Nkukomba Kwabani Leza Nkwatambula?
Cibalo 5
Nkukomba Kwabani Leza Nkwatambula?
1. Ninzi mukaintu umwi mu Samariya ncaakali kuyanda kuziba kujatikizya kukomba?
SENA mwalina buzuba mwalibuzya kuti, ‘Nkukomba kwabani Leza nkwatambula?’ Mukaintu umwi ulakonzya wakuuyeeya mubuzyo uli boobu ciindi naakaambaula a Jesu Kristo munsi a mulundu wa Gerizimu mu Samariya. Ikutondezya kwaandaana akati kabukombi bwaba Samariya abwabama Juda, wakati: “Bamatateesu bali kukomba mudundu eli, eno nywebo muamba kuti ku-Jerusalemu nkobeelede bantu kuyookombela.” (Johane 4:20) Sena Jesu wakaambila mukaintu ooyo mu Samariya kuti Leza ulakutambula kukomba koonse? Na wakaamba kuti kuli zintu buya zimwi ziyandika kutegwa Leza abotelwe?
2. Mukwiingula mukaintu mu Samariya, ncinzi Jesu ncaakaamba?
2 Kwiingula kwa Jesu kugambya kwakali kwakuti: “Ciindi cileza kuti nomuba mudundu eli, nokuba ku-Jerusalemu, enko nkomuyookombela Taata.” (Johane 4:21) Ba Samariya kwaciindi cilamfwu bakali kumuyoowa Jehova akukomba baleza bambi ku mulundu wa Gerizimu. (2 Bami 17:33) Lino Jesu Kristo wakaamba kuti tabuli busena oobo naa bwaku Jerusalemu ibwakali kuzooba cintu cipati mukukomba kwakasimpe.
AMUKOMBE MUMUUYA AMUBWINI
3. (a) Nkaambo nzi ba Samariya ncobatakamuzi ncobeni Leza? (b) Ino mbuti bama Juda basyomeka abambi mbubakali kunga balamuziba Leza?
3 Jesu wakaya ambele akwaambila mukaintu mu Samariya ategwa: “Mulakomba ncomutezi, swebo tulakomba eco ncotuzi, nkaambo lufutuko luzwa kuba-Juda.” (Johane 4:22) Ba Samariya bakalaa mizeezo yabukombi yakubeja alimwi bakali kuzumina buyo mabbuku aa Bbaibbele osanwe mataanzi kuti ngaazwa kuli Leza—alimwi naaba ngayo ccita mukulembulula kwabo beni kwiitwa kuti Pentateuch yaku Samariya. Aboobo teebakamuzi ncobeni Leza. Pesi balo bama Juda bakali pedwe luzibo lwamu Magwalo. (Baloma 3:1, 2, Ci) Aaya Magwalo akapa zintu ziyandika mukuziba Leza kuli bama Juda basyomeka abambi bakalisungwide kuswiilila.
4. Mbuli bwakaamba Jesu, nkaambo nzi bama Juda aba Samariya boonse ncobakali kuyandika kucita kutegwa kukomba kwabo kutambulike kuli Leza?
4 Kujanika kuti mbuli mbwaakatondezya Jesu, boonse bobile bama Juda aba Samariya bakali kweelede kubambulula nzila zyabo zyakukomba kutegwa bamubotele Leza. Wakati: “Ciindi cilasika, kwalo casika kale, aawo aabo bakomba cakasimpe bayoomukomba Taata mumuuya amubwini. Mbambabaabo Taata mbayanda, kuti kabamukomba. Leza Muuya, aboobo aabo bamukomba baleelede kumukomba mumuuya amubwini.” (Joni 4:23, 24, Ci) Tweelede kumukomba Leza “mumuuya,” katukulwaizigwa amyoyo iizwide lusyomo aluyando. Cilakonzeka kumukomba Leza “mubwini” kwiinda mukwiiya Jwi lyakwe, Ibbaibbele, akumukomba mukasimpe kakwe kayubunwidwe. Sena mulayandisya kucicita eeci?
5. (a) Ino “kukomba” caamba nzi? (b) Ninzi ncotweelede kucita naa tuyanda kuti Leza akutambule kukomba kwesu?
