Ciiyo 8

Bukkale Bwamumukwasyi Ibukkomanisya Leza

Ino mulumi ulaa ciimo nzi mumukwasyi? (1)

Mbuti mulumi mbweelede kweendelezya mukaintu wakwe? (2)

Ino wisi ulaa mikuli nzi? (3)

Ino mukaintu ulaa lubazu nzi mumukwasyi? (4)

Ino Leza uyanda nzi kubazyali akubana? (5)

Ino Bbaibbele likwaamba buti kwaandaana akulekana? (6, 7)

1. Ibbaibbele lyaamba kuti mulumi ngomutwe wamukwasyi. (1 Ba-Korinto 11:3) Mulumi weelede kuba amukaintu omwe buyo. Beelede kukwatana bweelede, ikutobela mulawo.—1 Timoteo 3:2; Tito 3:1.

2. Mulumi weelede kumuyanda mukaintu mbuli mbwaliyanda mwini. Weelede kumweendelezya munzila Jesu njaakeendelezya basikumutobela. (Ba-Efeso 5:25, 28, 29) Teelede kumuuma mukaintu wakwe naa kumupenzya munzila iili yoonse. Weelede kumulemeka.—Ba-Kolose 3:19; 1 Petro 3:7.

3. Wisi weelede kubeleka canguzu kubamba mukwasyi wakwe. Bakaintu bakwe abana weelede kubajanina zyakulya, zyakusama, alimwi aŋanda. Alimwi wisi weelede kubajanina nzyobayandika ibamukwasyi wakwe munzila yakumuuya. (1 Timoteo 5:8) Ulasololela mukugwasya bamukwasyi wakwe kwiiya zya Leza alimwi amakanze Aakwe.—Deuteronomo 6:4-9; Ba-Efeso 6:4.

4. Mukaintu weelede kuba sikugwasya mubotu kumulumi wakwe. (Matalikilo 2:18) Uleelede kugwasya mulumi mukuyiisya akufwundisya bana babo. (Tusimpi 1:8) Jehova uyanda kuti mukaintu kabamba mukwasyi wakwe caluyando. (Tusimpi 31:10, 15, 26, 27; Tito 2:4, 5) Weelede kubaa bulemu kapati kumulumi.—Ba-Efeso 5:22, 23, 33.

5. Leza uyanda kuti bana kababamvwa bazyali babo. (Ba-Efeso 6:1-3) Uyanda kuti  bazyali kababayiisya akubalaya bana babo. Bazyali beelede kujana ciindi cakubaa bana babo akwiiya Bbaibbele ambabo, kubaabila nzyobayandika munzila yakumuuya alimwi ayakumoyo. (Deuteronomo 11:18, 19; Tusimpi 22:6, 15) Bazyali tabeelede kululamika bana babo munzila yabukali naa yalunya.—Ba-Kolose 3:21.

6. Ciindi banabukwetene nobajana buyumuyumu kweendelana, beelede kusoleka kutobela kulaya kwa Bbaibbele. Ibbaibbele lilatukulwaizya kutondezya luyando akulekelelana. (Ba-Kolose 3:12-14) Ijwi lya Leza talikulwaizi kuti kwaandaana ninzila yakumana mapenzi masyoonto pe. Pesi mukaintu ulakonzya kusala kumusiya mulumaakwe kuti (1) wayumya moyo kukaka kugwasilizya mukwasyi, (2) kali ulamuuma cakuti takonzi kupona kabotu alimwi buumi bwakwe bwalangilwa ntenda, naa (3) kukazya kwakwe kwiindilide kwapa kuti citakonzeki kukomba Jehova.—1 Ba-Korinto 7:12, 13.

7. Banabukwetene beelede kusyomeka kuli umwi aumwi. Bumambi ncibi kuli Leza alimwi akumukaakwe muntu. (Ba-Hebrayo 13:4) Koonana amuntu uutali mulukwatano olo nkakaambo kalikke kazumizigwa mu Magwalo kuti Munakristo akonzye kuleka mukaakwe akwaanguluka kukwata naa kukwatwa kumbi. (Matayo 19:6-9; Ba-Roma 7:2, 3) Jehova ulakusulaika kulekana kwabantu batakwe akaambo kamu Magwalo ikabazumizya akukwatana abambi.—Malaki 2:14-16.

[Zifwanikiso izili apeeji 16, 17]

Leza uyanda kuti bazyali kabayiisya bana babo akubalaya

[Cifwanikiso icili apeeji 17]

Wisi siluyando ulabasanina bamukwasyi wakwe munzila yakumubili ayakumuuya