Nkaambo Nzi Ncotucembaala Akufwa?
Cibalo 6
Nkaambo Nzi Ncotucembaala Akufwa?
1. Ninzi ibasayaansi ncobatakonzya kupandulula kujatikizya buumi bwabuntu?
IBASAYAANSI tabazi pe bantu ncobacembaalila akufwa. Kubaanga maseelo aamibili yesu eelede kaasyuuka akuti tweelede katupona kukabe kutamani. Ibbuku litegwa Hyojun Soshikigaku (Sayaansi Yatubeela-Beela Twamubili) lyaamba kuti: “Kucembaala kwamaseelo mbokuswaangene akucembaala akufwa kwamuntu ncintu citateeleleki.” Banji ibasayaansi balasyoma kuti kuli magolelo aabuumi “ngotuzyalwa angawo.” Sena muyeeya kuti baliluzi?
2. Ninzi bamwi ncobacita akaambo kakuti buumi buzwela buyo?
2 Lyoonse bantu bali kulombozya koongola alimwi mane basoleka akuti babe bantu batafwi. Kuzwa mumwaanda wamyaka wane B.C.E., misamu iiyeeyelwa kuti yakaanzwa kugwasya kuti cikonzeke kuba muntu uutafwi yakababotela bamwi bana China balupati-pati. Ibamwi bami baku China bakatobela bakiisola misamu eeyi iitegwa njakoongola—yalo yakali kubambwa amusamu wiitwa kuti mekyuri—bamane bakafwa! Nyika yoonse mbwiizulwa, ibantu basyoma kuti lufwu taali ngamamanino aabuumi bwabo. Ba Buddha, iba Hindu, ibana Isilamu alimwi abambi boonse balaa bulangizi kapati bwakubaa buumi bamana kufwa. Mu Kristendomu, banji beezeezya buumi bwakujulu bwakwiide kutangala.
3. (a) Nkaambo nzi bantu ncobalombozya buumi butamani? (b) Mmibuzyo nzi iijatikzya lufwu yalo yeelede kwiingulwa?
3 Mizeezo yakukondwa akumana kufwa itondezya kulombozya kwabuumi butamani. “Wabika bulangizi bwabuumi buteeli mumyoyo yabo,” mbolyaamba Bbaibbele kujatikizya muzeezo wabuumi butamani ooyo Leza ngwaakabikka mulindiswe. (Mukambausi 3:11) Bantu bakusaanguna wakabalenga kabalangilwa kukonzya kupona kukabe kutamani anyika. (Matalikilo 2:16, 17) Ino nkaambo nzi bantu ncobafwa? Ino lufwu lwakaboola buti munyika? Iluzibo lwa Leza lulayiingula mibuzyo eeyi.—Intembauzyo 119:105.
MUZEEZO WALUCISO
4. Mbuti Jesu mbwaakazibya cigwebenga eeco cakaleta lufwu kubantu?
4 Cigwebenga cilasola kuzimaanya mukondo waco. Eeci ncencico ncaacita ooyo uulaa mulandu wakuleta lufwu kuzyuulu zyamamiliyoni aabantu. Wazinyona-nyona zintu ikuvwumbilila lufwu lwabantu kuti cibe cintu citateeleleki kabotu. Jesu Kristo wakacaamba eeci cigwebenga ciindi naakaambila baabo bakali kukanza kumujaya ikuti: “Nywebo muzwa kuliuso Saatani, muyanda kucita iziyanda uso. Walo wali mujayi kuzwa kumatalikilo, alimwi takede mubwini, nkaambo takukwe bwini mulinguwe.”—Johane 8:31, 40, 44.
5. (a) Ooyo wakazooba Saatani Diabolosi wakatalika buti? (b) Ino aamba nzi mabala aakuti “Saatani” a “Diabolosi”?