5 Jesu wakasimpya kwaamba kuti Leza uyanda kukomba kwa kasimpe. Eeci citondezya kuti kuli nzila zyakukomba izitatambuliki kuli Jehova. Kukomba Leza caamba kumulemeka kapati cakuyoowa mubulemu akumumanina milimo yakwe. Kuti mwayanda kulemeka muleli singuzu, mulalangilwa kuti inga mwayandisya kumubelekela akucita zimubotela. Mmasimpe swebo tuyanda kumubotela Leza. Ikwiinda kwaamba buyo kuti, ‘Cikombelo cangu ncecindeelede,’ tweelede kuba masimpe kuti kukomba kwesu kulasika azintu nzyayanda Leza.
UUCITA KUYANDA KWA TAATA
6, 7. Nkaambo nzi Jesu ncatabatambuli bamwi aabo balitaminina kuba basiciiya bakwe?
6 Atubale Mateyo 7:21-23 tubone naa inga twazubula kaambo kamwi kapati katondezya naa kukomba koonse kulatambulika kuli Leza. Jesu wakati: “Boonse bandaambila kuti, Mwami, mwami, teensi mbabo bayoonjila mu-Bwami bwakujulu, ngooyo uucita luyando lwa-Taata uuli kujulu. Kubuzuba obo banjibanji bayoondaambila kuti, Mwami, mwami, sa teetwakasinsima kuzina lyako? Alimwi, sa teensi kuzina lyako nkutwakatanda badaimona [zilenge zibi zyamuuya]? Sa teensi kuzina lyako nkutwakacita milimo mipati minji? Lino nzoobaambila kuti, Nsimuzi pe, amuzwe kulindime inywe nubamucita zibi.”
7 Ikuzumina Jesu Kristo kuti mMwami ncintu citacaali mukukomba kwakasimpe. Pele kwakali cinoobulide mukukomba kwabanji aabo balitaminina kuba basiciiya ba Jesu. Wakati bamwi bakali kuzoocita “milimo mipati,” mbuli njobeezeezya kuti nkuponya kwamaleele. Pele bakali kuzookakilwa kucita ceeco Jesu ncaakati ncintu ceelede kapati. Teebakali ‘[kuzoo]cita luyando lwa-Wisi.’ Kuti katuyanda kubotela Leza, tweelede kwiiya ncayanda Taata akucicita.
LUZIBO LWINI-LWINI—NCIKWABILILO
8. Nituyanda kucita kuyanda kwa Leza, ninzi ciyandika, alimwi nciimo nzi cilubide ncotweelede kutantamuka?
8 Kucita kuyanda kwa Leza kuyandika luzibo lwini-lwini lwa Jehova Leza a Jesu Kristo. Luzibo luli boobu lutola kubuumi butamani. Mbokuli boobo toonse tuyooyanda kuba bantu basinizizye kumakani aakujana luzibo lwini-lwini kuzwa ku Jwi lya Leza, Ibbaibbele. Bamwi inga baamba kuti kwiina makani kufwumbwa kuti katusinizizye alimwi katuli basungu mukukomba kwesu. Ibambi balataminina ategwa, ‘Kuti kotazi zinji, toyandiki kucita zinji.’ Kakuli lyalo Bbaibbele lilatukulwaizya kuvwuzya luzibo lwesu lwa Leza amakanze aakwe.—Ba-Efeso 4:13; Ba-Filipi 1:9; Ba-Kolose 1:9.
9. Ino mbuti luzibo lwini-lwini mbolutukwabilila, alimwi nkaambo nzi ncotuyanda kukwabililwa boobu?
9 Luzibo luli boobu lulakukwabilila kukomba kwesu kubusofwaazi. Mwaapostolo Paulo wakaamba zyacilenge cimwi camuuya icilicengeezya kuba “angelo wamumuni.” (2 Ba-Korinto 11:14) Kacilicengeezya boobu, eeci cilenge camuuya—citegwa Saatani—cilasola kutucenga kutegwa katucita zintu zyaandeene anzyayanda Leza. Azimbi zilenge zyamuuya izili antoomwe a Saatani zyaalikusofwaazya kukomba kwabantu, Paulo ncaakati: “Zintu ezyo nzibapaizya bahedeni, nkubadaimona nkubazipaizizya, takweensi kuli-Leza pe.” (1 Ba-Korinto 10:20) Kulalangilwa kuti banji bakali kuyeeya kuti bakomba munzila iiluzi, nokuba kuti teebakali kucita ncayanda Leza. Bakali kucengwa kutegwa kabanjila mukukomba kusofweede kwakubeja. Tuyooiya akale zimbi kujatikizya Saatani abadaimona, pele aaba basinkondonyina Leza bakusofwaazya ncobeni kukomba kwabantu.
