Ciiyo 6

Ino Bwami bwa Leza Ninzi?

Ino Bwami bwa Leza bujanika kuli? (1) Nguni Mwami wambubo? (2)

Sena kuli bambi ibalaa lubazu mukulela a Mwami oyo? Kuti kabaliko ino mbangaye? (3)

Ncinzi citondezya kuti tukkede mumazubaa mamanino? (4)

Ncinzi Bwami bwa Leza ncobuyoocitila bantu kumbele? (5-7)

1. Iciindi naakali anyika, Jesu wakayiisya basikumutobela kuti kabakombela Bwami bwa Leza. Bwami nimfwulumende iisololelwa a mwami. Ibwami bwa Leza nimfwulumende iilibedelede. Ilibambidwe kujulu alimwi iyoolela nyika eyi. Iyoosalazya zina lya Leza, naa kulisetekanya. Iyoopa kuti kuyanda kwa Leza kucitwe ansi mbweena mbuli mbokucitwa kujulu.—Matayo 6:9, 10.

2. Leza wakasyomezya kuti Jesu uyooba Mwami mu Bwami Bwakwe. (Luka 1:30-33) Ciindi Jesu naakali anyika, wakasinizya kuti unooli Muleli siluse, mululami, alimwi uulondokede. Ciindi naakapiluka kujulu, taakaindililaa kupegwa Bwami mu Bwami bwa Leza pe. (Ba-Hebrayo 10:12, 13) Mu 1914, Jehova wakapa Jesu bweendelezi oobo Mbwaakasyomezezye. Kuzwa ciindi eco, Jesu wali kulela kujulu kali Mwami uusalidwe aa Jehova.—Daniele 7:13, 14.

3. Alimwi Jehova wasala baalumi abamakaintu bamwi kuzwa munyika kuti bakaye kujulu. Bayoolela limwi a Jesu kabali bamami, babetesi, alimwi abapaizi kubantu. (Luka 22:28-30; Ciyubunuzyo 5:9, 10) Jesu wakaita basikulela limwi mu Bwami bwakwe kuti “katanga kaniini.” Mweelwe wabo ngu 144,000.—Luka 12:32; Ciyubunuzyo 14:1-3.

4. Mbwaakabeda buyo Mwami, Jesu wakaatula Saatani alimwi abangelo bakwe babi kuzwa kujulu akubasowela kucilawo canyika. Ncencico eci zintu ncozyabijila boobu ano ansi kuzwa mu 1914. (Ciyubunuzyo 12:9, 12) Inkondo, inzala, malwazi, kuvwula kwamilandu—zyoonse ezi nzibeela zya “citondezyo”  cakuti Jesu ulalela alimwi akuti bweende oobu buli mumazubaa mamanino.—Matayo 24:3, 7, 8, 12; Luka 21:10, 11; 2 Timoteo 3:1-5.

5. Ino-ino Jesu uyoobeteka bantu, kubaandaanya mbuli mweembezi mbwaandaanya mbelele ampongo. “Imbelele” mbabaabo ibanooli basinizya kuti mbalelwa bakwe basyomeka. Bayootambula buumi butamani anyika. “Impongo” mbabaabo ibanooli babukaka Bwami bwa Leza. (Matayo 25:31-34, 46) Ino-ino Jesu uyoonyonyoona boonse bali mbuli mpongo. (2 Ba-Tesalonika 1:6-9) Kuti kamuyanda kubalilwa “[ku]mbelele,” mweelede kuswiilila mulumbe wa Bwami akutobela nzyomwiiya.—Matayo 24:14.

6. Lino nyika ilikosawidwe muzisi zinji. Cimwi acimwi cilaa mfwulumende yancico. Eezi zisi zilifwini kulwana. Pesi Bwami bwa Leza buyoozinjilila abusena zyoonse mfwulumende zyabantu. Buyoolela bukabe nemfwulumende yelikke nyika yoonse mbwiizulwa. (Daniele 2:44) Mpoona takukabi limbi nkondo, milandu, alimwi akulwana. Boonse bantu banookkala antoomwe muluumuno alukamantano.—Mika 4:3, 4.

7. Mu Bulelo bwa Jesu Bwacuulu Camyaka, bantu basyomeka bayoolondoka, alimwi nyika yoonse iyooba paradaiso. Aakusika mamanino aacuulu camyaka, Jesu unooli wazicita zyoonse Leza nzyaakamulailila kucita. Mpoona uyoobupilusya Bwami kuli Wisi. (1 Ba-Korinto 15:24) Ede inga cabota kuti mwabaambila balongwe abayandwa benu nzyobuyoocita Bwami bwa Leza?

[Cifwanikiso icili apeeji 13]

Mubulelo bwa Jesu, takukabi limbi lusulo, akusalana