5 Ee, Diabolosi “[m]mujayi” siluciso. Ibbaibbele litondezya kuti mmuntu ncobeni, kutali buyo bubi buli mumoyo wamuntu pe. (Matayo 4:1-11) Nokuba kuti wakalengwa kali mungelo uululeme, ‘taakakkala mubwini.’ Uleelela ncobeni kwiitwa kuti Saatani Diabolosi! (Ciyubunuzyo 12:9) Wiitwa kuti “Saatani,” antela “sikukazya,” nkaambo wali kukazya akulwana Jehova. Eeci cigwebenga cilaitwa akuti “Diabolosi,” icaamba “sikubejekezya,” nkaambo camusampwida zina Leza.
6. Nkaambo nzi Saatani ncaakazangila Leza?
6 Ninzi Saatani cakamupa kuti ayande kuzangila Leza? Mbuhaacivwule mwangu. Bwakamupa kunyomenena Jehova nkwaakali kukombwa abantu. Diabolosi takwe naakalikasya kulombozya kukombwa ooku, kwalo kwakali kweelela buyo Sikulenga. (Amweezyanye a Ezekiele 28:12-19.) Mubusena bwaceeco, ooyu mungelo iwakazooba Saatani wakakubikkilila kulombozya ooku kwabuhaacivwule mwangu mane limwi kwasima akuzyala cibi.—Jakobo 1:14, 15.
7. (a) Ninzi cileta lufwu kubantu? (b) Ino cibi ninzi?
7 Twamuziba uulaa mulandu ooyu wakuleta lufwu kubantu. Pele ino cini-cini cileta lufwu lwabantu ncinzi? Ibbaibbele lyaamba kuti: “Lumoola [“lubole,” Ci] lwalufu nzibi.” (1 Ba-Korinto 15:56) Ino cibi ninzi? Ikutegwa tuliteelele bbala eeli, atulange bupanduluzi bwakabelesegwa mumilaka mitaanzi ya Bbaibbele. Maciti aaci Hebrayo aci Giliki aayo aavwula kusandululwa kuti “cibi [“cinyonyoono,” Ci]” aamba “kwiinzya” kaapandulula kwiinzya akeengo naa kulezya ambaakani. Ino nimbaakani nzi toonse njotwiinzya? Nimbaakani yakumvwida Leza munzila iilondokede. Ino cibi cakanjila buti munyika?
MBUWAKACITWA MUZEEZO OOYO
8. Mbuti Saatani mbwaakasola kupa kuti bantu bamukombe?
8 Saatani wakayeeya kabotu-kabotu muzeezo ooyo ngwaakali kusyoma kuti ayoomupa kulela bantu akuti kabamukomba. Wakayeeya kuyunga banabubili bakusaanguna, ba Adamu a Eva, kuti babisizye Leza. Bazyali besu bakusaanguna, Jehova wakalibapede iluzibo lwakali kunoobaletela buumi butamani. Bakalizi kuti Sikubalenga wakali muntu mubotu nkaambo wakababikkide mumuunda mubotu wa Edeni. Adamu wakabubona bubotu bwa Wisi wakujulu ciindi Leza naakamupa mukaintu weebeka uugwasya. (Matalikilo 1:26, 29; 2:7-9, 18-23) Ikuzumanana kwabuumi bwabanabubili bakusaanguna kwakayeeme akumvwida Leza.
9. Mmulawo nzi Leza ngwaakapa muntu wakusaanguna, alimwi nkaambo nzi eeci ncicakali cintu camaanu?
9 Leza wakalailila Adamu kuti: “Misamu yoonse yamumuunda ncobeni uyooilya, cita musamu wakuziba bubotu abubi. Toelede kulya kulinguwo pe, nkaambo mubuzuba obo mboyoolya kulinguwo ncobeni uyoofwa.” (Matalikilo 2:16, 17) Mbwaakali ngo Mulengi, Jehova Leza wakalaa nguzu zyakubikka zyeelelo zyakulilemeka akupandulula cibotu acibi kuzilenge zyakwe. Mulawo wakwe wakali wamaanu nkaambo Adamu a Eva bakalaangulukide kulya micelo kuzwa kumisamu yoonse imbi mumuunda. Bakali kukonzya kutondezya kulumba kwabo kubulelo bwa Jehova bweelede, ikwiinda mukumvwa milawo yakwe muciindi cakulibikkila zyeelelo zyabo beni zyakulilemeka.