10. Ninzi ncomunga mwacita kuti muntu wabikka musamu uujaya acaali mumaanzi ngomuteka, alimwi ninzi luzibo lwini-lwini lwa Jwi lya Leza ncolutugwasya kucita?
10 Kuti mwaziba kuti kuli wabikka musamu uujaya acaali mumaanzi ngomuteka, sena inga mwazumanana kwaanywa? Ede inga mpoona-mpoona mulabweza ntaamu kujana kumbi kwakuteka maanzi mabotu, aatasofweede. Iluzibo lwa Jwi lya Leza ilwini-lwini lulatugwasya kuziba bukombi bwini-bwini akukaka busofwaazi oobo bupa kuti kukomba kutatambuliki kuli Leza.
BALAIISYA NJIISYO ZYABANTU
11. Nkulubila nzi kwakukomba ikwakaliko kuba Juda banji?
11 Ciindi Jesu naakali anyika, bama Juda banji teebakali kutobela luzibo lwa Leza lwini-lwini. Aboobo bakasowa coolwe cabo cakubaa ciimo cibotu kuli Jehova. Paulo wakalemba boobu kujatikizya mbabo: “Ndazumina kuti bali abusungu kumakani aa-Leza, pele busungu mbubajisi teensi bwaluzibo.” (Ba-Roma 10:2) Bakalisalila beni nzila yakumukomba Leza muciindi cakuswiilila ncaamba walo.
12. Ninzi cakasofwaazya bukombi bwa Israyeli, alimwi ninzi cakaletwa akusofwaala ooko?
12 Bana Israyeli kusaanguna bakali kucita bukombi busalala bupedwe a Leza, pele bwakasofwaala aziyiisyo zyabantu abusongo. (Jeremiya 8:8, 9; Malaki 2:8, 9; Luka 11:52, Ci) Nokuba kuti basololi babukombi bwaci Juda ibaitwa kuti ba Farisi bakali kuyeeya kuti kukomba kwabo kwakali kutambulika kuli Leza, Jesu wakabaambila ategwa: “Anu Izaya wakaliluzi naakasinsima akaambo kanu! Nkaambo muli basikuupaupa ameso buyo, mbubonya mbokulembedwe kuti, ‘Aaba bantu balandilemeka amilomo yabo, pele myoyo yabo ili kule andime. Kundikomba kwabo nkwabuyo, nkaambo balaiisya njiisyo zyabantu buyo mbuli kuti nzizya Leza.’”—Maako 7:6, 7, Ci.
13. Mbuti mbotunga twacita bwakacita ba Falisi?
13 Sena cilakonzeka akulindiswe kucita mbubakacita ba Farisi? Eeco cilakonzya kucitika kuti twaide kuccilila zilengwa nzyotusiilwa izyakukomba muciindi cakulangisisya ncaamba Leza kumakani aakukomba. Kacenjezya bantu apenzi eeli liliko ncobeni, Paulo wakalemba kuti: “Eno Muuya waamba ncobeni kuti kuciindi ciciza bamwi bayookuzwa kulusyomo, bakagame kumvwa myuuya yakweena amafundisyo aabadaimona.” (1 Timoteo 4:1) Aboobo ikubaa lusyomo buyo lwakuti kukomba kwesu kulamubotela Leza takuzulili pe. Ndiza twakakukona buya kukomba kwesu kuzwa kubazyali mbuli mukaintu uulya mu Samariya. Pesi tweelede kuba masimpe kuti nzyotucita zilatambulika kuli Leza.
MUZITANTAMUKE ZIMUNYEMYA LEZA
14, 15. Nokuba kuti tulaa luzibo lwakuyanda kwa Leza, nkaambo nzi ncotweelede kucenjela?
14 Ccita kuti twacenjela, inga twacita cintu cimwi citatambuliki kuli Leza. Mucikozyanyo, mwaapostolo Johane wakawida kumaulu aamungelo kuti “[a]mukombe.” Pesi mungelo wakamucenjezya wati: “Leka, utaciti obo, nkaambo ndi muzikenyoko buyo, ndi umwi wabanabakwanu ibajisi bumboni bwa-Jesu. Komba Leza.” (Ciyubunuzyo 19:10) Tee mwabona ncomweelede kuba masimpe kuti kukomba kwenu kwatasofwaala mukukomba mituni yamisyobo iili yoonse?—1 Ba-Korinto 10:14.
