abwaamba musinsimi Isaya amwaapostolo Johane, ninzi ciyoocitika kulufwu?
21 Anyika ya Paradaiso, lufwu lwalo sunu ilupa kuti zinji zibe zyabuyo, luyoogwisigwa. (Baloma 8:19-21, Ci) Musinsimi Isaya wakaambilizya kuti Jehova Leza unooli “lufu walumenenena mane kukabe kutamani.” (Isaya 25:8) Mwaapostolo Johane wakapegwa cilengaano caciindi bantu bamvwida nobaya kwaanguluka kuzwa kumacise alimwi akulufwu. Ee, “Leza mwini uzookala kulimbabo, azoobe Leza wabo. Nkabela uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:1-4.
22. Mbuti luzibo lwakubusigwa mbolumujatikizya?
22 Iziyiisyo zya Bbaibbele zilatugwasya kuteelela kabotu cicitika kubantu bafwide. Imagwalo alacisalazya kwaamba kuti lufwu ngo ‘sinkondoma musyaalizi’ uuyoonyonyoonwa. (1 Ba-Korinto 15:26) Ino inga twajana nguzu akukkazikwa moyo muluzibo lwa bulangizi bwakubusigwa! Alimwi tuliboteledwe kapati kuti bayandwa besu bafwide aabo mbayeeya Leza bayoosinsimunwa kuzwa muŋonzi zyalufwu kuti babotelwe muzintu zibotu nzyababambilide aabo bamuyanda! (Intembauzyo 145:16) Izilongezyo zili boobu ziyoozuzikizigwa kwiinda mu Bwami bwa Leza. Pele ino bwakali kuzootalika lili kulela? Nkooko atulange.
Bupanduluzi buyungizidwe
^ munc. 4 Mu Bbaibbele lya New World Translation of the Holy Scriptures, ibbala lyakuti “soolu” (soul mu Cingisi) lisandulwidwe kuzwa kubbala lya Cihebrayo nephesh alya Cigiliki psykhe. Mbuli mbolibelesedwe mu Bbaibbele soolu caamba muntu naa munyama, naa buumi obo muntu naa munyama mbwajisi. Pele kubantu banji “soolu” caamba cibeela camuntu camuuya naa imuzimo walo uucaala kuupona ciindi mubili nuufwa. Ibamwi baciteelela kuti mbobube bwabuumi. Pele eeyi mizeezo yakusyaalizya tiili akati kaziyiisyo zya Bbaibbele.
AMULISUNKE LUZIBO LWENU
Imuuya uuli mubantu ninzi?
Ino inga mwacipandulula buti ciimo cabafwu?
Mbaani bayoobusigwa?
[Mibuzyo yaciiyo]
[Cifwanikiso icili apeeji 85]
Mbubwena Jesu mbwaakaita Lazaro kuzwa mucuumbwe, mamiliyoni aabantu ayoobusigwa
[Cifwanikiso icili apeeji 86]
Kuyooba kukondwa kupati ciindi ‘Leza lufu aakulumena kukabe kutamani’