10. (a) Ino Saatani bantu wakabasikila buti kuti abayunge kuza kulubazu lwakwe? (b) Ino Saatani wakamutamikizya nzi Jehova? (c) Ino nywebo mwaayeelela buti makani aaya Saatani ngasoleka kumusoka Leza?
10 Diabolosi wakakanza kutantamuna bantu bakusaanguna kuzwa kuli Leza. Kutegwa aboongelezye kuza kulubazu lwakwe, Saatani wakabeja. Diabolosi kabelesya nzoka, mbuli babaya bantu baambaula kwiinda muzidooli, wakabuzya Eva wakati: “Sa ncobeni Leza wakaamba kuti, Tamweelede kulya misamu yoonse yamumuunda?” Eva naakaamba mulawo wa Leza, Saatani wakati: “Tamukonzi kufwa pe.” Amane wakatamikizya Jehova kubaa makanze mabi kati: “Nkaambo Leza ulizi kuti mubuzuba obo mbubonya mbomuyooulya, meso aanu ayoojuka, lino muyooba mbuli Leza, muyooziba bubotu abubi mbububede.” (Matalikilo 3:1-5) Munzila eeyi, Diabolosi wakapa muzeezo wakuti Leza wakali kubaimya cintu cimwi cibotu. Akomena masampu aakabejekezegwa Taata wakujulu wakasimpe, siluyando, Jehova!
11. Mbuti ba Adamu a Eva mbubakaba bagwasilizinyina a Saatani?
11 Eva wakuulanga alimwi musamu ooyo, nkujana lino micelo yawo yaindila buya kweebeka. Aboobo Eva wakacela mucelo akuulya. Awalo mulumaakwe wakazoonjila mukubisizya Leza acaali kwiinda mukutamvwa. (Matalikilo 3:6) Nokuba kuti Eva wakacengwa buya, boonse bobile walo alimwi a Adamu bakagwasilizya muzeezo wa Saatani wakulela bantu. Icini cakacitika ncakuti bakaba bagwasilizi bakwe.—Ba-Roma 6:16; 1 Timoteo 2:14.
12. Ninzi cakaletwa akuzanga kwabantu kuli Leza?
12 Ba Adamu a Eva bakaanjila mapenzi aakaletwa amucito wabo. Taakwe nobakaba mbuli Leza pe ikubaa luzibo lulibedelede. Mubusena bwaceeco bakafwa nsoni akuyuba. Jehova wakamupa mulandu Adamu amane wakamupa cisubulo eeci: “Uyoolya insima cakufwa mitukuta mane ukapiluke kunyika, nkaambo mulinjiyo mowakagwisigwa, nkaambo uli bulongo buyo, akooko kubulongo nkoelede kupiluka.” (Matalikilo 3:19) “Mubuzuba obo mbubonya” bazyali besu bakusaanguna nobakalya mucelo kuzwa kumusamu wakuziba cibi acibotu, wakabasinganya Leza eelyo bakafwa kumeso akwe. Mpoona bakatandwa kuzwa mu Paradaiso alimwi bakatalika kufwa.
ZIBI A LUFWU MBUZYAKAMWAISIGWA
13. Mbuti cibi mbucakamwaisigwa mubantu boonse?
13 Saatani ubaanga wakazwidilila mumuzeezo wakwe wakukombwa abantu. Pele taakwe naakali kukonzya kubabamba basikumukomba kabapona pe. Ciindi nguzu zyacibi nozyakatalika kubeleka mubanabubili bakusaanguna, teebakali kucikonzya kuzyala bana balondokede. Mbuli mabala aasimbidwe abbwe, cibi cakasimbwa muluzyalo lwabantu aaba bakusaanguna. Aboobo bakali kukonzya buyo kuzyala bana batalondokede. Mbokunga bana babo boonse bakazyalwa ba Adamu a Eva kababiside kale, bana bakasiilwa zibi alufwu.—Intembauzyo 51:5; Ba-Roma 5:12.
14. (a) Nguni ngotunga twabakozyanisya aabo bakazya kuti tabakwe zibi? (b) Mbuti bana Israyeli mbubakazibisigwa busizibi bwabo?