15 Ciindi Banakristo bamwi nobakatalika kucita ziyanza zimwi zyabukombi zyatakali kumubotela Leza, Paulo wakabuzya: “Mupilukilanzi kuzilenge ezyo nzizyonya zitajisi inguzu zyakugwasya? Muyandilanzi kuboola alimwi mubuzike bwakulinzizyo. Mulalikatazizya makani aamazuba amyeezi amapobwe amyaaka. Ndayoowa kuti ambweni milimo yangu njindakamubelekela yaba yabuyo.” (Ba-Galatiya 4:8-11) Aabo bantu bakalijene luzibo lwa Leza, pele mukuya mazuba bakalubizya kwiinda mukucita ziyanza zyabukombi akulemeka mazuba aakulyookezya, izintu zyatakali kutambulika kuli Jehova. Tweelede kucita mbuli mbwaakaamba Paulo naakati, “amusunkulule, kuti muzibisye zintu zibotezya Mwami.”—Ba-Efeso 5:10.
16. Ino mbuti zibalo zya Johane 17:16 a 1 Petro 4:3 mbozitugwasya kuziba naa mazuba aakulyookezya aziyanza zilamubotela Leza, naa pe?
16 Tuleelede kubona kuti twatantamuka mazuba aakulyookezya aziyanza zimbi zyabukombi eezyo zinyansya njiisyo zya Leza. (1 Ba-Tesalonika 5:21) Mucikozyanyo, Jesu wakaamba boobu kujatikizya basikumutobela: “Tabali banyika mbuli mbwentali wenyika amebo.” (Johane 17:16) Sena cikombelo cenu cilaa lubazu mumapobwe amumazubaa kulyookezya aayo aanyansya njiisyo yakutabaa lubazu mutwaambo twanyika eeyi? Naa kuli basicikombelonyoko ibatola lubazu muziyanza amapobwe aalaa micito yeelene ayeeyo mwaapostolo Petro njaakali kupandulula? Wakalemba ategwa: “Cakomena ciindi ncimwakasowa kale kukucita mbuli mbubacita bamasi. Mwakali kweenda mubumpuwe amuzisusi zibi, mukukolwa amunjalalando, mukusenga bukoko amukukomba mizimo iitondwa.”—1 Petro 4:3.
17. Nkaambo nzi ncotweelede kutantamuka kufwumbwa cintu citondezya muuya wanyika?
17 Mwaapostolo Johane wakasimpya kwaamba mbuli mbokuyandika kutantamuka micito eeyo yalo iitondezya muuya wanyika iituzingulukide iitali yabuna Leza. Johane wakalemba ategwa: “Mutayandi nyika, neziba zintu zyamunyika. Kuti muntu wayanda nyika, luyando lwa-Taata taluli mulinguwe. Nkaambo zintu zyoonse zili munyika, niziba zisusi zyanyama niziba zisusi zyameso nikuba kulisumpula kwabuumi, tazili zya-Taata, pe, nzyenyika. Alimwi nyika ilamana, azisusi zyayo, pele oyo uucita makanze aa-Taata ulakalilila kukabe kutamani.” (1 Johane 2:15-17) Sena mwabona kuti aabo ‘bacita makanze aa Leza’ bayookalilila kukabe kutamani? Ee, kuti katucita kuyanda kwa Leza akutantamuka micito iitondezya muuya wanyika eeyi, inga twalangila buumi butamani!
MUTOBELE ZYEELELO ZYA LEZA ZISUMPUKIDE
18. Mbuti bamwi bana Korinto mbubakalubila kumakani aakulilemeka, alimwi ninzi ncotweelede kwiiya kuzwa muliceeci?
18 Leza mbayanda kuti kabamukomba mbabaabo basika azyeelelo zyakwe zisumpukide izyakulilemeka. Bamwi mu Korinto yansiku mukulubila bakali kuyeeya kuti Leza inga walekelela kutalilemeka. Tulakonzya kubona mbubakalubila kwiinda mukubala 1 Ba-Korinto 6:9, 10. Kutegwa Leza tumukombe munzila iitambulika, tweelede kumukkomanisya mumajwi amumicito. Sena bukombi bwenu bulamupa kuti mukonzye kucita boobu?—Matayo 15:8; 23:1-3.
19. Mbuti kukomba kwakasimpe mbokujatikizya mbotucitila bambi?
19 Kuyanzana kwesu abantu bamwi kuleelede kutondezya zyeelelo zya Leza. Jesu Kristo wakatukulwaizya kuti tucitile bantu bambi mbuli mbotunga twayanda kuti batucitile andiswe, nkaambo eeci ncibeela cakukomba kwamasimpe. (Matayo 7:12) Amubone aceeci ncaakaamba kujatikizya luyando lwabunyina: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Johane 13:35) Basiciiya ba Jesu beelede kuyandana akucita zintu zibotu kubakombinyina akubantu bambi.—Ba-Galatiya 6:10.
KUKOMBA AMOYO WOONSE
20, 21. (a) Nkukomba kwamusyobo nzi Leza nkwayanda? (b) Nkaambo nzi Jehova ncaakakaka bukombi bwa Israyeli mumazubaa Malaki?
20 Mumoyo wenu, mulakonzya kamuyanda kubelekela Leza munzila iitambulika. Kuti kakuli boobu, mweelede kubweza ciimo ca Jehova ikulanga makani aakukomba. Siciiya Jakobo wakasimpya kwaamba kuti nciimo ca Leza icipati, kutali cesu pe. Jakobo wakati: “Busyomi busalala butakwe kampenda mumeso aa-Leza Taateesu mbombubo obu, bwakuti muntu aswaye bamusyaala abamukabafu mumapenzi aabo, akuliyobola cakutaba akabala nikaba komwe kaansi.” (Jakobo 1:27) Kayandisisya kukkomanisya Leza, umwi aumwi wesu weelede kulangisisya bukombi bwakwe kubona masimpe kuti tabusofweede amicito iitali yabuna Leza antela kuti kwiina cintu ncotutaciti walo ncabona kuti cileelede.—Jakobo 1:26.
21 Kumukomba kusalala amoyo woonse Jehova kolikke nkokumukkomanisya. (Matayo 22:37; Ba-Kolose 3:23) Ciindi bana Israyeli nobakalezya aawa, Leza wakati: “Mwana ulalemeka wisi, amuzike ulalemeka mwami wakwe. Lino na ndime uso, kulemekwa kwangu kuli kuli? Na ndime mwami wanu, kuyoowegwa kwangu kuli kuli?” Bakali kunyemya Leza kwiinda mukutuula zipaizyo zyoofwu, zilema, azicisidwe kulinguwe, elyo wakakukaka kukomba kuli boobu. (Malaki 1:6-8) Ikukomba kusalala kolikke nkokumweelede Jehova, ikutalezya aawo pe, alimwi tatambuli kufwumbwa cilezya kusika akulyaaba kulinguwe alikke.—Kulonga 20:5; Tusimpi 3:9; Ciyubunuzyo 4:11.
22. Naa tuyanda kuti Leza akutambule kukomba kwesu, ninzi ncotuyootantamuka, alimwi ninzi ncotuyoocita?
22 Mukaintu mu Samariya ooyo wakaambaula a Jesu wakali kubaanga ulayanda kukomba munzila iitambulika kuli Leza. Naa nkokulombozya kwesu ooko, tuyootantamuka ziyiisyo amicito izisofwaazya. (2 Ba-Korinto 6:14-18) Mubusena bwaceeco, tuyoobeleka canguzu kuti tukajane luzibo lwa Leza lwini-lwini akucita kuyanda kwakwe. Tuyootobela kabotu-kabotu malailile aakwe kutegwa kukomba kukatambulike. (1 Timoteo 2:3, 4) Bakamboni ba Jehova balasoleka kucita ncicona eeco, alimwi muluyando balamukulwaizya nywebo kuti mube alubazu mukukomba Leza “mumuuya amubwini.” (Johane 4:24) Jesu wakati: “Mbambabaabo Taata mbayanda, kuti kabamukomba.” (Joni 4:23, Ci) Tulombozya kuti mube bantu bali boobu. Tatudooneki kuti mbuli mukaintu uulya mu Samariya mulayanda kubaa buumi butamani. (Johane 4:13-15) Pele bantu mulababona kabacembaala akufwa. Cibalo citobela cilapandulula.
AMULISUNKE LUZIBO LWENU
Mbuli butondezedwe ali Joni 4:23, 24, Ci, nkukomba nzi Leza nkwatambula?
Mbuti mbotunga twabona naa Leza ulabotelwa aziyanza zimwi amapobwe?
Nzintu nzi zimwi ziyandika mukukomba kutambulika?
[Mibuzyo yaciiyo]
[Cifwanikiso icili apeeji 44]