14 Nokuba boobo, sunu banji tabayeeyi kuti mbaasizibi. Mumasena amwi anyika, imuzeezo wakuzyalwa acibi tuuzizilwe. Pesi eeco tacili cisinizyo cakuti taakwe cibi. Mulombe uulaa tombe kubusyu ulakonzya kulyaamba kusalala, alimwi ndiza inga ulazumina buyo amana kulanga mucimboni-mboni. Bana Israyeli bansiku bakali mbuli mulombe oyu ciindi nobakatambula Mulawo wa Leza kwiinda mumusinsimi Wakwe Musa. Imulawo wakacisalazya kutondezya kuti cibi cakaliwo. “Nikwatali Mulao, nindataakuzi zibi,” mbwapandulula mwaapostolo Paulo. (Ba-Roma 7:7-12) Mbuli mulombe uulanga mucimboni-mboni, ikwiinda mukubelesya Mulawo kulilanga, bana Israyeli bakali kukonzya kubona kuti mbantu basofweede kumeso aa Jehova.
15. Ninzi ciyubululwa nitulanga mucimboni-mboni ca Jwi lya Leza?
15 Kwiinda mukulanga mucimboni-mboni ca Jwi lya Leza alimwi akulanga zyeelelo zyalyo, tulakonzya kubona kuti tatulondokede pe. (Jakobo 1:23-25) Mucikozyanyo, amuyeeye Jesu Kristo ncaakaambila basiciiya bakwe amakani aluyando kuli Leza akubeenzinyina, mbuli mbokulembedwe ku Matayo 22:37-40. Kanji-kanji bantu balayiinzya mbaakani mutwaambo ootu! Banji mane tacikwe ambocibapenzya kumanjezeezya abo batatondezya luyando kuli Leza akubeenzinyina.—Luka 10:29-37.
AMUBUCENJELELE BUCENJEZU BWA SAATANI!
16. Ninzi ncotunga twacita kuti tutajatikizigwi abucenjezu bwa Saatani alimwi nkaambo nzi eeci ncecili cintu ciyumu?
16 Saatani ulayandaula nzila zyakutupa kuti tucite cibi acaali. (1 Johane 3:8) Sena kuli nzila imwi yakuleya kujatikizigwa amuzeezo wakwe? Ee nkwiili, pesi iyanda kuti swebo tukalwane kampenda nkotujisi kakubisya acaali. Eeci tacili cintu cuuba-uba nkaambo aaka kampenda nkotuzyedwe ankako kalaa nguzu kapati. (Ba-Efeso 2:3) Paulo wakayandika kuti alwane canguzu. Nkaambo nzi? Nkaambo cibi cakakkede mulinguwe. Kuti aswebo katuyanda kuzuminwa a Leza, tweelede kukalwana canguzu aaka kampenda ikali mulindiswe.—Baloma 7:14-24, Ci; 2 Ba-Korinto 5:10.
17. Ninzi cipa kuti nkondo njotulwana kampenda nkotujisi kabusizibi yiindile kuyuma?
17 Mbokunga lyoonse Saatani ulasoleka kujana ciindi cibotu cakuti atoongelezye kutyola milawo ya Leza, nkondo yesu njotulwana cibi tiili ngubauba pe. (1 Petro 5:8) Ikutondezya mbwaakalibilikide akaambo ka Banakristonyina, Paulo wakati: “Pele ndiliyoowede kuti mbuli nzoka mbuyakacenga Eva mubucenjezu bwayo, anywebo inga myoyo yanu ileenwa akuleka kulipa kuli Kilisito amoyo oonse.” (2 Bakolinti 11:3, Ci) Saatani ubelesya bucenjezu mbubwena biyo asunu. Ulasola kutusyanga muzeezo wakudooneka bubotu bwa Jehova alimwi ambocigwasya kumvwa milawo ya Leza. Diabolosi ulasola kutulya coolwe akaambo kakampenda kakubisya nkotwakasiilwa akutupa kuti tutole nzila yakuliyanda, yabuhaacivwule mwangu, yalusulo, alimwi ayakusalulula.
18. Mbuti Saatani mbwabelesya nyika kusumpula cibi?
18 Cimwi cazibelesyo Diabolosi ncabelesya alindinswe ninyika, yalo iili munguzu zyakwe. (1 Joni 5:19, Ci) Kuti twabula kucenjela, bantu bamunyika eeyi iituzingulukide basilweeno alimwi batasyomeki balakonzya kutusinikizya kutola nzila iikazyanya azyeelelo zya Leza zyakulilemeka. (1 Petro 4:3-5) Banji tabaibikkili maanu milawo ya Leza alimwi balakutabulula ookuya kudokola-dokola kwamanjezeezya aabo kusikila mane limwi taacifwi bunyeele pe. (Baloma 2:14, 15, Ci; 1 Timoteo 4:1, 2) Limwi bamwi mane basika nkobatola nzila zyalo manjezeezya abo naatalondokede nzyaatakali kubazumizya musule.—Ba-Roma 1:24-32; Ba-Efeso 4:17-19.
19. Nkaambo nzi ncokutazulili ikwalo kupona buumi busalala?
19 Ikupona buumi busalala nkuzwidilila loko munyika eeyi. Pele kutegwa tumukkomanisye Mulengi wesu, zilainda aawa iziyandika. Tuleelede katulaa lusyomo muli Leza akulimvwa kuti kuli mukuli ngwatupede kuyumuna. (Hebrayo 11:6) “Lino oyo uuzi kucita kabotu, nekubaboobo taciti, wabisya,” mbwaakalemba siciiya Jakobo. (Jakobo 4:17) Ee, ikutamubikkila maanu Leza amilawo yakwe acaali akwalo nkubisya.
20. Mbuti Saatani mbwanga wasola kumukasya kucita ciluzi, pesi ninzi cinga camugwasya kukasya kuyungwa ooku?
20 Saatani ulalangilwa kumugubinganya nomusola-sola kujana luzibo lwa Leza kwiinda mukwiiya kwenu kwa Bbaibbele. Tusyoma kuti tamukazumizyi mapenzi aali boobu kuti amukasye kucita ciluzi. (Johane 16:2) Nokuba kuti beendelezi banji bakabikka lusyomo muli Jesu ciindi naakali mumulimo wakwe, teebakamuzumina nkaambo bakali kuyoowa kutantamukwa abuleya. (Johane 12:42, 43) Saatani ulasola calunya kukonga kufwumbwa muntu uuyandaula luzibo lwa Leza. Nokuba boobo, nywebo mweelede kuyeeya lyoonse akulumba zintu zibotu Jehova zyacitide. Ndiza limwi inga mwakonzya kugwasya basikukazya kubaa ciimo cakulumba abalo.
21. Mbuti mbotunga twaizunda nyika alimwi akampenda nkotujisi kabusizibi?
21 Kufwumbwa kuti katutalondokede, tunoobisya. (1 Johane 1:8) Nokuba boobo, tulagwasigwa mukulwana nkondo eeyi. Ee, cilakonzeka kuti inga twazunda munkondo yesu njotulwana amubi, Saatani Diabolosi. (Ba-Roma 5:21) Kumamanino aamulimo wakwe waanyika, Jesu wakakulwaizya basikumutobela kabelesya majwi aaya: “Munyika mulaba amapenzi, pele amulimbe myoyo, ndakiizunda nyika.” (Johane 16:33) Nokuba kubantu batalondokede, cilakonzeka kuzunda nyika mulugwasyo lwa Leza. Saatani takwe nguzu kulibaabo bamukazya alimwi ‘balibombya kuli-Leza.’ (Jakobo 4:7; 1 Johane 5:18) Mbuli mbotuyoobona, Leza ulipede nzila yakuzwa mubuzike kucibi akulufwu.
AMULISUNKE LUZIBO LWENU
Ino Saatani Diabolosi nguni?
Nkaambo nzi bantu ncobacembaalila akufwa?
Cibi ninzi?
Ino Saatani ubayunga buti bantu kuti kababisizya Leza acaali?
[Mibuzyo yaciiyo]
[Cifwanikiso icili apeeji 54]
